Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> پرکھ پڑچول >> اناڑی پڑچولیاں دے ڈھائے چڑھے مولوی غلام رسول عالمپوری

اناڑی پڑچولیاں دے ڈھائے چڑھے مولوی غلام رسول عالمپوری

طارق گوجر
December 5th, 2009
5 / 5 (4 Votes)

میں ذاتی طور تے ادب دے اوہناں پڑھیاراں وچوں آں جیہڑے اپنے کلاسیکی ورثے نوں جذباتی سانگے دی تھاں تاریخی عمل دے پچھوکڑ وچ ویکھن تے جاچن وچ یقین رکھدے نیں ۔ادب توں ہٹ کے ویکھئے تاں زندگی دے ہر معاملے وچ وی صحت مند ویہار ایہو ای اے۔عقیدت جنی مذہبی جذبات نوں سکون دین لئی ضروری عمل اے اونی ہی پڑچول تے علمی معاملے وچ خطرناک چیز اے۔

بد قسمتی نال پاکستان وچ عام طور تے پنجاب وچ اچیچا کھوج پرکھ دے کلچر نوں سائنسی لیہاں تے چلاؤن دا ویہار نہیں بن سکیا، ایس دی وجہ نال جِتھے پرکھ پڑچول عقیدتاں دے پہراوے وچ ولیہٹی نظر آؤندی اے اوتھے کئی پڑچولی سبھاء توں سکھنے لوکاں ولوں پڑچولی بنن دے جتن وی عام نظر آؤندے نیں۔ساڈا قومی ہرکھ ایہہ ہے پئی ساڈے معتبر تعلیمی اداریاں نے وی پرکھ پڑچول دے ناں تے انج دی پڑچول ساہمنے لیاندی اے جیہڑی ایس خالص سائنسی عمل دے نام اتے کالے سیاہ دھبے برابر اے۔

انج دی پرکھ پڑچول دی تازہ مثال مہینہ وار لہراں وچ چھپیا عارف عالمپوری صاحب دا اوہ مضمون اے جس وچ اوہناں مولوی غلام رسول عالمپوری بارے تن بھلاں دی دس پائی اے۔ایہہ تن بھلاں ایہہ نیں۔

١۔مولوی صاحب ذات دے گجر نہیں سن سگوں جلاہے سن۔
٢۔روشن علی مولوی صاحب دا مرشد اے۔
٣۔مولوی صاحب نے 15 ورھے دی عمر وچ شاعری شروع نہیں کیتی سگوں ایہہ اوہناں دی روحانی عمر سی جو کہ مرشد دا فیض ملن توں مگروں شروع ہوندی اے۔

عارف عالمپوری اپنی کیتی گئی پرکھ پڑچول لئی جو دلیلاں دے رہے نیں اوہ انج نیں۔

١۔اوہناں دے بھائی صاحب ڈنگر خریدن گئے اوتھے اوہناں نوں اک بندہ ملیا جس نیں دسیا کہ''پُتر میں اوس ویلے کوئی پندرہ سولاں سال دا ساں جس دن مولوی صاحب جیہڑے کہ قوم دے جلاہے سن فوت ہوئے۔۔۔۔۔۔۔۔۔۔''

ایہناں دلیلاں دی تفصیل وچ جائیے تے ہاسہ وی آؤندا اے تے رون وی۔۔۔مولوی صاحب کوئی اجہی ہستی نہیں جیہناں بارے ساڈے کول معتبر حوالیاں دی گھاٹ ہووے،اوہناں نوں گزریاں ایناں چر نہیں ہویا پئی وچکارلیاں گھنڈیاں گواچ جان، مولوی صاحب دی تیجی پیڑھی جیندی جاگدی اے تے اوس کولوں جا کے اوس دے ماپیاں دی قوم بارے پُچھیا جا سکدا اے، میرا خیال اے کوئی وی اولاد (پُت پوترے یا دوہترے) اپنے وڈھکیاں دی قوم بارے جھوٹھ نہیں بولن لگی۔مولوی ہوراں دے دوہترے صاحبزادہ مسعود نوں سب پنجابی پیارے جاندے نیں، جے عارف عالمپوری نہیں جان دے تاں میں ایڈریس لکھ دیناں اوہ اوہناں نوں مل لین تے اپنی پڑچول نوں ہور اگے ودھا لین، حیرانی دی گل ایہہ اے پئی فاضل پڑچولی نے سدھے ساہویں تے جیوندے حوالیاں نوں چھڈ کے داستاناں تے کہانیاں تے گزارہ کیتا اے۔صاحبزادہ مسعود دا ایڈریس انج اے

صاحبزادہ مسعود احمد
مولوی غلام رسول عالمپوری اکیڈمی،سیکنڈ فلور، رحیم سنٹر پریس مارکیٹ امیں پور بازار فیصل آباد
پڑچولی دی سوکھت لئی مولوی صاحب دے دوہترے دا موبائل نمبر وی دتا جاندا اے
00923457681542

٢۔۔عارف عالم پوری ہوراں دا کہنا اے پئی سید روشن علی مولوی صاحب دا شاگرد نہیں سگوں اوہناں دا مرشد اے، اپنی ایس پڑچول لئی اوہناں اوہی مجھاں دے وپار ویلے ملن والے بابے دا حوالہ دتا اے نال ای اوہناں اوہ شعر لکھے نیں جیہناں وچ مولوی ہوراں سید روشن علی نوں پیر کہہ کے مخاطب کیتا اے، لگدا اے عارف عالمپوری پنجاب وچ رہ کے وی ایتھے نہیں رہے، رہے ہوندے تے اینا تے پتہ ہونا سی پئی پنجاب وچ مقامی قوماں دے لوک (میری عام مراد غیر عربی نسل لوکاں توں اے) سیداں دی آل اولاد نوں اکثر پیر تے مرشد کہہ کے سد دے نیں۔ عارف عالم پوری ہوراں نوں پہلاں تے چاہیدا سی کہ اوہ مضموں لکھن توں پہلے سید روشن علی دے پوتے سید ضمیر شاہ نوں مل لیندے جیہڑے اج وی فورٹ عباس وچ جیوندے جاگدے نیں، تے جے اوہ پہلاں کھنج گئے نیں تے اجے وی ویلا اے، جا کے اپنے بھلیکھے دور کر لین۔سید ضمیر شاہ دے ہتھ دی لکھی اوس لکھت موجب جیہڑی اوہناں مولوی صاحب دے دوہتے صاحبزادہ مسعود احمد نوں آپ لکھ کے دتی، سید روشن علی مولوی صاحب دا مرید سی ، نکے ہوندیاں یتیم ہو گیا سی، اوہناں اوہنوں نکے ہوندے توں لے کے جوانی تکیر پالیا، فیر پٹھاناں ول اوس نوں ویاہیا مگروں اوہ مالوے جا وسیا، مولوی ہوراں نوں ملن دی چاہ رہنی، اوس اج آؤنداں کل آؤنداں آکھی جاناں ، صوفی شاعر نوں اپنے ازلی ادریویں دے وکھالے لئی بہانہ چاہیدا ہوندا اے سو مولوی ہوراں اوس دے نام چٹھیاں لکھ کے اپنا فلسفہ ہجر بیان کیتا۔ ہرکھ ایہہ ہے کہ ساڈے فاضل پڑچولی نے جیندیاں حوالیاں نوں چھڈ کے شعراں توں فرضی معنے کڈھن دا جتن کیتا اے تے سوادی گل اے پئی بڑی ڈھٹائی نال کیتا اے ۔جے عارف عالمپوری صاحب نوں جیندے حوالیاں تک پہنچن دی چاہت ہووے تاں سید ضمیر علی دا شہر فورٹ عباس دور تاں نہیں۔مینوں عطاء للہ عیسی خیلوی دا گایا ایہہ مصرع عارف صاحب دے حسبِ حال لگ رہیا اے ۔۔۔۔۔۔۔۔ انج پنڈ ی تے پشور لگا جاندا وے عیسی خیل دور تاں نہیں

٣۔عارف عالمپوری ہوراں دی پڑچول ایہہ ہے پئی مولوی ہوراں 15 ورھیاں دی عمر وچ شاعری شروع نہیں کیتی۔ایہہ جو دسیا جاندا اے کہ اوہناں 15 ورھے دی عمر وچ سنجیدہ ادبی کم نوں ہتھ پا لیا سی تے ایہہ اصل وچ اوہناں دی اوہ عمر سی جدوں اوہناں نوں مرشد توں فیض پائیاں 15 سال ہو چکے سن۔ایس پڑچول نوں ثابت کرن لئی اوہناں جو دلیلاں دتیاں نیں اوہناں نوں پڑھ کے ہاسا آؤن نوں کردا اے۔

عارف عالمپوری تے اوہناں دے پڑچولی استاداں نوں علم ہونا چاہیدا اے پئی کسے پرسدھ نظریے یا کھوج نوں رد کرن لئی ٹامک ٹوئیاں تے ٹیویاں نال گل نہیں بن دی، سگوں ٹھوس دلیل تے مضبوط حوالہ چاہیدا ہوندا اے۔جیویں یار لوکاں نے مولوی ہوراں دے مصرعے۔۔۔۔ کیہڑی کھس پٹوار جانی ۔۔توں سید روشن علی دے پٹواری ہون دی فال کڈھی سی (حالاں اوہ ساری عمر مسیت وچ امامت کراؤندے رہے ) انج ای عارف صاحب نے اوہناں دے اک شعر چوں اپنی مرضی دی پڑچول نوں چمکا لیا تے ایہی فتویٰ دے دتا پئی مولوی ہوراں دی ادبی زندگی دے مڈھ بارے جیہڑی ٥١ سال دی عمر دسی جاندی اے اوہ اصل وچ اوہناں دی مرشد دا فیض ملن توں مگروں دی عمر سی۔۔۔شعر انج اے

گزری ورھیاں پندرہ عمر میری اس روز
جاں بھریا وچ کاغذاں کڈھ دلے دا سوز

ہن سمجھ نہیں آؤندی پئی ایس شعر چوں کنج ایہہ ثابت ہوندا اے پئی کاغذاں وچ شاعری راہیں دلے داسوز بھرن سمے مولوی ہوراں نے جس پندراں سال دی عمر دا ذکر کیتا اے اوہ اوہناں طبعی عمر نہیں سی سگوں مرشد توں فیض ملن توں مگروں لنگھیا 15 سال دی ویلا سی۔ایہہ انج دی کاڈھ اے کہ جیویں دی میرا اک یار ہر ویلے کڈھن نوں تیار بیٹھا ہوندا اے۔اوس دا آکھنا اے پئی تسیں دنیا دا کوئی وی شعر پڑھو، میں تہانوں اوہدے چوں تصوف کڈھ دیاں گا۔

عالم پوری ہوراں دی پڑچول وی اج کل دیاں اوہناں یونیورسٹیاں دی پڑچول وانگ لگدی اے جہناں دے کئی ڈاکٹرز حضرات ایچ ای سی توں جعلسازی دے الزام ہیٹھاں اپنیاں ڈگریاں کھہوا بیٹھے نیں، تے جیہڑے بچے نیں اوہ وی اپنے ڈاکٹری مقالے پچھلیاں اندراں وچ لکو کے رکھ دے نیں پئی بُرے ویلے دا کوئی پتہ نہیں ہوندا۔

عارف عالمپوری نوں چاہیدا اے پئی اوہ پہلاں اپنے مطالعے نوں ودھاؤن، پڑچول دے مڈھلے اصولاں توں جانوں ہون تے ایس توں وی ودھ کے اپنے لکھے نوں دوجی وار اک واری گوہ نال پڑھ لین ، تن دی تھاں کئی بھلاں آپ ای اوہناں دے ساہمنے آ کھلون گیاں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels