Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> کم والی(کہانی) 7ویں لڑی

کم والی(کہانی) 7ویں لڑی

نین سکھ
May 28th, 2017

ضلع جہلم دی گرائیں جِیراں، باغ منشی لدّھا وچ لہورن ہوکے نزیر بیگم، تے اگے جج صاحب دی حویلی جِتھے اوہ کم والی شائسہ بیگم ہوگئی۔ اوہ پردہ دار سادات دی نُونہہ جیہنے روزی روٹی لئی معصوم دِھیاں نوں گھر ڈکیا تے چوری لہور ریڈیو دے ڈرامے وچ کم کیتا جتھے اوہنے اپنا ناں عالیہ بیگم رکھ لیا۔ اوہنے چار ویاہ بھُگتے۔ چوتھا خاوند شیخ فاروق احمد معظم شیخ دا پیو، سپیکر پنجاب اسمبلی شیخ رفیق احمد دا بھراء، اوہ 1990 وچ فوت ہویا۔ اوہدا پہلا نکاح اوس آئرش فوجی نال ہویا جیہنے جلیانوالہ باغ دے قتلام (1919) وچ نہتھے لوکاں اُتے گولی چلاون توں انکار کیتا۔ اوس مفرور کیپٹن میسی نال عالیہ بیگم دا ویاہ چھ مہینے رہیا، اوہدے مرنوں بعد جیہڑی بمار دھی جمی، اوہدا اجے ناں وی نہ رکھیا کہ اوہ مرگئی۔ دُوجا خاوند مرزا ضیاء الدین بیگ، حیدر آباد (دکن) دی چار مینار سگریٹ فیکٹری دا منیجر جیہدے توں اوہدے چار بال ہوئے: زُہرہ، مُشتری، ظہیر تے زبیدہ جیہناں چوں ظہیر تے مُشتری نِکی عمرے فوت ہوگئے۔ ہن تساں نویں لڑی پڑھو۔ ہر لڑ ی وچ پچھلی لڑی دا لنک کہانی دے اخیر وچ دتا جاندا ہے۔

شیخ فاروق احمد ہورِیں امرتسری کشمیری شیخ، اوہدا پیو شیخ یعقوب گورنمنٹ کالج لہور دا گولڈ میڈلسٹ جیہڑا انڈین ریلوے وچ ملازم ہوکے محلہ فاروق گنج (اندرون مصری شاہ) وس گیا۔ شیخ فاروق احمد دا اک بھراء شیخ خورشید احمد فوج دا کمشنڈ آفیسر تے دوجا ایڈووکیٹ شیخ رفیق احمد سیاستدان۔ اوہ آپ کیمرہ مین، مشہور کیمرہ مین رضا میر دا شاگرد، کینیڈا توں اوہنے سینمیٹو گرافی وچ چھ مہینے دا ڈپلومہ کیتا ہویا، اوہ شاہ نور سٹوڈیو دا ملازم، اوہدے بارے سٹوڈیو وچ مشہور کہ اوہ گلاں نہیں کردا، گاہلاں کڈھدا، ہر ویلے غصے وچ رہوے۔ اوس ٹبّر وچ کوئی بیماری، عالیہ بیگم بھانے ادّھے مرد جماندرو پاگل تے رہندے کسے ویلے وی پاگل ہوسکدے۔
پُتر ہویا،عالیہ بہت خُش جیہنے اوہدا ناں ظہیر رکھیا جیہڑا اوہدے موئے پُتر دا ناں۔ دادے دی مرضی چلی جیہنے پوترے داناں معظم شیخ رکھ دِتا، ماں اوہنوں پیار نال بِلّو کہن لگ پئی۔ پُتر دی ماں پر عالیہ بیگم دی زندگی عذاب، شکی خاوند، نِت لڑائی۔ شیخ فاروق احمد عالیہ بیگم نوں اوہدے پِچھلے خاونداں تے اولاد دے میہنے دیوے۔ حالاں نکاح توں اگدوں عالیہ بیگم اپنا سارا پچھوکڑ شیخ فاروق احمد اَگے پھرولیا جیہڑا ہُن غصے وچ اوہدی اک نہ سُنے، پاگل ہوجائے، ایہہ دورہ اوہنوں اکثر پوے۔
کراچی وچ دو فِلم سٹوڈیوز کھُلے، اک ماڈرن سٹوڈیو تے دوجا ایسٹرن سٹوڈیو۔ کراچی وچ بہت پیسہ، ہر کوئی آکھے۔ کئی فلمی لوک لہوروں کراچی شفٹ ہوئے جیہناں وچ کیمرہ مین شیخ فاروق احمد وی۔ عالیہ بیگم ایس آس تے نال کہ خورے شہر بدلیاں گھر دا حال بدل جائے۔ شیخ فاروق احمد نوں ماڈرن سٹوڈیو وچ نوکری مل گئی۔ پر جیویں سٹوڈیوز فلاپ ہوئے، ملازم وی پریشان پرتے۔ لہور وچ شوکت حسین رضوی شیخ فاروق احمد نوں کم دیندا سی، جیہڑا کراچی گیاں اوہدے نال اِنج ہوگیا تے فیر اوہنے شیخ فاروق احمد نوں کدی کم نہ دِتا۔ جیہڑا بے روزگار ہوکے گھر بہہ گیا۔
لہوروں لائیو ٹی وی ڈرامہ شروع ہویا تے پرڈیوسراں نوں ایکڑاں دی لوڑ پئی۔ اشفاق احمد ڈرامہ لِکھیا ’ٹاہلی تھلے‘ جیہدی کاسٹ وچ عالیہ بیگم دا ناں وی۔ اوہ ٹی وی ٹیشن جان لئی گھروں نِکلی، بِلّو روئی جائے۔ مگروں جدوں شیخ فاروق احمد دِیاں گاہلاں مُک گئیاں، اوہنے پُتر نوں چُپ کراندیاں مار مار ہور روایا۔ واپس آیاں عالیہ بیگم جیٹھانی کولوں سُنیا تے اوہ جرنہ سکی، اوہنے پُتر نوں کُچھڑ چُکیا تے جا گارڈن ٹاؤن مینا داؤد گھر رات رہی جیہڑی اوہدی فلم دی ساتھی۔ اگلے دن اوہ فیر سمن آباد پُرانے محلے۔ فلم سٹوڈیوز، ٹی وی ٹیشن، لہور آرٹس کونسل تے ریڈیو ٹیشن۔ عالیہ بیگم کم تے جارہی، کم توں آرہی۔ شیخ فاروق احمد نال کدی کدی لڑائی لئی صُلح ہووے، پر جلدی فیر وکھرپ ہوجائے۔ بِلّو سکول جان لگ پیا، گراؤنڈ وچ کھیڈدا نگہت سُلطانہ دے پُتر طاہر حسن دا دوست بن گیا۔ بھیّا پان والا، بٹ ٹکاٹک والا تے ملک دُدھ دہی والا بِلّو دی ماں دیبہت عزت کردے، اُدھار دیندیاں اوہ کدی وہمی نہ ہوئے۔
اقبال حسن موچی دروازے دا، فلم دی شوٹنگ ویلے اوہ کیمرہ ٹرالی چلاندا سی۔ فلم ’پنجاب دا شیر‘ وچ مظہر شاہ وِلن، اوہدی بدماش منڈلی دا اک چمچہ تُھڑ گیا جیہدا بس اینا رول کہ وِلن دی بڑھک اُتے دوجے چمچیاں نال رل کے ہسنا۔ اقبال حسن کیمرہ ٹرالی چھڈ کے ایکسٹرا دا ایہہ رول کیتا۔ اوہ کیمرہ مین ریاض احمد دا اسٹنٹ جیہوں فِلم دی سکرین اُتے چمکن دا بہت شوق۔ عالیہ بیگم اوہنوں تے اوہدی لگن نوں ویکھ کے آکھیا:
توں سگواں پنجاب دا گھبرو، توں ہیرو جچدا!
اقبال حسن نوں اِنج جاپیا جیوں اوہدی ماں اوہنوں دُعا دِتی۔ اوہنے عالیہ بیگم نوں اپنی ماں بنالیا تے بِلّو اوہدا نِکّا وِیر۔
عالیہ بیگم ساری حیاتی دھکے کھادھے، اوہدے کولوں کسے دا دُکھ سہہ نہ ہووے۔ اِرم دی بِپتا، ہر سوہنی مجبور کُڑی دی کہانی جیہڑی غریباں دی دھی امیراں دی مُنڈے نال بھنڈی جاوے۔ فیر عزت دار دنیا وچ اوہدا کوئی ٹھکانہ۔ اِرم ضلع سیالکوٹ دے کسے پِنڈ چوں لہور آئی۔ ہیرا منڈی وچ نچدی تے رنڈی باز فِلم رپورٹر قمر ملک عاشق ہوگیا جیہڑا بلیک میلر، سکینڈل بناکے کسے نوں لکھّوں ککھ کردیندا۔ کنجراں نال متھّا لگا تے اوہ جِت گیا، اِرم نوں ویاہ کے سمن آباد لے آیا۔ پر اِرم بال جم کے تماشبین قمر نوں چنگی نہ لگے، اوہ اوہنوں طلاق دے کے چلا گیا۔ بال چُک کے جاندی نوں نگہت سلطانہ پچھان لیا۔ کار روک کے نال بہالیا تے گھر لے آئی جیہدے کول ہر ویلے حسن جوانی دے ڈھیر گاہک پر اِرم منّی نہ جیہڑی ہُن جسم نہ ویچنا چاہوے، بھاویں فِلماں وچ کم کرن دا ڈھیر شوق۔ اوتھوں عالیہ بیگم اِرم نوں گھر لے آئی تے اوہدے لئی فلم وچ رول پُچھدی پھِرے کہ اقبال حسن آگیا جیہڑا اِرم نوں ویکھدیاں ای بدنیت۔ اوہ پُنوں بنیا ہویا، پہلی فلم وچ اوہنوں ہیرو دا رول لبھا، سسّی نوں جپھیاں پاپا گرم (نغمہ اوہدی ہیروئن جیہڑی مشہور ہیرو حبیب نال ویا ہی ہوئی)۔ پر اِرم، اقبال حسن نوں نیڑے نہ لگن دِتا کہ اوہنے ہُن کسے مرد نال نہیں سَونا۔ عالیہ بیگم اِرم دا ساتھ دِتا تے اقبال حسن منہ بولی ماں نال رِنج ہوکے اوہدا بُوہا چھڈ گیا۔ اِرم نوں عالیہ بیگم نال سٹوڈیو لے جاندی، اوہنوں فِلماں وچ نِکے نِکے رول مِلن لگ پئے۔ مسعود پرویز دی فلم ’ہیر رانجھا‘ وچ اوہ رانجھے دی بھرجائی بنی، پیسے جڑے تے اوہنے نیڑے ای کرائے تے وکھرا گھر لے لیا.....
Link of Part 6 of same story
http://www.wichaar.com/news/312/ARTICLE/33041/2017-05-27.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels