Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> مُصلّی، اسیں درواڑ! (کہانی) تریجی لڑی

مُصلّی، اسیں درواڑ! (کہانی) تریجی لڑی

نین سْکھ
April 12th, 2017

آغا خاں سہوترے دے ایس نعرے وچ قصہ مصری خان وی تے ڈرامہ ’’مُصلّی‘‘ وی۔ مُصلّی کون تے چنگڑ بار کیہ؟ ایم کے پی تے دیہاتی مزدور تنظیم دی کہانی جیہدے وچ ماسٹر سوہن لال دا ذکر تے میجر اسحاق دی ویل
ممبر شپ لئی انقلاب نوں پرچار دا آغا خاں سہوترا پورا پنجاب گاہندا پھردا رہوے۔ ’دیہاتی مزدور تنظیم‘ دے سرگودھا، لُڈن، حجرہ شاہ مقیم، پاک پتن تے خانیوال ممبراں دے کچے کوٹھیاں وچ دفتر کُھلے۔ دیہاتی مزدوراں نوں، جیہڑے اکثر مُصلّی ہوندے، ممبر بنن وچ دو تِن دن لگ وَیندے۔ پَوند ممبر اپنی ہڈو رتی تے اپنے وڈکیاں کولوں سُنیاں گلاں کتھاں سُناوے جیہناں چوں لوڑِیندیاں آغا خاں سہوترا لِکھدا ونجے۔ جیہدے تھیلے وچ دو رجسٹر ہوندے، ہِک وچ چندے دا حساب، ممبر دا رسید نمبر تے اوہدا انگوٹھا لگا ہووے تے دُوے وچ ممبراں بارے جانکاری۔ اصل وچ آغا خاں سہوترا نوں جَدن سمجھ آئی کہ مُصلّی پنجاب دے قدیمی وسینک، اوہ اوہناں دِیاں گلاں راہیں اوہناں بارے کتاب جوڑ دا راہندا......
میجر اسحاق دا ڈرامہ’ مُصلّی‘ پڑھدیاں اِنج ڈَھڈ ہویا، ’’مسلمانی وچ سُنیا کہ ہر قوم اُتے اسمانوں کائی کتاب اُتری، مُصلیاں لئی اوہ صحیفہ ’مُصلی‘ !‘‘
اوہ صالحوں تے ٹھری نوں پنجاب بارے جو دس پائے، اوہ اوہیو گلاں جیہڑِیاں مُصلی ڈرامے وچ سیّد اقتدار علی، رُتے تے صاباں نال کیتیاں تے انقلابی سوچ اوہ جیہڑی ’مصلی‘ وچ نورے دی رُتے نال گل بات۔ موج وچ آئی ٹھری آغا خاں سہوترے نوں آکھن لگی، ’’توں سیّد اقتدار علی، میں صابّاں!‘‘ کولوں صالحوں پھُنڈیا، ’’توں نُورا، میں رُتا!‘‘ آغا سہوترا ہس پیا، ’’میں آپ رُتا، تاریخ دا کھوجی سید اقتدار علی تے مِل مزدور انقلابی نُورا رل کے میجر اسحاق بنن!‘‘
ٹھری تے صالحوں جیہڑے کدی کھیتاں وچ گڈھ واہ دے حصے دار ہائن، ہُن روڑی کُٹدے تے بجری ڈھونڈے۔ اُدن اوہ ’قصہ مصری خان‘ دے مصری خان تے بائی پٹھانی ہوون۔ پر اَج اوہ کجھ ہور ہوگئے۔ آغا خاں سہوترا دے آدرشاں دی جگائی جوت وجہوں اوہ ہُن ظلم دی حاکمی توں میجر اسحاق دے نابر مُصلّی۔ جیہناں دِیاں گلاں سُن کے ہور بیلی بیلانیاں وی ’دیہاتی مزدور تنظیم‘ دے نیڑے لگے جیہڑے آغا خاں سہوترا دے آیاں اکٹھے رل باہندے۔ کجھ بھٹہ مزدور، کجھ کھیت مزدور، تے کائی مِل مزدور۔ ٹھری تے صالحوں ہورِیں ٹبّر دے ستارھاں جی پکی دے مزدور جیہڑے دُونہہ جھُگیاں وچ راہندے جِدھے تنظیم دا دفتر جیہڑا چلدا پھِردا راہندا، کائی پکی ٹھاہر ناہی......
ٹھری تے صالحوں ’مُصلّی‘ دے صاباں تے رُتّا جیہڑے راء صلابت دی حاکمی چوں اُجڑے سیّد اقتدار علی دے متھّے لگے جیہڑا زمین دار بُڈھن شاہ دا پُتر، یونیورسٹی دا سٹوڈنٹ، سوشیالوجی وچ اپنے تھیسس لئی اوہ مصلیاں بارے پرکھ پڑچول کررہیا۔ جیہنے رُتے تے صاباں نوں پنجاب، ہڑپے تے مصلیاں بارے سبق پڑھائے۔ پر بُڈھن شاہ مُصلیاں دی جاگرتی دا مخالف......
جوانی شیطانی ہووے، کتاباں پڑھدا سیّد اقتدار علی صاباں دی جوانی اُتے ڈُلھ پیا، پر جیہنے کھانگڑ راء صلابت کولوں عزت بچائی، اوہ بدنیت گبھراٹے دے وی ہتھ نہ آئی تے جیہدے پچھنڈے نال ڈَھیندیاں سیّد اقتدار علی صوفے نال جالگا تے اوہ سِر دی ڈاڈھی سٹ ہتھوں اُ تھائیں ڈھیر ہوگیا......
رنگ روپ والی اتھری صاباں گرفتار ہوئی جیہنوں تھانیدار تفتیش لئی لے کے جاندیاں بدماش اکھیں تاڑ دا رہیا۔ سید اقتدار علی زمین دار بُڈھن شاہ دا اِکلا پُتر جیہدا اوہنوں بہوں صدمہ پر اوہنوں اپنی سیاست دی چِنتا ودھیری جیہنے اپنے سیاسی مخالف نادر خاں نوں پھساون لئی پُتر دی حادثاتی موت نوں قتل دا وقوعہ بنا دِتا......
تھانہ کچہری بھُگتیدی صاباں آپ ملاحظہ کیتا کہ کیویں بیان گھڑے گئے، کُوڑھے گواہ آئے تے بناوٹی بر آمد گیاں ہوئیاں۔ اودھر مفرور رُتا جیہدے چِت اُتے ہر وہلے ہڑپہ اسوار، اوہ پتیھیریاں وچ جارلیا جِدھے اوہنوں لیبر لیڈر نُورا مِلیا جَیں بھٹہ مزدوراں دیاں بے مُہار سوچاں وچ انقلابی جاگ لائی۔ رُتے دے اندر مچھرے پنجاب اُتے انقلاب دا رنگ چڑھیا:
جیہڑا دا ہوے، اوہیو کھاوے
سوشلزم آوے ای آوے
اودھے اُچیرے نعرے تے ایدھے صاباں ہِک واری وت جِنسی ہوس دے نشانے تے۔ پر اِتواریں وی اوہدا رنگ نہ اُڈیا، اوہ لالو لال رہی۔ اوہدے ہتھ چاقو لگا جیہدے نال تھانیدار لہو لہان ہویا......
صاباں جَدن انقلابیاں دی سنگت وچ آئی، اوس شُوکدی قاتل دے کول خونی پستول ہا جیہڑا اوس تھانے چوں چوری کیتا......
O
Part 2
http://www.wichaar.com/news/312/ARTICLE/32743/2017-04-10.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels