Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> قصہ کہانی >> رات ۔ ہک

رات ۔ ہک

مرزا حامد بیگ
January 30th, 2009

رات __________ہِک

اُس آبادی چ ازلاں توں ہنیرا ہیا۔
چواں پاسے ، وڈے تے گھنے کوانہہ ہئے، جیہناں نی آوازاں نے شرلاٹ اُتھے نے ماحول آں ڈراونا بنا دتا ہیا۔ آبادی نے وسنیک اُس ڈاڈھے ہنیرے چ اپنا ساہ گھٹینا محسوس کرنے ہئے۔ ہولے ہولے اوہناں نے مونہہ مُہاندرے پیلے پے گئے ، تے ہتھ پیر شل ہوون لگے ۔ برے اوہ جینا منگنے ہئے۔
اُس گھُپ ہنیرے چ ، جتھے ہتھے آں ہتھ سُجھائی نہیں دینا ہیا، حیاتی نا کاروبار جاری ہیا۔
لوکاں اپنے گھراں تے بزاراں چ نکے نکے ڈیوے بال گھدے ہئے ۔ بزارے نیاں دکاناں تے گھار ، اُجاڑ قبرستان آر ہئے ، جیہناں نے مجور ، جیوں تیوں اپنی لکھی نے دیہاڑے پئے پُورے کرنے ہئے۔
کُل مخلوق ہکی دُوئے کولوں ڈرن نی کوئی وجہ نہیں ہئی برے اوہ سارے بڑیاں اوپریاں فکراں چ ہئے۔
ہکی دوئے نال گلّاں کیہ کرنے ہئے ، گوشے کرنے ہئے ، تے گل کرن توں پہلے ڈیوے نی نمی لو وچ ہکی دُوئے نیاں شکلاں چنگی طرح پچھان گھینے ہئے، متے کسے ترئیے بندے تک گل پہنچ ونجے تاں کوئی مصیبت بن کھلووے ۔
سبھے اپنے گھراں چ بچیاں واں ہولی ہولی گل کرن نی تلقین کرنے ہئے، اوہناں ساریاں ، گھراں نیاں کدھیاں تے وڈے وڈے اشتہار ٹنگے ہوئے ہئے۔
"کدھیاں نے بی کن ہونے ن۔"
"اُچّی واز وچ بولن تے مصیبت تُساں تے ای نہ آسی ، سارے گھرے چ مصیبت اُٹھ کھلوسی۔"
اُس آبادی نے بُڈھے چٹ کاپڑ ، جیہناں بہوں پہلوں اس اُجاڑ جاگھاں چ پہلی مسیت بناون نا خواب تکیا ہیا ۔ ہن پشیمان ہئے۔
ہویا کیہ کہ اوہناں اتھے آباد ہوون ویلے خیال کیتا ہیا کہ دیوں اپنا رستہ بدل گھنسی تے اس بھاری جاگھاں چ بی چاننا ہو ویسی ۔ پرے ہُن اوہ اس ازلاں نے ہنیرے توں اک کے پچھتانے ہئے، تے اپنے اندراں چ چھُپ کے ونے ہئے ۔ اوہناں نیاں مریاں مریاں گل گھوٹو وازاں چ وین ، راتی نی چُپ چڑانگ چ دُور دُور سُنینے ہئے۔ مدتاں توں روون والے اس گلاں ناخیال رکھنے آئے ہئے کہ آبادی نے دوئے وسنیک اوہناں نی وجہ توں اوکھے نہ ہوون ، برے ہُن اس ازلاں نے ہنیرے تے ہُماں توں اک کے کدی کدار کوئی ہک ادھا بندہ گلا پھاڑ کے چیکن لگ پینا ہیا ۔
"چاننا۔۔۔۔۔۔۔۔ چاننا۔۔۔۔۔"
چُپ نی چار دیواری تُرٹنی ہئی تاں لوک ڈرے نال کمن لگ وینے ہئے، اس کر کے کہ ہُن عذاب پھُٹ پیسی۔
ایہہ خیال کر کے ای چیکن والا بندہ مر وینا ہیا۔
کجھ دیہاڑیاں بعد جدوں اُس نا مُڑدہ خراب ہونا ہیا تاں اُس نی بخشیش واسے دُعا کرنے ہئے تے اُساں عزّت احترام نال دبنے ہئے۔
اُس نی قبراں دائیں ہتھ کر لوک قسماں کھانے ہئے، تے اپنے پیاریاں واں اُس نے بھیڑے انجام توں ڈرانے ہئے۔
جدوںساون نی پہلی کنی پینی ہئی تاں آبادی نا ہنیرا ہور ودھ وینا ہیا، برے اوہا دیہاڑے ہونے ہئے جدوں لوک مُدتاں بعد آپے چ ہس بول گھینے ہئے۔
موسم نکھرنا ہیا تاں چھتاں تے پھُل کھڑنے ہئے۔
کڑیاں سُرمہ دانداسہ کرکے اپنے اپنے ماہیے نے گاون گانیاں ہیاں ، تے اپنے منگیوے فال کڈھنیاں ہیاں۔
برے ایہہ سارا کجھ تھوڑے دیہاڑے ای رہنا ہیا رُتاں بدلیناں ہیاں تے وت اوہ ہنیر ۔۔۔۔۔۔۔
وت لوک اپنیاں پاٹیاں اکھیاں نال ایہجے نظارے تکنے ہئے کہ اوہناں نیاں جیبھاں تالُواں نال جُڑ وینیاں ہیاں تے بُڈھڑے چٹ کاپڑ خیالی شہراں نے خواب تکن توں بی رہ وینے ہئے۔
لمیاں مُدّتاں ، اس آبادی نے وسنیکاں کجھ ایہجے چکر چ چکرا کے عُمراں گال دتیاں کہ ہلی نہیں تے سلی نہیں۔
اوہ ایہجے اسمانی تارے ہئے جیہڑے تُرٹنے ہئے تاں اپنے پچھے لمیّاں لیکاں چھوڑ وینے ہئے۔
اُس نہ مُکّن والی رات چ ، چند ہک سیانے تے نیک لوکاں اسمانی صحیفے آپو لکھ لکھ کے ہنیرے نیاں وسنیکاں تک پہنچائے ۔ تد لمیاں مدّتاں بعد سارے ڈھینے گُڑھنے اکٹھے ہوئے تے اپنے ای چوں چند جواناں واں اوہناں امام ضامن بدّھے۔ جواناں واں متھیاں تے پیار دے کے دیویں آ لبھ کڈھن واسے گھل دتّا۔
ساریاں دروازیاں نیاں مہاٹھاں تے کھلو کے بچیاں تے تریمتاں اپنے ہتھ تے سرے نے چیڑے ہلا کے اوہناں واں خُدا نے سپرد کیتا۔ جھُڑلیاں والے مونہہ مُہاندریاں واں کسی ان ڈٹھے خوف نیاں لکیراں ہور بُڈھا کر دتا۔
بہوں دیہاڑے لگھ گئے۔
گئے ہوئے نہیں پرتے۔
مسافر ہوون ویلے اوہناں مُونہاں نے کٹورے بی بی کے تے چیک چیک کے ساری آبادی چ چاننا کرن نا ذمہ گھدا ہیا۔
اوہناں نیاں مُونہہ بولیاں بھیناں تے مانواں اوہناں واں
یاد کر کر کے تھک گئیاں۔
اوہ پھُل ہمّس گئے ، جیہناں نال ستّاں سُہاگناں اوہناں واسے ہار بنائے ہئے، کنواریاں کُڑیاں شادی نے خواب تکنیاں تکنیاں بُڈھیاں ہو گئیاں تے بُڈھیاں مانواں نا ایمان ، امام ضامن توں اُٹھ گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels