Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> نِتھاواں(عبیداللہ سندھی بارے کہانی۔5 ویں لڑی)

نِتھاواں(عبیداللہ سندھی بارے کہانی۔5 ویں لڑی)

نین سُکھ
March 5th, 2017

مولانا عبیداللہ سندھی دی ایہہ کہانی اوس بُوٹے دی کہانی جیہڑا اپنی تھاں توں اِنج پُٹیا گیا کہ سدا بے وطنا رہیا۔ افغانستان، روس، تُرکی تے سعودی عرب وچ پردیس کٹدیاں سُفنے سدھراں قتل ہوئے۔ اپنے پرائے دی پچھان ہوئی تے کوئی نیڑے نہ لگا۔ ہوش آئی تے ویلا نہ رہیا۔

کابل وچ رَولا جیہڑا جہادی پارٹی قید خانے وچ سُن لیا،
’’اعلیٰ حضرت شاہِ افغانستان قتل!‘‘
جلال آباد وچ بھراء دی موت دا اعلان کردیاں ای نائب السلطنت سردار نصر اللہ خان آپ امارت دا دعوے دار۔ پر انڈین قونصلیٹ دے دفتر باہر کسے ہور خبردی اُڈِیک جیہدے اندروں کابل دا نائب الحکومت سردار امان اللہ خان اِنج نکلیا کہ اوہدے اک پاسے رئیسِ امورِ خارجہ سردار محمود بیگ طرزی تے دوجی باہی سپہ سالار سردار محمد نادر خان- مصاحبانِ خاص باہر تیار کھلوتے جیہناں سردار امان اللہ خان دی امارت دا نعرہ لوایا۔ کابل وچ کسے نوں اعلیٰ حضرت شاہِ افغانستان دا غم نہ فرنگیاں ہتھوں تُرک خلافت دے خاتمے دی خبر دا دُکھ ، سگوں قاضی القضا حاجی عبدالرزاق نویں امیرِ افغانستان بارے امیر المومنین تے خلیفہ تے المسلمین دا فتوٰی دِتا جیہڑا سراج الاخبار وچ اِنج چھپیا جیوں تُرک خلافت دے خاتمے بعدوں اسلامی دنیا دا خلیفہ امیرِ افغانستان جیہدا پہلا حکم، ’جہادی پارٹی‘ دی رہائی تے ’پروویژنل گورنمنٹ آف انڈیا‘ دی بحالی۔ مولانا عبید اللہ سندھی رہا ہوندیاں ای امیر امان اللہ خان دے ’مشیر برائے امورِ ہند‘لگ گئے۔ پہلی ملاقات اِنج ہوئی کہ مِلدیاں ای افغان امیر اپنے مشیر نوں دسیا،
’’من ہموہستم!‘‘
مولانا سندھی سمجھ گئے تے اوہنا نوں اعلیٰ حضرت شاہِ افغانستان نال اپنی اوہ ملاقات چیتے آگئی جیہدے وچ موجودہ امیرِ افغانستان نوں اِنج پیش کیتا گیا کہ افغانستان راہیں ہندوستان دی آزادی دی جدوں صورت بنی، دِلی دے تخت اُتے افغان شہزادے دا حق۔ ایہہ کہہ کے اعلیٰ حضرت اپنے پُتر، جیہڑا اوس ویلے کابل دا نائب الحکومت سی، نوں تھاپڑا ماریا۔ مولانا سندھی افغان امیر دی سناؤنی سمجھدیاں:
دامنِ شہ آوردہ ام بکف
گربکشتم زہے طرب گربکشتہ زہے شرف
تے افغان امیر ہندوستان دی آزادی لئی ہر امداد دا وعدہ کردیاں:
مقصدِما قریب قریب است
کجھ دن مگروں مجلس فاتحہ خوانی وچ امیر امان اللہ خان اپنے مشیرِ ہند نوں اوہدے رہبر اُستاد شیخ الہند دی موت اُتے اِنج پرچایا،
’’محمود الحسن یک کار را شروع کرند، من اُو را پور می کنم!‘‘
مشیرِ ہند کول اگدوں ای ’ہندوستانی جامعہ‘ دا منصوبہ تیار جیہدی اجازت مِل گئی......
عالمی جنگ مُکدیاں افغان امیر نوں لگا کہ تھکیا ہویا برطانیہ ماڑا پے گیا جیہدے خلاف قاضی القضا جہاد دا فتوٰی دِتا جیہڑا سراج الاخبار دی سُرخی بنیا۔ مشیرِ ہند مولانا سندھی سپہ سالار سردار محمد نادر خان دے عطا کرہ قلعہ علی آباد وچ جامعہ دا نظام لکھ رہے کہ اوہ مشیرِ ہند نہ رہے تے اوہناں نوں کم توں روک دِتا گیا۔ کیوں جے خلیفہ المسلمین میر امان اللہ خان دا برٹش اِنڈیا نال نواں معاہدہ ہوگیا جیہدے تحت افغانستان دی خود مختاری منّی گئی تے اوہدی خارجہ پالیسی نوں اِنڈین قونصلیٹ دی منظوری دی لوڑ نہ۔ نویں معاہدے دی ایہہ وی شرط کہ افغانستان برٹش اِنڈیا دے خلاف کس ملک دا اتحادی نہیں بنے گا جیہدے لئی افغانستان نوں برِٹش انڈیا کولوں تِن کروڑ پونڈ امداد (خراج) مِلی۔ سرحدی لڑاکے قبیلے، آفریدی تے وزیر جیہڑے افغان امیر دی شہہ تے فرنگیاں نال چھیڑخانی کردے رہے، اوہ بے وارثے ہوگئے جیہناں نوں برٹش انڈیا دی فوج بہت بُرا ماریا......
مولانا سندھی تے اوہناں دے ساتھی فیر مُلزم ’جہادی پارٹی‘ جیہدی نگرانی شروع ہوگئی۔ افغانستان توں اِتنی بد دِلی کہ مولانا سندھی روس راہیں تُرکی جاون دا سوچ لیا۔ پر افغانستان وچ آون سوکھا، نِکلن محال، کجھ دِتیاں راہداری مِلے۔ جہادی پارٹی خالی ہتھ، اک خدمت دے بدلے اوہنوں اجازت نامے دی آس لگی۔ خدمت کیہ روس اگے افغانستان دی وکالت کہ اوہ روس دا خیر خواہ جیہدے ولوں روس دی سرحد ہر سازش تے شرارت توں محفوظ۔ پر ایہدے لئی روس افغانستان نوں اِک کروڑ پونڈ دیوے۔ ’جہادی پارٹی‘ ’روسی مِشن‘
وچ بدل گئی۔ مولانا سندھی مِشن دے لیڈر جیہناں دی پچھان کابل وچ روسی سفارت خانے نوں ایہہ دسّی گئی کہ اوہ کانگرس کمیٹی کابل دے صدر تے پروویژنل گورنمنٹ آف اِنڈیا دے وزیرِ داخلہ۔ روسی سفیر رسکو لِنکوف مولانا سندھی دی بہت عزت کیتی نالے اوہناں دی بدحالی نوں ویکھدیاں سفر دا سارا خرچہ وی دِتا......
سرکاری اجازت نامہ ہوندیاں وی پارٹی نوں افغان حکومت اُتے بھروسہ نہ، کابل توں مزار شریف نوں چور رستے راہیں سفر ہویا کیوں جے افغان سرداراں ہتھوں لُٹِیون دا خطرہ۔ خچراں تے کھوتیاں اُتے یبھدیاں روسی سرحد تائیں ست دن سفر کردیاں جہادی پارٹی دے مجاہدین ڈردیاں پِچھے جھاتی ماردے رہے......
O
چوتھی لڑی دا لنک
http://www.wichaar.com/news/312/ARTICLE/32497/2017-03-04.html
نین سکھ پنجابی لکھاری نیں اتے انہاں نوں ڈھاہاں انترنیشنل ایوارڈ وی ملیا سی۔ انہاں دی تازہ کہانیاں دی کتاب ’’شہید؟‘‘ بارے اج کل گل بات ہو رہی ہے۔ایہہ انہاں دی
نویں کہانی جے۔اوہ ہن تیک پنج پنجابی کتاباں لکھ چکے نیں، ترے کہانیاں دی کتاباں نیں اتے اک شاعری تے اک ناول۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels