Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> شاہ تے ساہو کار

شاہ تے ساہو کار

نادر علی
January 16th, 2009

شاہ تے ساہو کار


کرامت پور ایس جوہ وچ اکلا سیداں دا پنڈ اے ایہہ سید کتھوں آئے تے کد آئے؟ ایہہ تے لوکے دے مراثیاں نوں ای خبر ہوسی پر سہی انجے ہوندا سی پئی اساڈے وڈ کے سید کرمات حسین شاہ دا کم پیری فقیری نہیں دادا گیری ہوسی۔ شہراں دے نیڑے دے لوک دُھراں دے چور ای ہوسن۔ اساڈے نالے نکا جیہا پنڈ "شیطانیاں"بھی ہویا۔ تے سارے شہر تے اساڈے لوک بھی سیداں دی کوئی چنگی گل کدے سنی نہ۔ اکھے "آکھن نوں تے سید ہوندے دین دُنی دے تھم، دیہاڑی پین شراباں یارو راتی مارن سنھ!" پرا ساں ہسنا تے کہنا، "سید بھاویں کِنے گناہ کرے اوس دے رہنے گِٹے گٹِے۔ پر غیر سید اک کرے تے اوہدے گل گل ہو ویندا اے!"
پر ایہہ سبھ گلاں اساڈے دادے دے جنگلاں دے ٹھیکے تے چاچے بہشتی سید خیرات حسین ایم ایل اے توں پہلوں دِیاں گلاں ہوئیاں۔ ہُن تے لہوروں لے کے نور پور تائیں کوئی ایڈا وڈا راٹھ نہ ہوسی۔
شاہ تے اساڈے لوکے دولت شاہ لوکے دا ساہو کار بھی آہیا۔ جوں سارے پاسے ریت آہی لوکاں ہندواں ساہوکاراں بھی شاہ سدنا تے آل رسول نوں وی۔ دولت شاہ نوں تے شہانیاں دی اوٹ آہی پر لوکے وچ کوئی گھر سیداں دا اجیہا نہیں سی جیہڑا قرضئی نہیں سی دولتے دا۔
جِتنا وڈا اونا ای ودھ قرضئی ! دولتے آکھنا "گھرے والیاں ناں خیرات حسین ایس لئی رکھیا پئی اساڈے وڈکیاں دی خیرات نال پلے آہے!" استغفراللہ! پر آہے دوویں سوہنے تے عاشق اکدوجے دے۔ چاچا خیرات شاعر بھی آہے پر ویکھن وچ دولتا شاعر لگنا۔ چاچا سوہنا تے شوخا آہیا تے دولتا سوہنا تے دھیما۔ اوس کہنا، "سُچجے سیانے ساہوکار بنے تے کُچجے کنجر شہانے!"توبہ استغفار!
میں دولتے دے چھوہر مدن لال دا جماعتی ساں۔ اوس چوکھی گل کرنی تے میں ڈھا لینا، اکھے، "پرھ کلمہ!"اوس کلمہ پُٹھا سدھا پڑھنا تے میں ہور پتنا۔ میں کتاب چاکے اوہدے مُونہہ چا لینی۔ لے پترا ایہہ گؤ ماتا ای! کھادھی آ! ہن تے مسلمان ہو یوں!"اوس گھر جا کے شکایت کیتی۔ اوہدا پیو ہسیا۔ اوس کہیا، "پچھیں سو تیری بے نوں مچھی پکانی آوندی اے؟"میں آکے ماں نُوں دسیا......... "پتر سچ آہدا اے کھان پکان دا چج تے دولتے کیاں نوں ای آوندا اے۔ شہانے گوشت بھن کے آپنے آپ نوں بڑا کجھ سمجھدے نیں۔ دولتے دی بُڈھی جیہا اچار تے جگ وچ کوئی نہ بناندا ہوسی۔ اوہ چج والے بھی ہن تے ستھرے وی!
ـ"میں چھتھاپے کے کہیا، ـ"بے بے توں تے دولتے دا ادھار دینا ایں میں تے مدنے دا اھدار نہیں دینا!"
پر ادھار جیہا دولتے ادھار دتا۔ چھتالی وچ مسلم لیگ دے ٹِغٹ نال چاچا جتیا ہوسی پر پیسہ تے سارا دولت شاہ دا سی۔ اوس ہٹی لٹا چھوری۔ پر جتاندا نہیں سی دولتا؟ اساں جلوس کڈھیا تے دولتا ہٹی اگے ہتھ جوڑ کے انج کھلہا سی جوں زنانی ہووے کھلہی گھنڈ کڈھ کے!
دو دن بعد سنھ لگی دولت شاہ دے گھر۔ پرانی حویلی دولتے دی کچی آہی تے نویں پکی تے وچکار لی کندھ اک کوٹھری دی کچی۔ چوراں پرانی حویلی سنھ لائی تے مڑ کوٹھڑی وچ دی پسار وچ گئے۔ باہر اندر دی بہار آہی۔ جنے باہر ستے سن تے زنانیاں اندر۔ چوراں نوں لبھا کجھ نہ۔ اوہناں جاندیاں ٹوم کوئی لاہی رام دھائی دی۔ لوکے وچ تھر تھلی پے گئی۔ سہانیاں دے لوک آپے سارے چور اج سادھ بن گئے۔ رو ہے روہی سارا لوک۔ اکھے لوکے دی دھی نوں کوئی ہتھ پائے؟ "کسے ایہہ بھی کہیا پئی چودھریاں لہائی کیتی اے خیرایت حسین شاہ دی۔ شہانے دا مخالف چودھری خوشی محمد ممبر آہیا پرانا یونینسٹ پارٹی دا۔
اخیر سولاں اگست سن سنتالی والے دن جا چور پھدیجا۔ حویلیاں دووے ساڈے چاچے دے قبضے آہیاں۔ کچی وچ اساں ڈنگر بنھے تے پکی وچ جندرا پیا سی۔ اوس راتی سولاں اگست نوں راتی مالے والی حویلی مُنڈے جاگے۔ اسلاتے اکرا دوئیں بھرا ٹوئے پئے کڈھدے آہے پسار وچ۔ دگاں بھی خالی نکلیاں۔ ایہہ بھی دُھمی پئی سونے نال بھریاں آہیاں۔ کسے آکھیا سونا آہیا جیہڑا شاہ ہوراں کڈھا کے دلی ٹوریا۔ ایہہ بھی دھمیا پئی خیرات شاہ ہوراں آپ کڈھ لیا تے ماڈل ٹاؤن والی کوٹھی خریدی۔ سن چھتالی دی سنھ دیاں بھی کہانیاں ای بنیاں۔ تے سنتالی دیاں دی! پنڈ دے مسخرے کسے ایہہ بھی کہیا،"مایا دا کیہ پتہ لگدا اے!"مایا مدنے دی دادی دولت شاہ دی بے بے دا ناں سی! دو ورھے دو سکھنیاں دیگاں وچ ای نیز پکدی اے۔ بے بے قلعی بھی نہ کرائیاں۔ اکھے "دھو کے، شرط کر لوؤ!"شہانیاں کیہڑا کدے ایڈا کما حرام حلال جھا گیا سی۔ دولتے دولت سانبھی۔ اساں سدا بے قدری کیتی۔ دولت بھی سہانیاں نال کدے وفا نہ کیتی!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels