Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> اَچھنا گچھنا(دادا امیر حیدر انقلابی دی کہانی(۔9ویں لڑی

اَچھنا گچھنا(دادا امیر حیدر انقلابی دی کہانی(۔9ویں لڑی

نین سْکھ
February 22nd, 2017

اَچھنا گچھنا مطلب آنا جانا۔ 90 ورہیاں دا، ست کڈھیاں ایہہ دو لفظ دادا امیر حیدر دی کہانی دا خلاصہ۔ ایہہ اک ہول ٹائمردا روز نامچہ۔ برِٹش راج وچ پچھڑے پوٹھوہار دا حال احوال تے یونائیٹڈ اِنڈیا وچ کمیونسٹ لہر دا ویروا۔ اُچیرے انقلابی آدرشاں لئی نمانے ورکر دے جوکھویں سنگھرشن دی وارتا۔ ایہہ انھیرے پندھ وچ بلدی بُجھدی جاگرتی دی لو، لمے سفراں تے قید کوٹھڑِیاں دا بیان۔

بمبئی، ماسکو تے مدراس۔ کدھرے کامریڈاں کولوں کمیونزم بارے پڑھیا، کدھرے روپوشی وچ رہ کے پارٹی دا کم کیتا تے کدھرے جیل کٹی۔ دس سال بعد کالُو دا پُتر امیر حیدر گراں پرتیا جتھے اجے وی کجھ نہ بدلیا۔ اوہ ای غریب لوک، تے اوہ ای اوہناں دے دُکھ۔ پر اوہ ای سجن تے اوہ ای مہر محبتاں۔ کجھ راج دوارے، خلقت بھُکھی۔ ووٹاں نوٹاں دی سیاست نال نوِیں اشرافیہ پُنگر رہی۔ جیہڑا سنگی مِلے، اوہدِیاں اکھاں وچ اوہ ای سوال جیہدا جواب دیندا امیر حیدر تھکے نہ، ’’سُرخ انقلاب ضرور آسی، ظلم نہ رہسی!‘‘.....
سردارنی دا حُسن رُل گیا، دوساہمنے دند نہ رہے، کالیاں زُلفاں چوں سفیدی جھاک رہی جیہڑی اجے وی اپنی رہائی دا دن اُڈیکے پئی۔ پوٹھوہار جتھے سارا سال فوج وچ بھرتی کُھلی رہوے، مرداں وچ انگریزاں دی غلامی دِسے پر سوانِیاں آزاد:
چھلّا ساوی جھنگی اے
حاکم اج فرنگی اے
ڈاڈھی ہتھ نی تنگی اے
کیہڑے پاسے جاواں
پوہلی پئی کھاواں
رعایا حاکماں دا دھیان رکھے:
قمیضاں وَیل نِیاں
اُچا ہوائی بنگلہ، وچ میماں ٹہل نِیاں
پوٹھوہار وچ پردیسی فوجی گھر پرتدیاں چاہ دی پتی لے کے آندے، کجھ ای سالاں وچ لوک اجیہے چاہ تے لگے کہ دُدھ لسی سوا دنہ دیوے۔ غریب نوں وی چاہ دی طلب:
چاہ بِنا نہ رہنی آں تکڑی
نہ گھر گویا تے نہ گھر لکڑی
جِند دو وقتی چاہ ہوئی
چاہ ہیٹھاں بالاں پئی ٹانڈے
ویچ چھوڑے گھرے نے بھانڈے
چاہ دو رُپیئے پاہوئی
اوکھیاں کمائیاں، گنڈھ تُرپ نوں سفید پوشی دی سدّھر پر منگ پِن کے اوکھا گزارہ:
بگی گھوڑی تے ڈبڑا کھیس اے
ساڈا ڈھول گیا پردیس اے
جیویں ڈھولا، ڈھول سُندری
ہووے سُنیارا، گھڑدیوے مُندری
----
اسیں اِتھے تے ڈھولا گاہی وے
دو ہتھ شملہ، جُتی پرائی
چِٹی گرگابی، کالی شلوار ہووے
پاکے نکلاں، دِلے دا جانی نال ہووے
----
اسیں اِتھے تے ڈھول چکڑالے
سَوڑی جُتی تے پے گئے چھالے
پَیڑ کھادھی وَینی اے ڈھول مکھنا
دِل پردیسیاں دا راضی رکھنا
ہر باہی پردیساں دی یاد پسری ہوئی، ریل گڈی، جیہنوں سرکاری حاکم اِنج وڈیاون کہ اوہدی وجہوں پورا اِنڈیا اِک دیس بنیا جیہڑا اگے ودھ رہیا، اوہ ایتھے سُکھ نہیں، دُکھ بنی ہوئی۔ پورا پوٹھوہار وچھوڑے ڈنگیا:
ٹیشن بل بتیے
چھُٹی پردیسی آونا، دو ٹیمی چل گڈیے
آونا، دو ٹیمی چل گڈیے
میں کُوک مرینی آں
وِسل نہیں دئیں بابو، میں ڈھول کھڑینی آں
----
میں اِتھے تے ڈھولا لیّے
ٹُٹ جان گڈی دے پہیے
جیہڑی لے سجناں نوں گئی اے
پانی بھرینی آں ٹوئے توں
تے ڈھول سنجاتا کوہے توں
گرائیں پِیراں تے پُجارِیاں دے منّنہار، اپنے حق توں بے خبر جیہناں لئی امیر حیدر انقلاب دا جھنڈا چُکیا ہویا، اوہنوں اوہدے کامریڈ بلارہے۔ امیر حیدر فیر بمبئی نوں منہ کیتا۔ اوہدیاں اکھاں وچ اتھرو، اک مانگت بال مسافراں کولوں منگدیاں گارہیا:
گڈی سرکاری، پُلاں توں لنگھنی آچھم کرکے
بچڑے ماواں دے گھِنی وَینی آبند کرکے
پوٹھوہار پِچھے نوں جارہیا، ریل گڈی چھکا چھک چھکا چھک اگانہہ نوں ودھدی گئی.....
O
اٹھویں لڑی دا لنک
http://www.wichaar.com/news/312/ARTICLE/32408/2017-02-20.html
نین سکھ پنجابی لکھاری نیں اتے انہاں نوں ڈھاہاں انترنیشنل ایوارڈ وی ملیا سی۔ انہاں دی تازہ کہانیاں دی کتاب ’’شہید؟‘‘ بارے اج کل گل بات ہو رہی ہے۔ایہہ انہاں دی نویں کہانی جے۔اوہ ہن تیک پنج پنجابی کتاباں لکھ چکے نیں، ترے کہانیاں دی کتاباں نیں اتے اک شاعری تے اک ناول۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels