Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> مُصلّی، اسیں درواڑ! (کہانی) 7 ویں لڑی

مُصلّی، اسیں درواڑ! (کہانی) 7 ویں لڑی

نین سْکھ
April 18th, 2017

آغا خاں سہوترے دے ایس نعرے وچ قصہ مصری خان وی تے ڈرامہ ’’مُصلّی‘‘ وی۔ مُصلّی کون تے چنگڑ بار کیہ؟ ایم کے پی تے دیہاتی مزدور تنظیم دی کہانی جیہدے وچ ماسٹر سوہن لال دا ذکر تے میجر اسحاق دی ویل

آغا خاں سہوترا، 1972 وچ ایم کے پی (مزدور کسان پارٹی) نال، اُدن رلیا ہا جَدن ہشت نگر وچ کساناں دی خاناں (خوانین) دے خلاف چلی لہر دی دُھم ہائی۔ صوبہ سرحد (موجودہ کے پی) دے شیر علی باچہ تے افضل بنگش دے سِر اُتے عزت دی پگ رکھیونیں۔ پر اَگے ودھدی لہر اُتھائیں رُک گئی کیوں جو ایم کے پی دے دو دھڑے نِکھڑ کے ساہمنے آگئے۔شیر علی باچہ تے افضل بنگش وچ پھِک پے گئی۔ ہِک کھیت مزدوراں دا لیڈر تے دُوے خاناں توں خالی کرائی زمین اُتے قابض نویں مالکاں دا گروپ بنا لیا۔ لڑائی لمّی ہوندی گئی، شیر علی باچہ افضل بنگش نوں تے افضل بنگش شیر علی باچہ نوں پارٹی چوں کڈھ دِتا۔ اوس مقامی لڑائی وچ پارٹی صدر میجر اسحاق کسے دِھر دا ساتھ نہ دتا جیہدے پاروں افضل بنگش رِنج ہوگیا تے اوس سردار شوکت علی تے مرزا ابراہیم نال رل کے ’ورکرزپارٹی‘ بنا لئی۔ شیر علی باچہ وی پارٹی دے خلاف ہوگیا.......
ایم کے پی وچ دیس پنجاب تے پنجابی بولی پردھان ہائن، ایس حقیقت توں آغا خاں سہوترے کدی انکار نہ کیتا۔ راجہ پورس تے دُلابھٹی دی ویل ہوکدیاں اوہ ایہہ وی دس پاوے بئی پارٹی دے دیہاتی اُلار وجہوں شہری باؤ تے بروفیسر ٹائپ انقلابی، ایم کے پی وچ سمائے کائی نہ تے پارٹی وچ بہوں چِر نہ تگے۔ کراچی دا فتح یاب علی ہووے تے بھاویں لہور دا امتیاز عالم۔ فتح یاب علی شروع لاء پارٹی دے اندر اپنا وکھ گروپ رکھیا جیہدے وچ کراچی دے مزدور۔ 1977 وچ امتیاز عالم شیر علی باچہ نال رل کے نوِیں لائن لیندیاں پارٹی نوں تروڑ دِتّی کہ ہر پاکستانی قومیت دی اپنی وکھ پارٹی ہووے۔ جیہدے تحت شیر علی باچہ ٹوٹّے پختون خواہ، اکرم دھرِیجہ سندھ لیبر آرگنائزنگ کمیٹی تے امتیاز عالم پنجاب لوک پارٹی بنائی۔ہتھیار بند جتھے بندی واسطے لودھراں وچ ٹریننگ سینٹر کھلیا۔ بہاولنگر تے لودھراں وچ ایم کے پی دے مقامی ورکرز امتیاز عالم اٹیر لئے تے آباد کار ساتھی میجر اسحاق دے نال رہے۔ افغانستان راہیں فارن فنڈنگ تے اسلحہ آون لگ پیا۔ اے این پی (عوامی نیشنل پارٹی) تے سی پی پی (کمیونسٹ پارٹی آف پاکستان) روسی امداد دے ورتاوے بنے۔ لیفٹ نوں سازشی تے شرارتی ویکھ کے بمار میجر اسحاق بہاولپور جیل وچ بہوں دُکھی راہندا۔ جیہدے سِر انقلاب دا سہرا نہ سجیا پر اوس کامریڈدی میّت اُتے پھُلاں دا ڈھیر لگا.......
اگلے صِدقی صدر غلام علی کلّو دا ساتھی بن کے آغا خاں سہوترا ہر ویلے ہر جاگھے پارٹی واسطے حاضر راہندا۔ میجر اسحاق اوہنوں کدی وِسریا نہ تے اوس جنگ نامہ لکھیا جیہدے وچ اوہنے ہڑپے دے وارث مُصلیاں نوں میجر اسحاق دی اگوائی وچ ظلم تے جبر نال لڑدیاں وکھایا، ہر اِکٹھ وچ اعلان کرے:
گل سچ دی میجر اسحاق کیتی
جہدے اُتے آغا خاں سہوترے تے اوہدی برادری پورے صِدق نال امنّا کیتی۔ جوسوشلزم تے کمیونزم میجر اسحاق پڑھا گیا اوہنے گزارے جوگا سمجھ لیا۔ آپ اوہنے اینگلز دی بس ہک کتاب ’’خاندان، ذاتی ملکیت اور ریاست کا آغاز‘‘ (اُردو ترجمہ) پڑھی۔ میجر اسحاق آغا خاں سہوترا ہر اوس انقلابی دھڑے توں ولاوے جہدے چوں اوہنوں میجر اسحاق دی خشبو نہ آئی، جو میجر دا مخالف، اوس دِھر نوں مِل کے آغا خاں سہوترے دا روح راضی نہ ہووے......
آغا خاں سہوترا پارٹی نال پکّا، پر پارٹی اوہ نہ رہی، جوکدی ہائی۔ دو انگریزی لفظ نِت سُنیون:مرجر تے سپلٹ۔ اِنج جیوں لیفٹ دے لوک نِکھڑن لئی رلن۔ 1996 وچ کمیونسٹ پارٹی تے ایم کے پی دا مرجر ہویا، کمیونسٹ مزدور کسان پارٹی بن گئی،2003 وچ سپلٹ ہوگیا۔ آغا خاں سہوترے دُکھی دن نال پچایا کہ ’ڈرامہ پارٹی‘ جہڑی مُڈھوں مُصلّی ڈرامہ کھیڈ دی آئی، اوہ وی ایم کے پی دی ٹُٹ بھج مگروں اِکٹھی نہ رہی، کھِنڈ گئی۔ ماسٹر طالب حسین دا پیر محل گروپ وکھ ہوگیا تے اُنہاں اپنی ’ڈرامہ کلب‘ بنا لئی۔ میجر اسحاق دی اصل ایم کے پی ہُن دِسے کائی نہ، ’دیہاتی مزدور تنظیم‘ وی دِنو دِن مٹّھی تے ڈِھلی ہوئی کیوں جو آغا خاں سہوترا بہوں بُڈھا ہوگیا۔ پاکستان دے لیفٹ وچ ایم کے پی کول جہڑا وادھا ہا، اوہ لہندا پنجاب جِدھے ’دیہاتی مزدور تنظیم‘ دا مقابلہ کائی نہ۔ سارے مُصلّی ہِک مٹھ آغا خاں سہوترے دے مگر، پر ایہہ کمیونسٹ پروفیسر گروپ نوں وارانہ کھاوے۔ سرگودھا دے وکیل شوکت بلوچ راہیں ’دیہاتی محنت کس محاذ‘ کھڑا ہوگیا جہدے وچ کجھ کسان ’دیہاتی مزدور‘ اکھِی کے رلے جیویں فداشاہ، فتح محمد بھٹی، راء شاکر......
پر آغا خاں سہوترے نوں اخیرلے ویلے تائیں انقلاب دی کائی آس ہائی۔ لوے تے نویں نروئے ساتھیاں نوں تھاپڑا مریندا۔ ہبھدائیں انقلابیاں دے کھوہرے نعرے این جی اوز وِچ وَنج کے ملائم ہوئے۔ رشید دھولکے دا ’مورچہ‘ تے احمد نواز وٹو دا ’ریڈ سٹار‘ پڑھدیاں اوہنوں چون ساہی بنے۔ بھاویں اوہدے پرانے کامریڈ پارٹی دی میّت اُتے لڑدے راہندے، افضل خاموش دا مُنہ ہور منے تے چودھری لطیف منجی نوں لائلپور (فیصل آباد) لے جا کے دفنانا چاہوے۔ سیّد عظیم تے تیمور رحمان نواں پُونگ، سرخ سوچاں وچ لہر دے آغا خاں سہوترے نوں چنگے لگے

......
Link of the Part 6
http://www.wichaar.com/news/312/ARTICLE/32771/2017-04-14.html 


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels