Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> حسینا قاچو

حسینا قاچو

نادر علی
January 15th, 2009

حسینا قاچو


بندیاں دیاں کہانیاں مکدیاں ای نہیں پرجے کوئی سنن والا ہووے، تے ویہل ہوئے سننے دی۔ قید دی ہور کوئی چنگی گل ہووے نہ ہووے کہانیاں ون سوونّیاں! لوکیں بھی رنگ برنگے، چور اچکے قاتل ظالم تے مظلوم۔ کُجھ اجیہے تنگ جے اوہناں دی گل سن کے بندہ سوڑا پے جائے تے کُجھ اجیہے بھی جیہڑے سکھلے سہی ہوندے آہے۔
بابا خزانچی جس دَہ ورھے پہلوں نوکری وچ سرکاری خزانیوں وِیہہ لکھ چوری کروایا، سنرا ہو گئی پر پیسہ سرکار نوں نہ لدھا۔ اوس پکا بندوبست کیتا آہی۔ اوس کہنا، "ساری عمر دھکے کھان نالوں قید چنگی اے! گھرے والے بھی سکھلے ہن۔ اوہدا اِک گُجھا یار سرکار نوں تے نہ لبھا پر کگھرے والیاں اوس پڑدے نال کُجھ پیسہ ہر مہینے پُچا دینا۔ "بس ملک صاحب میں اینے جوگا ای آہیا۔"ہُن اوہ پنج وقت دا نمازی اے تے لمبڑدار اِنج جوں دروگہ لگا ہووے!
دوجا جیہڑا جی خوش ڈِٹھا اوہ حسینا قاچوسی۔ میں اوس نوں پہلوں دا سنجاندا ساں ۔ ناواں نوں تے لوکاں دیاں شہر دیاں ساریاں بدماشاں دے ناں دھرے آہے : " جمعہ حرامدا" "کیدو لنگا "، "سبحانا ٹنڈا "، "پھجا لُنڈا"پر حسینا قاچو آہیا بھی چاقو مار۔
انجھک نڈر تے ترکھا۔ شہر دے ہر سیاست دان نوں اجیہا رچھ لوڑیدا آہیا۔ میرے دھڑے دے چیمیاں نال اوہ رلیا تے مینوں اکثر ملدا سی ۔ قید وچ بابے خزانچی میرا سنیا تے اوس نور پور دا مشقتی حسینا میرے نال لایا۔ پر ایہہ حسینا ہُن اوس وڈے بدماش ہار نہیں سی۔ جیہدا سارا شہر ناں جاندا سی تے گلاں کردا سی۔ بدماشاں والی جے کوئی گل اوس وچ آہی تے ایخو پئی پورے جثے دا بندہ اسی ۔ سیاست وچ بدماش تے میں بہت ڈٹھے پر اصلی کم دے دانے اوہا آہے جیہڑے لوہکے جیہے ہونے۔ کجھ تے اصلوں ماڑکو سہی ہونے ۔ بندے دا کوئی کم بھار چان دے علاوہ جثّے دا ہوندا کوئی نہیں۔ دل یاں دماغ لوڑیدا اے دل بھی جس نوں کہندے ہن اک دماغ دا جھٹ پٹ حساب کتاب لا کے وار کرن دا ناں اے ۔ نا سمجھاں نوں ایس گل دی سمجھ بھی نہیں ہوندی۔ پھورا مارنا تے بھار گور سبھ شوشیاں دیاں گلاں نیں۔ جنا چھوہلا ہووے تے سیانا ہووے تے مار نہیں کھاندا ۔ اتے چھوہلا یاں چنگا اسور تے پورے جثّے دا ای ہو سکدا اے ۔ موٹا بندہ موٹے تھانیدار ہار رعب واسطے بیشک چنگا ہووے جوں اکثر پنجاب دے سیاسی لیڈر ہن پر کم کرنا ہور گل اے ۔ پوند حسینے ایہہ گل مینوں سمجھائی۔ میں آپ پورے جسم دا بندہ ہاں۔ "سرکار تہاڈا جثہ اساڈے کم واسطے چنگا اے !"حسینا کم کر دیاں ہسیا۔
"کیہ کم کرانا ای میرے کولوں حسینیا ؟""سرکار ساڈے کولوں خدمت کرواؤ میں تہاڈیاں نوکراں ہار آں
!"
"سیاست دان بننا ای ؟ "میں ہس کے پچھیا ۔
"سرکار تہاڈی دعا نال نور پور وچ سیاست دان بنائے بڑے نیں !"حسینے کہیا۔
"ایتھے کیہ لین آ گیا ایں ؟ سنیا اے پنج سال قید ہوئی اے ؟ "
"سرکار پتہ ہوندا تے میں پہلوں ایتھے آ جاندا۔ بڑا سکھ جے
ملک صاب اجکل پلس مقابلہ کون کرے ! چودھری مینوں مروان لگے سن۔ ہُن سرکار دے کھاتے تے چڑھ گیا!"
"چودھریاں دی توں اینی سیوا کیتی اے کیوں مرواندے نیں تینوں ؟ "
"سرکار ایہہ تے کاروبار اے چودھریاں دا ۔ اوہ پیو مروا سڑن جے فیدا ہووے تے ۔ سرکار معاف کرنا میری گندی زبان اے ماں بھی ویچ چھوڑن !"
"حسینا توں تے سیانا بندہ نکلیا ایں ؟ "میں ہس کے کہیا۔
"ملک صاحب میں پڑھدا بڑا چنگا ساجے۔ گھر دے جاہل سن۔ مڑ سوچناں پڑھ کے بھی کیہ لینا سی۔ ڈی سی دے دفتر کلرک ہوندا۔ ہُن سنے ڈی سی صاحب سارے گل مندے جے !"
"ڈی سی صاحب نال تیری کنج دوستی اے ؟ "
"سرکار چنگیاں امباں نال۔ اسی لوک سادے آں سمجھنے آں صاباں کیہ لوڑ نکیاں شئیں دی۔ پر امب اجکل مہنگے جے۔ میں چھ ٹوکرے اوہ چن کے ٹورے جیہڑے ڈی سی صاحب امب ویکھے نہ ہون ڈی سی صاحب گھر بلوایا اکھے بھائی حسینیا تیرے امب چنگے ہین۔ بس سرکار آہمنا ہویا تے میں ڈی سی صاحب تے بیغم صاحب دوہاں نوں امباں دے سیزن امب ! چنگا، گوشت، چنگی سبزی ! تے لہور بیغم صاب دے پیکے بھی اپڑ گیا۔ اوہ لوگ بڑے اچھے لوک جے پتراں ہار مینوں سمجھدے جے۔ چیز فنا فٹ لہور پہنچانی۔ ڈی سی آفس سارا مینوں سلاماں کرے۔ اجکل ڈی سی صاحب سیکرٹریٹ آئے جے۔ اوہناں دروغے نوں فون کیتا ، اسی جیل وچ آزاد ہو گئے۔ جیل بھی تے ملک صاب وڈا کاروبار اے۔ پوڈر دا کم میں نہیں کردا، نہیں تے کروڑوں کماندا ! پر پورڈر والے بھی ڈردے نیں میرے کولوں۔ میں سر لالچ کدے نہیں جے کیتا۔ "حسینے مینوں وکھایا۔
"ہور کیہڑا کم جاننا ایں توں سیاستدانا ؟ " میں ہس کے پچھیا۔
"سرکار کھانا، بڑا چنگا پکا لیندا جے۔ اج تہاڈے واسطے خاص کریلے منگائے نیں۔"
"حسینیا میرا کھانا تے گھروں آ جاندا اے ۔ "
"سرکار ایہوا جیہیا نہ ہوسی ! کُجھ کھاؤ پیو کہ تسی تے پڑھدے ای رہندے او۔ مینوں پتہ اے تسی وہسکی پیندے او۔ آکھو تے ولایتی منگا دیاں ۔ اجے شہر وچ میرا اینا کو ٹہکا ہے اے !"
"حسینیا چنگا اے کجھ دن چھٹی اے "میں دل دی گل دسی۔
"سار نہ ہون کھنو نہ چھڈیو۔ میں تے انگریزی بڑی پیتی اے۔ ایہہ ڈی سی صاحب کہہ کے چھڈوائی اے۔ ہویا انج اک واری کجھ بے ادبی ہو گئی ۔ میں پی کے گیا ساں ۔ میں مافی منگ لئی ۔ پر ڈی سی صاحب کہیا اے بری شے اے چھڈ دے ۔ "
"ڈی سی صاحب آپ تے بڑی پیندے نیں !"میں اینویں کہیا۔
"بچی بچہ کوئی نہ ہویا سرکار ۔ بیغم صاحب تے بڑی چنگی اے پر میرا خیال اے ڈی سی کدھرے ہور دل لائی بیٹھے نیں !"
"ایہہ تینوں کس دسیا اے ؟ "
"توں کدے دل لایااسےا کدھرے ؟ "
ـ"سرکار میرا ویاہ کروایا اک واری چیمہ صاحب ایڈا سوہنا بندہ ویکھیا سی۔ میں سرکار عاشق ہو گیا آپنی ای بُڈھی اتے۔ بس سرکار ایہہ حیاتی وچ اک سٹ ڈاڈھی کھادی اے۔ مینوں کیہ پتہ سی چودھری مینوں دُھر بنا رہے سن۔ کُڑی بھی مینوں نکا جاتا۔ دل ٹُٹ گیا اے ۔ میں شادی کر کے غلطی کیتی سرکار۔ میں کوئی ٹبر تے پالنا نہیں۔ جان چھٹ گئی اے پر دُکھ مینوں ضرور اے !"
"حسینیا ویاہ تیرا کیوں کروایا چودھریاں ؟ "میں اصلوں کہانی وچ پھس گیا۔
"سرکار اوہناں دا خیال سی میں اوہناں دے دھڑے نال ہو جاں دا۔ بڈھی میری نے عجب عجب سنیہے دینے۔ میں بڑا سمجھایا بھلیے لوکے تیرا سیاست نال کیہ کم ؟ پر اوہ تے جوں سیاست دی ہٹی لائی بیٹھی سی تے لالچی ایڈی پئی روز دی کھٹی منگے !"
"تینوں وڈا بندہ بنان لگی ہوسی ۔ کیہڑی بُڈھی دا دل نہیں کردا ؟ "میں تسلی دتی۔
"سرکار دل اوس بڈھی وچ ہے ای کوئی نہیں سی۔ اوہ کوئی ذات دی ڈین سی !"حسینیے دا مونہہ لا ل ہوگیا۔
"حسینیا چودھری کیہڑے فرشتے نیں ؟"
"ملک صاب تسی ایہہ لکھ روپئے دی گل کیتی اے۔ بس ندان ساں سمجھیا نہیں ۔ پڑھیا لکھیا جو نہ ہویا ! ہن سمجھ آئی اے۔میں تے ہُن جیل وچ بھی خوش جے۔ لوکاں مینوں دُھر بنایا بڑی واری ، پر میں ایڈا بھی انھا نہیں جے۔میں تے ماں باپ دوستاں دی سیوا ای کیتی اے۔ تے تہاڈی دعا نال خوش جے "
"پر جیلوں باہر تے پھیر اوہا سیاست اے "میں دلوں دُکھ نال کہیا
"سرجی ہُن میں یملا بن جانا اے سمجھ مینوں سبھ اے۔ اوہدی بڑی مہر اے ۔ تسی کریلے ، ذرا کھا کے ویکھو ! کل امب بھی منگوائے نیں۔ ذرا کھا کے ویکھو ۔ "
ایس حسینے قاچو نون چاقو دی لوڑ نہیں بندہ مارن واسطے !


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels