Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی لیکھا >> تِن کانے

تِن کانے

نادر علی
January 31st, 2009

تِن کانے

تن کانے تے نہیں اوہ تن کالے آہے۔ مُلھو اوہناں دا پیو اجے جوان سی۔ اوس تے ستو مربے وچ دھڑے تے چھپر پا لیا۔ مُڑ چل سو چل ۔ تن اگڑ پچھڑ ملُو دے پُتر ہوئے واہگہ ،لدھا تے کھوکھرا۔ مساں مر کے ورھے ورھے دا فرق ہوسی تے ایہہ کھوکھرا اساڈی چک دی کھوکھراں دی آبادی پچھے نال دھریا۔ "ایہہ دو تے ساہنسی ہوئے اک سوچیا لو کے دے ذمے بھی لاواں !"مُلھو ہسیا۔ میں کہیا "ہے تے کالا"۔ "مُڑ کسے راہئیے دی سٹ ہوسی !"مُلھو دب ہسیا! ملُھو دے ہاسے تے ایہناں تناں کلوٹیاں جوں میراں گھر وسایا ہویا سی۔ میرے گھر اولاد نہ ہوئی ۔ میں آپ پیو دا کلا پُتر ساں۔ میری بُڈھی نے کدے جھورا کرنا تے مُلھو ہور ہسنا ۔ "ستو سُون آلی اے چودھرانی ! اک توں بھی لے کے پال لئیں!" اوہ چار ورھے اوس کولوں کسے حال پُچھنا تے اوس ہسنا، "ول آں چودھری ! ستو سُون آلی اے !"اکھے "ول آں چودھری ستولیری اے ! پر چوتھے سال جوں نظر ای لگ گئی۔ مُڑ کوئی اولاد نہ ہوئی۔
ایہہ تن جنے مُڑ ریہڑے پے گئے۔ میں آپنا سارا مربع کراہ لیا تے کم ودھ گیا۔ اک مربع میں ٹھیکے تے لے لیا۔ "پُتر میرے ہوئے نیں چودھری بھاگ تینوں لگ گئے نیں۔ " مُلھو ہسنا۔ تنے لیلیاں ہار ستو مگر مربعے وچ بھجے پھر دے سن۔ ہور دو ورھے لگھے تے ہتھ پئے پواندے آہے۔
پر چھوہر جوان ہوئے تے ہاسے مُک گئے۔ ایڈے جوان آہے جے کوٹھے ماوندے نہیں سن تے تنے چور ! تن کالے مُڑ تن کانے ڈاکو مشہور ہوئے۔
لوکے وچ میرے جیڈا سوکھا گھر کوئی نہیں سی۔ اٹھو پہر میں تے مُلھو کم کرنا۔ مُڑیاں دا دل کرنا تے اوہناں ہتھ پوا چھوڑنا۔ اتھرے ہوئے تے نکمے ! پر آہے ایڈے سوہنے یاں مینوں سوہنے لگنے ! اوہناں نوں ویکھ کے میری بھُکھ لہہ جانی ! اخیر اکدن اساڈے گھر سنھ لگی۔ میں اوڈ کھوجی بُلائے تے لوکے وچ ہاسا پے گیا۔ "اکھے کھرا چودھری دے مربعے نکلیا اے !"میں مُلھو نوں بُلایا۔ "چودھری مینوں کھوکھرے تے شک اے !"کہہ کے مُلھو دا رنگ فق ہو گیا ! "اوئے ایس ماں پاڑ دا ناں ای غلط رکھیا ہائی !"میں پتہ نہیں کیوں ہس پیا۔ "چودھری ہاسے دی گل نہیں۔ جے پُلس نہ ماریا تے میں تھاں مار دیساں ایس حرامدے نوں!"مُلھو رون ہاکا ہو گیا ۔ "پُلس دا میں بندوبست کر لیساں !"سادھ چور نوں پیا دلاسہ دیوے ! تھانہ آیا تے میں پرچہ خارج کروا لیا وڈھی دے کے ! مُلھو تیجے دن کھوکھرے نوں پھڑ کے میرے کولیایا تے کھوکھرے کولوں ٹُرن نہیں سی ہوندا۔ بس اک واری رُنا ساری حیاتی اوہ کھوکھرا! "ایہہ پیو مینوں مار چھوڑسی چودھری مُعافی دے چھوڑ !"اوس روکے میرے پیر پھڑ لئے۔
انج میں ایہہ سپ کیلے ! مُلھو نوں میں پُچھیا، "توں کیوں دُرلی دتھا بن گیوں ؟"اکھے، "ماں پاڑ آہدا آہیا چودھری میرا چاچا لگدا اے ؟"آہدا تے سچ ای آہیا۔ پر اوس نوں چور بنن دی تے جاچ آہی چاچا بنن دی نہیں سی ! چاچے تے چودھری ای بن جاندے نیں ! وقت بُرا آ گیا۔ بی ڈی الیکشناں مگروں راج ای چوراں دا ہو گیا۔ ہُن لہوروں بہاول پور تائیں میرا ناں بولدا سی ایہناں سُوراں پچھے۔ اتنے بد ذات جوں لوہے دیاں لٹھا سن ! پُلس دی پھینٹی اوہناں دے علاوہ کوئی جھل نہیں سی سکدا۔ وارو واری اک اندر ہونا پر دادا گیری بھی مینوں چنگی نہ لگی۔ میرا پیارا اوہا رہیا جو پہلے دن سی ! سوہنے بڑے لگدے سن ! ڈھیر سمجھانا پر اوہ تے جنگل دے جانور آہے !"اوئے مُلھو موڑ ایہناں نوں مرویسن !" "کیہ کراں چودھری ؟ کپاہ جے سانبھ لئی نیں !"اوس پوہے ماہیں آکھنا ۔ "کیہ کراں چودھری ؟ کنک جے سانبھ لئی نیں !"اوس جیٹھے ہاڑے کہنا۔
پر رُت بدلدیاں کیہڑی دیر لگدی اے۔ دُوجا مارشل لاہ لگا تے بھارا ہویا مُلھو نوں تے مینوں۔ لہور اک ڈاکے وچ کھوکھرے فیر کھولیا تے گھرے آلے مر گئے۔ مارشل لاء لگا تے تنے کالے مُلھو تے میں اندر ہو گئے۔ میری تے مُلھو دی ضمانت ہو گئی۔ ملٹری کورٹ وڈھی دین واطے میں گھرے دی ہر شے ویچ چھوڑی پر میجر نہ منیا، "
These three have to swing!"دیز تھری ہیو تو سونگ !ـ"ایہناں تناں نوں جھوٹنا پوے گا"۔ میجر پہلوں انگریزی وچ تے ،ُڑ اُڑدُو وچ کہیا، میں گھر آ کے مُلھو نوں دسیا تے اوہ دس دینہہ ماندا رہیا تے یارھویں دینہہ مر گیا !
پر ماڑیاں نصیباں نوں ستو تے میں جیوندے آہے ۔ پھانسی دی آخری مُلاقات ستو تے رُنی سو رُنی ، میرا بُرا حال ہو گیا۔ اوہ ملاقات تے بولے گھٹ پر رُنے بھی کوئی نہ۔ ستو آکھیا، "کوئی گل کرو ایہہ چودھری بھی مر ویسی۔ تُساڈے پیو ہار !""بے بے ایہدی ہور بولی اے اساڈی ہور!"کھوکھرے آکھیا۔ "ایہدے نت پوں باراں ہن تے تیرے تن کانے!"


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels