Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> گُلستان بوستان

گُلستان بوستان

نادر علی
January 15th, 2009

گلستان بوستان

سنتالی اڑتالی ورھے پہلوں جیہڑا مری آہیا اوہ اج نہیں ۔ ہُن تے مری دیاں راجیاں بھی محل پوا لئے نیں۔ آل دوالے گراواں وچ لہور ہار دیاں کوٹھیاں راہ لگھدیاں پئیاں سہی ہوندیاں نیں۔ پر سڑ کے دے نیڑے ایہہ کوٹھیاں اکثر خالی ہوسن۔ سائیاں اسلاما واد کوٹھیاں جا پائیاں نیں تے گرمیاں ہماتڑ پرانیاں مری آون والیاں ہار خبرے لندن امریکہ گزار دے ہوسن۔ غریبی تے اجے بھی بُہت اے۔ اڈے توں چھوہ کے مال روڈ توڑی اوہا مزدوراں تے منگتیاں دا میلہ لگا پیا اے۔
امیری غریبی کوئی کسے دے وس تے نہ ہوئی۔ اساں پرانے آون والیاں چوکھی تکلیف ایہہ ہو چھیاں نو دولتیاں دی اے۔ کتھے پنڈی لہوراں پشوراں دی جنٹری ہوئی ! ڈاکخانیوں ٹر کے پنڈی پوائنٹ توڑی سو واقف ملنا۔ خاندانی لوکاں ساریاں آونا۔ بییاں کسے اکھ پٹ کے نہ ویکھنا۔ ہُن سیالکوٹ فیصل آباد دے ہٹوانیاں دے چھوہر تے مڈل ایسٹ توں آئے ہوئے پینڈو چھوہر بٹر بٹر تکدے ای نہیں آوازے بھی کسدے نیں۔
میں کدے مری نہ آوندا جے ایہہ میرا گورنمنٹ کالج دا یار سوشلسٹ کدائیوں دا مینوں دھک نہ لیاوندا اوس کہیا، "نو دولتیاں دی تکلیف صرف پرانے دولت منداں نوں ہوندی اے ۔ "اکھے ، "سبھ دولت نویں ہوندی اے پرانیاں نو ں ہور لوڑیدی اے جے نویاں نالوں اُتے رہن تے نویاں نوں بھی ہور لوڑیدی اے جے پرانیاں نال ساویں ہو جان۔ دولت داء نال ای بندی اے تے سبھ ہمیش چوری دی ہوندی اے ۔ جے پرانیاں دا ایہہ خیال ہووے پئی اوہ مامے بابے جیہڑے چور دُھراں دے آہے۔ اوہناں دیاں کیتیاں تے پڑدے پا لیسن تے اوہ اوہناں دی بھُل اے۔ پرانی دولت روز ودھیری وڈی اسامی نال ویاہی جاندی اے ۔ نویں امیر پرانیاں راجیاں تے پرانیاں ججاں تے جرنیلاں دے کُڑم بن ویندے ہن تاں جے چوراں دے دودے ٹولے وسدے رہن۔ ایہا پیٹا تانا دولت دا رہندا اے ۔ "
مینوں ایس آدم بے زار شوشلسٹ دی کدے سمجھ نیں آئی۔ نہ اوہ پرھیا دا بندہ اے نہ ٹبر ڈیرہ داری والا تے ہُن تے مڑ مک گیا اے اوہدا شوشلزم تے "تاریخی تے پیداواری عمل "جس دی اوس روز رٹ لائی ہوندی آہی۔
اشتیاق مینوں تے میں اوہنوں مناندیاں حیاتی گزار چھوڑی اے۔ ایتکی لہور چوکھی گرمی پئی تے اوہ آپنی سالانہ پیدل چڑھائی تے، تے میں اپنا نکا جیہا سیزن دا پھیرا لان آیا۔ میں کہیا ، "جے میرے نال جائے کُجھ دن لکھیاں پڑھیاں لوکاں دی کمپنی وچ گزارے مری دی ٹھیک "سوشل سٹڈی"کرے تے شاید ہوائی گلاں چھڈ دیوے۔ مری آن کے تے خوب اوہنوں سیر کرائی ہوٹلاں دی۔ پرانے علاقے دیاں سر کردہ لوکاں نال ملیا۔ ستی صاحب نسل در نسل امیر تے ساؤ راجے ہن۔ میں کہیا ایہناں نوں ملسی تے فرق سہی ہو ویسی، پر اشتیاق اِک واری ملیا تے دوچار کتاباں چا لیایا۔ ستی صاحب بھی مصروف آہے۔ نیشنل اسمبلی دا سیشن لگا پیا سی۔ پرائم منسٹر بھی کُجھ دن مری آ رہیا سی، پر اشتیاق دا اوہا صبح شام ٹرنا۔ مینوں پہاڑاں وچ آ کے بہوں اُداسی ہو دیندی اے میداناں دا بندہ ہویا۔ دو چار دن بعد مری دا چارم مک جاندا اے! "تیری اداسی کدے نہ مکسی چودھری توں بندیاں توں تے غریبی توں ڈرنا ایں۔ پہاڑاں وچ تینوں تنگی غریبی سہی پئی ہوندی اے۔ بتیاں سڑکاں ہیٹاں باجھوں تیری بے وساہی ودھ جاندی اے۔ بندیاں، رُکھاں، پشوں نال اصل بندے دا سبندھ اے، جنس دا ناں حیاتی اے!" اوس فلسفہ جھاڑنا! "میں بندیاں دا جانو آں۔ دو دفعہ الیکشن لڑیا اے۔ بہتیرے میرے غریب کزن نیں ٹبر وچ غریب امیر سبھ نال میرا واہ اے! تیری پارٹی نالوں ودھ تے میرے واہک تے نوکر نیں۔ میرا بندیاں نال سبندھ ہے کہ تیرا؟"اشتیاق بحث وچ ہار جائے تے ہس چھوڑ دا سی۔ "سبندھ تیرا آپنے آپ نال کوئی نہیں۔ تیری بُڈھی نال کوئی نہیں۔" اوہا
پر سنل ہوون والاداء اوس لایا۔ "تے تیری بڈھی؟" میں بھی رہ نہ سکیا۔ "میں جاننا ہاں کیہ واپر دی اے اوس دی گھرے والی نال۔ کنج اوہ کالج پڑھا کے گھر دا چونکا ٹور دی اے۔ رُل گئی اے شوہدی۔ پر اشتیاق آپنی گل تے اڑیا رہیا پئی میرا میری دے علاقے تے بندیاں نال سبندھ کوئی نہیں۔ اِک دن ایسے بحث وچ مینوں چھانگا گلی لے گیا۔ اوتھے میرے لاہور والے دوست کرم شاہ ہوراں اِک نکی جیہی ہٹ بنا چھوڑی سی۔ کدی کدائیں دورھیاں بعد پھیرا لاندے سن۔ میں لہوروں چابی منگوائی۔ میں کہیا نتھیا گلی ایوبیہ جا چکر لگاساں۔ اوہ دوجے دن وڈے فوجی بوٹ پا کے تیار ہو گیا۔ "چلو ملک صاحب تہانوں سیر کراواں۔ ایتھے دی دنیا وکھاواں!" میں کہیا، "کیہڑی نویں دنیا وکھاسی۔"
"پہاڑوں لہہ کے ہیٹھاں گراواں تائیں جاساں۔ پہاڑ دی ٹیشی تے گراں نہیں پیندے۔ لوکاں ہاڑ سیال دوویں گزارنے ہوندے نیں نالے کُجھ مرلے دانیاں پٹھیاں واسطے بھی لوڑِیدے نیں۔ کُجھ نہ ہویا تے اترائی چڑھائی دا تھکیواں ہوسی۔ ساہ چڑھیاں بھی بندہ کدے سوچن لگ پیندا اے" اوہ ہسیا.....
ـ"چل جُوں خان ہوراں آکھیا آہیا، قافیہ بھاویں نہ رلے بُنھ تے پاٹسی!" میں کہیا، "چلو ملک صاحب ون سونی دُنیا اے تسی چل کے ویکھو۔"اوس ضد کیتی۔ میں بہوں سمجھیا، "میں ایس علاقے تے بندیاں نوں اوس نالوں بہتر جانناں۔"مڑ کے اسی ہیٹھ لتھے تے اصلوں علاقہ بدل گیا۔ وادی وچ جا کے اِک گراں آیا "گلستان"اوسدا ناں اسی سکول دی اِک کمرے دی بلڈنگ تے پڑھیا۔ اسی دوویں آپنے لباس تے رنگ ڈھنگ وچ اوپرے۔ کتیاں بھی اوپر ہان کر کے بھونک کے حال پہریا پا کے سواگت کیتا۔ ملک بھی تھوڑا جیہا پریشان ہویا۔ گراؤں باہر اِک نویکلا گھر سی، دوجیاں توں ذرا وڈیرا تے صاف ستھرا......اسی اٹکے تے ایک بُڈھی مائی باہر آئی۔ اسی شہریاں ہار سلام کیتا۔ "وے بوستانا وے بوستانا! باہر آمِزمان آئے نی؟"اوس واجا لا۔ اِک ہسدا ہویا معتبر بندہ باہر آیا اوہ پنڈ دا سردار سہی ہویا۔ "آؤ جی! جی آیاں نودں بہسو۔ تسی صاحب تے سیر تے آئے معلوم ہوندے ہو!"اوہ سیانا دانا سہی ہوندا سی۔ "اوسدی شکل بڑی مانوس اے۔ مینوں شکل کدے بھلدی نہیں۔ ایس ضرور میرے نال کدھرے سروس کیتی اے"میں ہولی جیہی ملک نوں دسیا۔ بوستان بھی گٹکیا جوں اوس مینوں سنجان لیا اے۔ میں سمجھیا ضرور فوج وچ ایس میرے ہیٹھاں سروس کیتی اے۔ اوہ بیٹھا نہیں۔ اوس کرسیاں کڈھیاں۔ لسی پلائی تے فوراََ بغیر پچھیاں چا دا کہیا۔ اسی زبردستی کول بٹھایا، "تسی گراں دے سردار سہی ہوندے او؟"میں گل چھیڑی۔ "ایہہ غریب گراں دے سردار تے آہے کوئی نہیں۔ میں نمبردار دا پترآں۔" "سرداری ہوئی نا!" میں پھر کہیا۔ "ایتھے زِویں نہیں معاملہ نہیں نمبرداری کاہدی ہوسی سرکار!"اوہ عجز دے طور بولیا۔ اشتیاق فوراََ سیاست دی گل چھیڑی۔ پچھیا، "کیہڑی پارٹی نوں ووٹ دتا۔ کس نوں چنگا سمجھداسی..... " "کے آکھیے سرکار ایتھے برادریاں ووت پئے نیں پارٹیاں اساں واسطے بہوں دور دی گل ہونی اے۔ عباسی صاحب اساڈے ممبر ہُن اوہناں سڑک بنوا چھوڑی اے۔ بجلی پہنچ گئی اے۔ بہوں کم کیتا اے اوہناں!" وت تسی مسلم لیگی ہوئے؟"میں اندازہ لایا۔ "نہیں جی ووت مسلم لیگ گِھدے ہِن۔ نہیں تے اکثر ہور لوکاں پیپلز پارٹی نوں ووت دتا اے!" "اوہ کیوں؟"میں پچھیا۔"نظریاتی ووٹ سمجھو!"اوس بڑے اعتماد نال کہیا۔ اوہ پڑھیا لکھیا سہی ہوندا سی۔ میں سمجھیا میرے کسے دفتر کلرک ہوسی۔ "تہاڈا مہاندرا بڑا مانوس اے!"میں اخیر رہ نہ سکیا۔ "سر میں تساں نوں پرسوں دوپہر سیمز (SAMS) وچ لنچ سرو کیتا سی۔ میں اوتھے بیرا ہاں!"مینوں جوں دھکا لگا۔ اشتیاق بڑا ہسیا، "ویکھیا ای تھاں تے حالات نال لوک بدل جاندے ہن!"


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels