Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> کم والی(کہانی) 8ویں اتے اخیرلی لڑی

کم والی(کہانی) 8ویں اتے اخیرلی لڑی

نین سکھ
May 29th, 2017

ضلع جہلم دی گرائیں جِیراں، باغ منشی لدّھا وچ لہورن ہوکے نزیر بیگم، تے اگے جج صاحب دی حویلی جِتھے اوہ کم والی شائسہ بیگم ہوگئی۔ اوہ پردہ دار سادات دی نُونہہ جیہنے روزی روٹی لئی معصوم دِھیاں نوں گھر ڈکیا تے چوری لہور ریڈیو دے ڈرامے وچ کم کیتا جتھے اوہنے اپنا ناں عالیہ بیگم رکھ لیا۔ اوہنے چار ویاہ بھُگتے۔ چوتھا خاوند شیخ فاروق احمد معظم شیخ دا پیو، سپیکر پنجاب اسمبلی شیخ رفیق احمد دا بھراء، اوہ 1990 وچ فوت ہویا۔ اوہدا پہلا نکاح اوس آئرش فوجی نال ہویا جیہنے جلیانوالہ باغ دے قتلام (1919) وچ نہتھے لوکاں اُتے گولی چلاون توں انکار کیتا۔ اوس مفرور کیپٹن میسی نال عالیہ بیگم دا ویاہ چھ مہینے رہیا، اوہدے مرنوں بعد جیہڑی بمار دھی جمی، اوہدا اجے ناں وی نہ رکھیا کہ اوہ مرگئی۔ دُوجا خاوند مرزا ضیاء الدین بیگ، حیدر آباد (دکن) دی چار مینار سگریٹ فیکٹری دا منیجر جیہدے توں اوہدے چار بال ہوئے: زُہرہ، مُشتری، ظہیر تے زبیدہ جیہناں چوں ظہیر تے مُشتری نِکی عمرے فوت ہوگئے۔ ہن تساں اخیری لڑی پڑھو۔ ہر لڑ ی وچ پچھلی لڑی دا لنک کہانی دے اخیر وچ دتا جاندا ہے۔

1972، پاکستان پیپلز پارٹی دی حکومت، ایم پی اے شیخ رفیق احمد سپیکر پنجاب اسمبلی چُنیا گیا جیہنے اپنے بے رُوز گار بھراء شیخ فاروق احمد لئی نوِیں اسامی بنوائی تے اوہ بادشاہی مسجد وچ ’وی آئی پی رِی سیپشنسٹ‘ لگ گیا۔ گریڈ بھاویں باہلا اُچا نہ، پرٹوہر واہوا۔ محکمہ اوقاف دے ماتحت ملازماں اُتے اوہدا واہوا رُعب، جیہناں نوں اوہ گھُراکھِیاں پاپا تے کچیچیاں وٹ وٹ گاہلاں کڈھدا۔ نوکری دے آہرے کیہ لگا، وڈے بھراواں مصری شاہ وچ اپنا سانجھا آبائی گھر شیخ فاروق احمد نوں ای دے دِتا۔ جیہنے اوہ ویچ کے خیبر بلاک (علامہ اقبال ٹاؤن) اپنا گھر بنالیا۔ جیہدا گھور اِکلاپا اوہنوں دِنے راتیں ڈھنگے، پُتر بِلّو ہر ویلے چیتے آوے، ہُن عالیہ بیگم نوں منانا اوہدی مجبوری۔
بد زبان نوں پوری برادری وچ وس لگدیاں کوئی مِلدا نہ، نوکری کیہ لگا، وی آئی پی ہوگیا۔ اخباراں دِیاں تصویراں تے ٹی وی دِیاں خبراں وچ اوہ معزز مہمان نوں گائیڈ کردا دِسے، پاکستانی وزیر اوہدے پِچھے چلدے۔ کرنل شیخ خورشید احمد نوں نِکا بھراء چیتے آیا جیہدے گھر ڈِنر پارٹی، 33۔سی آفیسرز کالونی لہور صدر، گھر دا ایڈریس۔ شیخ فاروق احمد فیملی سنے ویلے سِر اپڑ گیا۔ سارے پروہنے آگئے، گوانڈھی کرنل رضوی دی اُڈیک جیہڑا اپنے نویں ویاہے پُتر تے نونہہ دی تیاری وجہوں لیٹ ہوگیا جیہدے آؤندیاں ای بھانڈے کھڑکن لگ پئے، کھانا لگ رہیا۔ سبھ پروہنیاں، خاص کر عورتاں، نوٹ کیتا کہ کرنل رضوی دی نُونہہ تے عالیہ بیگم اک دوجی نوں پچھان کے مِلدیاں بہت پریشان ہوگئیاں۔ عالیہ بیگم لئی اوتھے بہنا محال، اُٹھن لگی کہ کھانا کُھل گیا۔
واپسی لئی سرکاری کار وِچ بہندیاں ای شیخ فاروق احمد عالیہ بیگم نوں گالھ کڈھ کے اوہدی پریشانی دی وجہ پُچھی تے:
اوہ میری دھی سی!
عالیہ بیگم روپئی۔ پر شیخ فاروق احمد ڈِھلّا نہ پیا
کیہڑی دھی؟..... کیپٹن میسی دی؟..... مرزا ضیاء الدین بیگ دی؟ محسن رضوی دی؟ کہ.....
بس! بس! ڈرائیور کار روک!
عالیہ بیگم رات دے انیھرے وچ کار چوں لہہ گئی۔ بِلّو ’’ماں! ماں!‘‘ پُکار دا رہیا پر شیخ فاروق اوہنوں کھروے ہتھیں پھڑلیا تے کار چلوا دِتّی۔
عالیہ بیگم شیخ فاروق احمد دے گھر نہ گئی، اگلی سویرے اوہنوں سمن آباد وچ کرائے تے گھر مِل گیا۔ پیو کجھ دن پُتر نوں زبردستی نال رکھیا، ماں تے اوہدے پِچھلیاں بارے اوہدے چنگے کن بھرے۔ ’’نیچ خاندان!‘‘..... ’’بدنام لوک!‘‘..... ’’اوہدے کئی خاوند!‘‘..... ’’اوہدے کِنے بال!‘‘..... ’’اوہدا بھراء بدماش!‘‘..... ’’اوہدی بھرجائی ہیرا منڈی دی کنجری!‘‘.....
بِلّو نوں کجھ گھڑِیاں ماں تے نانکے بُرے لگن، پرفیر اوہ ماں نوں یاد کرکے روون لگ پوے۔ تے اخیر اوہ ماں نوں جا سمن آباد مِلیا۔
شوبِز نال جُڑے لوکاں دی زندگی وچ چنگے مندے دن آؤندے رہندے۔ کم آوے تے کم کرن دی بھاجڑ، کم نہ ہووے تے کم لبھن لئی بھج نس۔ عالیہ بیگم جیہڑی ہورناں لئی کم لبھ لیندی، کدی کدی آپ وی بے رُوزگار ہوجائے۔ اجیہے ای دن، اوہ پیدل ٹی وی سٹیشن توں واپس آرہی، رائل پارک ولوں نوِیں نکور لم سلمّی کار نکلی جیہدی اگلی سیٹ اُتے اوہدا وڈا بھراء حاجی فتح محمد جیہدے بارے اوہنے ایہہ ای سُنیا کہ اوہ مِڈل ایسٹ توں پیسہ کما کے لیایا۔پر اوہ اوس ویلے جیہدی کار وچ بیٹھا، اوہ ہیرا منڈی دا چودھری، اعجاز بھَیناں والا، نواں نواں فلم پروڈیوسر بنیا، ریالاں تے دِرہم دیناراں وچ کھیڈے جیہدے بارے مشہور کہ اوہ عربی شیخاں نوں لہوروں لے جا کے کُڑیاں سپلائی کرے جیہڑا ڈرائیونگ سیٹ اُتے بیٹھا کار چلا رہیا۔ اوہدا بھراء تے اوہ فلم پروڈیوسر آپس وچ گل کردیاں اُچی اُچی ہسدے اپنے دھیانے اگانہہ لنگھ گئے۔ اوہناں دا عالیہ بیگم ول دھیان ای نہ پیا۔
اوہ لکشمی چوک توں بس اُتے بہہ گئی، اوہنوں لگا کہ اوہنوں چکر آرہے۔ اوہنے اکھاں مھیٹ لئیاں، بس چلدی رہی، سٹاپ آؤندے گئے۔ اوہ کدھرے گواچ گئی، تاہیوں تے بس کنڈکٹر، جیہڑا اوہنوں نِت ویکھے، نوں اُچی واجے دسنا پیا ’بسطامی روڈ!‘ بس توں لہندیاں عالیہ بیگم دا دل خراب ہون لگ پیا، اجے اوہنے اُلٹی نہ کیتی پر اوہنوں اپنے کولوں بدبو آرہی۔ گھر جان توں گھبراوے پئی کہ اوہ بِلّو نوں کیہ منہ وکھاوے جیہڑا اوہدے کولوں اوہدے خاندان بارے پیو دے دسّے سوال پُچھدا۔
عالیہ بیگم اج بہت تھک گئی۔ ایڈے رولے وچ اوہنوں اپنے ساہ چلن دی واج آئی تے اوہنوں یاد آیا کہ اوہنوں ڈاکٹر ٹی بی دسّی ہوئی۔ اوہ بیمار اُچی اُچی رونا چاہوے۔ بدو بدی اوہدے قدم اوہنوں تانی بیگم ول لے کے جارہے۔ پر رستے وچ اِرم دا گھر جیہدی گھنٹی وجان لگی کہ اندروں اقبال حسن تے اِرم دے ہسن دی واج، اوہ سَوں سَوں کے جاگے، رجّے ہوئے ہاسے رُک ای نہ رہے۔ عالیہ بیگم چلدی رہی، تانی بیگم دا گھر آگیا جِتھوں فلم ایکٹر ادیب نالا بنھدا نِکل رہیا، اوہنوں ویکھ کے لنگوٹ دا پکّا کچا پے گیا تے چوَل ہاسا ہس لگ پیا۔
پرتدیاں اوہنے دھیان کیتا کہ اوہدا روون تے نہیں، ہسّن لئی دِل رِیجھے پیا۔ اِنج جیوں اوہدے ایدھر اودھر، ہر پاسے ہاسا ای ہاسا۔ پڑ بھخیا ہویا تے اوہنے مقابلے وچ ہسنا۔ ساہمنے بدماش پہلوان حاجی فتح محمد، پنجاب دا گبھرو اقبال حسن تے بمبئی دا وِلن ادیب۔ ایس حالے اوہنوں خورے کیوں شرارت سُجھی تے کسے پاگل نوں چھیڑن ٹُر پئی۔ سمن آباد مُکدیاں علامہ اقبال ٹاؤن آگیا۔ اوہنے گیٹ پچھان کے گھنٹی وجائی۔ اندروں بِلو نِکلیا جیہڑا ماں نوں ویکھ کے پریشان ہوگیا کہ اوہ اوہنوں دسّے بِنا پیو نوں مِلن آیا ہویا جیہنوں پِچھوں اندروں شیخ فاروق احمد آواز دِتی:
بلّو گیٹ کھولِیں، کم والی آئی ہونی!
The story has 8 parts and that is its last part. You can read part 7 at below link and in every link you will find link of the previous parts
http://www.wichaar.com/news/312/ARTICLE/33048/2017-05-28.html
Links of part other parts
Part1 http://www.wichaar.com/news/312/ARTICLE/33008/2017-05-22.html
Part 2 http://www.wichaar.com/news/312/ARTICLE/33013/2017-05-23.html
Part 3 http://www.wichaar.com/news/312/ARTICLE/33021/2017-05-24.html
Part 4 http://www.wichaar.com/news/312/ARTICLE/33028/2017-05-25.html
Part 5 http://www.wichaar.com/news/312/ARTICLE/33035/2017-05-26.html
Part 6 http://www.wichaar.com/news/312/ARTICLE/33041/2017-05-27.html 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels