Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی لیکھا >> جوگی پہلوان

جوگی پہلوان

نادر علی
January 31st, 2009

جوگی پہلوان

رُت پوہ دی ہووے تے اُتوں پچھم وگدی ہووے تے پالا تے جان کڈھ چھوڑدا اے۔ دُوجے ویڑھے اسی بابے حاجی دی فاتحہ واسطے بیٹھے آہے ۔ پیشی ویلے اوس نوں دب کے آئے تے گھرے آلے تے آپ جگراتے ، پالے تے سیاپے نال موئے پئے آہے ۔ مینوں ہُن شہر رہ رہ کے بھنجیں بہن دی عادت بھی نہیں رہی ۔ گوٹھ چوکڑی میتھوں ماری بھی نہیں جاندی۔ دو سویٹر پا کے اُتے لوئی لے بھی میں اک تے پالے دا پھنڈیا آہیا دُوجا بہہ کے دُعا لئی ہتھ نہیں سن چُکے جاندے ۔
لوک کرم کلی قبرستان تے پٹّھا دتّھا کر کے گھراں توں لگے آوندے آہے ۔ ہر نویں آون آلے آکھنا، "دُعا آکھو"تے مُڑ مُڑ کے ساری پھُوہڑی ہتھ چا لینے۔مینوں پالے تے دُکھدے لک نے بہوں تنگ کیتا آہیا۔ سار پھُوہڑی آلیاں جھورا تھوڑا تے کوڑے وٹے د روٹی دی اُڈیک باہلی آہی۔ اچراں اک بڑا بڈھا پر نانکا ٹُر دا بندہ آیا تے میرے ال کنڈ کر کے وچکار آن بیٹھا۔ میں پالے نال پیا مرد آہیا اوس اُتے نہ چادر آہی نہ کھیس ۔ چھرے ہوئے کُرتے وچوں وجود پیا سہی ہوندا آہیا ۔ آ کے بیٹھا بھی انڈول جوں پکھی آن بہندے ہن۔ اوس گوٹھ بھی نہ ماری انج لگے لنگاں اُسدیاں آہیاں کوئی نہ ! تے دھڑ سدھا تیر کھلا آہیا پھُوہڑی تے۔ "اساں سردی بھی نہیں لگدی؟"میں کول بیٹھے بابے حاجی دے پُت کولوں پُچھیا۔ "بابا جوگی ! تیرا بھترئیا چودھری افضل پیا پُچھدا اے پئی بابے نوں سردی نہیں لگدی ؟"بابے جوگی ہس کے میرے ال مُونہہ کیتا۔
"پُترا چاچے دا یڈا فکر ای تے برانڈی لیاوے ناں مینوں !"
بابا جوگی میرے نالوں کوئی تریہہ ورھے وڈا ہوسی میں پجاہ ٹپ گیا ہاں تے اوہ بھی اسیّاں توں ڈھیر ای اُتے ہوسی ۔ بابا جوگی پہلوان اساڈی جُوہ دا اکلا پہلوان آہیا جس نُور پور شہر جا کے وڈیاں جوڑاں نال گھول کیتے۔ اخیرلی کُشتی سن چالیہہ دوالے اک اشتہار وچ اوہ سبھ نالوں وڈا جوڑ بھی آہیا۔ "جوگی پہلوان پٹھا بہادر پہلوان کراڑی والا"بمقابلہ "بنی بخش پہلوان پسر گُونگا پہلوان رُستم زمان !"گُونگا پہلوان تے جگ وچ مشہور سی پر اوسدے پتر دا مینوں صحیح ناں بھی یاد نہیں ہن ۔اصؒوں اجے چھوہر سی تے جُثے دا ہولا۔ جوگی نور پور شہر اک دوچھڈ کے سبھ نوں ڈھا بیٹھا سی۔ اوہ وڈی عمر دے وڈے ناویاں آلے پہلوان آہے۔ اوہ چھوہر کولوں ڈھینا نہیں سن چاہندے ! نور پور دے ٹھیکداراں واطے گونگے دے پُتر دا بڑا نام سی۔ وڈے اشتہار لگ گئے سارے شہر گجرات کُجراں آلے تے سیالکوٹ ۔ پڑاں وچ تے تن شہر سم جاندے۔ پڑاں اُسدن بھریا پیا آہیا۔ گُونگے دا پُت اصلوں چھوہر آہیا تے ہولے جُثے دا۔ بابا جوگی بھی ہولے جُثے دا سی پو لوہے ہار تے کمایا ہویا پنڈ اوس کئی واری آپنے نالوں دُونے جنے ڈھائے گونگے دے پت دا گورا رنگ تے تکھے نقش آہے۔ اوس وڈی کالی پگ بدھی آہی۔ جوگی دا مارا جیہا صافہ آہیا اوہ بھی منگیا ہویا۔ ویہہ نکے جوڑ گھل بیٹھے آہے۔ میں اجے پندراں دانہیں ساں پر گھلیاں میں بھی۔ اک دو جوڑ انجیں نکیاں منڈیاں دے بھی ہونے۔ اشتہار تے ناں چھپیا "افضل پہلوان پٹھا جوگی پہلوان کراڑی آلا !"میں کنی ورھے اشتہار سانبھ کے رکھیا آپنے ناں پاروں۔ موچیاں دی دکان تے بھی لگا رہیا اوہ اشتہار کوئی ویہہ ورھے۔ بابا جوگی لوکے دا پہلوان جد وڈا جوڑ بنیا!
پر میں تے پہلوان بنیا روگی کر کے ١ روگ تے جماندرو آہیا۔ سیانے پنڈت بدری ناتھ میرے چاچے نوں کہیا ، "ایہنوں زور کرایا کر ۔ کسے اکھاڑے تے چھڈ دے ۔"بابا جوگی دا کُھوہ لاگے سی تے کُھوہ تے اکھاڑہ سی۔ وڈے ویلے چھوہراں زور کرنا۔ گُھلاہ گیڑنا زور واطے تے نہان لئی۔ لوکے وِچ شہر آلے شگن تے نہیں سن، فیر بھی میرے چاچے اِک نواں کھیس دھرایا بابے جوگی دے قد میں، تے اکھاڑے تے گُڑ ونڈیا۔ پر چیہڑی بابے گل آکھی اوہ مینوں ساری عمر نہ بُھلی۔ میرے چاچے دسیا پئی پنڈت ہوراں زور لئی آکھیا اے جوگی کہیا، "چودھری ایہدے نالوں کیہڑی چنگی گلا اے۔ جیہنوں زور دی لوڑ ہووے اوہ تے سر پر زور کر سی! زور شونق نال مان نال بھی لوک کردے ہن۔ پر سِرے تے اوہا چڑھدا اے، جِس اُستاد دا حُکم سمجھ کے کم کیتا! گُرو کہیا، رب نوں منظور ہویا تے ہو گیا! واہ جی واہ ایہنوں تے لوڑ اے! واہ جی واہ چودھری داتے آپ دِل لگسی۔ جا چودھری ہُن ایہہ روگی جوگی تھی ویسی!"میں رانجھے ہار جوگی تے نہ ہویا پر رانجھے ہار گُرو میری لوڑ پچھاتی۔ دو سالاں وِچ شاہ پکن لگ پیا۔ دو داء بھی سِکھ لئے۔ پِنڈے وِچ شاہ پِھریا تے روگ بھی مُک گیا۔ خُدا جانے نمونیا خراب ہویا سی۔ دمہ سی کہ سُوکھا سی۔ مُک گئی۔ میں اکھاڑے بھی گُھلیا تے دنگل بھی جوں میں دسیا اے پر دِہویں جماعتے دھیان دی پڑھائی ال لوڑ سی۔ پڑھائیاں نوکریاں تے چودھراٹ دے آہریں میں بُھلا۔ گراں بُھلا سجن بُھلائے۔ پیسہ تے آ گیا پر روگ بھی مُڑ آلگا۔ رب دی بڑی مہر آہی کوئی ڈاڈھی ازمیش بھی نہ پئی بس چنگیاں بھاگاں دی ہی مار وگ گئی۔
بابے نوں اوہ از میش پئی جیہڑی جگ وِچ سبھ نالوں ڈاڈھی اے۔ اکلا جوان پُتر ماری اگیا۔ زور اُوس کیہ کرنا سی۔ اوہ تے ایس نویں زمانے وِچ آیا۔ جد پہلوانی مُک گئی۔ بابے آکھیا، "ہُن لوکے نوں نِرا پیسہ لوڑی دا اے گھول تے جوگ آہیا!"بابا شیت چوکھا پہلوانی دھڑے دا آہیا۔ پر دنگلاں، ٹھیکیداریاں، شرطاں تے نُورا کُشتیاں وِچ بھی پہلوانی دی رِیت رہی۔ رِیت عام بھی آہی تے لوکاں نِبھائی بھی۔ نویاں کھیڈاں نِری کُشتی نہیں وِنجائی۔ لوکے وِچ ساریاں کھیڈاں ای مُک گئیاں۔
پر بابے جوگی دا پُت حسینا مویا تے لوکاں کہیا بابا مر ویسی ویر نِھانا تے اِک کُچجا آہر آہیا تے بابے دے ٹبر نہ پیسہ آہیا تے نہ جبا نہیں۔ اوس فیر اوہا گل کیتی۔ "چودھری کیہ کردا مر بھی نہیں سکدا۔ میریاں دو دِھیان ہن اِک دُکھی حسینے دی ماں اے۔ چودھری جیون دی لوڑ اے سو جیونا ہاں!"
اج میں روگی تے بابا جوگی اجے بھی جیوندا آہیا میں پُھوہڑیوں اُٹھا تے بابے نال اُسدے گھر تائیں گیا۔ میں آپنی بیماری دی بپِتا سُنائی۔ بابے کہیا،
ـ"چودھری تینوں خبرے صحت لوڑی دی نہیں۔ میں سیانا تے نہیں تے جیون مرن رب دے ہتھ اے۔ پر چودھری دِل مندا ہووی تے ٹھیک ہو ونج!"گل تے پُرانی آہی پر کئی گلاں پلے بجھیاں بھی بُھل ویندیاں نیں۔ تیرا روگ ایہا سہی ہوندا اے پئی توں ٹھیک ہوونا نہیں لوک روگ پئے پالنے آں بُھکھ مُتھاجی وڈے روگ ہن۔ پر روگ نال دِل سارے لوک کٹھے لائی بیٹھے ہاںَ کیا راجہ کیا منگتا سبھ روگی ہاں!"رہا کوئی ہووے سیانا جوگی جیہدے سارے جی چیلے بن جایئے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels