Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی لیکھا >> ماریا

ماریا

نادر علی
January 31st, 2009

ماریا

ماریا اوہدا ناں سی۔ "ماریا وُلفر ہیمپٹن"جوں میں اوہدے پاسپورٹ وچ اوس راتی پڑھیا سی۔ پر جرمن لہجے وچ اوس نوں "مارہیا"سد دے آہے ۔ ایسے ہجے نے ہی ایہہ کہانی چھوہی۔
سندھ کلب دے ویڑھے وچ دو تن پگاں آلے وڈیریاں نال بیٹھی اوہ شراب پی رہی سی۔ ایہہ سن بہتر دی گل اے جد اجے شراب کھلی سی۔ ایس سنگ وچ میرا پُرانا یار ظفر چانڈیو بھی بیٹھا سی۔ میں چانڈیو نوں ملن گھٹ تے میم نوں تکن واطے ودھ اوہناں کول جابیٹھا۔ شراب تے میں بھی پی رہیا ساں اوہ سارے رجے پئے سن تے ادھے سُتے پئے سن۔ میں پنجابی وچ پُچھیا، "ایہہ میم کتھوں پھسائی جے؟"میم ہس کے پنجابی وچ بولی، "جی ایتھوں ہی پھسائی نیں"میں پچی ہو گیا تے میں انگریزی وچ اوس اُدھیڑ عمر دی میم نوں پچھیا اوہ کراچی کد آئی سی۔ اوس کہیا، "جد دا لہور چھڈیا!""تُسی چوکھے چر دے پاکستان او؟""جی عمر ای لنگھ گئی جے۔ ایتکاں دساں ورھیاں بعدآئی ہاں پر پہلوں دس ورھے گزار کے گئی ساں!" مُڑ ہولی ہولی اوس آپنی حیاتی بارے اوس تے اگلیاں کئی بیٹھکاں وچ آپنی جیون کتھا سنائی۔
جد دھیرکی کھاد فیکٹری بندی سی تے اوہ آپنے کھسم نال جیہڑا جرمنی پڑھدا سی کراچی آئی۔ دھیرکی نوکری ملن تے اوہ دھیرکی ٹُر گئے۔ میم دا کھسم کر کے اوہدے جنے جھٹ پٹ ترقی کیتی "پر مینوں ورت کے اوہ آپنی ہی آپنے کیتے توں کھج گیا"۔ اوہ مُڑ کے پاکستانی تے فیرلکھنؤ دا نواب تھی گیا۔ اوس میرے نال اوہ کیتی جیہڑی کوئی دُشمن نال نہ کردا ہوسی۔ اوس مینوں بُرقعہ پوایا تے گھر اک قیدی ہار رکھیا مڑ ہتھ بھی چُکنا شروع کر دتا۔ چار بچے ہوئے پر میں سبھ کجھ چھڈ کے دس سال جرمنی ٹر گئی ۔ بچے بڑے یاد آوندے سی۔ مڑ آئی ہاں بچے وڈے ہو گئے ہن۔ وڈے دو میرے دھڑے دے تے نکے اوہدے دھڑے دے نیں۔ نکیاں تے میں یاد بھی رہی۔"
"تُسی تے شریف بندے لگدے ہو!" "یار شریف نہیں ہوندا تے کھسم شریف دے گھر چھڈ کے آؤ۔ اوہ ملیر توں اگے رہندا اے ۔ تُسی جاگدے سہی ہوندے او۔ ظفر صاحب تے سُتے پئے نیں ۔ شریف عورت لئی بہت چرکا ہو گیا اے۔ "اوہ زور نال ہس کے بولی ۔ "میں تیار آںظفر توں پُچھ لوؤ تسی آخر اوہدے پراہونے ہو۔"
ـ"لے جا سُو یار! "ظفر مینوں سمجھاون لگ پیا۔ پرمیم تے آکر میم ای آہی تے میری نری دوستی جوں شریف بندیاں وچ ہوندی اے تے ٹھرک تے آخر شریف آدمی دا کم اے بدماشی تے دھکے شاہی ہوئی۔
دو ورھے انجیں لنگھ گئے۔ روز شام اوس دفتر توں سندھ کلب آ جانا۔ راتی روٹی کھا کے پچھلے سوتے میں گھروں دُراڈے لاہ آونا۔ دُنیا جہاں دی گل ہونی۔ کوئی لالچ بھی اوس نہ کرنا۔ روٹی شراب دا بل بھی کدی کدی لڑ کے اوس آپ دینا۔ "میجر صاحب بال بچے دار او۔ دال روٹی دا فکر کریا کرو۔"اوس مینوں سمجھانا آوہ آہی سنجھوڑی!
ہر کم اوس بڑے ڈھنگ تے آہر نال کرنا۔ میری برتھ ڈے تے کتاب لیائی تے میں حیران ہو کے پُچھیا، "تینوں میرے جنم دن دا کتھوں پتہ لگا اے!" "لا لیا اے ۔ یارنی جو ہوئی !" "نہیں سرکار ساڈا بھین بھر آلا رشتہ اے بدنام نہ کرو۔ "
ـ"ماموں جان تُہاڈا تے تہاڈے وڈے بھنئیےدا اکو جنم دن اے ایس لئی یاد سی!"
میری لہور پوسٹنگ ہو گئی تے ظفر دی بُڈھی
پیکے پنڈ کجھ مہینیاں لئی گئی۔ ظفر کہیا، "ایسی کڑی تے کھاد فیکٹری آلیاں دا چوکھا حصہ بندا اے ۔ توں ونج لہوریں تے سانوں ملہڑ پان دے ۔ "ماریا دا کھسم فیر ناراض سی تے اوہ شہر کتے آن سودا سوچ رہی سی۔ "فی الحال تے چونڈیو صاحب دے ڈیرے ٹُر جا۔ گھر خالی اے۔ " "تے ماریا کُڑی نرالی اے!"اوس قافیہ جوڑیا۔ کجھ مہینے اوہ ظفر کول رہی مُڑ کدھرے ہور ٹُر گئی ۔ ظفر نوں بھی پتہ نہیں سی۔ اللہ جانے کتھے کتھے کھجل خوار ہوئی۔
اٹھہتر وچ عمرے تے جاندیاں میں سوچیا اک دن شراب دی معافی ہونی اہیدی اے عمرے تے بخشوا لیساں۔ شراب دا بھی عجب ٹورا ہوندا اے پچھلی راتی ہیرا منڈی جان نوں بھی دل کردا اے میں تے کدے ایہہ کم نہیں سی کیتا۔ پر ایتکاں گُناہ ثواب عجب گڈ مڈ ہوئے پئے سن۔ "صاحب عورت ہے ۔ میم ہے!"مینوں بیرے پچھلے سوتے کہیا۔ "لے آؤ۔"میں کہیا جوں ساری حیاتی رنڈی بازی کیتی ہووے ۔ پر اوہ آئی تے ہوش گم ہو گئے۔ ماریا تے کجھ ظاہر نہ کیتا تے بُوہا بھیڑ چھڈیا۔ اوہ کجھ بڈھی لگی۔ پر گلاں شروع ہویاں تے اوہ مُڑ کے جوان ہو گئی۔ اوس دسیا اوہدی نوکری نہ رہی۔ ظفر دی بڈھی آئی سی۔ کھسم بھی مارن نوں پھردا سی۔ ہُن اوہ ڈولی کھاتا وچ اک فلیٹ وچ رہندی آہی۔ پر آہی بالکل انڈر گراؤنڈ ۔ رات رات دا کاروبار ای رہ گیا سی۔
اوس رات اساڈا بھین بھرا دا رشتہ بھی نہ رہیا۔کدے سمجھ نہ آئی پئی اوہدا کھسم و
ڈاگُناہ گار سی کہ ظفر چانڈیو کہ میں نیم حاجی۔ اوس عمرے تے اللہ کولوں بڑی معافی منگی۔ ماریا بھی بڑی یاد آئی ۔ اللہ دے گھر کسے نوں یاد کرنا ای دعا ہوئی۔ مُڑ کدے اوہ نہیں ویکھی۔ خبرے دُعا منظور ہو گئی ہووے تے اوہ سکھی ای ہووے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels