Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> قصہ چار درویشاں دا >> قصہ چار درویشاں دا: سیر پہلے درویش دی (ستویں لڑی)

قصہ چار درویشاں دا: سیر پہلے درویش دی (ستویں لڑی)

میر امن دہلوی
October 19th, 2009

اخیر گل ایہہ کھلی پئی شہر دے نیڑے اک عالی شان عمارت اوہدے نال باغ، تلا سنے اک نوکر چاکر وک رہی ہے۔ تے ایس باغ دے نال اک لونڈی جیہڑی گائیکی بہت جاندی ہے ایہہ دوہویں وکدے نیں۔ اکلا باغ نہیں، جیویں اوٹھ دے گل وچ بلی۔ جیہڑا کوئی اوہ باغ لوے اوس لونڈی دا مُل وی بھرے تے تماشا ایہہ ہے پئی باغ دا مُل اک لکھ تے ایس لونڈی دا پنج لکھ ہے۔ تے میرے کول ایہہ خریدن لئی پیسے نہیں۔ میں ویکھیا اوہ میرے ساہمنے بیٹھ کے وی اوس باغ لئی اینا پریشان سی۔ میں تے ہر پل اوہدے لئی حاضر سی اوسے ویلے خسرے نوں حکم دتا پئی کل سویرے شاہی خزانے توں پیسہ لے کے اوہ باغ تے لونڈی دوویں خرید کے ایس بندے دے ناں کروا دے۔ ایہہ حکم سن دیاں ہی بڑا خوش ہویا تے مونہہ تے رو آئی۔ ساری رات جیویں ہمیش خوشی خوشی لنگھدی سی لنگھی۔ فجر ہوندیاں ہی اوہ ٹر گیا۔ خسرے دے کہن موجب اوہ باغ تے لونڈی خرید دتی۔ فیر اوہ جوان رات نوں ہمیش وانگوں آؤندا جاندا۔

اک دیہاڑے بہار دے سمے موسم سوہنا سی ۔کنیاں پے رہیاں سی، بجلی وچ چمک رہی سی تے ہوا وی واہوا سوہنی چلدی پئی سی۔ بڑی عجیب جہی حالت ہو رہی سی جیویں ہی شراب تے نظر پئی دل کیتا اک گھٹ بھراں۔ جدوں دو تن پیالے پی لئی تے دل وچ اوس خریدے ہوئے باغ دا خیال آیا۔ دل کیتا پئی ہنے اوس باغ دی سیر کیتی جاوے۔ مصیبت پچھ کے تھوڑی آؤندی ہے۔ چنگی بھلی بیٹھی بٹھائی اک دائی نوں نال لے کے سرنگ راہیں اوس جوان دے مکان وچ گئی اوتھوں باغ ول ٹر پئی۔ ویکھیا تے باغ حقی بہشت دے بروبر سی۔ مینہ دے تبکے رکھاں دے ہرے ہرے پتیاں تے پئے ہوئے انج لگ رہے سی جیویں زمرد دیاں پڑیاں تے موتی لگے ہوون۔ تے پھلاں دی لالی ایس مینہ وچ انج دی چمکی سی جیویں شام نوں شفق ہووے۔ تے نہر کنڈھیاں تیکر بھری شیشے وانگوں نظر آرہی سی تے موجاں لہرا رہیاں سی۔

میں ایس باغ وچ ہر پاسے سیر کردی پھردی سی کہ دن مک گیا تے شام ہوئی۔ اینے چر وچ اوہ جوان اک روش تے نظر آیا۔ تے مینوں ویکھ کے بہت ادب تے خوش ہو کے اگے ودھیا تے میرے ہتھ نوں اپنے ہتھ وچ پھڑ کے باراں دری ول ٹر پیا جدوں اوتھے میں گئی تے اوتھوں دے حال تے باغ دے سوہپن دا خیال دل چوں کڈھ دتا۔ چانن دا اینا ٹاٹھ سی پئی تھاں تھاں قمقمے فانوس بتیاں سی شب برات نوں اینے چانن دے مگروں وی اوہ چانن ایہدے اگے ہنھیرا لگدا، اک پاسے آتش بازی، پھلجڑی، انار، داؤدی، بھچنیا، مروارید، مہتابی، ہوائی چرخی، ہتھ پھل، جاہی جوہی پٹاخے ستارے نکلے سی۔

ایسے وچکار چند چڑھ پیا بڑا سوہنا ماحول بن گیا۔چانن ہوندیاں ہی جوان نے کہیا ہن چل کوٹھے تے بیہنے آں میں انج دی مورکھ ہوگئی پئی اوہ نگوڑا جو کہندا میں من لیندی۔ ہن ایہہ ناچ نچایا پئی مینوں اُتے لے گیا۔ اوہ کوٹھا اینا اُچا سی پئی سارے شہر دے مکان تے بازار دے چراغاں جیویں ایہدے پائیں باغ سی۔

میں اوہدے گل وچ بانہواں پا کے خوشی نال بیٹھی سی تے اک رنڈی بڑی بھیڑی جہی شکل والی شراب دا شیشہ ہتھ وچ پھڑ کے ایتھے اپڑی۔ مینوں ایس ویلے اوہدا آؤنا بہت ہی بھیڑا لگیا تے اوہدی شکل ویکھ کے ہی دل گھابر گیا۔ تے میں گھابر کے جوان نوں پچھیا ایہہ کیہ مصیبت ہے ؟ توں کتھوں لیاندی ہے ؟ اوہ جوان ہتھ بنھ کے آکھن لگا ایہہ اوہی لونڈی ہے جیہڑی ایس باغ دے نال تہاڈی مہربانی نال خریدی ہے۔

مینوں لگیا پئی ایس مورکھ نے بڑی سدھر نال ایہنوں لیا ہے خورے ایہنوں چنگی لگدی ہے۔ اوہدی خاطر غصہ پی کے چپ ہو رہی پر دل اوسے ویلے بجھ گیا تے ناخوشی جہی طبیعت تے چھا گئی۔ اوہدے تے قیامت اوس کمینے نے ایہہ کیتی پئی ساقی اوس چھٹڑ نوں بنایا اوس ویلے میں اپنا لہو پیندی رہی تے جیویں طوطی نوں کوئی کاں دے نال اک پنجرے وچ بند کر دیندا ہے نہ جان دا ویلا سی نہ بیہن نوں جی کردا سی۔

مکدی گل ایہہ پئی اوہ شراب انج دی سی پئی بندہ جانور بن جاوے دو چار جام اُتے تھلے ایسے تیزاب دے جوان نوں دتے تے ادھا پیالہ جوان دے ترلے لین تے میں زہر وانگوں پیا۔ اخیر اوہ بے حیا وی بے سُرت ہو کے ایس مردود نال بے ہودہ حرکتاں کرن لگ پئی تے اوہ کمینہ وی نشے وچ بے لحاظ ہو گیا تے نامعقول حرکتاں کرن لگیا مینوں ایہہ غیرت آئی جے ایس ویلے زمین پاٹے تے میں غرق جاواں۔ پر اوہدی یاری دے پاروں میں بللی ایہدے تے چپ ہو رہی تے اوہ اصلی پاجی سی۔ میرے ایس درگزر کرن نوں نہ سمجھیا نشے دی لہر وچ ہور وی دو پیالے چاڑھ گیا پئی رہندا سہندا ہوش جیہڑا سی اوہ وی بھل گیا تے میرا ڈر اُکا مک گیا بے شرمی نال اُس بھیڑی شکل والی نال ہمبستری کیتی تے اوہ پچھل پیری وی ایسے حالت وچ تھلے پئی ناز نخرے چکواندی رہی تے دوہاں وچ چما چاٹی ہوون لگی۔ نہ ایس بے وفا وچ وفا سی نہ اوس بے حیا وچ حیا۔ جیویں دی روح اُنج دے فرشتے میری ایس ویلے حالت ایہہ سی پئی جیویں جان ہی مک گئی اپنے آپ تے لعنتاں پاؤندی رہی پئی ایتھے آئی کیوں تے اینی وڈی سزا پائی؟ اخیر کتھوں تیکر سہواں، میرے سر توں پیراں تیکر اگ لگ گئی تے انگیاریاں تے لیٹن لگی۔ کاوڑ نال بھیڑا حال ہو گیا۔

اوس شرابی کبابی نے دل وچ سوچیا جے بادشاہ زادی ایس ویلے غصے ہوئی تے کل میرا کیہ حال ہووے گا تے سویرے کیہ قیامت مچے گی؟ کیوں نہ ایہدا کم نبیڑ دیواں۔ ایہہ ارادہ ایس غیبانی دی صلاح نال دل وچ کر کے اٹھ کے گل وچ پٹکا پا کے میرے پیریں آن پیا تے پگ سر توں لا کے ترلے کرن لگ پیا۔ میرا دل تے اوہدے تے لٹو ہو ہی رہیا سی جدھر کہندا جاندی سی تے چکی وانگوں اوہدے وس وچ سی۔ جو کہندا سی اوہ کردی سی۔ جویں تیویں مینوں پچلا کے پھیر بہایا۔ تے ایسے شراب دے دو چار پیالے بھر بھر آپ وی پیتے تے مینوں وی دتے۔ اک تے غصے نال میں سڑ بھج کے کباب ہو رہی سی دوجا انج دی شراب پی کے میں چھیتی بے سُرت ہو گئی۔ کجھ سُرت نہ رہی اودوں اُس ظالم تے نمک حرام ،کٹر نے تلوار نال مینوں پھٹڑ کیتا سگوں اپنے ولوں مار چھڈیا، اوس ویلے میری اکھ کھلی تے مونہوں ایہی نکلیا خیر، جو کیتا اوہ بھریا پر توں اپنے کرم نال ایس خون ناحق توں بچاویں۔

مبادا ہو کوئی ظالم ترا گریباں گیر
میرے لہو کو تو دامن سے دھو، ہوا سو ہوا

کسے نوں ایہہ بھیت نہ دیویں، تے اسیں تینوں جان دینوں وی فرق نہ کیتا۔ فیر اوہنوں رب دے حوالے کر کے میرا دل ڈب گیا۔ مینوں اپنی سدھ بدھ کجھ نہ رہی۔ خورے ایسے قصائی نے مینوں مردہ سمجھ کے ایس صندوق وچ پا کے قلعے دی کندھ دے تھلے لمکایا جیویں توں ویکھیا۔ میں تے کسے دا مندا نہیں چاہندی سی۔ پر ایہہ خرابیاں نصیباں وچ لکھیاں سی۔

مٹتی نہیں کرم کی ریکھا
ان آنکھوں کے سبب یہ دیکھا

جے سوہنیاں نوں ویکھن دا دل وچ چاہ نہ ہوندا تے اوہ بدبخت میرے گل دا طوق نہ ہوندا۔ رب نے ایہہ کم کیتا پئی تینوں اوتھے گھل دتا تے میری حیاتی دا کارن بنایا ہن جیون توں وی نموشی آوندی ہے پئی ایہہ رسوائیاں کھچ کے اپنے ولوں جینا نہ رکھاں یاں کسے نوں منہ نہ وکھاواں۔ پر کیہ کراں مرن دا اختیار اپنے ہتھ وچ نہیں۔ رب نے مار کے فیر ساڑیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels