Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> وے کیہڑا ایں(اک باغی شاعرہ دی کہانی) لڑی6

وے کیہڑا ایں(اک باغی شاعرہ دی کہانی) لڑی6

نین سْکھ
June 8th, 2017

وادھو پیسے، واہوا بوتلاں، اینی ساری اِکٹھی شراب ویکھ کے نسرِین دی تریہہ لہہ گئی۔ گھر وچ آواجائی ودھ گئی، ہر ویلے رونق میلہ۔ عیاش پِنڈے تے ترسے نَین، نویں پروہنے تے پُرانے یار۔ پر نسرِین اپنے وجود چوں باہر نکل گئی۔ کالمسٹ نوں جاپے کہ رانا تے نسرِین، دویں جی دھرتی نال جُڑے ہوئے، صوفیاں دے منن والے۔ رانا ملامتی جلال وچ ظاہر ہووے۔ نسرِین نِمانی وچ عاجزی، باطن وچ چین کرے، یسوع مسیح اوہدا قلندرِاعظم، اوہ یوگا سِکھن لگ پئی۔

اسلامی مارشل لاء دے پِچھانہہ کھِچو یارھاں سال، جیہدے وچ اگانہہ ودھو سوچ نال جُڑے سُوجھواناں بھُکھ، دُکھ، گُمنامی تے بدنامی ہنڈائی، اوہناں نوں 1988 وچ سکھ دا ساہ آیا۔ کالمِسٹ اکھیں ڈِٹھا، پیپلز پارٹی دی حکومت آئی، نسرین اُچیہسدیاں سرگم وچ آجائے، رانا اُچیاں ہواواں وچ اُڈے، ’’راتیں بے نظیر بھٹو دا فون آیا سی.....‘‘ ، ’’اج بے نظیر نال گل ہوئی اے..... اوہنے مینوں پُچھیا..... میں اوہنوں دسیا.....‘‘ پر پرائم منسٹر نال اوہدی فون کالز دا گواہ کوئی نہ۔ نسرِین وی اوہدے مُونہوں سُنے۔ پر عوامی وزیراں تے مشیراں نال اوہدِیاں ملاقاتاں تے مشورے اکثر لوکاں ویکھے۔ رانے دی دھی چاندنی فیصل آباد رہندی جیہنوں رانے سیاست وچ لانچ کرن دی کوشش کیتی۔
وادھو پیسے، واہوا بوتلاں، اینی ساری اِکٹھی شراب ویکھ کے نسرِین دی تریہہ لہہ گئی۔ گھر وچ آواجائی ودھ گئی، ہر ویلے رونق میلہ۔ عیاش پِنڈے تے ترسے نَین، نویں پروہنے تے پُرانے یار۔ پر نسرِین اپنے وجود چوں باہر نکل گئی۔ کالمسٹ نوں جاپے کہ رانا تے نسرِین، دویں جی دھرتی نال جُڑے ہوئے، صوفیاں دے منن والے۔ رانا ملامتی جلال وچ ظاہر ہووے۔ نسرِین نِمانی وچ عاجزی، باطن وچ چین کرے، یسوع مسیح اوہدا قلندرِاعظم، اوہ یوگا سِکھن لگ پئی۔
کالمسٹ دے ساہمنے اوہناں بالاں لئی گیتاں دا سرکاری پراجیکٹ کیتا۔ گھر وِچ ہار مونیم تے طبلہ وجن لگ پئے۔ پرویز پارس، فہیم مظہر، رانا تے نسرِین۔ سُراں تے ماترے کوئی شُغل نہیں، پہاڑے گاون بن گئے۔ پر سُکھاں وچ وی نسرِین دُکھاں تے ٹیکے لواندی، پُرانے پھٹاں دے کھرِینڈے چھِلدی رہوے تے وچھوڑے دے زہر نوں چوسدیاں نیلی ہوجائے۔ نیلا رنگ اوہنوں بہت پسند، کرشن دا رنگ نیلا تے مرزے جٹ دِیاں نیل کرائیاں نیلکاں۔
مصیبتاں ماری ماں!
کالمسٹ نسرِین لئی ناں سوچیا۔ اوہ جِنّی لاڈے تے ضِدی گولو دی ماں، اونی ای اکھّڑ تے مُوڈی رانے دی سنبھالنہار، وِٹریارانا اوہنوں کُٹ وی لیندا۔ گولُو لئی اوہنوں اوہدی چاکلیٹ تے آئسکریم دی فکر، نہیں تے گولُو رُس جائے۔ اوہ گولُو دی بطخ دا بہت خیال رکھے، نالے اوہدے لئی ودھیا نویں نویں کھانے پکائے۔ اوہنے گولُو لئی اک نوِیں ڈِش بنائی جیہدا ناں اوہنے سوچیا فِش پٹاٹو۔
سبھ دوستاں نوں پتہ کہ نسرِین کھانا پکانا ’وڈی بھابی‘ کولوں سِکھی جیہنوں وڈی بھابی اوہدِیاں نناناں، آشا پوسلے تے رانی کِرن کہندیاں سن جیہڑِیاں پاکستانی فلم انڈسٹری دِیاں موڈھی ہیروئناں۔ نسرِین جدوں حبیب اللہ روڈ تے کرائے دار ہوئی، لہور ریڈیو سٹیشن دا وائلنسٹ شمشیر علی اوہدا گوانڈھی سی جیہدی گھر والی بارے مشہور کہ اوہ چسکورے لہور وچ سبھ توں سوادی کھانا پکاوے، جیہنے اوہدے ہتھ دا پکیا کھالیا، اوہ اوہدی وڈی بھابی بن گئی۔
کراچی وچ نسرِین دے بھراء سہراب بھٹی دا ویاہ جیہنوں اوہ اجے وی کاکا کہندی سی، اوہدی وری اوہنے لہور وچ بنائی جیویں ماں اپنے پُتر دے سارے چاء پورے کردی۔ کالمسٹ نوں اوہ مصیبتاں ماری ماں لگدی پر اوہ ایہہ وی جانے کہنسرِین اپنے پہریوے دا بہت خیال رکھدی۔ میچنگ لِپ سٹیک، نیل پالش، جُتی، کپڑے تے پرس۔ بُڈھیپے ول جاندیاں اوہنوں جِسم اُتے جھُرڑیاں زہر لگن، اوہ مہنگیاں مہنگیاں رِنکل فری کرِیماں خریدے۔
نسرِین 1992 وچ لہور دی ڈپٹی کنٹرول بنی، کجھ دن اوہنوں کنٹرولر دا وی چارج لبھا، اوہنوں ساتھی لہور ریڈیو سٹیشن دی بے نظیر کہن لگ پئے۔ مارگلہ ریڈیو اسلام آباد دی ہیڈ بنی۔ اوتھوں ریڈیو خیر پور دی سٹیشن ڈائریکٹر بن کے گئی تے کہن لگی:
اسلام آباد دے کُوفے توں
میں سندھ مدینے آئی
1995 توں 1998 تیک نسرِین شاکر علی میوزیم لہور دی ریزیڈنٹ ڈائریکٹر رہی۔ وچ 1997 آگیا، پاکستان دی گولڈن جوبلی، ’آزادی ٹرین‘ چلی، نسرِین اوہدی کلچرل ہیڈ جیہنے ریل گڈی وچ پورے پاکستان دا چکرلایا۔ سارا رستہ کلچرل پروگرام ہوئے۔
واپسی تے بڑی خُش کہ اوہدِیاں اکھاں اگے انیھرا، چکر ا کے بے ہوش ہوگئی۔ ہائی بلڈ پریشر دا اٹیک کیویں نہ ہوندا، جیہڑے گولُو نوں اوہنے بارھاں سال نِگھ تے وراگ نال پالیا، اوہنوں اوہدے جمن والے لین آگئے---- کجھ دِناں دے سلمان نوں اوہدی نرس ماں زاہدہ عندلیب نسرِین دی جھولی کیوں پایا کہ اوہنوں جاپان وی نرسنگ دی نوکری مِل گئی، اوہ تفضیل حسین وجہوں اوہدی سہیلی بنی سی جیہڑا لہور ریڈیو سٹیشن وچ اوہدے نال پروڈیوسر رہیا۔ گھر اُجڑ گیا، نسرِین سُتی وی ’’گولُو! گولُو!‘‘ کردی رہوے۔
O
Link of Part 5
http://www.wichaar.com/news/312/ARTICLE/33113/2017-06-07.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels