Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> مُصلّی، اسیں درواڑ! (کہانی) 8 ویں لڑی

مُصلّی، اسیں درواڑ! (کہانی) 8 ویں لڑی

وچار ڈیسک
April 21st, 2017

آغا خاں سہوترے دے ایس نعرے وچ قصہ مصری خان وی تے ڈرامہ ’’مُصلّی‘‘ وی۔ مُصلّی کون تے چنگڑ بار کیہ؟ ایم کے پی تے دیہاتی مزدور تنظیم دی کہانی جیہدے وچ ماسٹر سوہن لال دا ذکر تے میجر اسحاق دی ویل

دراوڑ تنظیم پاکستان
ایہہ آہر چنیوٹ دے رمضان دراوڑ دا جیہنے کجھ ورہے اگدوں صوبائی اسمبلی دا الیکشن لڑیاں تے اَٹھ ہزار پنجاسی ووٹ لئے۔ پُرانے سانگے پِچھے اوہ ایس ویلے بمار آغا سہوترے دی پُچھنی لئی آیا بیٹھا تے اوہ دوویں دراوڑ ایس گل اُتے جھُردے رہے کہ اوہناں دی برادری چوں جی کِردے جاندے کیونجے اوہ اپنی ذات وٹا کے عزت دے طلب گار۔
’’شالا ایمان بندے دا کھڑِیوے نہیں!‘‘
آغا خاں سہوترے لما ساہ چھِکیا۔ خبر نہیں، ایہہ راہندیاں نوں دُعا کہ آزاری دے اندر دی کائی ورم---
1987/88 دی گل، نِت بھٹہ مزدور آغا خاں سہوترا کول شکایتاں لے کے آون۔ ظلم ہدوں ودھ گیا، پیشگی دے کے بھٹہ مالکان، مزدوراں نوں غلام سمجھنتے اُنہاں توں جبری مشقت لیندے۔ آغا خاں سہوترا باخبر کہ سارے پنجاب دے بھٹہ مزدور دراوڑ، کدھائیں چوڑھے مُصلی تے کدھائیں عیسائی چُوڑھے۔ اوہدی ’بھٹہ خشت مزدور یونین‘ جیہڑی 1970 دی رجسٹرڈ، اوس کمپنی باغ سرگودھا وچ بھٹہ مزدوراں دا جلسہ کیتا۔ تے اگلے دن لہوروں سدّا آگیا جِدھے ریلوے ٹریڈ یونین لیڈر مرزا ابراہیم دی پردھانگی وچ اوہ سارے پنجاب دے لیفٹسٹ دھڑے سِر جوڑ بیٹھے جِدھوں س بھٹہ مزدوراں دا نواں لیڈر نکلیا جہدا ناں احسان اللہ خاں، تے جیہنے ’بھٹہ مزدور محاذ‘ راہیں لہور دِیاں سڑکاں اُتے دُھماں پائیاں۔ نِت لہورہائی کورٹ وچ حبسِ بے جا دی پٹیشن، بیلف راہیں کسے بھٹے اُتے چھاپا تے جبری مشقت واسطے قید بھٹہ مزدوراں دی بازیابی۔ اخباراں وچ رولا پیاتے سپریم کورٹ بھٹہ مزدوراں دی فریاد سُنی......
گوادر (بلوچستان) چوں پنجاب آیا احسان اللہ خاں دراوڑاں وچ آغا خاں سہوترے نوں بہوں اوپرا لگے جیوں کوئی ایجنسیاں دا بندہ۔ پر اوس ڈرامہ باز کول جنرل ضیاء دے مارشلاء وچ قلعہ کٹن دا سرٹیفکیٹ۔ آغا خاں سہوترا آپ وی اوہدے جلسے جلوس لئی سرگودھے توں لہور جاوے۔ چھیویں پھیرے لہوروں پرتیا تے سرگودھے دی کچی آبادی وچ آغا خاں سہوترا دے گھر ڈھول کھڑکیا:
مُصلیاں دی بس آئی!
ایہہ 1993 دی گل، سُن کے ٹھری تے صالحوں نوں اِنج لگا جیوں انقلاب آگیا ہووے، مبارک دیون بھنّے لگے آئے۔ پر آغا خاں سہوترے مبارک جھلی کائی نہ، جھُردا بیٹھا-----
لہور وچ بھٹہ مزدوراں دے جلسے جلوس، احسان اللہ خاں آغا خاں سہوترے نوں وِلا کے کسے نوں ملاون کان دیال سنگھ مینشن مال روڈ دے شیزان ریسٹورنٹ لے گیا۔ اِنڈین پراہنا جہدا ناں سوامی لال، جہڑا بھٹہ مزدوراں لئی انٹرنیشنل لیول تے کائی کم کرنا چاہوے۔ فنڈز وی بہوں تے گلاں دی وی تھوڑ کائی نہ۔ آغا خاں سہوترا دیہاتی ضرور پر آئی ایل او کنونشن نمبرز 29 تے 105 اوہدے لئی کائی نوِیں گل نہ۔ اَینٹی سلیوری انٹرنیشنل، انٹرنیشنل لیبر کانفرنس، تے گلوبل سلیوری انڈیکس رپورٹ دا اوہ جانُو سُونہا۔ اوہ پنجاب دے بھٹہ مزدوراں دی گل کرے، سوامی لال اوہنوں انٹرنیشنل لیبر پالیٹکس سمجھاندا رہیا۔ آغا خاں سہوترے اپنی ’بھٹہ خشت مزدور یونین‘ ویچن توں صاف انکار کردِتا۔ پر اوہدا موٹر مکینک پُتر غفور جہڑا ایتکیں اوہدے نال ہویا۔ احسان اللہ خاں دِیاں گلاں وچ آگیا جہڑا آغا خاں سہوترے دی ’بھٹہ خشت مزدور یونین‘ نوں بس دینا چاہوے بئی بھٹہ مزدوراں دے جلسے جلوس وچ گِنتی ودھے۔ ساری یونین احسان اللہ دی حامی ہوگئی، آغا خاں سہوترا اکلّا رہ گیا۔ پر ’بھٹہ خشت مزدور یونین‘ ای نہیں، ہڈوں ایم کے پی دے کئی کامریڈ اندرو اندر احسان اللہ خان دے تنخواہ دار......
آغا خاں سہوترا احسان اللہ خاں نوں شروع توں کیوں مشکوک سمجھیندا، کیوں جو اوہنے پَوند بھٹہ مزدور بابا کالا نوں اپنی مشہوری لئی اشتہار بنایا جہدِیاں دِھیاں نوں بھٹہ مالک اغوا کیتا۔ ریگل چوک لہور وچ ’بھٹہ مزدور محاذ‘ دا نِکا جیہا دفتر اوہدِیاں اکھاں ساہمنے امیر ہویا۔ سوامی لال دا فنڈ خُفیہ آوے پر کجھ فراڈ سبھ دے ساہمنے۔ ’پیشگی‘ دے خلاف سپریم کورٹ دا فیصلہ درشن مسیح بنام سرکار (1990) ویچ ویچ بھٹہ مزدور محاذ این جی او بن گئی جہدا ناں بانڈڈ لیبر لِبریشن فرنٹ (بی ایل ایل ایف)۔ سِدّھے سادے بھٹہ مزدور احسان اللہ خاں دے اِنج مگر لگے ہوئے کہ اوہناں نوں آغا خاں سہوترا دی ایہہ گل سمجھ نہ آوے بئی سپریم کورٹ دے فیصلے دی مصدقہ نقل اوہ آپ وی لے سکدے۔ اوہ وچارے سمجھن کہ سپریم کورٹ دا فیصلہ مزدوراں دے ہتھ وچ بھٹہ مالکان دے خلاف ہتھیار جہڑا رکھنا اوہناں لئی لازمی جیہدے اُتے بی ایل ایل ایف دی مُہر نہ ہووے تے اوہ بیکار۔ احسان اللہ خاں اوس فیصلے دی نقل 1991 وچ پنج سودی ویچنی شروع کیتی، ریٹ چڑھدا گیا جہڑا اوڑک دس ہزار ہویا......
مصلیاں دی بس، جہڑی جلوساں لئی بھٹہ مزدوراں نوں ڈھوون لئی، اوہ آغا خاں سہوترے دے پُتر غفور سرگودھا - فروکہ رُوٹ تے چلا دِتی۔ مُصلّی مفت سواری
کرن، کمائی کائی نہ، چھڑی ٹوہر۔ خرابی بنی تے اوہ بس ورکشاپ اُتے کھلوتی سکریپ ہوگئی۔ آغا خاں سہوترے دی پُتر نال لڑائی رہوے جہڑا اوس امانت وچخیانت کیتی تے بس دا غلط استعمال ہویا۔ پُتر نِت دی لڑائی توں چلدیاں پیو دا گھر چھوڑ گیا......
احسان اللہ خاں پرت وات وی نہ لئی پر آغا خاں سہوترے ورکشاپ تے خراب کھلوتی بس بارے بی ایل ایل ایف نوں اطلاع کیتی جہنوں ہُن بانڈڈ لیبر توں ودھ چائلڈ لیبر دی چِنتا۔ بُڈھے کالا بابا دی تھاں بال اقبال مسیح دا اشتہار چل رہیا۔ دستی قالین بالاں دِیاں اُنگاں نال اُنیوے، روزانہ بارھاں گھنٹے مزدوری، ادھے گھنٹے دی چھٹی، سارا ہفتہ مزدوری ہووے۔ جہدے لئی چار سالہ اقبال مسیح چھ سو رُپیئے وچ وِکیا۔ احسان اللہ خاں کارپٹ انڈسٹری نال متھّا لایا تے کئی بال آزاد کروائے۔ مرید کے دے اقبال مسیح نوں اوہ سوِیڈن تے امریکہ لے گیا جِدھے اوہدا چنگا مُل پیا۔ واپسی تے کارپٹ انڈسٹری بارھاں سالہ اقبال مسیح نوں اوہدے نشئی مامے کولوں قتل کروا دِتا جہدا الزام احسان اللہ تے لگا جہنے ایس قتل دے الزام نوں وی کیش کروایا تے اوہ دراوڑ وسیب توں باہرلا بندہ باہر ای چلاگیا تے دو دراوڑ جی مہر صفدر تے سیدہ غلام فاطمہ ’فریڈم سینٹرز‘ دا چھابہ لا بیٹھے.......
Part 7
http://www.wichaar.com/news/312/ARTICLE/32798/2017-04-18.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels