Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> وڈے داُدُو دی کہانی

وڈے داُدُو دی کہانی

نادر علی
January 16th, 2009

وڈے دادُو دی کہانی

دادُو دیاں میں اکثر کہانیاں سناندا رہناں ..........پر ایہہ اوہدے پڑدادے دی کہانی اے ......میں اکثر سوچناں ایہہ دادُو انج دا بندہ کیوں اے ؟ خبرے پنڈاں تھائیں اسیں اجے بھی کجھ آپنیاں وڈیاں ہار آں ۔ یاں اساڈی مٹی دی تاثیر اے۔ ایہہ کہانی مٹی دی کر کے ضلع گجرات وچ دھمی ۔
نکا دادُو اللہ داد اے تے وڈا ایہدا پڑداد آہیا۔ انگریز آ گئے آہے تے وڈا بھیڑ پیا اساڈے لوکے کول چیلیانوالے ۔ پوربی لال کڑتیاں والے شاماں ویلا اجے آہی تے اساڈے پنڈوں لگھنے شروع ہوئے ۔ اج شامی مُہر لنگھی اٹھ پہر اکو لام لال کڑتیاں دی لگی رہی ۔ آکھن "دام لے لو بھوسہ دے دو !"پر مڑ سرکار کُمپنی دی بنی اوہناں آ کچہریاں پائیاں .........معاملہ تارن جوگے پیسے تے اساڈے لو ے سو ورھے بعد بھی کوئی نہیں آہے۔ اودوں اللہ جانے کیہ ملبا لگا بھارا۔ مہر دادُو کہیا نہ آپ دیساں تے نہ دھکڑاں دا کوئی ہور بندہ ...........آئے سرکار دے پیادے مُشکاں اوہناں بنھ گھدیاں تے لے گئے گجراتے ۔ ایہہ جتھے ہُن خزانہ اے نا گجرات کچہری کمپنی باغ کولے۔ ایتھے بہندا آہیا انگریز صاحب وڈا۔ بڑی دہشت آہی اوس صاحب دی ۔ نالے دادُو آہیا اپنے پڑیوترے ہار کھچرا ! انگریز صاحب پچھیا"ٹم کُھڈا دادامعاملہ تاردا نہیں ؟ "دادُو ہتھ چا بنھے تے آکھیا "تاردا صاب ! تاردا! "صاحب کہیا ایہدیاں مشکاں کھولو۔ حکم دتا، "جاؤ کھڈادادا !"پنڈ آوے تے دادُو مُکر جائے۔ لمبردار ذیلدار زور لا تھکے۔ تن واری پھڑیا۔ صاب اگے دادُو ہور تے پنڈ آ کے ہور ..........میرداد ذیلدار آہیا وڈا سیانا۔ اوس کہیا ، "ہر واری لہائی عملے دی ہوندی اے تے رہائی دادُو دی۔ اُنج بھی دادُو کولوں ڈردا آہیا۔ دادُو سُنیہا ٹوریا آہیا ......
ـ"گورا اساڈی کیڑ رکھسی ایہہ آپنیاں بُوریاں دی توں کیڑ رکھیں ! چیتا کھل کے لہندے شاہ پور نہ جاندیاں ہوون !"
میر داد بہوں سیانا بندہ آہیا۔ مڑ جوں کہانی اساں سوسال سنی اوہ انج آہی پئی میر داد راتو رات دھکڑاں دی مٹی پٹائی تے اسوار ٹوریا کچہری ۔ دوجے دن اوس منت کیتی پئی عدالت دے فرش دی لپائی کرنی اے صاب اُٹھیا تے اوس لپائی چا کیتی دھکڑاں دی مٹی نال ! سومواریں جد چوتھی واری دادُوآں پھڑ کے لیائے۔پیش کیتا تے اوس اکھیاں چا پر تائیاں ! صاحب کہیا ، "کھڈا داد ملبا دتا ؟"دادُو کہیا "نہ دیناں تے نہ دیساں .........مر ویساں نہ گورے دا حکم منیساں !"لوک حیرانیا پیا پئی دادُو کھچرا اج نابریا کیوں کھلوتا اے ! مڑ ایہا کہانی سو ورھے اسی سندے آئے پئی دھکڑاں دی مٹی نابر آہی ...........آپنی مٹی دی خشبو دادُو دے نکے چڑھی تے اصلی دادُو ننگا ہو کھلوتا۔ چار سال قید اوس کٹی .........پرجیل وچ تے دھکڑاں دی مٹی نہ ہوسی۔ اوس داروغے پہرے دار پسما لئے اکھے راتی اوہدیاں مٹّھیاں بھردے آہے سرکار دے پیادے۔
شاہ پور والیاں نال اوس دی یاری آیہ۔ بار تے ساری نابر آہی ۔ چور وڈا آہیا دادُو ..........اکھے اکدن بیٹھا چھوی پیالمب کردا آہیا کسے بال آکھیا ، "بابا دادُو توں چور ایں ؟ ذیلدار کے آہدے نیں دادُو چور دی ایہہ گل ۔ دادُو چور دی ایہہ گل !"دادُو آکھیا ، "آ پتر تینوں گل سناواں چوری دی ! میں گیا ساں چاڑھیں اوتھے میرا یار سی شیرا .........شیرا گھر نہیں سی۔ بڈھی اوسدی دیگیچہ رکھی بیٹھی آہی چلھے تے۔ تے وچ کڑچھاکھڑکائے ۔ لوہڑے کڑیاں روندے روندے سوں گئے ۔پچھلے سو تے رن شیرے دی چپہ روٹی دا تے ساگ طباکھی چالیائی اکھے روٹی کھالے ۔ میں آکھیا ، "ردُھو نی چاول تے لے آئیں ایں ٹوڑا ! کتھوں منگیا ای ؟ "اوہ رُنی اکھے "گھر شے اللہ والی کوئی نہیں ۔ بالاں نوں پئی ولاندی آہی اُتوں آیوں توں ! کیہ کردی ۔ کل شیرامینوں ماردا پئی روٹی نہ دتی آ یار میرے نوں ! "میں آکھیا "ہلا میں وڈے ویلے آواں داوڈے ویلے !"میں تے منتر جاندا ہویا پشواں دا۔ پشو میرے نال انج ٹردا اے جوں وچھا گائیں دا ماں نال۔ میں اوس پنڈ چاہڑاں وچ اک گاں تاڑی آہی۔ راتی کھولی تے وڈی سرگھی جا ساہ لیا کنجاہ ۔ قطبا قصائی میرا پرانا یار آہیا ایسے کم دا ..........ڈنگر اوس راتو رات کوہ کے ٹھکانے لا چھوڑنا۔ میں کہیاگائیں دا چا کر گوشت تے مینوں چا دے جو کُجھ کھان پین دی شے ہے ای گھرے وچ .........اوس دہ سیر آٹا ، دہ سیر دانیاں دے دو سیر گھیو دے تے آوندیاں سیر اوس گائیں دا گوشت چا دتا۔ اکھے لوا بھارُو آہیا۔ ایہہ تحفہ لے جا ! میں ولا ولا کے کھرا گنوا کے آگیاں واپس چاہڑیں ! روٹی ٹکر اوس ول بالاں لٹی پکایا ..........بال گاون "دادُو آوے رج کھواوے!" تے تاڑیاں مارن۔ اکھے "دس پترا دادُو چور اے ؟ "بال ہس کے آکھیا "کوئی نہ !"


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels