Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی کارا >> میلے چِت کٹھور جیو

میلے چِت کٹھور جیو

نادر علی
January 31st, 2009

میلے چِت کٹھور جیو

سردار جگت سنگھ نُور پور ضلع دا جگا ڈاکو مویا تے پھگن دی پنجویں سی۔سارا جگ ہی آیا اوس سُلکھنے دا مونہہ ویکھن۔ اوہ آہیا ہی سُلکھنا ! ڈاکو توں بھگت بن گیا ! سچے پیر یارھویں آلے چوروں قطب بنایا ! ایہہ بھی گُرواں دے گھر لاڑھا ہوسی ! کوئی خلقت آئی اوہدے مرنے تے ۔ الوکے چلو کے ہل نہ وگے۔ گھر آلیاں تندور نہ تائے ، ڈنگراں کسے پٹھے نہ پائے ، جاتکاں روندیاں نوں ماواں دودھ نہ پوائے ۔گل وچوں کجھ انج بھی آہی پئی زنانیاں اوس سوہنے دا مونہہ تکن آئیاں۔ اج کوئی پڑدہ نہیں سی تے جیہناں چھُپ چھُپ دلے وچ اوہدیاں گھوڑیاں گائیاں اج کھلہیاں پئیاں روون لے لے ناں بھراواں دے ! لوکاں ایہہ بھی کہیا پئی زنانیاں سلُکھنے نوں ویکھن آئیاں تے جنے تاجو کنجری نوں ! اُنج تے اوہ بھی اوس بھگت دی جوگن بن گئی ۔ جدوں جگے ڈاکو دیاں
کسے اکھاں کڈھیاں تے اوہ سٹھاں دے گیڑ آہیا تے تاجو تریہیاں ورھیاں دی ہوسی۔ بابے انّھا ہو کے مُجرے توں توبہ کر لئی۔ جد تائیں "رب اکھاں دتیاں ویکھنے نوں"اُس حُسن دی سرکارے متھا ٹیکیا۔ اوہدیاں عاشقاں تے تاجو تے رل گئیاں تے رہیاں عاشق سوہنے دیاں پر سوہنے یعقوب علیہ السلام ہار اندرچانن ہو گیا ۔ اُساں اُس دا گواچا یوسف لبھ گیا۔ اوس چوریاں چھڈ سیوا تے زنانیاں تے کام نوں چھڈ نام اپج لیا۔ سیواکیتی ماڑے دی۔ اُثا بولیا نہ ! مان چھڈ دتا ! تے تاجو کنجری بھانے جہان دتا۔ ہولی ہولی ترلے پاندی روندی تے تڑفدی عاشق گواچے نوں جوانی جاندی نوں اخیر اوس بھی جو گیا پا لیا آہیا۔ مرضی نال گاونا تے اوہ بھی اجیہا پئی نشے تے غزلاں دے مارے گاہکاں دا نشہ ہرن ہو جانا۔ "اسی نمازاں نہیں پڑھن آئے"کئیاں سڑ کے بولنا۔ اوس غلام فرید چھڈ کے کسے شاہ حسین لہورئیے دی کافی چھوہ دینی ۔ کسے ناں بھی نہیں آہیا آوندا اوس حسینے دا ! مادھو لال دے عاشق نوں تے دنیا جاندی آہی۔ میلے چراغاں بھی جانا۔ "سالُو سہج ہنڈھا لے نی"اوس گاونا تے رونا ۔ کئیاں روندی نوں ویکھ کے رو بھی پینا تے ٹاویں ٹاویں لوء بھی لگنی۔ پر اوکھی گھاٹی آہی۔ "سارے راتی ماواں کول سویوں!"اوس چھتھا پے کے بس کر دینا ۔ پر آہی حُور تے آوز کنیاں پھگن دیاں۔ رہ رہ کے لوکاں مُڑ آونا۔ اج پھگن دی رانی جیہڑی کوئی بتالیہاں دے گیڑ ہوسی۔ جو گیا لاہ کالے پا کے آئی سی۔ پر آہ بے پرواہ ویکھن والیاں توں !
ٹبر تے آہیا کوئی نہ اوس سُلکھنے دا، لوکاں بھی اج تاجو کنجری نوں گھرے آئی ہار عزت دتی۔ آہی مجال کوئی سواگت نہ کردا۔ اکھ نہیں ٹھہر دی اوہدے اتھرواں دھوتے مکھڑے تے۔ مرنا بھی عجب گھڑی ہوندی اے، سارے جیون دے راگ چھڑ پیندے نیں ! جیوندیاں نوں موت تے مویاں نوں حیاتی یاد آوندی ہے !
اج نورے ڈوگر دی گنڈھ دلے دی کھل گئی۔ نُور آپ ڈکیت آہیا۔ سُلکھنے دے نال آپا مقابلہ کرنا۔ پر جد سُلکھنے چوریاں چھڈ چوراں دے کھرے کڈھنے شروع کیتے تے کھوجیاں دے مگر روز اوس گھوڑی تے چڑھ آ ڈوگر دا بُوہا کھڑکانا۔ "ڈوگرا ڈنگر موڑ دے !"اُس پولا جیہا آکھنا۔ "سکھا ! جیون نہیں دیندا"ڈوگرے ہس کے کہنا۔ پر ڈنگر موڑ دینے ۔ بھوئیں پیو دی ونڈی گئی تے ڈوگر مربعیاں سیاست دان بن گئے سن۔ نور الدین ڈوگر مسلم لیگ دا ٹکٹ لے کے چھتالی وچ ایم پی اے ہو گیا۔ سرداراں بھی پیسے دتے آہے ممبر تے اُس ہو ای جانا آہیا پر اک نہیں اوہدی چودھر منی تے جگجیت سنگھ چٹھے نہیں منی !"چودھری لبھ چور دی تے چودھری دی اکو جہی ہوندی اے۔ چٹے کپڑے پا لئے نی ! ساڈے گُرو آکھیا اے چٹے جن کے کپڑے میلے چت کٹھور جیو !'توں چٹے پا کے ہُن اصلوں میلا تے کٹھور ہو گیا ایں ! ایہہ چوریاں پاریاں اُدھالے چھڈ دے۔ رب بندیاں نہیں بھالدا ! رب نیتاں جاندا اے !"ڈوگڑ دے دو شریک قتل ہوئے تے جگے نوں مڑ ڈوگر تے شک سی۔ "نوریا ظلم کیتا ای۔ ممبریاں نال تے لوک چوروں سادھ نہیں بن جاندے۔ ہن تے توں غریباں دی وستی چھڈ کے ماڈل ٹاؤن پاپ نگر دا واسی ہو گیا ایں ۔ چنگا تے توں تد ہوویں جے بھلا کریں کسے ماڑے دا۔ ممبری تے ناں ناویں دی چنگیائی اے
ـ" ـ"کیہ کراں میں جوگی بن جاواں جگیا ؟"ڈوگر اوکھا ہو کے بولیا "ڈوگرا میں انّھا ہو کے سُجاکھا ہویا ہاں۔ خبرے جوگی بن کے توں بندہ بن جائیں ۔"اج ڈوگر دی سُلکھنے کولوں تے جان تے چھٹ گئی پر دل دے بیٹھا تاجو نوں ۔ دیہاڑے دس گزرے تے نورا ڈوگر ہیرا منڈی اپڑ گیا۔ "تاجو میں سلکھنے دا جھورا کرن آیا ہاں"اوس گل چھوہی ۔ "توں تے میرے نال جھوراکر لیا اے۔ میں سلکھنے نوں جاننی ہاں۔ میں کیہدے نال جھورا کراں۔ کوئی اُسدگھرے آلا ہووے تے میں بھی جھورا کر لاں۔"ـ"میں اوہدا نکا بھراہاں"ڈوگر آکھیا۔ تاجو بولی نہ اگوں ۔ "تیرے بھی چاہن آلیاں وچ شامل ہاں۔""ہیرا منڈی آون واسطے بھرا ہو سو۔ پر پاسکو نہیں او اوسدے !"ـ"تاجو گھر آئے نال چنگی نہیوں کیتی، میںاسمبلی دا ممبر ہاں !"ـ"ڈوگر گل سنبھالن دا جتن کیتا۔
"ڈوگر صاحب رب دے ساہمنے تے کنجری اگے سبھ ننگے ہوندے نیں ۔ ممبری لاہ کے بہہ جاؤ۔ میں اج گاواں گی۔"ہور بھی دو چار شریف سفید پوش آ گئے۔
"تکھا تیج چابک اسوار کوئی نہیں ! تیں جیہا عاشق کوئی نہیں دلدار کوئی نہیں !"
"ایہہ مُردار جگجیت سنگھ واطے گاوندی سی"اک واقف بولیا۔ "تاجو اجے تیرے چاہون آلے جیوندے نیں"ڈوگر صاحب تھوڑی جیہی پی کے لہر وچ آ گئے۔ تاجو بھی پیوندی آہی ۔ جدن دا سوہنا سُلکھنا مویا اُس بوتل روز مکُا دینی۔ اج دوہاں دے دلے وچ چور آہیا۔ ڈوگر جگے دی معشوق نوں پھسا کے جگے کولوں بدلہ لین آیا سی تے تاجو جگے دے ایس جعلی بھرا نوں سدھا کرن واطے پُٹھی ہوئی بیٹھی سی۔ رہندے لوکیں اکھاڑا چھڈ کے ہولی ہولی ٹُر گئے تے ایہہ دونیں دھپ آہمنے ساہمنے۔ "نوریا کیہ ڈھونڈدا پھرنا ایں ؟"تاجو پُچھیا۔ نُورا کول ڈھکیا۔ اک ادھا
داء اوہ بھی جاندا آہیا۔ اُس پیر پھڑ لئے تاجو ہسی تے اوہ رون ڈیہہ پیا۔ "تاجو میں بڑا تہایا ہاں۔"اُس چھاتی نوں ہتھ پھیردیاں کہیا۔ "کاکا تینوں پتہ نہیں تینوں لوڑی دا کیہ اے۔ لے ایس سکے چوہے توں تیری تریہہ نہیں مُکنی ۔"اوس جھگا چا کے ڈوگر دے مونہہ نال لایا۔ پر ڈوگر اوہنوں مناندا تے پسماندا آپ ٹھنڈا ہو گیا۔ اوس شرمسار سُتھن سانبھی تے نس دی کیتی۔
"چودھری توں آپ نہیں جاندا تینوں کیہ لوڑی دا اے۔ نت نت خوشیاں تے نت سکھ دا تے اک پر چھاواں اے بھلے لوک ایس پر چھاویں دا اصل روز بناندے رہندے نیں۔ تیرے وچ یاں یاں میرے وچ ایمان دی رتّی ہووے تے سوانگ مک ویندا اے ! میں بڑے بھور ڈٹھے ، جیہڑے پھلاں کولوں سن پتراں سن ڈالیاں اُڈ گئے ! پھل تاں اُجڑ گئے پر لین والے دی بھکھ پھیر بھی کدی نہ مکی۔ جا آپنا ڈھونڈتے چھڈایہہ کُوڑ پسارا!"
ڈو گر ماڈل ٹاؤن آلی کوٹھی آراتی بُوہا کھڑ کایا جُوں کِدھرے واردات کر کے نٹھا ہووے! سمجھ اوہنوں کوئی نہ آئی کِسے گل دی! لیٹ کے اوس "حال اوئے! حال ائے" ہُنگارا ماریا تے نادے اوہدے خاص مُلازم تریہہ کے پُچھیا، "خیر اے ڈوگر صاحب؟ کِسے اُچی نِیویں گل تے نہیں کیتی؟""نہیں اوئے مینوں لگدا اے جوں جگے دا جِن پے گیا اے!""خیر مہر اے چودھری جی! دس دِن موئے دی بد رُوح پِھر دیا اے۔ "
ـ"نہیں نادر دِینا! ایس سوہرے میری جان نہیں چھڈی! کدے ڈکیت کدے کھوجی کدے بُھوت تے کدے اِک سوہنی عورت بن جاندا اے!"


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels