Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> خان بہادر چودھری نبی داد پُلس کپتان

خان بہادر چودھری نبی داد پُلس کپتان

نادر علی
January 15th, 2009

خان بہادر چودھری نبی داد پُلس کپتان


جدوں سن چھتی وچ چودھری نبی داد ایس پی ہویا تے ایس پی ہونا بڑی وڈی گل سی۔ رہیا تے اِک سال ای، تے وقت توں پہلاں ریٹائر ہویا، تے خبرے ایس پی ہوندا ای نہ جے واہے والے سر سکندر حیات صاحب وزیر اعظم پنجاب نہ ہوندے۔ شریکاں، چاہڑے والیاں چودھریاں سوہریاں تے ایہہ بھی آکھنا پئی "ایس پی تے ہویا سی پر ودھی بری لیندا سی۔ تے نوکریوں کڈھیا گیا سی! کتھوں پوا لئی ساسو ماڈل ٹاؤن والی کوتھی؟ حلال دی کمائی نال؟ حلال دی کمائی نال تے ماڈل ٹاؤن وچ گھٹ ای کوئی کوتھی پئی آہی پر پیسے نال بڑ برے داگ دُھچ جانے نیں۔ نسلاں سَور گئیاں...سارے پتر گورنمنٹ کالج لہور پڑھے تے چودھری نور محمد وڈا پتر آئی سی ایس ہو گیا تے چاچے نبیئے دارھی رکھ لئی تے اصلوں مسلمان ہو گیا.....آپنی کہانی بھی آپ مینوں ایس صوفی دورِ زندگی وچ سنائی۔ چودھری نور محمد بھی ایس کہانی تے بڑی کان کرنی، "ابا نہ سنایا کرو ایہہ تھانیداری والی کہانی۔ گلٹ (احساس جرم) دی بھی اِک حد ہوندی اے! ہسٹری بھری پئی اے ایس کہانی نال۔ نو باڈی از پرفیکٹ" چودھری نور محمد دے سارے پتر امریکن ہو گئے نیں۔ ماڈل ٹاؤن والی کوٹھی وچ اوہ صوفی دور وچ داخل ہون دی تیاری کر رہیا اے۔ میں پچھلے سال جُوں اساڈی ساری جوانی تے مڑ اوہدی ریٹائرمنٹ دے بعد عادت رہی شامی اوہدے نال شراب پینی۔ صاحب اٹھ کنال دی کوٹھی وچ اکلا جُوں قید ہووے۔ اجکل گرمیاں نیویارک تے سردیاں جُھردیاں لنگھدیاں نیں۔ میں فون کیتا، "اک سکاچ دی بوتل لبھ گئی اے۔ دوویں بھرا پاکستان دی "گولڈن جوبلی "منائیے!"صاحب ہن اصلوں شراب چھڈ دتی اے۔ پیسے والیاں نوں لبھنی تے اوکھی نہیں ہوندی نالے پنجاب کلب والے تے ساری بندی وچ بھی کلب بہہ کے پیند ای رہے نیں۔ صاحب کلب بھی چھڈ بیٹھا اے تے اجکل "شہاب نامے"دا اکثر ذکر کردا اے۔ مولبی ہویا کہ ہویا۔ دو عمرے بھی کر آیا اے۔ پر اوسدن چوکھا اکلاپا لگدا سی، من گیا۔ گل چاچے نبی داد دی پری میچیور ریٹائرمنٹ دی چھڑ پئی۔ "میں ابادی وڈھی دی نہیں مندا..... کوئی ایس پی رینک دا بندہ تصور ای نہیں کر سکدا سن چھتی وچ!"میں مڑ کہیا پئی چاچے نوں آپ کہن دی کیہ لوڑ سی؟ چاچے اکواری نہیں کنی واری مینوں آپ سنائی۔ میں نہیں مندا! "آئی ڈونٹ بیلیو اِٹ
ـ"چودھری نُورا اڑ گیا......توں اینویں دوتے دو بائی بنانا ایں! اوہ کامیاب آدمی سی۔ ایہدے وچ کیہ ہرج اے۔ اگر ڈنڈا چھ فٹ تے ہووے تے تسی اگر چھ فٹ تپ سکدے ہووو تد ای ہائی جمپ کر سکدے او....نہیں تے ڈنڈا ڈھے پیسی! ایہی سدھی گل اے It is simple as that"ڈنڈے دے ہیٹھ دی بھی لنگھ سکدے او! یاں چھال ای نہ مارو کوئی ہور کم چا کرو!"میں ہسیا۔ "کیہ دسیا ابا تینوں اج مینوں سنا دے۔ مینوں پتہ اے ملتان والیاں قریشیاں ابا نوں عطااللہ شاہ بخاری نال دوستی کر کے کڈھایا۔ انگریز ایس توں بڑی کان کردے سن۔ ابا ہمیشہ شاہ جی، دیاں کہانیاں سنانیاں۔ جیہدے نال توں نت ابا تے رشوت دی تہمت لانا ایں!"میں اوہنوں دسیا اوہ تے پرانا آئی سی ایس کر کے رج تنخواہ لیندا سی پر پھیر بھی آمدن تے اوہناں پلاٹاں تے مربعیاں توں ہوئی، جیہڑے چودھری نبی داد تے مڑ نُورے نوں سرکار نے دِتے۔ نواب کالا باغ بھی چاچے نبیے دا یار سی۔ جاندا جاندا کوئی آئی ڈی بی پی وچ نفے آلا کرا گیا۔
"بکواس اے!
It is nonsenseاوہ تے جھنگا سی It was permit۔ نادر علی تیرا مسئلہ ایہہ ہے توں پیسہ کد ویکھیا نہیں۔ پیسہ بنانا آسان نہیں پر ابا تے پیسہ جُوں عاشق سی۔ جیہڑی شے وچ ہتھ پایا بُہت کمایا! ایہہ ای کہانی اے This is the story
اخیر میں رہ نہ سکیا میں کہیا میری بھی سن لے......تے میں اِنج سنائی۔ وڈھی تھانیدار پٹوار وچ عام سی جے سو فیصدی نہیں تے نوے فیصدی ضرور لیندے سن۔ انگریز دے زمانے وچ پھڑے جاؤ تے سزا ضرور ملدی سی نالے کم بڑا کرنا پیندا سی پُلس چور پھڑ دی سی چوری کرواندی نہیں سی۔ سیانے لوک دیانت داری نال نوکری کر دے سن۔ ترقی دے بعد اخیر نوکری وچ دو چار ہتھ مار لیندے سن۔ نالے سرکار دے عطیات مربعے زمیناں تے ہزار فائدے والے کم رعایا تے پئے کرن۔ امیراں نال یاری رشتے داری ہونی۔ سیٹھاں رج قرضِ حسنہ دینا۔ دانے، پٹھے، مجھاں گاواں، گھوڑے! اساڈے گھر پنجاہ ولیتی گاواں سن جیہڑیاں سبھ تحفے وچ آئیاں سن۔ نسلاں سَور جاندیاں سن۔ ماڈل ٹاؤن والی کوٹھی تے اپرمال والی جائیداد لکھاں دی نہیں کروڑاں دی سی تے سبھ حرام توں حلال ہوئی! تے پھیر میں ڈی ایس پی کیمبل پور توں ایس پی ڈیرہ غازی خان ہون دی کہانی سنائی۔
چاچے نبی داد دی چوکھی نوکری ضلعے کیمبل پور دی سی۔ اوتھے ای تھانیدار تے مڑ ڈی ایس پی ہویا۔ سارے نواب تے خان جاندے آہے آپنوں۔ یارانے آہے واہ دالیاں نال، کھنڈے والیاں نال شمس آباد والیاں نال تے کوت فتح خان والیاں نال۔ ترقی دی افواہ اِک سال توں آہی۔ اساڈے سارے ٹبر وظیفے پڑھے۔ نواب سر فضل علی نوں گجرات دادے دسیا پئی نبی داد پہلا گجر ایس پی ہووے گا ہسٹری وچ! نواب صاحب آکھیا اوہناں بھی سنیاسی تے ایہہ بڑی مبارک گل سی۔ نواب صاحب گُجراں وچوں وڈے آہے۔ سر سکندر حیات وزیر اعظم ہوئے تے واہ جلسہ ہویا، روٹی ہوئی۔ چاچا نبی داد نواب سر فضل علی نوں نال لے کے گئے۔ کھنڈے والے شمس آبادی تے کوٹ فتح خان والے نال لے کے نواب صاحب وزیر اعظم کول گئے۔ اوہناں کہیا چودھری نبی داد گجرات دا نہیں ہُن کیمبل پور دا سپوت اے ! سر سکندر حیات آپ آپنے حلقے دے پٹواری تھانیدار دا خیال رکھن والے بندے سن۔ چاچے نوں سردار صاحب چاہوندے سن۔ اوہناں وعدہ کیتا گورنر تے آئی جی نال گل کرن گے۔ پر تھانے لادے تلہ گنگ دا تھانیدار۔ چاچے دا پھلور دا سکاڈیا سی۔ دوہاں رل کے وڈے دو چار ہتھ مارے تے جادے پنڈ والے دوہرے قتل وچ دوویں قاتل چاچے دی جھوٹھی تفیتش نال چھٹے! چاچے نوں ایس پی ہون دی کوئی امید خواب خیال وچ بھی نہیں سی۔ ایدھر ترقی دی دُھمی تے ایدھر ہائی کورت وچوں جادے والے کیس تے ہائی کورٹ دے ڈی ایس پی تے تھانے لا دے والے ملک اسلم دے خلاف سڑ کچر آ گئے۔ ملک تے فوری جبری ریٹائر ہو گیا پر ایس پی رابرت صاحب چاچے دے بڑ یار آہے۔ چاچا سارے پنجاب دے سیاستداناں دی مخبری کردا سی۔ اٹک وچ اکھان آہیا پئی "سارے پنجاب وچ سیاست تے ضلعے اٹک اندر خباثت ہوندی اے!"ساریاں نواباں مخبری کرنی تے سبھ رپوٹاں چاچے لینیاں تے لِکھنیاں۔ خلافت توں لے کے یونینسٹ پارتی ہر کسے دے خلاف رپورٹ دینی۔ خیر ہائی کورت سڑ کچر دے باوجود سردار صاحب چاچے نوں ایس پی کرا لیا۔ چاچے دے نصیبیں رابرٹ ڈی آئی جی ملتان ہویا تے اوس چاچے نوں ایس پی ڈیرہ غازی خان منگ لیا۔ ایتھے بلوچاں سرداراں دیاں آپس دِیاں ڈھیر لڑائیاں آہیاں تے مولبیاں دا بھی رولا آہیا۔ چاچا دیوبندیاں وچ دیوبندی تے بریلویاں وچ بریلوی سی۔ نال عطاء اللہ شاہ بخاری ہوراں نال یاری!
نور محمد صاحب چھتھا پے گیا میرے لمے بیان توں ۔۔۔ "کیہ لمی کہانی پائی جانا ایں نہ کوئی ایہدا مُونہہ اے نہ سر ! کسے نیٹو
Nativeدا ایس پی ہونا کوئی نکی جیہی گل نہیں سی۔ ساری یونینسٹ سیاست وچ میاں فضل حسین دی کوشش نال ایہہ تبدیلی آئی۔ ابا دا چنیا جان پنجاب وچ اوہدا اک نمبر ڈی ایس پی تے افسر میٹیریل ہونا سی ۔ انگریز چون وچ کدے غلطی نہیں کدے غلطی نہیں سی کردا (The English men never wrong in their choice) "
ـ"میں ایہہ کہہ رہیاں پئی ڈی ایس پی تے تھانیدار دا گھٹ فرق سی۔ ڈی ایس پی تے ایس پی وچ زویں اسمان دا فرق سی۔۔۔ چاچے مخبری کیتی تے سبھ چارے کیتے تے رشوت خور ہون دے باوجود ترقی لے لئی۔ پُلس کپتان ہونا بُہت وڈی گل سی۔ سارا ضلع آیا سی چھبی اپریل سن چھتی وچ اساڈے لوک۔ ضلعے وچ تن کاراں سن ڈی سی رام پیاری تے کدار ناتھ دی۔ دس کاراں اساڈے بوہے کھلہیاں سن ! اوس دن تے اساڈے پنڈ دیاں لوکاں پہلی واری کار تے پُلس کپتان ویکھیا ! "بکواس کری جا رہیا ایں۔۔۔۔ ایہدے واسطے میرٹ تے گمپشن Merit and Gumptionچاہیدی اے ۔۔۔۔ ابا وڈا آدمی سی۔ اسی سبھ اوس نال ای وڈے ہوئے ۔ توں کیوں کرنیل توں اُتے نہیں گیا۔ ہر کسے نوں اوہ ملدا اے جیہدا اوہ حقدار ہوندا اے "Everyone gets what he deserves
"کرنیل تے میجر وچ بڑا فرق ہوندا اے۔ توں مینوں دھی دا ساک نہ دیندوں جے میں میجر ریٹائر ہو جاندا ۔ "میں ہس کے کہیا پر صاحب ناراض ہو گیا۔۔۔ "توں کدی بندیاں ہار گل نہیں کردا
Your are never serious۔ تے توں سنکی ایں ! "And you are a cynic
"صاحب اخیرلی کہانی سن لے۔۔۔ "میں بوتل دی اخیرلی چھیک بھر کے کہیا۔۔۔۔ "چاچا ڈی جی خان بھی ڈانوا ڈول سی۔ ہائی کورٹ والے ریمارکس (لکھت) اجے چاچے دے مگر سی۔ ملک اسلم نوکریوں نکل گیا تے ڈی ایس پی نبی دا د کیوں نہیں نکلیا جس تفتیش کیتی۔ تے ہن کہانی دا اوہ حصہ اے جیہڑا چاچے خبرے میرے سوا کسے نوں نہیں دسیا۔ ملتان والے قریشی رابرٹ صاحب ڈی آئی جی توں بڑے تنگ سن اوہ بڑا اوکھا بندہ س
ی۔ چاچے دی وڈے قریشی صاحب تے ڈی آئی جی دوہاں نال یاری سی۔ اوہناں پردے نال ڈی آئی جی صاحب دے بیرے دے علاوہ کوئی نہیں سی جاندا پئی ڈی آئی جی صاحب شریفے دا عاشق اے۔ شریفا بہت سیانا اے تے اوہ بھی آپنے صاحب دا عاشق تے اوہدا راکھا سی۔ جے شریفا چاہوندا تے صاحب کولوں کوئی بھی کم کرا سکدا سی۔ چاچا عقاب دی نظر رکھدا سی۔ اوس تاڑ لیا تے شریفے نوں پتر پتر کہہ کے پسما لیا۔ گھرے دے دوویں جی شریفا تے صاحب چاچے دے یار آہے......ایہہ اخیرلا بھیت جیہڑارموزِ سلطنت ہار سی چاچے قریشی صاحب نوں چا دسیا.....ہن چاچا جے عقاب سی تے قریشی صاحب شاہین سن۔ اوہناں اِک ایسا مُنڈا تاڑ کے چُن کے آپنے مریداں وچوں کڈھیا جیہڑا نوکری منگن ڈی آئی جی ہاؤس گیا تے صاحب تے شریفا دوویں اوستے عاشق ہو گئے! عاشقی معشوقی ملتان والیاں تے بس اے! ہُن عجب ٹھیٹھر لگا۔ قریشی صاحب جد ڈی آئی جی ہاؤس جانا تے اوس نڈھے صاحب دے ساہمنے پیر صاحب دے پیر پھڑ لینے۔ رابرت واسطے پیر بھائی بنن توں علاوہ کوئی راہ نہیں سی۔ صاحب گِھر گیا۔ ہن اوس دی کور مک گئی تے قریشی صاحب دی گل اوس سُن لینی! ہن چاچے قریشی صاحب نوں سوال چا پایا پئی میری وڈھی دیاں افواہاں تے ہائی کورٹ والے سڑکچر دی گل اجے نہیں مُکی۔ لام لگ گئی سی صاحب کہیا فوج وچ کمشن لے لے۔ آخر اوہ بھی تد افسر رینک سی۔ چاچے کہیا مینوں کجھ نہیں لوڑِیدا۔ ڈی ایس پی توں ایس پی ہونا تے زِویں توں عرش تے جانا اے۔ کمشن نال تے زیادہ توں زیادہ جبلپور ای جانا ہوسی! قریشی صاحب تے رابرٹ صاحب باعزت ریٹائرمنٹ لے دتی۔ خان بہادری بھی مل گئی۔ فوج وچ لوک بھرتی کرا کے چاچا خان بہادر چودھری نبی داد پُلس کپتان رہیا ساری حیاتی!" بوتل مُک گئی سی۔ اسی دوویں ہُن وحدت الو جود ال آ رہے ساں...... "زندگی سبھ بکواس اے!"کہہ کے صاحب روٹی کھاودھے بغیر سَوں گیا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels