Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> سیانے تے ماندے

سیانے تے ماندے

نادر علی
January 15th, 2009

سیانے تے ماندے

امریکہ جُوں اک ہورجہان اے۔ مڑ نہیں وی ۔ جا کے رہوئیے تے ایہناں گلاں دی تے خبرے سمجھ آ ونجے ، پر دُوجے پواڑے پھڑ لیندے ہن۔ روٹی ٹکر سوکھے لئی دنیا جاندی اے، پر اوتھے رہن سُکھلا نہیں ۔ اک پردیس دُوجے لوک اوپرے تے بے لحاظے ۔ میں تے ڈاکٹری پاس کر کے گیا ۔ ڈاکٹراں دی ول کھٹی اے اوتھے۔ پراجے اوتھے دی ڈاکٹری پاس کر کے گیا۔ ڈاکٹراں دی ول کھٹی اے اوتھے۔ پر اجے اوتھے دی ڈاکٹری پاس نہیں سی کیتی۔ امریکہ کوئی نانکا پنڈ تے آہیا کوئی نہ۔ ہر شے مل دی تے کھٹی لوک آپو آپنی کھاوندا۔ آپا دھاپی کجھ ودھیری تے ایہہ کہانی اوس بارے ہی ہے۔
ورھا کھنڈ امتحان وچ لگدا سی۔ امریکہ کسے کم توں کان نہیں کردا ۔ جرنیلاں کرنیلاں دُوجی لام دے بعد چوکیدارے پئے کیتے ۔ ساڈے لوک بھی اوتھے جا کے ایہا آہدے ہن پئی شہر کیہ تے مہر کیہ ۔ سے افسر ٹیکسیاں چلاندے ، چوکیدارے ، مزدوریاں کر دے ہن۔ دُوئی دیہاڑی بھی ول لبھ ویندی اے ۔ سو ڈالر دیہاڑی مزدوری جُوں پاکستان دا چھ ہزار روپیہ سمجھو۔ میں بھی جانو ڈاکٹراں دے کہن تے ہسپتال نوکری کر گھدی چوکیدار دی ، پئی ڈاکٹراں نال واہ بھی رہسی ، کم بھی پیا ویکھساں تے رات ویلے بہہ کے کرن والے چوکیدارے وچ بندہ پڑھ بھی سکدا اے ۔ پر امریکہ کم سولاں آنے کرنا پوندا اے ، بھاویں بہہ کے چوکیدارا کرو تے بھاویں جھاڑو دیوو تے بھاویں ڈاکٹری کرو۔ سو وچ وڑیاں کم سوکھا نہیں سی۔ ہسپتال رات کوئی زخمی آ جائے تے نال ہی پُلس تے ہور سے پواڑے ۔ جے مریض کوئی مرن ہاکا ہووے تے ہسپتال تھرتھلی پے ویندی سی۔ تے امریکن تے رولے تے بھاجڑے دے باتشاہ ہن ، جوں اکھان اے پئی ال ہار رولا بہُتا !
ہسپتال ہر تھاں لاؤڈ سپیکر لگے ہن۔ بانگاں ہار زور نال تے نہیں ، پر سہجے سہجے لگا رہندا اے، "ڈاکٹر فلانی فلانے نمبر کمرے وچ پہنچے ۔ "اکھے "ڈاکٹر دیوی لیبر روم وچ پہنچے ! "بچے آون دی تے اطلاع ہوندی آہی کسے بچیاں آلے ڈاکٹراں ، پر کوئی مرن ہاکا ہووے تے ہونا "کوڈ نائنٹی نائن "فلانے کمرے وچ ۔ مُڑ تے سارے ہسپتال دوڑ پینا۔ دل دا ڈاکٹر ، آکسیجن آلے ٹھیلے ، بیہوش کرن آلے ڈاکٹر ، سرجن ، رچھ کان آلے، نرساں ، ڈاکٹر تے مگرے چوکیدار تے ہیڈ چوکیدار ! اساڈی ڈیوٹی کمرے دے باہر پئی کوئی گھرے آلا یاں فالتو بندہ اندر نہ جائے ۔ تے جے کوئی رڑھ جائے تے مُڑ ڈاکٹری ختم تے چوکیدار شروع ۔
گھرے آلیاں آونا۔ لاش مُردہ خانے لیجانی۔مُردہ خانے دی راکھی تے مرن دا کوئی وقت تے نہیں ہوندا، پربُڈھاتے ماندا کثر سرگھی ویلے رڑھدا اے۔ جدوں بلڈ پریشر گھٹے۔ بعض ویلے جُثے دی گرمی گھٹے تے ماڑے دی جند ہوا ہو ویندی اے۔
مرن توں علاوہ وائرلیس تے اک بُلارا ہونا " کوڈ ٹونٹی ، کوڈ
Twentyـ"ایہہ نرا چوکیداراں لئی ، پئی فلانی تھاں کوئی گڑ بڑ اے۔ اگ دا ہور کوڈ ہونا اوس وچ ہور آہر ہونے۔
اک راتی "ٹونٹی ، ٹونٹی روم 402
ـ" (Twenty , Twenty Room 402) وائرلیس تے آیا۔ جاگو سوتے میں سمجھیا پئی خبرے کوئی رڑھن والا اے ! پرمُڑ وائرلیس تے آواز آئی "مسٹر وارث سُتا پیا ایں ؟ کمرہ چار سو دو، اپڑا "ایہہ ہیڈ چوکیدار مائیک دی آواز آہی جیہڑا چٹا امریکن سی۔ پرانا پُلسیا۔ میں بھجا۔
اوتھے اپڑیا تے عجب تماشا لگا پیا سی۔ اک بُڈھڑی کالی عورت اک پہیے آلی کرسی تے بدھی پئی سی۔ اکثر ذہنی مرض آلیاں منجی نال یاں کرسی نال بنھ چھوڑ دے سن۔ "ایہہ کُتی کُھلی پئی اے !"مائیک حال پاہریا پائی ! ہن چٹے، کالیاں انج بھی بندہ نہیں سمجھدے ، پر اس مائی تے کوئی گڑ بڑ کیتی جاپدی آہی۔ مائیک دے نکوں خون پیا وگدا سی۔ "پرانہہ ہٹ ایہہ تینوں بھی مار سی آ !"مائیک ہور رولا پایا۔ مائی ال ڈٹھا تے اوہ لکوں بدھی پئی سی۔ "مائیک ایہہ تے شوہدی بدھی پئی اے !"شوہدی کوئی نہیں ایہہ ماں یدّھی۔ ایہدے ہتھ وچ پرس اے۔ اوہ ایس میرے مونہہ تے ماریا اے۔ ہُن پچھوں آتے جپھا گھت ! میں ایس دے ہتھ جا بنھاں ۔ "
میں بُڈھڑی مائی ال ڈٹھاتے ہس پیا۔ "ہس نہ !"اوہ روہے روہی بولیا۔ "دھیان کر !"اوس مینوں للکریا۔ مائی پرس بھواندی آہی ۔ مینوں اچن چیت اوہ آپنی ہوئی لگی ! اوس ہتھ بھوایا تے میں پھڑ گھدا۔ تے جُوں اک کائنات دا بھیت کھل گیا ! اوس نہ بھوایا نہ چھڈایا ! اوس پرس ہتھوں ڈیگ چھوڑیا تے ہتھ پہلوں ڈھلا ہویا۔ مُڑ اوس دیاں انگلاں میرا ہتھ پھڑ لیا ! پتہ نہیں اوس آسرا لیا کہ مینوں دتا ؟ مینوں بھی آسرے دی لوڑ آہی ۔ دنیا وچ کساں نہیں ؟
"یوآر ہولڈنگ ہینڈز"ہتھ پھڑنا انگریزی وچ سجن داہتھ پھڑن اے ! توں ایس کُتی نوں پہلوں داجاننا ایں ؟ "مائیک مینوں جُوں الاہما دتا۔ "ایہہ بڑی خطر ناک مریض اے !""ماندی پتہ نہیں ایہہ ہے ، مائیک کہ اسی ہاں ! "میں آکھنوں رہ نہ سکیا ! تے اوس اوہدے ہتھ بنھ چھوڑے!


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels