Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> قصہ چار درویشاں دا >> قصہ چار درویشاں دا: سیر دوجے درویش دی (ستویں لڑی)

قصہ چار درویشاں دا: سیر دوجے درویش دی (ستویں لڑی)

میر امن دہلوی
December 3rd, 2009

مکدی گل پئی میں تے کیہ آں کسے نے وی ایہہ عالم نہ ویکھیا ہووے گا نہ سنیا ہووے گا ایہہ چس مانن لئی اسیں دوویں بیٹھے سی پئی کریال غلیلا لگیا۔ ہن ایس واپری دا ماجرا سن کے اک نہیں چار پردی زاداں نے اسمانوں لتھ کے کجھ ایس معشوقہ دے کن وچ آکھیا۔ سن دیاں ہی اوہدا رنگ اُڈ گیا تے مینوں کہن لگی پئی اوئے پجاری دل تے ایہہ کردا پئی تھوڑا چر تیرے کول بیہہ کے دل پرچاواں تے انج ہی ہمیش آواں یاں تینوں اپنے نال لے جاواں۔ پر ایہہ جہان دوہاں بندیاں نوں اک تھاں آرام تے خوشی نال رہن نہیں دیندا۔ لے جانی رب راکھا۔

ایہہ سن کے میرے حواس جاندے رہے۔ میں کہیا جی فیر کدوں ملنی ہووے گی؟ ایہہ کیہ ظلم دی گل تسیں مینوں دس دتی ہن جے چھیتی آویں گی تے مینوں جیوندا ویکھیں گی نہیں تے پچھتاویں گی یاں اپنی تھاہر تے ناں نشان دس پئی میں ہی ایس پتے تے لبھدیاں لبھدیاں اپنے طور تے تیرے کول اپڑاں۔ ایہہ سن کے کہن لگی رب کرے تیری حیاتی لمی ہووے۔ جے زندگی ہے تے فیر ملنی ہو جاوے گی۔ میں جناں دے بادشاہ دی دھی آں تے کوہ قاف وچ رہنی آں۔ ایہہ کہہ کے تخت چکیا تے جیویں لتھیا سی اُنج ہی اُچا ہون لگا۔

جدوں تیکر ساہمنے سی میریاں تے اوہدیاں اکھاں چار ہو رہیاں سی جدوں نظراں توں اوہلے ہوئے تے حالت ایہہ ہو گئی جیویں پری دا پرچھاواں ہوندا ہے عجیب جہی اداسی دل تے چھا گئی عقل مت جاندی رہی دنیا اکھاں ساہمنے ہنھیر ہو گئی حیران پریشان تے سر وچ مٹی کپڑے پاڑ لینا نہ روٹی ٹک دی سدھ نہ چنگے مندے دی بدھ۔

ایس خرابی دا دائی تے استاد نوں پتہ لگیا۔ ڈردیاں ڈردیاں بادشاہ دے ساہمنے گئے تے میرا حال دسیا۔ خورے آپوں اوہناں تے کیہ کیہ غضب ٹٹیا جیہڑا اوہناں دا کھانا پینا سارا کجھ چھٹیا۔ اودوں بادشاہ ہوریں اپنے سیانے وزیراں مشیراں نوں نال لے کے باغ وچ آئے۔ میرے بے قراری تے ہرکھ ویکھ کے اوہناں دی وی حالت بھیڑی ہو گئی۔

اکھاں وچ ہنجو بھر کے گل نال لا لیا۔ تے ایہدی تدبیر دی خاطر حکم کیتا۔ حکیماں نے دل دی طاقت تے دماغی کمزوری لئی نسخے لکھے تے ملواٹیاں نے تعویز نقش پلاون تے کول رکھن لئی دتے۔ دعاواں پڑھ پڑھ پھوکن لگے تے نجومی آکھن لگے پئی ستاریاں دی گردش دے کارن ایہہ صورت پیش آئی ہے ایہدا صدقہ دیو۔

ہر کوئی اپنے اپنے کم دیاں گلاں کہندا سی۔ جو گزردی سی میرا دل ہی سہندا سی کسے دی کوئی تدبیر میرے کم نہ آئی دن بدن دیوانگی دا زور تے میرا پنڈا لسا ہوندا گیا۔ رات دن پٹ سیاپا ہی رہ گیا تے ایس حالت وچ تن سال لنگھ گئے۔ چوتھے سال اک سوداگر سفر کردا ہویا آیا تے ہر اک ملک دے تحفے انوکھے بادشاہ ہوراں نوں پیش کیتے تے نوکری لئی۔ بادشاہ نے بڑی توجہ کیتی تے پچھیا پئی توں اینے ملک ویکھے کتھے کوئی وڈا حکیم وچ نظر آیا یاں کسے کولوں اوہدے بارے سنیا ہووے؟ اوہنے دسیا پئی قبلہ عالم غلام نے بڑی سیر کیتی پر ہندوستان وچ دریا دے وچ اک پہاڑی ہے اوتھے اک گسائیں جنا دھاری نے بڑا منڈھب مہادو دا تے سنگت تے باغ بڑی بہار دا بنایا ہے۔ اوہدے وچ رہندا ہے تے اوہدا ایہہ دستور ہے پئی برسویں دن شیو رات دے دیہاڑے اپنے استھان چوں نکل کے دریا وچ تردا ہے تے خوشی کردا ہے۔ اشنان توں مگروں جدوں اپنے آسن تے جان لگدا ہے اودوں بمار تے درد مند دیس دیس تے ملک ملک دے جیہڑے دوروں دوروں آؤندے تے بوہے تے اکٹھے ہوندے نیں اوہناں دی بھیڑ لگی ہوندی ہے ۔

اوہ حکیم جنہوں ایس زمانے دا افلاطون کہنا چاہیدا نبض ویکھدا ہویا ہر کسے نوں نسخہ لکھ کے دیندا ہویا ٹر جاندا ہے۔ رب نے انج دا شفا والا ہتھ دتا ہے پئی دوائی پیندیاں ہی اثر ہوندا ہے تے اوہ مرض اُکا جاندا رہندا ہے۔ ایہہ ماجرا میں آپوں اپنیاں اکھاں نال ویکھیا تے رب دی قدرت نوں یاد کیتا پئی ایہو ایہو جہے بندے پیدا کیتے نیں۔ جے حکم ہووے تے شہزادہ عالمیان نوں اوہدے کول لے جائیے اوہنوں اک نظر وکھائیے بڑی آس ہے پئی اہناں نوں چھیتی آرام آجاوے گا۔ تے ظاہر وچ وی ایہہ تدبیر چنگی ہے پئی ہر اک ملک دی ہوا کھان نال طبیعت خوش ہوندی ہے۔

بادشاہ نوں وی اوہدی صلاح پسند آئی تے خوش ہو کے کہیا ٹھیک ہے خورے ایہدا ہتھ راس آوے تے میرے پتر دے دل چوں وحشت جاوے اک امیر معتبر سیانا تے ایس وپاری نوں میرے نال کر کے تے ضروری سامان نال دے دتا۔ نواڑی، بجرے، مور پنکھی پلوار، کھلین ، الاق، پٹیلیاں تے مع سر انجام سوار کر کے ٹوریا۔ منزل منزل ٹردیاں ٹردیاں اُس تھار تے جا اپڑے۔ نویں ہوا تے نواں دانا پانی کھان پین نال کجھ مزاج بدلیا پر چپ اُنج ہی سی تے رون دا سلسلہ وی اوہی۔ ہر پل اُس پری دی یاد دل وچوں نہیں جاندی سی۔ جے کدی بولدا تے بیت پڑھدا۔

نہ جانوں کس پری رو کی نظر ہوئی
ابھی تو تھا بھلا چنگا مرا دل


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels