Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> سیداں سبھرائی

سیداں سبھرائی

نادر علی
January 16th, 2009

سیداں سبھرائی

سیداں سبھرائی دے گن تے سارا جگ جاندا اے ، اوہدا حُسن لوکے وچ گھٹ لوک ہی جاندے ہوسن۔ پنجاہ ورھے اُنج بھی ہو گئے نیں اوہدا ویاہویاں۔ میری تے ہانن آہی۔ جے آپنے مادے دا عشق ہووے تے ایہہ بھی آکھاں پئی معشوق ہے میری ۔ اصلی حُسن تے اوہدی کرنی آہی تے اجے بھی ہے ۔ رُوپ بھی اوس کرنی ہی بنا چھوڑیا۔ ڈیڑھ کپڑے نال تے دوواں بندیاںنال اوہ جدوں چاہے ووہٹی بن جاندی آہی۔
لو کے دے ہر ویاہ تے مینوںاوہ ہئی ووہٹی سہی ہوندی سی تے میرے جیہیاں نمانیاں نوں بھی ووہٹی بنا چھوڑ دی آہی ۔ پیسیاں دی لوڑ ہووے تے پیسے بھی لے آوندی آہی۔ لوکاں ایہہ گلّاں پیّاں بنائیاں پئی بھاگ شاہ نال وسدی ہوسی۔ لوک نمانا کیہ جانے اوس کرن دا جادو ٹونا آوندا آہیا تے کامن ٹونا بھی اوس جیہا کسے نوں نہ ہوسی۔ پر بھاگ شاہ ساہوکار نوں لوڑ پے گئی آپنی دھی دے ویاہ تے جار مجھّاں دی۔ لوکے وچ کال آہیا۔ چار جھوٹیاں پلیاں نہ لبھن۔ سیداں دیاں خبرے کیہ کھاندیاں سن۔ پالیاں سیداں آہیاں ، پر چودھری لہنے کول بھی ایہا دو جھوٹیاں خزانہ آہیاں۔ اوس ڈھیر پیسے منگے۔ سودا ہویا نہ ۔ بھاگ شاہ دو پھیرے لائے۔ سیداں نوں پتہ لگا، اوس جھوٹیاں اگے لائیاں تے بھاگ شاہ دے ویڑھے بنھ آئی ۔ بھاگ شاہ مجھاں ویکھ کے روون لگ پیا۔ اوہ دن تے ایہہ دن سیداں جاں منگے تے بھاگ شاہ نہیں آہیا کردا۔
کرنی اوہدے اندر نُور دی آہی۔ جان بھی اوہدی آہی تگڑی۔ اوہ بھُکھیاں پال لیندی آی تے آپنا جُثہ تے اوسدا آہیا آپنا۔ نرویا تے نُور والا۔ دساں ورھیاں دی آہی جدبہن دی آتن سدیا کتُن واسطے۔گانویا بھی اوس ساری راتے ، روئی بھی اوس ربّ جانے کتھوں کتھوں لیا دتی ۔ چرخے بھی ادھی راتی چار ہور لے آئی۔ تے اوہدا کتن سارے آتن توں ودھیرا سی۔ چھلیاں دے ڈھیر اوس لائے اک جانگلیاں دی کُڑی آکھیا، "ایہہ کیہ بلا ہے ! دو ہتھ مار دی تے چھلی لاہ کے پرانہہ کر دی ہے۔ ایہہ گانو دی کنج ہے، کتدی کنج ہے تے لگدا اے بیٹھی ہے ہی نہیں !"
نظر لگ گئی سیداں نوں۔ میں آکھااکدن ہس کے "سیداں تینوں اکھیں سہی نہیں سہی نہیں سی ہوندا تے میرے کولوں پُچھ گھندی۔ "اوہ کوڑھا جیہا کُبا جیہا تے ذاتی دا کشمیری ۔ کمیاں جیہا آہی اساڈے لوکیں تیلی بھی کشمیری آہے تے جھڑوئے بھی کشمیری ۔ پیو سیداں کہیا میں اُدھل ویساں نال سیدے دے ۔ "ناں جوڑماں لگا ہوسی آ؟"میں مُڑ ہسی۔ " میں او س نوں وچن دے چھوڑیا اے "اوس فیصلہ سنا دتا۔ پتہ نہیں خبرے کشمیرئیے منت پائی تے کدھرے من ہی گئی ہووے ! گل دی سمجھ نہ آوے ۔ اک چھوہر دے کائی شے پلّے نہ تے دُوجا ذات کمینی۔ ہو گیا ویاہ۔ ویاہ گھٹ تے سیاپا ودھ آہیا۔ رات آپ بھاگ شاہ کولوں شئیں پوا لیائی۔ دو چار جی جنجے آئے۔ لوکے روٹی بھی موڑ دتی۔ ٹبر تے مارن نوں پھردا آہیا۔ سیداں ڈولی بہن توں پہلاں دو بوریاں کھوتے تے لدائیاں تے خانقا ہے فقیراں دے گھر دے آئی ۔ روٹی تے بھُکھے لوک مگروں پئی کھادی !
وت یارھاں بچے جمے اوس بارھاں ورھیاں وچ۔ کشمیری اجے بھی اُنجے کانگڑی آہیا ۔ مگروں سودائی ہو گیا۔ ایس نہ ہار منی ۔ اوہنوں شہر لے گئی۔ علاج آپ کروایا۔ آپ بچے پالے۔ اک دینہہ آیا تے خیری مہری سی۔ پنجاہاں ورھیاں دا اُنجے لگے جُوں نواں ویاہیا سی۔ سیدو بھیڑئیے ایہنوں پہلوں ہی جوان کر لیندیوں !""تسیں لوک بندہ سنجاندے ہو نہ رب سنجاندے ہو "اوہ ہسّی۔ مڑے کڑیاں ویاہ مُڑ فیر جوان جوان ہو گئی سیداں آپے۔ "کھسماں کھانئیے دوجا ویاہ نہ کروا بہویں۔ کدھرے کسے ہور منت پائی تے وختا پابہویں گی !"اک پُور اجے کشمیریاں دا ہور لاہ دیندی جے۔ پھرڑی نہ جاندی !"اوہ ہسی !
ہُن اوہا سارا پنڈ سیداں دا مُرید آہیا۔ کوئی ہے دنیا دا کم جیہڑا اوس نہ کیتا ہووے۔ ڈنگر پالے، کتیا تانیا ، جنا پالیا، بچے تے مُڑ آ کے سارے پنڈ نوں پا لیا۔
پر بج اوس سبھرائی نوں ہونی آن لگایا۔ پہلوں کھسم تے مُڑ جوان بچی تن دھیاں چھوڑ کے مر گئی۔ بھاگ بھی بندے دا وکھاوا تے بھرم بن جاندے ہین۔ لوکے سمجھیا اوہ مر گئی اے۔ کوئی پُچھن نہ ویڑھے آوے۔ میں جھراں تے اوہ ماڑی جیہی ہسے۔ اوس دوہتریاں جوان کیتیاں ۔
مڈل ایسٹ مُڑ آ گیا تے پیسہ مُڑ عاشق آن ہویا سیداں تے۔ اوس مڑ اُنجے ونڈ چھوڑنا۔ اوہا لوک مُڑ سیداں اگے سوالی بن گیا۔ اوس ماڑا وقت یاد کدے نہ کیتا۔ مُڑ جوان ہو گئی جُوں اک واری لوکے نوں درشن دینا آہیا سُو ۔ نہ گل نہ کتھ ادھ کیتی لوک ترفاٹ آ گیا۔ سیداں نوں رات چوراں گولی مار چھڈی اے۔ ایہہ گل بھی کسے نوں یاد نہ رہی پئی چار چور رڑی تے موئے پئے سن سیداں دی بندوق نال ۔ لوک یتیم ہوگیا۔ پُلس آئی تے چوراں دیاں لاشاں لے گئی خبرے پُچھ پڑتال بھی ہوندی ، پر لوک تے سیداں دا میلہ لگا سی۔ الو کے چلو کے توں خلقت ٹٹ کے آئی ۔ " کیہڑے جنے دا جنازہ اے ؟"کسے اوپرے پُچھیا !


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels