Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی لیکھا >> منگتا سارنگی نواز

منگتا سارنگی نواز

نادر علی
January 31st, 2009

منگتا سارنگی نواز

ایہہ کہانی اُستاد منگتاخان سارنگی نواز دی کہانی گھٹ تے نواب کرنل یار محمد خان دی کہانی زیادہ لگدی اے ۔ اُستاد منگتے دی تے اصل اینی ہی کہانی اے پئی اوہ پاکستان دا آخری سارنگی نواز سی۔ ہُن نہ کوئی سارنگی بناوندا تے نہ کوئی سارنگی وجاوندا اے !
اُستاد منگتا لگ بھگ میرا ہانی سی۔ جدوں اسی نکے نکے ساں تے منگتے دا پیو اُستاد اللہ نواز خان واقعی منگتا سی۔ اوہ تقریبا"انھا ہو چُکا سی۔ اوہنے وڈی ساری پگ بنھی ہونی تے اساڈے محلے آ کے گلی وچ حویلی بھاگ مل دیاں پوڑیاں اُتے بہہ کے (جیہڑی ہُن ہولی ہولی حویلی کرنل صاحب بن گئی اے ) سارنگی وجانی "میرے لئے جہان میں چین نہ قرار ہے!"اسی اک اک پیسہ سارنگی وچ پا دینا۔ فن دی قدر شہر قصور وچ تد وی کوئی نہیں سی ! نُور جہان تے بمبئی اپڑ گئی سی جیہدے بارے اللہ نواز ایہہ کہنا پئی "اوہ میری شاگرد رہی اے نکیاں ہوندیاں!"پر قصور وچ تے ہُن ہر گاون والا نور جہان دی اُستادی دا دعوے دار سی۔ منگتا بھی منگتا ای رہندا جے اوہدا پیو اوہنوں نہ بچاندا لہور ٹور کے۔۔۔۔
پر ایہہ تد دی کہانی اے جد منگتا اجے قصور سی تے حویلی کرنل صاحب جا کے سارنگی وجاندا سی۔ کرنل صاحب نواب تے قصور ای آ کے بنے تے پکے نواب تد ہوئے جد ایوب خان دے الیکشن وچ ممبر تے فیر ایوب خان دے کہن تے وزیر صحت مغربی پاکستان بنائے گئے۔۔۔۔ آپ نے سن سنتالی وچ جرنل ایوب خان دی ٹہل سیوا کیتی سُنیدی سی !
نواب صاحب دی کہانی تے پُرانی سی تے لوکاں توں زیادہ منگتے نوں پتہ سی۔ نواب صاحب اصلوں غیر سیاسی آدمی سن تے آپنے زور تے یونین کونسل دا لیکشن بھی نہ جت سکدے۔ کرنل ! یار ! محمد ! خان ! نہ سیاست دان سی نہ نواب نہ کرنل تے نہ سن۔ لام لگی تے اوتھے دے راجے نے آپ نوں ریاستی فوج دا آنریری کپتان بنا دتا۔ ہوشیار پور آندیاں تائیں آپ میجر تے فیر قصُور شہر دی سبھ نالوں وڈی حویلی سی الاٹ کرا لئی۔ پر آپ کول پیسہ اُکا کوئی نہیں سی۔ تے اٹھتالی اُننجا وچ اکثر اصغر کریانے آلے دی ہٹی تے بیٹھے اخبار پڑھ رہے ہوندے سن۔۔۔ اصغر ای آپ دا یار سی تے گھر باہر چلان لئی اوہدا ای اُدھار سی۔ اصغر اخبار بھی بڑی باقاعدگی نال پڑھدا سی۔ اگلے دن کرنل صاحب کہہ رہے سن، "سیاست میں اصغر میرا اُستاد تھا !"منگتے کہنا، "ایہہ انجیں ای اے جُوں میرا پیو نُور جہان دا اُستاد سی !" "پر اصغر اُدھار تے دیندا سی !"میں پچھیا ۔۔۔ فیر منگتے نے حویلی کرنل صاحب دے بُرے دناں دی کہانی سنائی:
"گھر کھان نوں کجھ نہیں سی پر رات نوں اسی دو میراثی آپدی خوابگاہ و چ آپ نوں سُلان واطے موسیقی وجاندے ساںَ نواب صاحب نوں موسیقی بارے ککھ پتہ نہیں سی پر جد دے قصور آئے رات نوں میراثی آپ دی خوابگاہ وچ ساز وجاندے سن۔ آپ کہندے موسیقی میری روح دی غذا اے۔۔۔ اسی کہنا، "مولا ایہہ دُوجی غذا دا کیہ کرئیے!"
ـ " بیگم صاحب نال گل کریں سویرے !"نواب صاحب نے سون توں پہلوں کہہ دینا۔
"بیگم نواب یار محمد خان، اللہ بہشت نصیب کرے سو، آپدے گھر دے خرچے پٹھے توں لے کے تعلقداری وضعداری ہر چیز دا خیال رکھدی سی۔ میں جا کے اوہناں نوں دسیا پئی نواب صاحب اساڈے معاوضے واطے بھجیا اے۔ بیگم صاحب مُنوں اصغرے دی ہٹی رُقعہ دے کے ٹوریا۔ اصغر صاحب سودے دے دو لفافے بنائے ۔ اک کہیا حویلی دے جاواں تے دوجا گھر لے جاواں۔ لفافے وچ گرم مصالحہ ، چاہ دی پتی تے دو سیر کھنڈ دے سن۔ میری بے بے شکر کیتا کجھ تے ملیا۔"
"سرکار اُدھار دا اکو مسئلہ ہوندا اے ۔ اُدھار ملدا نہیں !"منگے تے معاشیات دا سبق چھوہ دتا۔ "پر اصغر کریانے آلا تے آپدا یار سی تے ہمیشہ دا اُدھار سی؟"میں پُچھیا۔
"نہیں سکرار اُدھار دوبارہ کرنل صاحب دی ممبری وزیری دے بعد چالو ہویا ! بلکہ اصغر نے ہی صلاح دتی تے نالے کراچی دا کرایہ نواب صاحب نوں دتا جدوں آپ بالکل بھانک سن تے اخبار بھی اصغر دی ہٹی آ کے پڑھ رہے سن ! اوسے صلاح دتی پئی جرنل ایوب نوں ملو۔"
"فیر تے واقعی اصغر آپدا اُستاد سی سیاست وِچ!"میں ہس کے کہیا۔ "نہیں چودھری صاحب اصلی اُستاد تے بیگم صاحب بہشتی سن!""اوہ کِس طرحاں؟"میں پُچھیا۔ "سرکار نواب صاحب تے حویلی وِیچ سڑدے چھ کِلے شہری زمین سی تے ہزار روپیہ مرلہ زِویں دا بھاء ہو گیا سی پاکستان بنن نال پر الاٹ ہوئی کر کے وِک نہیں سی سکدی.....اوہا زِویں تے چھ کروڑ دی ویچی نواب صاحب نے جدوں لہور رہن لگ گئے۔ "
ــ"زِویں توں آپدی اصلی نوابی بنی!"میں مُڑ کے معاشیات دے مسئلے وِچ پھس گیا۔ "نہیں چودھری صاحب بندہ ای رب دا سبھتوں وڈا شاہکا اے!"ہُن منگتا افلاطُون بن گیا۔ "بیگم صاحب نہ ہوندی تے کُجھ بھی نہ ہوندا۔ چودھری صاحب جیہڑی عورت میراٹیاں کولوں گھاہ مروا سکدی اے، اوہ کُجھ بھی کر سکدی اے!""مجھاں واطے گھاہ تے مروانا ای ہوندا اے منگتیا!"میں کہیا۔ "نہیں چودھری صاحب میں پہلے مہینے دا گجِھیا مُڑ کے بیگم صاحب کول معاوضہ لین گیا۔ بیگم صاحب داتری میرے ہتھ وِتی تے کہیا ایہہ دو چار گنڈھیاں گھاہ وڈھ دے۔ میں بڑا کہیا، سرکار! تلوار میراثی دے ہتھ وِچ نہیں سوبھدی! پر بیگم صاحب آپ دو چار مُٹھاں وڈھ کے وکھایا پئی اِنج وڈھیدا اے! میں شرمندہ ہو کے شام تائیں گھاہ دے ڈھیر لا دِتے۔ بیگم صاحب اندروں چادر لے آئے تے کہن لگے ٹانگیاں آلے اڈّے تے جا کے گھاہ ویچ آواں۔ چار روپئیے بن گئے۔ دو بیگم صاحب آپ رکھے تے دو آپ نے مُنوں دے دِتے۔ سرکار منگتا ہاں پر منگ کے کدی نہیں کھادا! ساری عُمر محنت دی کمائی کھادی اے! میری اُستاد واقعی بیگم صاحب سی۔ جے گھاہ ویچ کے نوابی دا بھرم رکھیا جا سکدا اے تے اِنسان ہِمت کرے تے کُجھ بھی کر سکدا اے۔ نالے مولا ایڈی سخی! دو روپے آپ رکھے تے دو ایس غریب دی تلی تے رکھ دِتے۔ سکرار جیہڑا بندہ ادھی روٹی آپ کھا کے ادھی نوکر نوں دیوے اوہدے تے نوکر جان دے چھوڑ دا اے۔ "اُستاد منگتا خان واقعی اُستاد سی۔ گل دی باریکی فن دی باریکی ہار جاندا سی۔ انجیں ٹوتیاں تے رمزاں وِچ اوس کرنل صاحب دی ساری کہانی سُنا دِتی۔
اج اُستاد منگتا خان پاکستان دا آخری سارنگی نواز مر گیا اے۔ نُور جہان بھی اینا چِر اِکلی گان آلی پُوری ہو گئی اے! کلا کار تے سارے مر مُک گئے پر نواب کرنل وزیر اجے بھی بہتیرے نیں۔ فیر کلا کار بغیر کہانی مُک جاندی اے۔ ایہہ لوکاں نوں پتہ نہیں۔ جے منگتا میرا یار نہ ہوندا تے میں کہانی کار نہ ہوندا!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels