Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> وٹاندرا >> اک سویر دی آس وچ

اک سویر دی آس وچ

خالد فرہاد دھاریوال
January 16th, 2009

اک سویر دی آس وچ

ممتاز دا نوکر خوشیا جدوں کُتے نوں دو میل دی دوڑ لوا کے ہفدا ہویا حویلی وچ وڑیا تاں اوہ اپنے کُتے تے اوہدے راتببارے اپنے کسے ملن والے نوں دس رہیا سی ، "ایدکیں ایہہ ضرور بڑ جت لئے گا، بڑی ٹہل سیوا کر رہے آں ایہدی، شام سویرے ددُوھ ، گھیو، گوشت ........
ـ"
جھٹ کُومگروں خوشیا جدوں کوسے کوسے دُدھ دا پیالہ کُتے اگے رکھن جا رہیا سی، اوہنوں لگا جیویں روز وانگوں اج پھر بھُکھ نال ولکدے ساری دُنیا دے بال کتورے بن کے اوہے پچھے دوڑے آ رہے نیں، جیہناں وچ اوہدے اپنے بالوی نیں۔
"اوہ سویر کدوں آئے گی جس دن بندے نوں گھٹو گھٹ ایس کُتے بروبر من لیا جائے گا ؟"خوشئیے سوچیا تے دُدھ داپیالہ کُتے اگے رکھ کے اج دے سورج نوں نراشا نال ویکھیا جوامبراں اُتے کیسری رنگ دُھوڑ دا پچھّم وچ ڈب رہیاسی۔
کپڑے والی مل وچوں چھُٹی کر کے باہر نکلدیاں مجید نوں لگا جیویں روز وانگوں اج پھر دھرتی دا کالجہ پاٹ گیا اے تے سیت نال ٹھٹھر کے موئے ساری دُنیا دے بال قبراں وچوں آنے ٹڈ کے اوہنوں ویکھ رہے نیں ، جیہناں وچ ترے بال اوہدے اپنے وی نیں
"کفن سویر کدوں آئے گی جس دن مرے ہوئے بالاں دے بے جان سریراں دا کفن بنیاں ٹاکیاں کلول کردے بالاں دے ننگے سریراں دا مرنوں
پہلاں وی پہناوا ہون گیاں ؟" اوس سوچیا تے کھنگ دے اک لمے غوطے مگروں لہو رلیا تھُک باہر سُٹ کے اج دے سورج نوں نراشا نال ویکھیا جو امبراں اُتے کیسری رنگ دُھوڑدا پچھّم و ڈب رہیا سی۔
دن وچ تریجی وار چلم بھر کے منجے اُتے بیٹھے چودھری اگے حُقہ رکھن مگروں جدوں میرو آپ بھوئیں اپنے بیٹھ رہیا سی، اوہنوں جاپیا روز وانگوں
جیویں اج پھر دنیا بھر دے ہینے جیہناں وچ اک اوہدی اپنی واج وی اے چیک چیک کے کہہ رہے ہون "عزتاں تے مراتبے کدوں تیک پگاں دے شملیاں دی اُچیائی نال ناپے جاندے رہن گے اوہ سویر کدوں آئے گی جدوں بھوئیں توں منجے تیک ایہہ چار گٹھ دی وتھ مٹ جائے گی ۔ "
ہیٹھدیاں ہیٹھدیاں میرو نے اج دے سورج نوں نراشا نال ویکھیا جو امبراں اتے کیسری رنگ دُھوڑدا پچھّم وچ دب رہیا سی۔
کھیتاں وچوں گھر آؤندے فضلو نے قبرستان کولوں لنگھدیاں روز وانگ سوچیا، "اوہ دن کدوں چڑھے گا جس دن ایس تن ہتھ دھرتی توں اڈ کُجھ ہور بھوئیں اُتے وی اساں سیریاں دا حق من لیا جائے گا۔ جس وچ اسی اپنی مرضی دیاں فصلاں بیج کے ترے کال دی روٹی کر سکاں گے ؟"
پھر ٹردیاں ٹردیاں اوس اج دے سورج نوں نراشا نال ویکھیا جو امبراں اُتے کیسری رنگ دُھوڑدا پچھّم وچ ڈب رہیا سی۔روز وانگوںاج پھر رجی نے شیشے اگے کھلو کے اپنے چاندی ہوندے والاں نوں جیہناں دی روز گنتی ودھدی جا رہی سی،کالے والاں ہیٹھ چھپایا۔ پھر صندوق وچوں گوٹے کناری والا سوہا لیڑا جیہدے گوٹے دا رنگ ہُن میلا پے چُکیا اے کڈھ کے سر اُتے رکھیا تے گھُنڈ کڈھ کے مہندی دے رنگ نوں اُڈیکدے اپنے ہتھاں نال اوہنے کھڑکی کھولی۔
کھڑکی وچوں جدوں رجی پنڈ نوں آؤن والی پگڈنڈی ویکھ رہی سی اوہنے محسوس کیتاجیویں اوہدی طرحاں ہزاراں کُڑیاں اپنے گھرادں دیاں باریاں کھول کے اپنے پنڈاں نوں آؤندیاں پگڈنڈیاں ویکھ رہیاں نیں ۔
"اوہ سویر کدوں آئے گی جس دن کوئی ایہناں پگڈنڈیوں اُتے ٹُردا آئے گا تے ذات تے داج پُچھے بنا اوہناں دا ہتھ پھڑ کے اپنے نا لے جائے گا ؟"رجی نے سوچیا تے پھر کھڑکی وچوں اج دے سورج نوں نراشا نال ویکھیا جوامبراں اُتے کیسری رنگ دُھوڑدا پچھّم وچ ڈب رہیا سی۔
اوس کھڑکی بند کر لئی تے لیڑا تہہ کر کے صندوق وچ رکھن مگروں ہُن وستی دے دُوجے واسیاں دی طرحاں پھر اگلی سویر دی اُڈیک وچ سون دی تیاری کرن لگ پئی۔
اوہناں واسیاں وانگوں جو ہر شام پچھّم وچ ڈبدے سورج نوں نراشا نال وداع کرکے ہر سویر پُوربوں اُگدے سورج دا سواگت کردے نیں، ایس آس نال کہ شاید ایہی سویراوہ سویر ہووے جس دی اوہناں نوں صدیاں توں اُڈیک اے۔
کیہ پتہ اپنے پُرکھاں وانگوں ایہناں دے جیون دیاں راتاں وی ایس اک سویر دی آس وچ ای بیت جان۔ کیہ تُسیں دس سکدے او ایہہ سویر کدوں آئے گی ؟


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels