Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> مُصلّی، اسیں درواڑ! (کہانی) اخیرلی لڑی

مُصلّی، اسیں درواڑ! (کہانی) اخیرلی لڑی

نین سْکھ
April 23rd, 2017

آغا خاں سہوترے دے ایس نعرے وچ قصہ مصری خان وی تے ڈرامہ ’’مُصلّی‘‘ وی۔ مُصلّی کون تے چنگڑ بار کیہ؟ ایم کے پی تے دیہاتی مزدور تنظیم دی کہانی جیہدے وچ ماسٹر سوہن لال دا ذکر تے میجر اسحاق دی ویل
اخیر لی عمرے ہِکا آہر، آغا خاں سہوترا اپنے کھِنڈے کاغذ پھرولدا راہندا جیہناں نوں جوڑ کے کتاب بناون دی سدّھر۔ ایہہ کائی اوہدا اِکلے دا کم نہ، ایہہ اوس جو آپ ویکھیا تے سوچیا، تے جو کسے وی مصلی دسیا۔ پنجاب تے ہڑپّے دا مان میجر اسحاق صدقہ آیا پر اصل وچ ایہہ بار تے مُصلّی دی کہانی۔ کہ کیویں نِکے لاء اوہنوں اوہدا، بیلی راء اللہ داد مچھراوے:
چُوڑھی بہوے کُھڈ تے 
بِٹُھو نہالڑے چُڈ تے
دِناں دا پُورا اوہا چھوہر اَج بار نوں چنگڑ بار پیا ثابت کرے تے ساندل بار آلے ساندل نوں اپنا وڈکا لکھیوس چا۔ زمین داری ہوکے ونڈِیچے پنجاب دا حقدار ہوون لئی اوس ’مُصلّی، اسیں دراوڑ!‘ لِکھ کے حق ملکا نہ تاریا۔ اپنی دھرتی اُتے ناجائز قبضے دے خلاف اوس عوامی عدالت وچ ایہہ رپورٹ درج کروائی جیہدے وچ ہر قبضہ گروپ نوں اوس اِنج نامزد کیتا کہ شرماں دے نقلی گُھنڈ لہہ گئے، جعلی عزِتاں دے شملے رُلدے وتن تے اوس پنجاب دی ملّ مار راٹھا چارینوں ننگا چاکیتا۔ ذات برادری دے نکھیڑے، مذہبی بکھیڑے، سیاسی چالاں تے کاروباری کرتوت کھول وکھایوس۔ بھوئیں وال راجپوت دی جانگلی آکڑ دا بھارتے نہ اوہنوں گھوڑی پال جٹا تر دی آباکار وڈیائی دا لحاظ۔ اوہ نامُراد کسے پیر خانے دا مرید نہ، اوس گدّی نال بدّھی رعایا دی رہائی منگی۔ اوہنوں ایسی گل دا بہوں ارمان جہڑا وڈے زمین داراں نِکّے واہی واناں نوں غُلام رکھن لئی مُصلیاں نوں جرائم پیشہ بنایا، جِس بھڑووے ڈانگ چائی، اوڑک کسے نسلی کُتے دا خدمتگار ہویا......
اکثر لِکھدیاں آغا خاں سہوترا مصلی ڈرامہ ویکھن لگ پوے جِدھے سماج پَوڑھیاں ہویا:
ہر پَوڑھی وچ کئی پَوڑھیاں- مُصلّی سارِیاں توں تھلڑی پَوڑھی- سبھ توں اُپرلی پَوڑھی دا بھار سارِیاں پَوڑھیاں سہندیاں- سبھ توں تھلویں پَوڑھی ساریاں پَوڑھیاں دا بھار چُکدی......
مُصلّی دا رُتابن کے آغا خاں سہوترا مصلیاں نوں دسے:
تِناں وصفاں مُصلّی نوں ڈولن نہیں دِتا۔ کراں پَیراں دی ورتوں، چوری تے جُھومر۔ مُصلّی کرکے کھاندا، کرن نوں نہ مِلے تے چوری کریندا......
آغا خاں سہوترا بُڈھی عمرے اکثر اپنے دادے مسنے نوں یاد کر بہوے جیہڑا مارُو ویہار وچ اپنی برادری نوں اِنج ونگار دا رہندا:
کنڈا کنڈا واڑ
بندہ بندہ دھاڑ
2006 وچ آغا خاں سہوترا ہِک سوہِک سال دا ہوگیا۔ اوہ بال بچڑ دار پنجاں پُتراں تے دو دِھیاں دا پیو۔ محنت مزدوری پِچھے اولاد کدھائیں رُلدی ودی تے سرگودھا دی کچی آبادی جناح کالونی وچ اوس لاوارث دا دھرنگا دھرکِیندا رہووے۔ چلن پھِرن پروکارہ گیا، ہُن باہن اُٹھیون توں متھاج۔ گرانہہ سنگھوں نہ لنگھے۔ گھروں اُجڑی ہوئی دوہتری نانے نانی دی سانبھ سیوا کرے۔ چُلھ وچ اگ بالیاں کئی مہینے ہوگئے۔ آغا خاں سہوترے دی ٹبری بکھّاں بھُکھی بمار چچلا ندی رہوے، جہدا منت ترلا سُن کے کائی گوانڈھی سُکی سِنّی دے ونجے۔ اِنج آغا خاں سہوترے دا ہِک کمرے دا گھر چلے جہدا بُوہا نہ باری، چار دیواری دِیاں اِٹاں لوک لے گئے۔ پُورا کھلیا گھر کُھلی کتاب واکوں جہدے وچ ہِک لوہے دی الماری جہڑی بند رہوے۔ کیہ سنبھالیا ہویا، اوہ رجسٹر جہناں وچ ’دیہاتی مزدور تنظیم‘ دے چندے دا حساب تے ورقہ ورقہ مصلیاں بارے جوڑی کتاب.....
بُڈھا آغا خاں سہوترا بہوں اوکھا اُٹھے تے اپنی لوہے دی الماری کھولے، مُصلیاں بارے اپنی کتاب لبھدیاں لبھدیاں اوہنوں چیتے آوے کہ اوہ کائی فیصل آباد دا وکیل فوٹو کاپی کروان واسطے لے کے گیا، کدو دا گیا، پرتیا نہ۔ اوس وکیل دے نال کجھ این جی او دے لوک کیمرہ وی لے کے آئے، اوہدا انٹرویووی ریکارڈ کیتونیں۔ آغا خاں سہوترا دماغ تے بہوں زور دیوے پر وکیل دا ناں چیتے نہ آوے۔ ہِک دِیہاڑے منجی توں مُدھاندیاں گوانڈھی اللہ دتہ ڈِٹھا تے
اوہ نیڑے آلگا،
’’بابا، کلمہ بھر، ساہ سوکھا ہوسی آ!‘‘
آغا خاں سہوترا ہوش وچ، اجھک اجھک سینے دی سَوڑ تے روح دی کلھیائی کڈھدا رہیا،
’’ایہہ محمد بِن قاسم تے 1947 کل دے وقوعے، اسیں دراوڑ، آہڑ پے دی کائی گل کریے!‘‘
O
Link of last part no 8
http://www.wichaar.com/news/312/ARTICLE/32812/2017-04-21.html
Read all parts 1 to 9 at this link
http://www.wichaar.com/news/312/


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels