Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چرخے دی موت >> اِک سپاہی دی تھرموس

اِک سپاہی دی تھرموس

حنیف باوا
January 16th, 2009
5 / 5 (1 Votes)

اک سپاہی دی تھرموس

اوہدے کول سوائے اک تھرموس دے ہور کجھ نہیں سی۔ اوہ اک سپاہی سی تے آپنے آپ نوں دشمن دے حوالے کرن جا رہیا سی۔ راہ وچ اوہنوں دو بچّے کھیڈ دے ہوئے ٹکرے ۔ اوہ دوویں بچّے ریتے نال گھر بنا بنا کے کھیڈ رہے سن اوہ کھیڈ دے اوہنوں بڑے ای چنگے لگے ۔ اوہ اگانہہ ٹُرن دی بجائے اوہناں توں کجھ دُور ہٹ کے بہہ گیا ۔ اوہ اوتھے بیٹھا فوج دا سپاہی نہیںسی لگ رہیا ۔ ایس لئی کہ اوہ بندوق نوں بوہت پچھّے اوس رُکھ دے ہیٹھ چھڈ آیا سی جیہڑا کہ ریت دے اک وڈے ٹبّے دیاں جڑھاں وچ کھلوتا سی۔ تے جتھے اوس نے کنیاں مصیبتاں جھل کے کنّیاں ای بھُکھاں تریہاں کٹ کنّے دن تے کنّیاں ای راتاں اک کر کے آخری پناہ لئی سی تے جتّھے اوس نے ایہناں مصیبتاں بھُکھّاں تے تریہاں توں گھبرا کے آپنے آپ نوں دشمن دے حوالے کرن دا فیصلہ کیتا سی۔
جدوں اوہ اوس رُکھ دے ہیٹھ آکری پنا لین لئی کھلوتا سی۔ اودوں جیویں اوہدے دو ٢ پتّر اک دھی اوہدے ساہمنے کھلوتے ہون۔ ایہناں بچیاں لئی ای تے اوہ فوج وچ بھرتی ہویا سی ۔ ایہناں دی کملائی ہوئی حیاتی وچ بہار لیاون لئی ای ایس جنگ وچ کُدیا سی۔ اوہنوں جدوں دشمن نال لڑن لئی اگلے مورچیاں تے گھلیا سی ۔ اودوں وی اوہنے سوچیا سی۔
میں جان توڑ کے لڑاں گا۔ میں لڑائی وچ اجیہے کارنامے کردا ہویا مراں گا جیہناں نوں ویکھ کے سرکار مینوں کوئی اُچا جیہا تمغہ دیوے گی۔ اوس چمکدے ہوئے تمغے دی لشک میرے بچیاں دی ہنھیری زندگی وچ چاننا کھلار دیسی۔ چنانچہ میں جان توڑ کے لڑیا وی ۔ پر کیہ کیتا جاندا ۔ جنگ بناں کسے فیصلے تے اپڑیاں ای ختم ہو چکی سی تے میں دشمن دی جُوہ وچ دھکّے دھوڑے کھان نوں رہ گیاساں۔
زندگی نوں مصیبتاں تے تکلیفاں وچ جھوکن دا ہُن کیہ فائدہ چنگا اے میں آپنے آپ نوں دشمن دے حوالے کر دیاں ۔ شاید کسے ویلے وی میں آپنے بچیاں نوں ویکھ سکاں۔ کیہ ہویا جے میں اوہناں دی زندگی دے ہنھیرے نوں دُور نہیں کر سکیا۔ اوڑک اوہ میرے بچّے میں اوہ مینوں ضرور معاف کر دین گے۔ اوہ مینوں مل کے ضرور خوش ہون گے۔
جدوں دا اوہنے آپنے آپ نوں دشمن دے حوالے کرن دافیصلہ کیتا سی اوہدے سارے ڈر بھو لتھ گئے سن ۔ ہن اوہ کسے کولوں وی کنّی کترا کے نہیں لنگھدا سی۔ انج نجھّک ہو کے لنگھ جاندا جیویں اوہ اوہناں دے آپنے ای پنڈ دا کوئی وسنیک ہووے ۔ نہیں تاں آخری پناہ لین توں پہلاں اوہ بندے دے پرچھانویں توں وی ڈ رجاندا، تاہیوں تے اوہ وستیاں توں دُور رہ کے دن تے راتاں کٹدا سی۔ آپنی منزل نوں لبھن لئی اوہ دیس دی جُوہ ٹولن لئی جیہدا کہ اوہ وسنیک سی جیہدے حکمراناں لئی اوہ ایہہ جنگ لڑدا رہیا سی۔
پر اوہ اوہناں دو ٢ بچیاں کولوں کنّی کترا کے نہ لنگھ سکیا جیہڑے کہ اک رُکھ دی سنگھنی چھاں تھلّے بیٹھے کھیڈ رہے سن۔ اوہ بچّے ویکھ کے اوہنوں آپنے پُتّر یاد آ گئے اوہنے سوچیا ، ہو سکدا اے اوہ ایسے طرح گھر بنا بنا کے کھیڈ دے ہون ۔ اوہنوں ایہناں بچیاں تے آپنیاں بچیاں وچ کوئی فرق نہ لگیا ۔ تاہیوں تے لنگھدیاں ہویاں اوہدے پیر من من بھاری ہو گئے سن۔ اوہ اک قدم دی اگے نہ پٹ سکیا ۔ اوہ ایہناں دی کھیڈ وچ مخل نہیں ہونا چاہوندا سی۔ بس اوہناں نوں کھیڈ دیاں نوں تکنا چاہوندا سی۔
اوہ اوہناں توں کجھ دُور ہٹواں ہو کے بہہ گیا ، جیہڑے ریتے نال اوہ کھیڈ دے پتے سن۔ اوہنوں انج لگیا جیویں اوہ ریتا اوہدے آپنے پنڈ دا اوہ ٹھنڈا ریتا جیہڑا کہ گرمیاں دیاں تیز دُھپّاں نوں چُوس کے راتاں نوں ٹھنڈ ونڈ دا اے۔ امن چین ونڈدا سی۔ پر اج رب دی مخلوق دا ایہہ سانجھا ریتا بروُد دی اگ نے ساڑ کے سواہ کر چھڈیا ہوسی۔ جیہڑے رُکھ تھلّے اوہ بیٹھے سن اوہ اوہنوں آپنے ویہڑے وچ کھلوتے رُکھ ورگا لگیا۔
اوہنے اوہناں بچیاں دے پاٹے لیڑیاں ول ویکھ کے سوچیا ، شاید ایہناں دا پیو وی میرے وانگوں ایہناں دیاں لڑائی لوڑاں پُوریاں کرن لئی فوج وچ بھرتی ہویا ہووے شاید اوہنے وی کوئی تمغہ لین لئی لڑائی وچ بڑے بڑے کارنامے وکھائے ہون تے شاید لڑائی بند ہون تے اوہ وی دشمن دے علاقے وچ پھس گیا ہووے تے میرے وانگوں ایہناں بالاں لئی مصیبتاں توں ہار من کے آپنے آپ نوں دشمن دے حوالے کرن دا فیصلہ کر لیا ہووے۔
اوہ کجھ دور بیٹھا اوہناں نوں کھیڈ دیاں نوں ویکھدا رہیا ۔ اوہ سُکّے ریتے نال گھر بناون دی کوشش وچ لگے ہوئے سن۔ پر اوہناں نوں کیہ پتا سی پئی کدی سُکّے ریتے نال وی گھر بنے نیں۔ ریتے وچ پانی ملاونا پیندا اے ۔ شاید پانی اوہناں کول کوئی نہیں سی ۔ پانی اوہدے کول جو سی ۔ اوس تھرموس وچ جیہڑی اوہدے موڈھے وچ لٹک رہی سی۔ ایہہ پانی اوہنے اوس چھپڑ وچوں توں کجھ دور اک نکّی جیہی وستی ضرور سی جیہڑی کہ جنگ دے دوران ڈھیہہ ڈھیری ہو چکی سی۔ اوس وستی دے مکاناں دیاں کچیاں کندھاں دیاں اٹّاں دور دور تائیں کھلریاں پئیاں سن۔ اوس سڑی ڈھٹّھی وستی نوں کجھ دُور اک نکّے جیہے بچّے دی لاش تے اوہدے نال اک بڈّھا مویا پیا سی۔ اوہناں دے کول اک بکری دا بچہ کھلریا پیا سی ۔ ایہناں لاشاددں نوں ویکھ کے انج معلوم ہوندا سی جیویں ایس جنگ دا مقصد صرف ایہناں نوں ای مارنا سی۔ ایہہ مر گئے جنگ بند ہو گئی ۔
اوس ویلے ہُنالے دی رُت سی۔ ادھی رات دا ویلا سی۔ وٹ وی بڑا سخت لگیا ہویا سی ۔ اوہ پچھلے کئی گھنٹیاں توں کماد وچ لُکیا ہویا سی ۔جدوں اوہنوں تریہہ نے ڈاڈھا ستا لیا تاں اوہ ڈردا ڈراوندا کماد وچوں نکلیا تاں پانی دی تلاش وچ وگ ٹُریا چ۔ چوکھی کھوج مگروں جیہڑے ویلے ایہہ چھپّڑا اوہدی نظریں پیااوہنوں جیویں چاء چڑھ گئے ۔ اوہ اوہدے ول نس کے گیا ۔ اوتھوں اوہنے رج کے پانی پیتا ، نالے تھرموس بھرئی۔ ایہہ اوہو ای گندہ پانی سی جیہدی لوڑ اج بچیاں نوں پے گئی سی۔
اوہ اوتھوں اُٹھیا ۔ موڈھے وچوں تھرموس کڈّھی تے بچیاں کول آن کے کہن لگیا۔
"پترو ! سُکّے ریتے نال گھر نہیں بنیا کر دے ۔"
بچیاں نے مُونہہ اتانہہ چک کے اوہدے ول تکیا ۔ اوہ ایس طرح شرما جیہے گئے جیویں اوہناں دی کوئی چوری پھڑی گئی ہووے یا اوہناں دی چترکاری بھانڈا پھٹ گیا ہووے ۔ اوہنے اوہناں دیاں چہریاں ول ویکھ کے جیہڑے اودرے جیہے لگ رہے سن سوچیا۔ "میں اینویں ایہناں کول آیا، میرے آون نال ایہناں دی چنگی بھلی کھیڈ وگڑ گئی ۔ میں ایہناں نال دھروہ کیتا اے ۔ ایہناں دیاں نکیاں نکیاں خوشیاں دا گل گھٹ دتا اے ۔ مینوں ایتھوں چلیا جانا چاہیدا اے فوراً چلیا جانا چاہیدا اے ۔"چنانچہ اوہنے تھرموس اوہناں دے کول رکھ دتی تے ایہہ کہندا ہویا اگّے ٹُر پیا۔"میرے پُترو ، شالا تُسیں ایسے طرح گھر بناوندے رہوو، ایس طرح نکیاں نکیاں خوشیاں ماندے رہو۔ شالا تُسیں ہر قسم دی تتّی داء توں بچے رہوو۔
اوہ آپنے آپ نوں دشمن دے حوالے کرن جا رہیا سی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels