Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> کہانی پراگا >> سُپرلگژری اپارٹمنٹ

سُپرلگژری اپارٹمنٹ

نادر علی
January 15th, 2009

سپر لگژری اپارٹمنٹ

تن واری گھنٹی وجی۔ ایہہ سفیر صاحب ، میرے وڈے بھائی دی نشانی آہی، تاں جے سارے گھر نوں کیڑ ہو ونجے پئی وڈا صاحب آیا اے۔ اج آپ دی اڈیک بھی آہی۔ میں باہر نکلیا تے اک منگت مائی بوہے اگے کھلی آہی۔ "مائی تساں ٹلی وجائی اے ؟ "اوہ خالص چکوالی وچ پر منگتیاں ہار لمکا کے بولی، "ہک واری دی تے کوئی نیہہ سُنیندا بچڑا مینڈیا ! "اوس دی اواز، ڈھیٹھ پنے تے بولی نے مینوں ساڑ چھوڑیا۔ "تیرا اُدھار تے نہیں میں دینا ! ہلا جا مُن جان چھڈ!"تے بوہا زور نال میں ماریا۔
ٹلی مڑ کے تن واری وجی تے میں روہا روہی نکلیا، "آؤ بھائی جان تساں توں پہلاں اک منگت بھی تساں ہار ترے گھنٹیاں وجائیاں ہن !""یہ ملک حرام خوری اور کام چوری کا عادی تو پہلے ہی تھا، اب سینہ زوری پر اتر آیا ہے۔ اب خدا کے لئے اس ملک کو چھوڑو اور فی الحال کسی بہتر آبادی میں ڈھنگ کا مکان لو !"بھائی صاحب پنج سال برسلز سفیر راہ کے آئے سن۔ ایس توں پہلوں امریکہ یو۔ این۔ او وچ پاکستان دے نمائندے آہے ۔ امریکن شہریت لے گھدی ۔ پنجے بچے امریکہ آہے ۔ بھائی جان تد فارن سروس وچ گئے، جد پہلے نمبر آلے فارن سروس جاندے آہے تے دوجے آلے سی۔ ایس ۔ پی۔ ہُن تے پہلا لمبر لیارے محکمے جاوندا اے ! پر سہی ہوندا سی لیارا محکمہ فارن سروس بھی آہیا۔ کروڑاں دی جائیدار بھائی صاحب پاکستان تے امریکہ بنائی۔ سیٹھ حامد نال یاری آہی۔فورٹریس ہومز (قلعہ مکان) جد سیٹھ حامد بنائے تے نہ بھائی صاحب تے نہ میں لینا چاہندے ساں۔ ہن اوہناں دو مربعے دے حاطے وچ سپر لگژری اپارٹمنٹ بنائے، جتھے آپنا کلب ، سواری دے گھوڑے ، تلاء تے نکا گالف کورس بنوایا ، پر ممبر سارے سرکاری افسر تے باہروں آئے سکھلے پاکستانی آہے۔ ممبری واسطے ایہناں دے ووٹ لینے ضروری آہے تے انج ایہہ کہانی شروع ہوئی۔
میں تے بھائی ہوراں نوں غلام عباس دی کہانی "آنندی "سنائی ، پئی "جتھے ہیرا منڈی جائے اوتھے شہر بھی آباد ہو ویندے ہن۔ سرکار کنجری ہے اوس دا گھنٹہ وجدا رہسی۔ اسلام آباد ویکھ لوو!"بھائی صاحب تہاڈے لیفٹسٹ ہون تے ممبراں نوں اعتراض اے۔ کل نوں مشاعرے شروع کروا دیسو ۔ " میں کہیا ، "مجریاں نالوں تے چنگا ہے ، جسدا سرکاراں شوق رکھدیاں ہن !"پر کہانی گمبیھر ہو گئی۔ اک صاحب اوس سرس سکھلی ڈھانی دے میرے گھر ٹورے گئے ۔ شراب تے میں پی لیناں ، پر اجکل لبھدی نہیں تے ہے مہنگی ۔ بھائی صاحب اچیچے اسلام آباد توں وہسکی دی بوتل لے کے آئے نالے اک سیٹ گلاساں دا۔ "کدھرے لسی آلے گلاس نہ چادھریں !" میں برف دی شیشے دی بالٹی رکھ کے سارے شگن پُورے چا کیتے۔ وہسکی دی بوتل ککڑی ہار اے، "دوہاں ، چوہواں دا کھا جا تے اٹھاں دا بھیڑ بھڑا جا !"بھائی ہوراں تے اک ادھ پیتی پر میں تے قاضی صاحب ، سابق سیکرٹری خزانہ بہت پی گئے۔ اچن چیت قاضی صاحب تے جُوں فوت ہو گئے۔ چا کے مہمان خانے پایا، پانی رکھیا، غسل خانے وچ تولیہ بدلیا تے میں آ کے سوں گیا۔
میرے لیمپ دی بتی بلدی رہ گئی سی۔ ادھی راتی قاضی صاحب میرے کمرے وِچ پئے پِھر دے آہے۔ میں ابھڑ واہیا اتھیا، "خیریت اے قاضی صاحب؟"قاضی صاحب میرے میزتے پئیاں کتاباں پئے ویکھدے آہے۔ "کتابوں میں آپکا اچھا ٹیس
ٹ ہے!"قاضی صاحب میرے ال تے میرے نال سُتی بُڈھی ال تک کے آکھیا۔ میں سوچیا قاضی صاحب یاں تے نیندر وِچ ٹُر دے نیں یاں اجے پی کے بے ہوش پِھر دے نیں۔ میں اوہناں دی بانہہ پھڑ کے باور چی خانے لے گیا۔ اوہناں نوں اِک ٹھڈے پانی دا گلاس پیایا۔ گھڑی ال ویکھیا تے تِن وجے سن۔ قاضی صاحب سبھ شرابیاں ہار نیندر پُوری کر چکے سن۔ "کجھ کھا لوو تسیں راتیں روتی نیں سی کھا دی۔"میں فرِج کھولدیاں آکھیا۔ "تہجد گزاری اور سحرگا ہی کتنی قدرتی چیزیں ہیں!"میں تے اُکا سڑ گیا۔ "خاص طور تے رج کے پی کے سُتے ہوو تے نیندر انج ہی چھیتی پُوری ہو جاندی اے!"پر لڑنا تے مناسب نہیں سی۔ ہِز ایکسیلینسی سفیر صاحب میز بانی دا برا آہر کیتا سی تے اجے میری ممبر شپ دا فیصلہ ہونا سی۔ "کِچن آپ نے خود ڈیزائین کیا ہے یا کسی اِنٹیریر والے سے کروایا ہے؟ خاتونِ خانہ صاحبِ ذوق لگتی ہیں!"قاضی صاحب پُورے انٹرویو دے پینترے وِچ آ گئے۔ "قاضی صاحب کُجھ کھا لوو!"میں کھانا کڈھن تے گرم کرن دے آہر لگ پیا۔ مائیکرو ویو نال تے ہر شرابی ہار کھانے دا میں چنگا آہری ہاں۔ کھانا میز تے لا کے بیٹھے تے قاضی صاحب فوراََ صاحب توں اِک ڈگ کُتا بن گئے۔ اِک تے بُھکھے بھی ہوسن تے دُوجا کھان دا چج اُکا کوئی نہیں سی۔ جھٹ سارے وِچ ہر شے چٹ کر گئے۔ میں نیپکن دِتا تے اوہ پُونجھ پانجھ کے مُر اِنٹرویو دے کم لگ پئے۔ "کھانا اچھا تھا۔ خاتونِ خانہ خود پکاتی ہیں؟" "جی نہیں اج تے تہاڈی میز بانی دا خیال سی۔ سفیر صاحب دا باور چی آیا سی میرا بھی نال سی تے نفیسہ آپ بھی لگی رہی اے۔ چلو محنت ضائع نہیں گئی تُسیں کھاتے لیا اے۔" چنگا توپ دے گولے جیڈا ڈکار مار کے قاضی صاحب "شکر الحمدُللہ!" کہیا، نال ہی "ایکسکیوز می!" "پد، پُھوسی تے ڈکار، حکیم نوں دو پولے مار!"میرا دِل بد تمیزی کرن نوں کردا سی مُڑ خیال وڈے بھائی صاحب دا آوے "میرا مطلب اے ڈکار، ہوا خارج ہوون صحت دی نشانی اے!" "صبح کی سیر کے متعلق آپکا کیا خیال ہے؟"قاضی صاحب صحت دی دُوجی علامت ظاہر ہوون نال بولے۔ دِل تے میرا کرے پئی آکھاں، "چودھرانی ایہہ واج ہور اوہ واج ہور!"پر قاضی صاحب ذات دے پٹھان آہے تے پٹھان ایس اکھان دے اعلان نوں چنگا نہیں سمجھدے۔ بہر حال رات گئی بات گئی۔ دن چڑھے سبھ وڈیاں ہار قاضی صاحب مُڑ کے وڈے افسر بن گئے تے ممبری میری منظور ہو گئی۔
بھرمی کماں دے بھرمی شگن ہوندے نیں۔ روٹی پکاؤ۔ چج دا نواں فرنیچر لوو۔ اپارٹمنٹ دے نویاں گواہنڈھیاں نوں مِلو۔ ملن لئی چج دے کپڑے سِوائے، پر آہی بھیڑی شادی! دِن چار نہ گزرے تے کم وِگڑنا شروع ہو گیا۔ روز نویںشکَیت نویاں گواہنڈھیاں نوں ہونی۔ بھائی ہوراں میرے تے چڑھائی کر دینی..........بخیلی ، چغلی نندیا، دھرو "جوں سچے سائیں شاہ حسین آکھیا آہی ، اصلی کم ایس بھرم دھرم دے ہین ! کھلی فضا تے چھ بیڈ روم دی کھُلی اپارٹمنٹ وچ سوڑ جیہی رہنی۔
سبھ توں وڈا مسئلہ زبان دا سی۔ پاکستان دے امیراں ہار فیصلہ اوکھا آہی پئی کیہڑی زبان بولیے۔ پنجابی اوہ نہیں آہے بولدے تے انگریزی ایہناں نوں آوندی نہیں سی۔ انگریزی تے اوہا ہوئی جو سکھلے بولن۔ کوئی شیکسپئیر بولدے نہیں سن کیہڑا کسے پڑھیا ہویا سی۔ زبان دی بے زبانی ایس لئی بھی ودھیری سی پئی اٹھے پہر جائیداد ،کاراں تے امریکن سیر تے جیہڑا نکڑ چُکڑ اوتھوں مڑدیاں لیاندا آہیا، ایس توں علاوہ کوئی گل نہیں سی ہوندی ۔ گالف کھیڈنی اُنج بھی تے کوئی کھیڈ نہیں ۔ جُوں پاکستان وچ گالف کھڈان والے چھوہر ہی گالف کھیڈ دے نیں۔ کدھرے اک نوکر اک بیگم نال پھڑیا گیا۔ مار کُٹ ہوئی ۔ کسے نوکر نوں پولی جیہی پُچھیا، "اوہ سوہریا توں بیگم کنج پھسا لئی !"اوس کہیا ، "سرکار نوکر جُو ہوئے جو نوکری ملے کم سکھ لئیدا اے ؟ "میں ایہناں ، ان سکھ کھسماں توں بڑا تنگ آ گیا۔
بھائی صاحب ہُن روز آوندے ہن۔ تن واری ٹلی وجاندے ہن۔ میرا دل کردا اے یا اللہ اوہ چکوال منگت ہی آ جائے دو بول پنجابی دے تاں بولسی !


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels