Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی لیکھا >> گولڈن جوبلی

گولڈن جوبلی

نادر علی
January 31st, 2009

گولڈن جوبلی

نیلی نہر جتھوں نکلدی اے اوتھے پوند سکھاں دا چک سی سنتالی۔ پر دو گھر اساڈے چیمیاں مُسلماناں دے بھی آہے ، صوبیدار چیمے دی اولاد۔ تے ٹبر دا تے لاگے چکاں دا لیڈر سی میرا چاچا دلدار چیمہ۔ پاکستان بنان وچ میرے چاچے دا بھی حصہ سی۔ سن چھتالی وچ سرکار بڑا زور لایا پئی کوئی بندہ ساہیوال ضلعے دا اندر نہ ہووے پر پچھوں کُجرانوالے سیالکوٹوں سنیہے آونے پئی فلانا بھی جلوس کڈھ کے اندر ہو گیا اے۔ چاچے بھی اخیر مُلتان جا کے شہیداں وچ ناں لخا لیا !
سکھ گئے تے روہتکی آ گئے تے ہن تے دلدار چیمہ پُورا لیڈر بن گیا ۔ باراں پاس تے مُسلم لیگیا تے چک دا چودھری ! روہتکی بولی تے رانگھڑی بولدے آہے پر چاچا آہیا ساؤ اوہ ہر زبان بول لیندا سی۔ "محبت ہر زبان وچ کیتی جا سکدی اے راؤ صاحب !"اوس امراؤ خاں نوں آکھنا ۔ ایہہ پئی محنت دا مطلب دا مطلب صرف عورتاں نال محبت سی ایہہ بھی راؤ صاب نوں چھیتی سمجھ آ گئی ! یاں فیر چاچے نوں لیڈری دا شوق سی۔ تے ڈی سی صاحب تے مہابت خان سی ، پر چودھری صاحب اوہناں نوں بھی "محبت خان صاحب"ای کہندے سن ! تے ڈی سی صاحب نال بھی محبت کر دے سن ! کسے ڈی سی صاحب نال تے محبت نہیں کیتی جا سکدی جدوں اوہ ڈی سی لگا ہووے تے مہابت خان صاحب تے پٹھان سن تے تے پکے صاحب ۔ پر دلدار چیمے توں ہائیں مائیں کوئی محبوب نس نہیں سی سکدا !
اجے تے سُروپ کور شوہدی بھی نہیں سی نسی ! اجے باڈر آر پار اینا اوکھا نہیں سی تے سُروپی دے تے گھرے آلے اکثر چوری چھپے چکر لا لیندے سن۔ جنے اساڈے ٹبر چیمیاں دے سانولے آہے شیر سنگھ کے اینے ای گورے۔ سُروپی تے گوری نچھو سی تے سوہنی ! میرے وڈے بھرا دے ویاہ تے سارا ٹبر آئے تے سُروپی بھی آئی۔ دو راتاں اوس گاون نہ چھڈیا تے چاچا سُتا کوئی نہ ! سُتا تے میں بھی نہیں ساں ! مینوں لگے جوں ہر گاون سٹھ تے ٹپا چاچے واطے سی ! سروپی آہی بھی انجھک ۔ جاندیاں جپھا مار کے حاطے وچ ملی تے روئے بھی تے ہسے بھی ! "اوئے چیمیا میرے نال ویاہ کر لے !"اوس حد ٹپ سڑی ! "سروئیے کرتے لاں پروٹے وچ تیرے داڑھی آلے بھرا، جیہدا مُونہہ نہیں لبھدا، اوس کوئی کُڑی منگی تے چیمی راضی کوئی نہیں ہونی !"چاچے تُرت جواب دتا۔ "چیمیا، اُدھلیاں دے وٹے کوئی نہیں منگدا ! آکھیں تے نس آواں !"سُروپی چہکی ۔ "خدا دا خوف کر اساں مساں مر کے پاکستان بنایا اے !"چاچے آکھیا۔
سُروپی تے نہ آئی پر سکھاں نوں سنتالی نہیں بھُلدا ! اکدن آ کے ڈھیر سارے ڈنگر کھول کے لے گئے، امراؤ کیاں دے ۔ رولا پے گیا سارے ضلعے وچ۔ ڈی سی صاحب موقعے تے آئے ۔ "بارڈر کی حفاظت تُم لوگوں کا فرض ہے !"اوہناں لیکچر دتا۔ رضاکار فورس دی تیاری شروع ہو گئی۔ مُڑے تے چوکھے رانگھڑاں دے آہے پر سالار دلدار چیمہ ! آلے دوالے دے چکاں دے چھوہر بھی آونے ۔ تے ڈھیر سارے رنگروٹ چاچے اوڈاں وچوں بھرتی کیتے۔ ایہہ کیہ آہر سی بھیت تد کُھلا جد چاچے آپ حاطے دے اندر پریڈ کرانی ۔ اخیر ڈی سی صاحب دادورہ سکھلائی مُکن تے رکھیا گیا ۔ رضاکار تے سارے چٹیاں قمیضاں تے خاکی پتلوناں وچ سن پر رضاکار نیا
ں ون سونے کپڑے پائے ! حاطے دے اندر صرف ڈی سی صاحب تحصیلدار صاحب ، چیمہ صاحب تے حوالدار گئے۔ ڈی سی صاحب نوں ان دھوتے مُونہہ آلیاں رضاکار نیاں اُکا نہ چنگیاں لگیاں ! تے ڈی سی صاحب دے مُلاحظے دے شگن وچ "سپاہیاں"نال گل ضروری سی!"گن بھی جانتی ہو؟"ڈی سی صاحب اک کُڑی کولوں پُچھیا۔ "ہاں گان بھی جاننی آں"اوس گٹک کے آکھیا۔ "ستیاناس!"تحصیلدار چودھری احسان اللہ آکھیا۔ "اوئے اینیاں کنجریاں تینوں کتھوں لبھ گئیاں نیں ؟"اوہناں دلدار چیمے نوں پُچھیا۔ "چودھری صاحب کنجری تے اکلی دُکلی ہوندی اے ! کٹھیاں ہوون تے شکر بن جاندا اے !"چیمہ صاح لشکراں دا اوہ بھیت دس گئے جیہڑا ہیر دمودر دے بعد کسے پڑھیا نہ سُنیا ! " چودھری صاحب عورت مرد نالوں دلیر بھی اے تے سیانی بھی !"چیمہ صاحب وکے ! "لاحول ولا قوۃ!"تے "کیا بکتا ہے چودھری صاحب!"تحصیلدار صاحب تے ڈی سی صاحب دے مُونہوں کٹھا نکلیا !
پر چیمہ صاحب باقی دی پریڈ تے روٹی تے ڈی سی صاحب نوں راضی کر لیا ! وومن نیشنل گارڈ تے سنتالی وچ ای ٹُٹ گئی پر چودھری صاحب نوں اک لاؤڈ سپیکر تے اک عملے دا مُنشی لبھا۔ اوہناں کہیا، "ڈی سی صاحب کہندے نیں، لوگ لُٹ پُٹ کر آیا ہے اُن کو بتاؤ کہ پاکستان کے لئے یہ قربانی دی !"کجھ سکھاں کھوہ لئیاں نیں۔ باقی دلدار چیمے نوں دے دئیے !"امراؤ خان کہیا۔ پر ایہہ گل غلط سی۔ چیمہ صاحب گلاں باتاں دے چوکھے عاشق سن تے ہور کجھ نہ کیتا۔ مینوں کدے سمجھ تے چاچے دی ساری عمر نہیں آئی پر مینوں چاچا اک ساڈھے چھ فُٹ دا زنخا بھی سہی ہوندا سی ! ایہہ بھی گل غلط ای اے اصل وچ چاچا عورتاں کول بہندا بڑا سی ۔ اجکل تے ٹی وی آ گیا اے تے ہر کوئی اکدوجے دی جھولی وچ بہہ جاندا اے ، پر اوس زمانے وچ جنے زنانیا
ں کٹھے نہیں سن بہندے ۔ بُڈھیاں چاچے شرع دیاں چار ضرور کیتیاں !
ضلعیاں دی تاریخ تے ڈی سی آں نال ای ہوندی اے۔ فیر راجہ صاحب ڈی سی آئے تے چاچے دی اوہناں نال گُوڑھی پے گئی۔ مہابت خان نالوں زیادہ راجہ صاحب نال محبت ہو گئی۔ جوں صُوبیدار صاحب اساڈے دادا صاحب نوں جیہڑے ڈسٹرکٹ بورڈ دے ممبر آہے گورے ڈی سی پُچھیا، "چیمہ چودری صاب ایس پی کیسا ہے ؟"اوہ سردار پہلا دیسی ای پی سی تے سکھاں دا حمیتی ۔ رنگ دا اوہ بھی چنگا گورا سی ! دادے آکھیا، "صاب یہ ایس پی صاحب اچھا ہے ۔ اس سے پہلے والا بھی اچھا تھا۔ جو اسکے بعد آئیگا وہ بھی اچھا ہوگا !"
راجہ صاحب آئے تے چاچے جلسہ کرایا تے سرکار دے دتے لاؤڈ سپیکر تے تقریر کیتی۔ "مثنوی مولانا روم وچ لکھیا اے یوسف علیہ سلام نوں وکھان لئی حضرت زلیخا نے سہیلیاں نوں محل وچ بُلایا۔ سہیلیاں یوسف علیہ سلام نوں ویکھ کے خوش ہوئیاں ۔ محل دے رانگلے شیشے ویکھ کے بھی خوش ہوئیاں۔ ڈی سی صاحب یوسف ثانی نیں تے ضلع وچ ایہناں دے کم رانگلے شیشے ! اسی لوک خوش آں جوں حضرت زلیخا دیاں سہیلیاں !"بعد وچ ڈی سی ساحب کہیا، "انج دی کوئی گل مثنوی وچ مینوں تے نہیں یاد پوندی ؟"چاچا ہسیا، "سر تُہاڈا دل بھی تے خوش کرنا ہوندا اے !"کجھ راجہ صاحب دی کوشش کجھ گورنر صاحب دی چاچے نوں اُنی مربعے زویں سندھ وچ لبھ گئی۔ بھٹھے بھی چاچے جا پوائے ۔ چیمیاں دی نسل سور گئی ۔ پنج ورھے پہلوں چاچے تریہاں ورھیاں بعد اوہ اُنی ویچ کے چھ لوکے وچ خرید لئے۔ امراؤ ہسنا، "چودھری سندھ دا بھٹھا بہا آیا اے ہُن پنجاب دی واری اے!"
اج پاکستان دی گولڈن جوہلی تے چاچا مویا اے تے سوچنا ہاں وقت گُزریاں پتہ نہیں لگدا ! کل دیاں گلاں لگدیاں نیں ساریاں ۔ چاچے ہوراں اکثر آکھنا، "میں پاکستان بنان وچ حصہ پا کے ہتھ بنھا لئے۔ بے ایمانی کرن نہیں سی ہوندی آپنے ہتھیں بنا کے ! اج سو ستلج ملاں میں لوائیاں ہوندیاں!"امراؤ ہس کے پُچھنا، "سندھن چنگی ہوندی اے کہ پنجابن؟" "اوئے چیچہ وطنی ویکھیا نہیں تے گلاں ہند سندھ دیاں کرناں ایں۔ لبھ جائے کدھرے اک میم دی بچی رکھ لاں ! کیاں بات سی انگریز باتشاہ دی ! پر میم اسنوں کوئی نہ لبھی!"


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels