Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> قصہ کہانی >> قِصّہ کہانی

قِصّہ کہانی

مرزا حامد بیگ
January 30th, 2009

قصّہ کہانی

مُکنی گل ای اے کہ میں کدے بی اُدھار گھن کے واپس نہیں کیتا ۔ میراخیال ہیا اُدھار گھدا ای اس واسے وینا اے کہ واپس نہ کیتا جُلے ۔ میں پچھلے پنجاں سالاں نی بیکاری نے دناں وچ اتنا اک اُدھار گھن چُکا واں کہ واپس کرن تے آواں تاں اگلے پنج سال بھُکھا بیٹھا رہواں ۔ برے اج میں ستاہراں روپیاں نامنی آرڈر بھیج کے دو سال پہلوں کھادے ہوئے اُدھارے کھانے نا بل ادا کرنا چاہناں صرف ہک بل جس ناکدے کسی نہیں پچھا ۔ برے جس مانہہ ہر ویلے اپٹھا لٹکائی رکھا اے۔
ہُن اُس ہوٹلے ناپتہ مانہہ پوری طرح یاد نہیں رہیا، برے میں ای جاننا کہ ایہہ پیسے اُساں پوہنچ ویسن ۔ میرے جیہا خبیث بندہ اُس نے پیسے نہیں مار سکا تاں ہور کوئی نہیں مار سنا۔
دو پہلوں شہر چوں آنیاں۔ آخری دیہاڑے ، کاؤنٹر تے پئے ہوئے رجسٹر تے دستخط کرنیاں، میں اس نال جھُوٹھا وعدہ کیتاہیا کہ گھار پوہنچنیاں ای سارے پیسے بھجوا دیساں، تے اُس جواب دتا ہیا، او یرا میرے پیسے کدھر نہیں وینے۔ بے غم رہو۔ میرے ہوئے تاں آپے پوہنچ ویسن۔
تے میں اس ویلے سوچیا ہیا، "تُوں بی بے غم رہو۔ میں کدے اُدھار واپس کرنے واسے نہیں گھدا۔"
برے اج پہلی تنخواہ لبھی اے تاں اوہ یاد آیا اے۔ میں اپٹھا لٹکیا ہویا اس نا پتہ یاد کرناں۔
میں اپنے آپ آں اج پہلی واری اتنا کمزور پیا ویکھناں میں اس تنخواہ چوں ہک پیسہ بی اُدھار لاہنے چ ضائع نہیں کرنا چاہناں ۔ برے میں کیہ کراں میں بے بس آں تے اوہ پیا آکھنا اے :
"یرا، میرے پیسے کدھر نہیں ونیے۔
اج تنخواہ گھینے ویلے دستخط کرنیاں مانہہ اُس نے کاؤئنٹر تے پئے ہوئے رجسٹر نے دستخطاں ، وت ہک واری سرے نے بھار کر دتّا اے میں اُس نے ہوٹلے وچ اپنا پہلا دیہاڑا یاد کرنا واں۔ اس دیہاڑے کسی پاسوں روٹی نی درک نہیں ہئی تے میں اس شہر نا ماتر پُتر ہکی نکی جیہی بند ہٹی نی مُہاٹھاں تے بیٹھیا ہویاں اس ہوٹلے نے اندر باہر ہونیاں لوکاں واں پیا ویکھنا ہیاں، پتہ نہیں کیجوں تے کیہ سوچ کے میں بی اندر وڑ گیا ہیاں تے رج کے روٹی کھادی ہئی۔ بعد وچاء پی کے میں آرام نال کاؤنٹر نے کولوں ہو کے باہر نکل آیاں۔ اس بی پچھوں واز نہیں دتی ۔ میں پورے ست دیہاڑے روٹی کھانا رہیاں تے اُس جنے نے پُترے پرتایا نہیں۔
آخری دیہاڑے میں آپ ای کاؤنٹر تے کھلو گیاں ۔ اوہ مانہہ کھلوتا ویکھ کے دُوئے پاسے ویکھنے آں لگ پیا۔۔۔۔۔ میں گھار پوہنچنیاں ای سارے پیسے بھجوا دیساں ۔
اوہ یرا، میرے پیسے کدے آپے پوہنچ ویسن۔
میں اُتھے ہکی سنگیے نال گل کیتی تاں ہس پیا۔ آکھن لگا :
"میں تاں تُداں پہلوں وسا ای نہیں ہیا کہ غریب نا بالمارا ویسی ۔ سچ پُچھیں تاں ویلے بیویلے میں بی اُتھوں ای پیاکھاناں۔ برے یار لوک آکھنائے ۔ اوہ اپنا کھادا پیتا جدوں چاہوے رکھا گھنے۔
وت اُس مانہہ ہک کہانی سُنائی کہ ہوٹلے والے نا ہکا پُتر ہیا، عُمر ہوسیں کوئی ستاراں اٹھاراں سال۔ بڑا سوہنا۔۔ ۔۔ اوہ گم ہو گیا ۔ پُورے پندراں دیہاڑیاں بعد شہر نے ہکی بند مکانے چوں ہک لاش لبھی، بالکل ننگی شناخت کرنے تے پتہ لگا کہ اسی نا پُتر اے ۔ لوکاں نا ٹھاٹھاں مارنا سمندر، جس وچ اوہ ہکلا، ہر بندے نے مونہیں دائیں پیاویکھنا ہیا، کسی بندے اُس نی اکھی چوں اتھرو کرنیاں نہیں ویکھا ہکا چُپ۔
رولا پیا۔ پُلس والیاں پُچھ گچھ کیتی۔ اس توں پُچھا گیا کہ کسی تے شک آ گیا تاں دس ۔ اوہ آکھن لگا "میری کسی نال دشمنی نہیں میں کس تے شک کراں ؟"
کُجھ لوکاں واں اسی نے ہوٹلے تے کم کرنے والے ہکی بڈھے نوکرے تے شک ہیا۔ برے اُس نا ہکا جواب ہیا "میں کس تے شک کراں ؟"اُس بندے تاں میرے پُترے آں اپنے ہتھاں وچ کھڈایا اے ، ای اس نی پیو نی جاگھا اے ۔ تُسی آپ دسو میں اس تے کیجوں شک کراں ؟
گل پرانی ہو گئی تے لوک بھل بھلا گئے۔
اوہ نوکر چپ چپ رہون لگا۔ ویکھنیاں ویکھنیاں اُس نے سرے نے سارے وال چٹے ہو گئے تے لوکاں چاء وینیاں اُس نے ہتھ کمن لگے۔
ہکی دیہاڑے اوہ صبح ہوٹلے تے نہیں آیا۔ شامیں محلے نیاں بندیاں داں اُس نی کوٹھڑی چوں اُس نی لاش لبھی۔
اس ہوٹلے نی ای چھری نال اپی گچی لاہ سٹی ئی ۔ اس موتُو نے گواہ  محلّے نے نکّے نکّے دو بچّے ہئے جیہناں نے ساہمنے دیہاڑی ویلے اس مرنیاں ، اقرار کیتا ہیا کہ ہوٹلے والے نے پترے نا قاتل میں ای آں۔
اس گلاں بڑے دیہاڑے ہو گئے نیں۔ ویکھ کے دسّو میرے سرے نے وال چٹے تاں نہیں پئے ہونے ۔ میں کمنیاں ہتھاں نال منی آرڈر۔ لکھناں ۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels