Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> اَچھنا گچھنا(دادا امیر حیدر انقلابی دی کہانی۔سلسلہ وار)6ویں لڑی

اَچھنا گچھنا(دادا امیر حیدر انقلابی دی کہانی۔سلسلہ وار)6ویں لڑی

نین سْکھ
February 18th, 2017

اَچھنا گچھنا مطلب آنا جانا۔ 90 ورہیاں دا، ست کڈھیاں ایہہ دو لفظ دادا امیر حیدر دی کہانی دا خلاصہ۔ ایہہ اک ہول ٹائمردا روز نامچہ۔ برِٹش راج وچ پچھڑے پوٹھوہار دا حال احوال تے یونائیٹڈ اِنڈیا وچ کمیونسٹ لہر دا ویروا۔ اُچیرے انقلابی آدرشاں لئی نمانے ورکر دے جوکھویں سنگھرشن دی وارتا۔ ایہہ انھیرے پندھ وچ بلدی بُجھدی جاگرتی دی لو، لمے سفراں تے قید کوٹھڑِیاں دا بیان۔

امریکہ دا غدری ٹونی ماسکو وچ کمیونسٹ سخاروف !
ماسکو اپڑدیاں ای ٹونی یونیورسٹی آف دی پیپلز آف دی اِیسٹ وچ داخل ہویا جِتھے اوہدا نواں ناں سخاروف تے ڈِھلوں والکوف ہویا۔ کلاس فیلوز چوں بیلجیم دی فریڈا، روسی نتاشا تے بنگالی سوہاشنی نال دوستی ہوگئی۔ لیگ اگینسٹ امپرئیلزم دے جنرل سیکرٹری ورندرا ناتھ چٹو پادھیائے نال اودوں ملاقات ہووے جدوں اوہ سوہانشی نوں مِلن آؤندا۔ پڑھائی کیہ، مارکسی پوائنٹ آف ویو تحت اکنامک جغرافیہ، پولیٹیکل کانومی، فلاسفی تے تواریخ۔ روسی زبان تے کوڈ لینگوئج سِکھدیاں مِلٹری ٹریننگ وی۔ سارے سٹوڈنٹس اک دوجے نوں کامریڈ کہہ کے بُلاندیاں خُش ہوندے۔ سخاروف کدی کدی اُداس ہوجاوے،
’’جَینی یاد آرہی اے؟‘‘
والکوف اوہدی اُداسی دا کارن سمجھ جاندا۔ اک دن سخاروف اِکلّا ای ماسکو دے اک پارک وچ اکھاں مھِیٹ کے ٹیک لائی بیٹھا کہ اوہنوں لگا بینچ تے اوہدے نال جَینی آکے بہہ گئی۔ اوس اکھّاں نہ کھولیاں کہ جے اوہ کوئی سُفنہ ویکھ رہیا تے اوہ کدھرے ٹُٹ نہ جائے۔ پر اوہنوں جاگنا پیا کیوں جے اوہنوں کوئی رُوسی کُڑی انگریزی وچ بُلارہی،
''You look like a Varindra!''
وچھوڑیاں دے ڈنگے دو دُکھی، سخاروف تے لولیا مترو سوا، مِلدیاں ای اک دُوجے دا سہارا بن گئے۔ اِکٹھے گُھمدن پھِرن، بانہہ وچ بانہہ پاندیاں اِک دُوجے دے موڈھے اُتے سِر ہووے.....
ماسکو وچ سخاروف دا واہوا دِل لگ گیا، اوہنوں مان کہ اوہ اوس یونیورسٹی دا سٹوڈنٹ جتھے اوہدا لیڈر لینن لیکچر دیندار رہیا۔ دھن بھاگ، اوہ اوتھے روز الکسمبرگ نوں مِلیا تے اینگلز دے بیلی تھامسن مان نال اوہدی گل بات ہوئی۔ کامریڈ رالف فوکس نال رل بہنا اوہنوں بہوں چنگا لگا (جیہڑا مگروں سپین دی سِول وار وچ ماریا گیا)۔ اوہ ویکھدا کہ اوتھے ہوچی مِنہ، لیوشاؤچی تے راجہ مہندرا پرتاپ سنگھ اپنے اپنے دیساں وچ انقلاب دے منصوبے بنارہے ہوندے۔ اوہنے امریکہ وچ کمیونسٹاں دی دھڑے بندی ویکھی پر روسی بالشویک پارٹی اِک مُٹھ، کُوئی دُوج نہ دِسّے۔ ماسکو دے ریڈ سکوائر وچ مے ڈے، دی پریڈ رَیڈ آرمی پریڈ کردیاں دھرتی ہلا دِتی۔’’انقلاب زندہ باد!‘‘ نعرہ لاندیاں کامریڈ سخاروف انقلاب دی سُرخی نوں سارے جگ وچ پسردیاں ویکھ رہیا۔ اوس دن اوہنے چائیں چائیں ماں نوں خط لکھیا:
’’.....میں آپ لوگوں کے لیے وہ تحفہ لے کے آنا چاہتا ہوں جو آپ نے کبھی سوچا بھی نہیں.....‘‘
اگلے دن اوہ لولیا مترو سوا دے نال بیٹھا پر اوہدے توں بے دھیانا ہوکے ’پراودا‘ دی خبر پڑھ کے کھِڑ گیا، ’’شُعلہ پور وچ عوامی بغاوت!‘‘ اوہ اوس ویلے ماسکو نہیں، بمبئی وچ۔ پریم نگری دی وسنیک روسی دوست اُٹھ کے پرانہہ ہوگئی،
''You are not from my world!''
دوسال روس وچ کمیونزم پڑھ لکھ کے کامریڈ سخاروف بمبئی پرتیا جتھے اوہنوں پرانے سنگی، وکٹوریہ ڈاک دے مزدور، مِل پئے جیہناں اوہنوں دس سال بعد وی دادا کہہ کے بُلایا۔ اوہدا ایہہ ناں اوہدے نویں کامریڈاں وچ وی مقبول ہوگیا۔ انڈیا وچ کمیونسٹ پارٹی دی نِینہہ رکھدیاں اوہ ایس اے ڈانگے، پی سی جوشی، جی وی گھاٹے تے بریڈلے دا بھائیوال بنیا۔ منصوبہ بندی لئی کاغذ کالے ہورہے پر دادا کولوں ماں نوں خط نہ لِکھیا جا رہیا، کامریڈاں نوں سمجھ آگئی کہ اوہناں دا نواں کامریڈ اپنے گراں تے ماں توں بہوں اودریا ہویا تے اِنج اوہنوں کجھ دن دی چھُٹی مِل گئی.....
O
پنجویں لڑی دا لنک
http://www.wichaar.com/news/312/ARTICLE/32382/2017-02-17.html
نین سکھ پنجابی لکھاری نیں اتے انہاں نوں ڈھاہاں انترنیشنل ایوارڈ وی ملیا سی۔ انہاں دی تازہ کہانیاں دی کتاب ’’شہید؟‘‘ بارے اج کل گل بات ہو رہی ہے۔ایہہ انہاں دی نویں کہانی جے۔اوہ ہن تیک پنج پنجابی کتاباں لکھ چکے نیں، ترے کہانیاں دی کتاباں نیں اتے اک شاعری تے اک ناول۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels