Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> مُصلّی، اسیں درواڑ! (کہانی) 6 ویں لڑی

مُصلّی، اسیں درواڑ! (کہانی) 6 ویں لڑی

نین سْکھ
April 18th, 2017

آغا خاں سہوترے دے ایس نعرے وچ قصہ مصری خان وی تے ڈرامہ ’’مُصلّی‘‘ وی۔ مُصلّی کون تے چنگڑ بار کیہ؟ ایم کے پی تے دیہاتی مزدور تنظیم دی کہانی جیہدے وچ ماسٹر سوہن لال دا ذکر تے میجر اسحاق دی ویل

’شعلہ ‘اخبار؟... ’غدری‘ جیہدا اصل ناں ماسٹر سوہن لال؟... کتھ کتھونی؟... پِڑسانگی؟
1983 وچ ہِک دن ساجرے چھاپہ پیا، تفتیش شروع ہوگئی----
مُلزم مسنے مُصلّی دا پوترا اگرا بہاول دا، جہڑا ہُن آغا خاں سہوترا، ڈُلایا ککھ وی نہ، اوہ تھانہ کچہری بھُگتیندے عُمر گزاری بیٹھا۔ اجن کل ای لہوروں پرتیا جِدھے اوہدی ہائی کورٹ وچ پیشی ہائی۔ جُرم اوہدا ایہہ ہا جو اوہدے گھر وچ مُصلّی ڈرامہ کھیڈیا گیا جہنوں پُلس پے گئی۔ تے گرفتاری مگروں پرچہ ہوگیا۔ پنجاہ ہزار جُرمانہ تے پنج سال قید دے خلاف مُلزمان ہائی کورٹ وچ اخراجِ مقدمہ لئی عرضی پائی جہناں میاں سلیم جہانگیر نوں وکیل کیتا.......
پر اج جہڑی سرگودھے دی سرکاری مشینری نال دھاڑ پئی، کائی انہونی جاپے۔ کمشنر دی کار پچھے ایس پی دی جیپ۔ پُلس اگدوں اپڑ کے آغا خاں سہوترے دے گھر باہر ناکہ لایا ہویا۔ پر جہڑے تِن پراہنے اندر آئے، اُنہاں چوں کائی وی دِھر سرکاری ملازم ناہی۔ ہِک گورا جیہدا ناں جیمز، اکھے کسے امریکی لائبریری ولوں آیا، اوہدے بارے دس جے متحدہ پنجاب دے آخری وزیرِاعظم سر خضر حیات ٹوانے دے پُتر نذر حیات دا بیلی۔ نالدے دو ہماتڑ پاکستانی، ہِک اسلام آباد دا افضل پرویز تے دووا فیصل آباد دا عبدالغفور درشن، ایہہ دوویں فوک لورِسٹ۔ عبدالغفور درشن آغا خاں سہوترا دا پُرانا جانو، افضل پرویز پہلی وار مِلیا۔ امریکہ وچ وسدے نذر حیات ٹوانے نوں خبر نہیں کیہ ماروَگّی جو اوس اودھے اپنے علاقے دی کدوکی، برٹش انڈیا وچ داخل دفتر ہوئی سیکرٹ فائل چاکھولی جیہدے وچ درج کہ قبضے ویلے لاہندے پنجاب دے مُصلّی انگریز افسراں اُتے حملے کریندے رہے۔ سارے نابراں دے ناں پتے دسّے ہوئے جِہناں نوں لبھدے ہوئی ایہہ تفتیشی ٹیم آغا خاں سہوترا تائیں اپڑی۔ اج ایہہ سبھ وِسرنے قِصے پھرو لن دی کیہ لوڑ بنی، ایہہ کائی نہ دسّن، پُچھی گئے-----
فضلو مصلّی احمد خاں کھرل دے نال رہیا؟ اوہ جھامرے برکلی دی فوج ہتھوں ماریا گیا؟ ایہہ احمد خاں کھرل دے مرِیون توں تِن دن اگدوں دی گل؟
نادرا مُصلّی میجر نکلسن دے ہتھیں پیا؟
سُرخرو تے شمّے خوشاب والی پُل تے کرنل میتھیو اُتے حملہ کیتا ہا؟
مسنے سلانوالی نیڑے انگریز افسر ہیلی نوں للکاریا؟ (مسنا آغا خاں سہوترے دا دادا ہویا)
ماسٹر سوہن لال، شاہ پوروں ہفتہ وار اخبار شُعلہ وچ ’غدری‘ دے خُفیہ ناں نال لِکھدا نپِی گیا جہدے جُرم وچ اوہ سکول دی سرکاری نوکری چوں ں،نِکلیا۔ اوس ڈرامہ پارٹی بنائی، ناں رکھیوس ’کتھ کتھونی‘ جہڑی پِڑسانگی کھیڈے۔ پِڑسانگی چنگڑ بار دا پُرانا ڈرامہ سمجھو جہدے وچ ویکھنہار تے وکھا و نہار سارے سِیری ہوون۔ کتھ کتھونی اکثر جنگل وچ ’قصہ پنج پیر‘ کھیڈِے جیہدے وچ گُستان اندرپنج پیر اُترِن، جہڑے مُردیاں نوں زندہ کرکے جنت تے دوزخ دا نظارہ کرواون۔ پِڑ سارا گُستان ہووے، ویکھنہار مُردے جہناں دے ساہمنے درگاہ وچ پنج پیر۔ جَدن جنت بیان ہووے، ٹھنڈی سوادی ہوا چلن لگ پوے، باغ بہاراں مہکن، مِٹھّے میوے تے دُدھ شہد دِیاں نہراں۔ پر مزے وچ جنتیاں نوں اوس ویلے پِیر بے آرام چا کریندے جَدن غلامی تے بے غیرتی دی عیش نوں اوہ کھول وکھاون، جنت دوزخ ہووَنجے۔ دوزخی اگ وچ سڑدے، آزادی دے نعرے لاون......
آغا خاں سہوترا یاداں وچ اِنج بُڈا ہویا کہ گورے جیمز دا کاسٹیوم تے سٹیج بارے سوال ہوا وچ اُڈگیا۔
’کتھ کتھونی‘ دے اکثر کِھڈ کار نابر مُصلیاں دے جاتک ہائن جیویں نورنگ سُرخرو دا پُتر، سُلا شمے دا دوہترا تے ربّن نادرے دا پوترا۔ مسنے دا پوترا اَگرا کجھ ایدِن ماسٹر سوہن لال جانگلی نال رہیا، وت چھوڑ گیا کیوں جو ماسٹر سبھ مذہباں توں اِنکاری ہا۔ اگرے دی سمجھ اُدن ایہا کجھ ہائی کہ لامذہب ہوون پاروں مُصلّی وسیبوں باہر رہ گئے۔ تے اوہ اپنے بیلی غلام حیدر نائی نال رل کے احراری ہوگیا۔ مذہبی، پر جاگیرداراں تے انگریز حاکماں دے خلاف۔ لام دوران ماسٹر سوہن لال اشتہاری ہوگیا، اوہدے خلاف الزام ہا کہ اوہ جرمنی دا جاسوس۔ گھوڑے پال ٹوانے جیہڑے انگریز کیولری دے وڈے سپلائزر، اُنہاں ایہہ مُخبری کیتی۔ ’کتھ کتھونی‘ اُجڑ گئی......
آغا خاں سہوترے دا چیتا چنگا ہا، پر وَت وی اوہنوں اپنی اَن چھپی کتاب ’’مُصلّی، اسیں دراوڑ!‘‘ پھرولنی پئی جیہڑی اوہ کدوکی جوڑدا راہندا۔ امریکی جیمز وچولیاں راہیں اوہدے نال پُچھ دس کردا رہیا جیہدی سوچ دی سوئی اجن تائیں ’قصہ پنج پیر‘ وچ پھاتّی ہوئی:
اوہ پنج پیر کون ہائن؟
جواب دیندا دیندا آغا خاں سہوترا رمز وَال ہوگیا،’’تُسیں اج پِڑ سانگی کھیڈو، پیر میں وکھاساں!‘‘
پراہنے کجھ پریشان ہوئے۔
’’پِڑسانگی تہاتھوں کھڈِیونی کائی نہ، میں تُہانوں اپنے پیراں دی دس پاندا وَنجاں!‘‘
آغا خاں سہوترا اندر گیا تے ایم کے پی دے رتّے لال جھنڈے وچ سنبھا لِیاں ہوئیاں بلیک اینڈ وائٹ تصویراں لئی آیا۔
مارکس، اینگلز، لینن، ماؤزے تنگ تے میجر اسحاق، جہناں تائیں اپڑن ایڈا سوکھا نہ، اوس اپنی پوری انقلاب بانی سُنائی-----
O


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels