Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> دیس دیس دیاں کہانیاں >> چونویں کہانیاں >> آئی پُرے دی واء۔تریجی لڑی(کہانی)

آئی پُرے دی واء۔تریجی لڑی(کہانی)

نین سُکھ
February 2nd, 2017

نین سُکھ دی رچی ایہہ ’’پنجابی زبور دیسی راگاں وچ‘‘ دے جوڑنہار ’’پادری آئی ڈی شہباز ڈی ڈی‘‘ دی کہانی ای نہیں، ایہہ پنجاب وچ کرسچن مِشنرِیاں دے آون تے انگریز راج اُسارن بارے کھوج وی اے۔ پنجاب دے ’’چُوڑھے‘‘ کون؟، ’’سیالکوٹ کنونشن‘‘ کیوں ہویا؟ تے ایتھے ’’باندر کِلّہ‘‘ کھیڈ کیویں آئی؟ ایہدی پرکھ پڑچول اے ایہہ کہانی۔
آئی پُرے دی واء.....
کمپنی بہادری سرکار، سیالکوٹ دا علاقہ مِشنرِیاں دے حوالے جتھے چرچ، مِشن سکول تے مِشن ہسپتال توں بعد بنے مِشنری سکاٹ، جیہدا پورا ناں جارج واشگٹن سکاٹ، سیالکوٹوں بائبل مقدس تے راشن پانی لے کے گھوڑی اُتے بہندا۔ پہلاں اوہ ظفر وال جاندا، فیر ایتھوں نارو وال، جتھوں پسرورنوں مُنہ کردا تے پسروروں مُڑ سیالکوٹ۔ چمڑی گوری پر پنجابی ویس۔ دیسی چولا، ڈِھلا پجاما، جٹکی جُتی تے سِراُ تے کسانی پگ۔ راہ وچ جتھے موئی ماری خلقت، مِشنری دی گھوڑی کھلو جائے۔ گورا مِشنری پلِیتاں توں اوپریت کریہت نہ کردا، سگوں اوہناں نوں تھاپڑدیاں مہر دی نظرِیں ویکھدا، دوالیوں دُھتکاریاں نوں اندروں کھِچ پوے۔ والمیکی، میگھ، دیندار تے مجبی سِکھ مہربان پروہنے دی سواری پِچھے لگ گئے۔ چُوڑھیاں دے دو پِیر پنچ، جیہناں دے ناں بھجنا تے منگنا، پَورا سوکوہ مِشنری سکاٹ دی گھوڑی مگر لگ کے اوہدی ویل ہوکدے گئے۔ یسوع مسیح دی بشارت اچھوتاں اِنج سُنی جیوں اوہ اوہناں دے ناں پیاراں بھری چٹھی آئی۔ ظفر وال، جندراں، سُکھو چک تے مرالی، ایدھر نِت آیا مِشنری سکاٹ جیکن ایس جُوہ دا جی ہووے۔ جدوں آوے، کوئی سُکھ سنیہا لیاوے۔ بُتیاں کڈھ کڈھ ہنڈ گیاں نوں مِشنری سکاٹ ودھائی دِتی کہ اتوار دے دن کم توں چھُٹی، ایہہ عبادت دا دن۔ چھُٹی لئی کئی برادری چوں کِر گئے۔ کِرنیاں نوں ججماناں دھکّے زورِیں اتوار نوں کم لئی ونگاریا، مِشنری سکاٹ پُلس لے کے بوہڑ یا جیہدے اگے زِمی دار بے وس۔ بھجنا دے بُڈھے ماپے، سُناکھی تے دو آنّا، گورے مِشنری سکاٹ دے پَیرِیں پے گئے، ’’سانوں ساڈا پُتر موڑ دے!‘‘ پر بھجنا برادری وچ کیہ پرتدا، اوہدی گھروالی رامدی وی کِرگئی۔ اِک اِک کِردے کِرنیاں دا اِجڑمِشنری سکاٹ دے مگرے مگر.....
اگلے دِن ویاہ، راتِیں رحمی آپنے کُڑم مکھن دا ناں لے کے دھی پِیپو دا سہاگ گارہی، ’’چوناں وچوں چون مکھن میرے من وسدا!‘‘ پر ایہہ سہاگ وَین بنیا، جدوں خبر آئی کہ مکھن سنٹبرا کِر گیا۔ کالُو، دُلاّ، لالُو، راما، پیارا، جسُو، لاہنُو، گنڈُو تے رحما، پُوری برادری مسیحی ہوون نوں تیار، نشاندار دیالا، مِشنری سکاٹ اگے چار عرضاں لے کے حاضر ہویا تے ہتھ جوڑ کے بولیا:
*فصلاں دی بیجائی تے واڈھی سمے برادری چوں کِرن دی روک ہووے!
*اتوار دے دِن کِرنیاں نوں کم دی مناہی نہ ہووے!
*کِرنیاں نوں پرانے دھرم دے ڈھنگ نال مرنے پرنے دی چُھوٹ ہووے!
*یسوع مسیح دے نال نال کِرنیاں نوں بالا شاہ تے گُگے پِیر دے منّن مانن دی کھُل ہوئے ہووے!
شرطاں سُن ہر ویلے ہس مُکھ مِشنری سکاٹ دے متھے اُتے اوبڑ تیوڑی آگئی، گھُر اکھی پالئی تے کچیچی وٹ کے پنجابی بولنی بھُل گیا، تے اپنی بولی وچ کھرواا بولیا،
"No man can cross a river on two boats. You must forsake all for Christ, or you will not be counted worthy of Him!"
ایس بُلارے نوں سگواں تِکھا ماں بولی وچ احسان اللہ پرتایا۔ احسان اللہ، اوہدی برادری دا بندہ، پادری آئی ڈی شہباز سِہان لیا جیہنوں چیتے آیا کہ کیویں احسان اللہ مسیحی ہوکے انگلینڈ گیا، اوتھوں انگریزی سِکھ آیا، ہُن نارووال دے انگلیکن چرچ وچ پادری.....
اپنے گھراں نوں کئی کِرنے چھڈ کے اِکلے مِشن وچ آگئے پر یاداں پِینگاں جھوٹدِیاں رہن۔ اوہناں نوں ووہٹی، بال، ماپے، بھین بھراء، یار بیلی، بالاشاہ تے گُگا پِیر چیتے آؤ نوں نہ رہندے، مِشنری سکاٹ پِچھلیاں نوں مِلن یاں اوہناں نوں گھر جاون توں کدی نہ روکیا، کوئی دِھنگ دھگان نہ کیونجے اوہ مسیحی ہوون دا وچن دے کے جاندے۔ ایہہ اوہنوں پک کہ کِرنے مگروں اصل اصیل تے وچن دے پکّے۔ زِمی داراں نوں ایہہ چانن کہ اوہ کِرنیاں نال زور زبردستی کرن جوگے نہ، اوہناں قنونی کم کیتا۔ شاملاٹ اُتے مالک کھاتہ داراں دا حق جتھوں کِرنے بے دخل ہوئے۔ بے گھر ہوئے ماڑے مسیحی مِشنری سکاٹ دا راہ ویکھن لگ پئے جیہڑا اوہناں دی مدد لئی اپڑپیا۔ اوہنے اپنی سرکار کولوں نتھا ویاں لئیتھاں لئی۔ کِرنیاں لئی دونوِیاں وستِیاں وسِیاں۔ نواں پِنڈ تے سکاٹ گڑھ۔ سالویشن آرمی دے جنرل بُوتھ ایس علاقے دا دورہ کیتا، پُوری جُوہ وچ گل ہُل گئی، ’’مسیحی مذہب حاکماں دا!‘‘ رعایا نوں کن ہوگئے.....
سیالکوٹ وچ ٹَینری لگ گئی، پِنڈاں چوں چِکے چُوڑھے چُماراں نوں رُزگار لبھا، چودھرِیاں دی متھاجی مُکّی۔ گوجرا نوالے مِشن دا انڈسٹریل ہوم بنیا جتھے کم سِکھن لئی کِرنے داخل ہوئے۔ پر علاقے وچ تھرتلی اودن آئی جدوں لبُھو مَل تے نتُھو باجوہ اپنی برادری چوں کِرگئے۔ کھترِیاں تے جٹّاں نوں ڈھیر جھورا، جُھخدیاں نوں پر چاون آریہ سماجی پنڈت تے احمدی مُربّی اپڑپئے۔ آریہ سماجِیاں ہندواں نوں کِرن توں ڈک لیا تے احمدِیاں جٹّاں نوں رلاندیاں اپنی جماعت دی گنتی ودھائی پر اچھوت وانجے ورگ مسیحی مِشن دے حوالے.......(جاری جے)
نین سکھ پنجابی لکھاری نیں اتے انہاں نوں ڈھاہاں انترنیشنل ایوارڈ وی ملیا سی۔ انہاں دی تازہ کہانیاں دی کتاب ’’شہید؟‘‘ بارے اج کل گل بات ہو رہی ہے۔ایہہ انہاں دی نویں کہانی جے۔اوہ ہن تیک پنج پنجابی کتاباں لکھ چکے نیں، ترے کہانیاں دی کتاباں نیں اتے اک شاعری تے اک ناول۔
دوجی لڑی لئی ہیٹھاں دتے لنک تے کلک کرو
http://www.wichaar.com/news/312/ARTICLE/32263/2017-02-01.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels