Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> نِتھاواں(عبیداللہ سندھی بارے کہانی۔چوتھی لڑی)

نِتھاواں(عبیداللہ سندھی بارے کہانی۔چوتھی لڑی)

نین سُکھ
March 4th, 2017

مولانا عبیداللہ سندھی دی ایہہ کہانی اوس بُوٹے دی کہانی جیہڑا اپنی تھاں توں اِنج پُٹیا گیا کہ سدا بے وطنا رہیا۔ افغانستان، روس، تُرکی تے سعودی عرب وچ پردیس کٹدیاں سُفنے سدھراں قتل ہوئے۔ اپنے پرائے دی پچھان ہوئی تے کوئی نیڑے نہ لگا۔ ہوش آئی تے ویلا نہ رہیا۔
’’خوش آمدید!‘‘ منجانب امیرِ افغانستان
’’افغانستان بہ ہمہ وسعت خود آمادہ است کہ مہاجرینِ ہندی را پناہ بدہند!‘‘
اودھروں ہندی مسلماناں دے قافلے افغان سرحد تائیں اپڑے، ایدھر میرِافغانستان تے برٹش انڈیا وچکار امن معاہدہ ہوگیا۔ تحریکِ ہجرت دے مہاجرین امن دُشمن ہوکے گرفتار۔ مولانا سندھی نوں ایہہ مندا لگا جیہناں نوں افغان حکومت دے اہلکار افغان اکھان سُنایا کہ پروہنا گھر والے لئی کھوتّا جِدّھر مرضی اوہنوں ہِک دیوے۔ تاجِ برطانیہ دے ہتھ لمّے، کابل وچ پروویژنل گورنمنٹ آف انڈیا دوالے گھیرا تنگ ہویا جیہدے دو مِشن جیہڑے تُرکی تے روس گئے، اوہ راہ وچ ای گرفتار۔ جیہناں چوں میاں عبدالباری پنجاب دے سرشیفع دا رشتے دار جیہڑا اوہدا سفارشی بنیا تے مولانا محمد علی قصوری سرحد دے سر عبدالقیوم دا انگلینڈ وچ کلاس فیلو رہیا جیہنے اوہنوں رہا کروالیا۔ پِچھے رہ گیا شمشیر سنگھ عرف متھرا سنگھ جیہڑا ہندوستان چوں مفرور، بمب کیس دا مجرم، اوہنوں پھانسی ہوگئی۔ پروویژنل گورنمنٹ آف انڈیا وچ رہندیاں مولا عبید اللہ سندھی نوں کرسچن سالویشن آرمی دی طرز اُتے ’جنودِربانیہ‘ سُجھی جیہدی بھرتی خفیہ خط و کتابت راہیں ہوئی۔ 3 مربّی جیہڑے تُرک خلیفہ، ایرانی بادشاہ تے امیرِفغانستان۔ 12 مردِ میدان جیہناں چوں تُرکی ، ایران ، افغانستان دے حکومتی وزیر تے 5 ہندوستان دے مسلمان نواب۔ سپہ سالار شیخ الہند مولانا محمود الحسن تے قائم مقام سالار مولانا عبیداللہ سندھی۔ 29 نائب سالار، 15 معین سالار، 24 ضابطہ، 9 نائب ضابطہ، 3 درشہر صد باشی، 2 صد باشی تے پنجاہ باشی اِک، سپاہی اک وی بھرتی نہ ہویا۔ ایہہ سارے افسرانِ بالا انڈین نیشنل کانگرس، جمعیت العلمائے ہِند، احرار پارٹی تے خاکسار تحریک دے لیڈرز جیہناں دی مرضی پُچھ کے اوہناں دے ناں تے منصب درج ہوئے۔ تنخواہ برٹش کرنسی پونڈ وِچ رکھی گئی۔ تنخواہ دے نال فنڈز وی۔ جنودِربانیہ دا مرکزِ اول مدینہ تے مراکزِ ثانوی قسطنطنیہ، تہران تے کابل.....
جنودِربانیہ دا منصوبہ تے منصب داراں دے ناں اِک گزپیلے ریشمی رُمال اُتے لِکھے گئے جیہدی تصدیق لئی امیر افغانستان دی مُہر لگی۔ ایہہ ریشمی رُمال منصوبے دی منظوری لئی شیخ الہند تائیں پہنچانا لازمی جیہڑا شیخ عبدالحق بنارسی دے حوالے ہویا جو ہندوستان تے افغانستان وچ کپڑے دا سوداگر، نالے اوہ شیخ الہند دا شاگرد جیہنے سٹھ اِکو جیہے ریشمی رُمالاں وچ ایہہ رُمال چھپایا۔ پشور خیرِیں اپڑکے شیخ عبدالحق بنارسی رات اپنے جانُو حق نواز خان دے گھر رہیا۔ اوتھوں ریل گڈی وچ بہہ کے اوہنے کراچی جانا جتھوں اوہدی سمندری جہاز وچ حجاز لئی روانگی۔ پر جنودِربانیہ دے خفیہ منصوبے دی مُخبری ہوگئی، برٹش انڈیا دے تِن جاسوس پِچھے لگے۔ شیخ عبدالحق بنارسی رستے وچ رُکدیاں سفر کرنا سی۔ ملتان تے بہاولپور دو مقام جتھے اوہنے وِسرام کرنا......
ایہہ ریشمی رُمال مُلتان وچ پھڑیا گیا جیہڑا پنجاب دے گورنر سرمائیکل او ڈوائر ساہمنے پیش ہویا۔ جنودِربانیہ دے درج ہوئے افسراں دے گھراں وچ چھاپے پئے، سپہ سالار شیخ الہندمکے چوں تے قائم مقام سالار مولانا عبید اللہ سندھی کابل وچ گرفتار۔ جیہناں تِن مسلمان مُخبراں ریشمی رُمال پھڑوایا، لہور وچ فرنگی گورنر اوہناں اُتے مہربان ہویا۔ عبدالحق پُلس افسر لگا، رب نواز خان بہادر ہویا تے شاہ نواز ریلوے افسر بنیا......
افغانستان تے برٹش انڈیا وچ جیہڑا نواں معاہدہ ہویا، اوہدے مطابق افغانستان، برٹش انڈیا ولّوں امداد وچ وادھے بدلے دوشرطاں دا پابند:
1۔افغانستان آپ تے نہ اپنے اندروں کسے غیر ملکی گروہ نوں برٹش انڈیا اُتے حملہ آور ہوون دیوے گا۔
2۔افغانستان برٹش انڈیا دے مجرماں تے باغیاں نوں گرفتار کرکے عدالت راہیں سزا دیوے گا۔
انڈین سیکرٹ سروس دے ریکارڈ نوں مُکھ رکھدیاں افغانستان دے قاضی القضاء مُلزماں، مولانا سندھی تے اوہناں دے ساتھیاں، نوں اپنے فیصلے وچ ’جہادی پارٹی‘ لکھیا جیہنوں افغان قید خانہ دی تنگ کوٹھڑی وچ ڈکیا گیا......
رمضان شریف، عبادت دا مہینہ۔ پر کابل دے پہاڑاں وچ قید پردیسی بہوں اوکھے، کیویں روزہ نماز کردے جیہڑے جہاد فی سبیل اللہ لئی اپنا گھر تے پیارے بُھلے ہوئے۔ اوہ افغان مسلمان بھائیاں دے مندے ورتارے ہتھوں بہوں پچھتائے، گھرو کی یاداں دی کھیتی جیہنوں چروکنا سوکا لگا، اُتے دُکھ دی تریل پئی تے اکھیاں چون لگ پئیاں۔ وچھوڑے دِیاں لمِیاں راتاں، دس بندیاں دی گنجائش جتھے چھبّی قیدی۔ پھسیاں گھسّے لگّن، شیخ الہند دے شہر بریلی داکُولا کوارا مجاہد سُریلا نِکلیا، ’’خُسرو نجام کے بل بل جاندا‘‘ سہاگن ہویا:

پریم بھٹی کا مدھوا پلائی کے
متواری کرلی رے
موسے نیناں ملائی کے
.....
گوری گوری بیّاں، ہری ہری چوڑیاں
بیّاں پکڑ ہرلی رے
موسے نیناں ملائی کے
.....
بل بل جاؤں میں تورے رنگ رجوا
اپنی سی رنگ دی رے
موسے نیناں ملائی کے
.....
جہادی پارٹی دا کوئی قیدی بھیناں بھراواں نوں یاد کررہیا، کسے دِیاں اکھاں ساہمنے بیوی بچے، کوئی یاراں بیلیاں دِیاں یاداں دے حوالے تے کسے نوں بُڈھے ماپیاں دی فِکر۔ پر ’جنودِربانیہ‘ دا قائم مقام سالار کسے اگلے محاذ دی تیاری وچ گُم، حالاں ساتھیاں چوں اکثر نوں خبر کہ مولانا سندھی پِچھے بُڈھی بمار ماں، دو ماں مھیڑ دِھیاں تے اک بیوی۔ پہلی بیوی دی فوتگی مگروں مولانا دوجا نکاح اپنے اک ہور نو مسلم رشتے دار دی بیوہ نال کیتا جیہدے پِچھلگ پُتر احمد علی نوں اپنا جوائی بنالیا۔ مولانا دی دوجی بیوی تے اوہناں دی سِکھ ماں دا آپس وچ کوئی سلوک نہ۔ پریم کور گھر وچ رِشتیاں دی گنڈھ تڑت اُتے منکھی،
’’ایہہ چنگی مسلمانی، کھسم تیوِیں دے پُت نوں جوائی بنالوئے!‘‘
پر مولانا سندھی قید خانے وچ منصوبہ بندی لئی آزاد ---- حج اُتے قربانی لئی جیہڑے جانور ذبح ہوندے، اوہناں دِیاں کھلّاں دے کاروبار لئی حجاز وچ ’بین لاسلامی کمپنی‘ بنے جیہدی کمائی ’بین لاسلامی بینک‘ وچ جمع ہووے جیہڑا ضرورت مند مسلماناں نوں قرضِ حسنہ دیوے.....
’’حج تے عید الاضحی دور! مولانا صاحب عید الفطر دی فکر کرو !‘‘
عید الفطر دا ناں سُن کے قید خانے دے محافظ مونہوں بدوبدی نِکلیا،
’’فِطرانہ!‘‘
نال ای اوس غریب افغان دا مانگت ہتھ سلاخاں توں اندر آیا......
O
تریجی لڑی دا لنک
http://www.wichaar.com/news/312/ARTICLE/32490/2017-03-03.html
نین سکھ پنجابی لکھاری نیں اتے انہاں نوں ڈھاہاں انترنیشنل ایوارڈ وی ملیا سی۔ انہاں دی تازہ کہانیاں دی کتاب ’’شہید؟‘‘ بارے اج کل گل بات ہو رہی ہے۔ایہہ انہاں دی
نویں کہانی جے۔اوہ ہن تیک پنج پنجابی کتاباں لکھ چکے نیں، ترے کہانیاں دی کتاباں نیں اتے اک شاعری تے اک ناول۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels