Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> سوہنے دا سیواں داباغ

سوہنے دا سیواں داباغ

نادر علی
January 16th, 2009

سوہنے دا سیوواں دا باغ

(مارگریٹ گرین دی کہانی دا ترجمہ )

آہندے نیں سیوواں تے بندیاں دا خاص رشتہ اے۔ سوہنے دا باغ بھی سوہنے ہار سی۔ بوٹے تے پرانے آہے پر اوہدے باگ جنا جھاڑ کسے دا نہیں سی ہوندا۔ سوہنے بھانے بوٹے جیوندے جیاں ہار آہے۔ اوس بوٹیاں نال گوشیاں کرنیاںَ راتی پورے چن دی چاننی اوس اک بوٹی کُٹ کے بوٹیاں دیاں جڑھاں تے لیپ کرنی ، جیہڑے بوٹے پرانے ہونے اوس کدے کٹے نہ ۔ اوس راتی آ کے اوہناں دیاں برملاں تے پھلاں تے ہتھ پھیرنا۔ پھر چنگیاں مالیاں ہار ہتھاں تے پتراں تے پھُوکنا ۔ بوٹے مڑ کے ہرے ہو جانے۔ بوٹیاں وچ اک پرانا بوٹا آہیا جوں اوہ بوٹیاں دا سردار ہووے۔ سبھ بوٹیاں دا اوس خیال کرنا تے راتی دا وگنی تے گاونا:
"سوہنا مالی ساوُ اےوسے اوسدا باگ
باگ بھی مالا مال اے تے سوہنے اوسدے بھاگ!"
باغ بوٹیاں دی تے سوہنے دی جوں ہر گل وچ اک رمز ہووے۔ پیلے رنگ دے بہار وچ مٹھے تے رسیلے سئیو لگنے تے سوادلے تے خوشبو والے۔ لوکوں چڑھدے ولوں دا وگنی تے سارا لوک باگو باگ ہو جانا جوں سئیو لوکاں دے ویڑھے لگے ہون۔
بہار وچ جدوں سئیو پکنے سوائے شاہ میلہ لگنا۔ سوہنے دا ڈھگا تے بُڈھا آہیا پر اوس گڈ ڈھو لینی ۔ اک بُڈھا کھوتا سی۔ اوس تے اوس چھٹ لدنی پیر ہوراں کول لے جانی۔ چھٹ دا چڑھاوا چاڑھنا پیر سوائے شاہ ہوراں دے ۔
اوہناں نوں سوہنے دے سئیو ویکھ کے چاء چڑھ جانے۔ اوہناں دعا پڑھنی تے لنگر وچ سئیو ونڈ چھوڑنے ۔ دوجے دن میلہ بھخنا تے سبھ توں پہلوں سوہنے دی گڈ خالی ہو جانی۔ ہن تے اوہنوں ہوکادین دی لوڑ نہیں سی۔ اوہدا جوانی دا ویلا یاد سی :
"ماندے لئی دوا تے تگڑے لئی غذا
سئیو سوہنے دے کھاوے ، جیہڑا پہلوں آوے گا "
"خیرے دے خربوزے مٹھے !"بڑا رولا خیرے پانا پر پھاڑیاں کر کے دینیاں تے مٹھے نہ ہونے ۔ اوس ہوکنا، "مٹھے نہ ہون تے پیسے واپس"پر لوہڑیاں کڑیاں رولا پانا، "خیریا پھکا اے !"اوس کہنا، "جا جا بلو ! رولا نہیں پائیدا۔ چوکھے مٹھے نہیں کھائیدے شوگر ہو جاندی اے !" بھلا پھکا سودا کنج وکے۔ شاماں تائیں انجے ڈھیر لگا۔ رہنا۔ بے وہتیاں دے رولیاں میلہ ونجا چھوڑیا۔
"دینے غناگار، دا شربت دیدار "
دینے کانے اینویں کھنڈ تے رنگ گھول کے پیا ویچنا۔مڑ اوہا "سر کڑی دا دھڑ لومڑی دا !" تے "سرخے دی سرکس"جتھے اوہا مویا جیہا شیر جیہڑا خبرے گوشت دی تھاں گھاہ کھاندا سی۔ میلہ آہیا ای سوہنے دے سئیواں دا ! ہر بندے اُچیچے سئیو لین آونا۔ پیر ہوراں بھی آکھنا، "سوہنیا جاندی بہار دا میلہ اے۔ اسیدوویں بُڈھے ہو گئے آں۔ میلے جوگی کوٹھیاں تھاں نہیں چھڈی ۔ سوہنے کہیا، "پیر جی انج نہ آکھو۔ مُنڈیاں واطے دعا کرو۔ میلے لگدے رہن دے مڑ گاونا، "میلہ میلیاں دا نہ پیسیاں دا نہ دھیلیاں دا !"پیر ہوراں کہنا، "سوہنیا لالچ ودھدا جاندا اے۔ نہ پیار ودھیا اے نہ برکت !"
آخر لالچ نے سوہنے دے باغ دا بھی آن اجاڑ کیتا۔ سوہنے دے دو پُتر آہے وڈے دا ناں ترکھا تے نکے دا ناں بھولا سی۔ تے آہے بھی سگمے ! ترکھے جیڈا چلاک کوئی نہیں سی تے بھولے جیڈا ساؤ کوئی نہیں سی۔ سوہنا مویا تے اوس آکھیا "ترکھیا بھولے دا خیال کریں۔ جو دیسیں اوہ لے لیسی "دتا ترکھے اوہا جیڑیا کسے نہ کم دا ڈھگا اتے پربت والے پاسے اچی زویں دے کجھ بوٹے جیہناں نوں ریتلا دھڑا کر کے کدے پھل پھُل نہ لگے۔
اک سال تے اینویں لنگھ گیا۔ ترکھے دے ماڑے کم اوس محنت نال بوٹیاں دی ٹہل سیوا نہ کیتی۔ گوشیاں تے گاون کیہ اوس بوٹیاں نوں جیوندا جی نہ جاتا۔ نہ کوئی درد نہ پیار اوس دے دلے وچ .........بھولے روونا تے آپنے سنجیاں بوٹیاں لئی بُڈھے داندتے لدھ کے ملھڑ لیا کے اوس آپنے حصے دے باغ وچ ملھڑ چا پایا۔ ترکھے ایک کنڈیاں والی تار لا کے باگے نوں ونڈیا ہویا آہیا۔ اوس کہیا "او بیوقوفا کدے کھنگر بوٹے نوں پھل لگد ا اے ؟"پر اوس نوں کیہ پتہ سی۔ بھولا تے اوس بوٹی بارے بھی جاندا سی جسدا بوٹیاں دے مُڈھ تے سوہنا لیپ کردا آہیا...........تے نالے ترکھے نوں
پتہ نہیں سی پئی اجے تے کجھ نویں بُوٹے پر بت والے دھڑے تے بابے سوہنے لائے آہے۔ اک دن باگاں دا سیانا بابا رانجھا آیا۔ اوس بھولے نال رل کے بوٹیاں دے مڈھ گوڈی کیتی۔ کُجھ نویں ٹونے دا نُسخہ آہیا ..... "اٹ سٹ تے بھاکھڑا کوار گندل اسیں ہور بھی بوٹیاں جاننے ہاں !"بابے رانجھے جاوندیاں کہیا۔ لوؤ جی کرنی رب دی کیہ ہوئی پئی بھولے دے سارے بوٹیاں تے پھل لگن لگ پیا تے ہولی ہولی ترکھے دے سارے بوٹے سک گئے۔ بھلا پانی گوڈی محنت بنا بھی کوئی شے پھلدی کھلدی اے ہن تے لوکاں آکھنا۔ اگلے سال بھولے بھی پیر صاحب کول چڑھاوا چڑھایا تاں جے پیو دی رُوح خوش ہووے۔ پیر صاحب بھی خوش ہوئے۔میلے تے بھولے دے سیواں دی دھم آہی۔ ترکھے دے جیہڑے تھوڑےمُچ سیو آہے اوس "سوہنے دے سیو ! کر کے ہوکا بھی لایا لوکاں کہنا
"خیرے دے خربوزے ماڑے ترکھے دے سیو مندے !
بھولے دے سیو انج چنگے جوں ہوون چنگے بندے !"
"بھولے داباگ " کدے نُور پورجاؤ تے پچھیو گرمیاں وچ جاؤ تے سونے ورگے سیوبھی ملسن۔
"سودے سدھیاں دے سونف ڈنگیاں دی !
پیڑے شرقپوری موج اے چنگیاں دی !


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels