Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی لیکھا >> اِک کالے بندے دی کہانی

اِک کالے بندے دی کہانی

نادر علی
January 31st, 2009

اِک کالے بندے دی کہانی

نیویارک شہر تے چٹیاں دا ای سی پر ہولی ہولی ڈھیر کالے آ گئے ۔ جیہڑی جُوہ ڈیہنی کرائے گھٹنے اوتھے ہولی ہولی کالے تے غریب سپینی پئے ودھنے ۔ ایہناں محالیاں وچ "ہار لم"تے "برانکس ہار لُگ بھی ودھ جانی۔ دنیں بھی اوپرے بندے نوں ڈر لگنا۔ شہر تے فیر بھی چٹیاں دا ای رہیا۔ "شہرسائیاں دے راج کمائیاں دے !"واردات بھی غریب غُربا ای کردا آہیا۔ رات ویلے ہولی ہولی شہر کالاہوندا جانا۔ گڈیاں وچ کالے تے گلیاں وچ کالے !
آخر کالیاں نمانیاں ہار میں بھی تے پاکستانوں کھٹی کرن آیا ساں۔ پیپلز پارٹی دے کاغذ بنوا کے ایجنٹ دا پنجاہ ہزار اُدھار چا کے جا وڑیا امریکہ ! اک تے محنت مزوری توں علاوہ نوکری نہ لبھے۔ پہلی واری سمجھ آئی پئی اخبار نویسی کیڈی سکھلی روزی سی۔ دُوجے آکڑ لکھاری دی دانشوری دی نہ جائے ۔ لہور تے دس جی جاندے سن دوجی سلام کردے سن ! آپنے آپ نوں کجھ سمجھی دا سی ! کالم تے آپنا ناں پڑھی دا سی ! ایتھے شہر کیہ تے مہر کیہ ! چوکیدار سوکھا ۔ جگراتے دی عادت آہی ۔ رات جاگن دے ستر ڈالر ! رات دے کم تے آون جان نال کالیاں نال واہ پیا۔ لحاظ تے اوہ کسے دانہیں سن کر دے۔ پرہولی ہولی کیڑ آلی تھاں دی سمجھ آ گئی ! وڈے ویلے اوہناں نال بہہ کے بئیر پینی تے چٹیاں نوں گاہلیں کڈھنیاں تے روٹی کھا کے سوں جانا۔ چار پہر جگراتے تے ایس سیاہی گفتگو نال شاعری بھی آن زور کیتا! شاعر تے میں پنجابی دا آہیاتے پنجابی شاعری سُنن آلاورلا ورلالبھنا۔ اوہ بھی وٹے سٹے آلا ! اک سُنائی تے دس سُتیاں پینیاں ! ہار لم اک لیفٹسٹ اخبار نکلدا سی "نیوتیشن"اک واری کالم لکھ کے دتا۔ اوہناں چھاپیا تے انج یاری لگی ٹام نال۔ ٹام تے بہوں چڑھیا لکھیا کالا سی۔ انگریزی وچ نظم بھی لکھدا سی۔ اک واری اوہناں مشاعرہ کیتا " پوئٹری جیم سیشن"ٹام تے میں بہوں ساری شراب پیتی۔ ٹام کہیا توں بھی آکے نظم سُنا۔ نظم بھی ایویں جوڑ جپ سی : "او کالیے بُڈھیے مائیے کتھے جانا یا ! تیرا کالا مکھ سوہنا من موہنا اے ! دُکھیا بندہ ہسداکیڈا سوہنا اے !"اے!"مُڑ انجیں چٹیاں مالکاں
دے ڈکرے اوہدے پیریں لیا کے سٹنے دا کوئی آہر آہیا تے ہولی ہولی اوہ کالی ماتاتے میں ٹی ایس ایلیٹ بنن لگ پیا ! "کالی کالی کالی ماتا !"اخیرلا مصرعہ سی ! ایویں بھجی ٹُٹی انگریزی وچ ترجمہ کر کے پڑھی ۔ نالے تھوڑی جیہی تقریر "پیپل پارٹی"آلی کیتی تے حال پہریا پے گئی۔ شاعر تے کیہ بننا سی ٹام نال ہور گُوڑھی یاری پے گئی۔
ٹام آپنے اک چٹے یار نال ملایاجیہڑا نیویارک میٹروپولیٹن (
Metropolitan) میوزیم نیویارک دے وڈے عجائب گھر دا وڈا افسر سی۔ اوس مینوں عجائب گھر چوکیدار لایا تے میں تے جوں کارے لگ گیا۔ عجائب گھر تکنا تے مُزوری بھی ودھیری ! پر ڈینس جیہڑا ٹام دا کالج دا یار سی اوہ میرایار بن گیا۔ "خبرے سبھ کالیاں ہار توں بھی چٹے تے عاشق ہوویں !"ٹام شراب پی کے ایہہ چھیڑ خانی چھوہ دینی !
"ٹام نفرت کیہڑا چنگا کم اے؟ تینوں ڈینس نال نفرت کیوں اے!"میں پُچھنا۔ "نفرت نہیں ایویں کدیگل کراں تے شراب نال مونہہ شرط کرنا پوندا اے !"ٹام نے ہسنا۔"توں کالا نہیں ! مینوں تے سہی ہوندا اے توں کجھ بھی نہیں !"شراب نال کُڑتن ٹام دی ودھدی جانی۔
ٹام بڑا وکھا تے بڑا کبا بندہ سی سبھ نمانیاں دی بولی وچ گاہل مندا تے ہوندا ای اے۔ پر ٹام نے کدے تے آکسفورڈ آلی انگریزی پئی بولنی جد کدے بُہتی پی کے فلسفے دی کوئی گل چھیڑ لینی نہیں تے بولنا اوسدا اکالیاں ہار اوہا جانگلی چھیڑواں آلا ہونا "ہُولیا ! ہا!"دُرماں پاڑا!"اوس مینوں ہر دُوجے فقرے وچ آکھنا ۔ ایہا مانواں پُنن نال ای اساڈی یاری وچ نینہہ دی کُڑتن سنگھنی ہوئی ! پر ایہہ کُڑتن کالیاں کولوں بھی جھلی نہ جانی۔ ۔ ٹام اک بلدا بھانبھڑ سی تے اک رُوڑی دا ڈھیر۔
رات اوس دب شراب پی کے جوں منت منی ہونی پئی ٹیشن دے پلیٹ فارم تے مُوترنا ضروری آہیا۔
"ٹام شرم کریا کر !"میں پوند کجھ دن کہنا۔
"اوئے کالے لنگ دی مشہوری واطے اے !"اوس کہنا۔
"نالے پتہ ای ایہہ زخم دا علاج اے ! نرویا اے "اوس ہور ہُوڑ جانا۔
"اساڈے بھی ماں پاڑا جے پھٹاں تے مُوتر دے نیں"میں بھی ساویں ہویا !
"ایہہ سانجھا دوا دارُو ای تے بھرا بناندا اسانوں !"ٹام وکیا۔
اخیر اکدن اوہ آپنے روزے دے آہرتے لگا سی۔ میں بھوں کے پوڑیاں چڑھ گیا تے اُتلی پوڑی تے کھڑکے ٹام دے سر تے مُوتریا ! ٹام دا وڈے ویلے تائیں ہاسا نہ کھلووے !
پر گل بکھیڑے نال تے مُکدی نہیں سی۔ وڈی لڑائی تے روٹی ٹکر دی آہی۔ انگریزی لٹریچر دا اوہ سٹی کالج دا وڈیاں نمبراں نال بی اے پاس سی۔ مینوں ایہہ گل ڈینس سُنائی۔ "نیونیشن"آلے ہفتے دا ڈیڈھ سو ڈالر دیندے سن۔پر ڈینس بھی اوہدا بچپن دا یار سی۔ اوس اکدن مینوں "نیونیشن"دا کچا چٹھا سنایا۔ میں بھی انجیں سُنیہا ٹام نوں دتا۔ "ڈینس آہدا سی ایہہ ایویں مُنڈے بازاں تے بڈھیاں رنڈیاں دے ہتھے چڑھیا اے !"
ـ"اک ڈینس تے اک توں ماں پاڑ ! نہ بہویا کر اوہدے کولے !"اوہ روہا روہی بولیا۔ "پر یار تے تیرا اے ! ـ"میرے مُونہوں نکل گیا!
"یار آپنی ماؤ دا اے ! میں تے پچھلیاں پنجاں ورھیاں وچ صرف اک منٹ گل کیتی اے۔ تیری سفارش واسطے !"اوہ جلال وچ آ گیا۔ "کدے عجائب گھر نہیں او گیا ؟
ـ"میں حیران پُچھیا۔
"میں ہار لم دا چڑیا گھر ویکھدا رہناں ! ایہہ انہت راگ اے !"ٹام روون ہاکا جیہا ہوگیا !
"تُوں کدے ملیا نہیں ڈینس نوں ؟ اوس مینوں دسیا اے توں انٹرویو واطے گیا سیں !"میں سُنی سنائی دسی !
"گل سن او مُوتر خانے ! میں دس دن سوچدا رہیا پئی نہ جاں۔ اک تیرے ہار کُڑی ماں پاڑ میری یار سی۔ اوہدا کھسماں نوں کھانی دا دل سی میں کجھ بن جاواں ۔ جان توں پہلوں مینوں دست لگ پئے۔ کموڈ توں اُٹھیا تے ویکھیا میری قمیض دی بانہہ لبڑی پئی اے۔ میں دھوتی پر داغ نہ لتھا ! ایہہ انج سمجھ پر جوں میرے زخم تے پٹی سی تے میری ڈحال ڈینس کول بہن واطے ! پر ایہہ مینوں بھی نہیں سی پتہ پئی میری قمیض ہیٹھاں بھی لبڑی سی ! میں لڑ جھگڑ کے ڈینس دے دفتروں اُٹھیاں تے ویکھیا اوہدا صاف صُوفہ بھی لبڑیا ہویا سی ! ڈینس ایہہ میرا گونہہ لبڑ گیا اے سُتھریا ! تیرے صُوفے نال ! ایہہ دھوا لئیں ۔ نہیں تے سمجھ نہ آوسی آ گونہہ دی گورے بندے دا اے کہ کالے بندے دا !"
"مینوں اُلٹی ہو ویسی !"پہلی واری اوہ ساؤ اوکھا بولیا!
"توں نرا گُونہہ ایں ٹام ماں پاڑا!"میں اخیر ہس پیا۔
("
you suck") "توں چُوپنا ایں ! علیا!"اوہ راضی نہ ہویا!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels