Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> جیون کتھا: ینگ پیپلز فرنٹ دا چڑھا تے مُکا

جیون کتھا: ینگ پیپلز فرنٹ دا چڑھا تے مُکا

November 12th, 2008
ینگ پیپلز فرنٹ نوں لوکاں وچ اپڑاوان لئی اک سیمنار کیتا گیا جیس لئی بڑی تیاری ہوئی۔ اوس وچ اٹھ پرچے پڑھے جانے سن جیس وچ اک پرچہ میرے ذمے وی سی پر میرے کولوں لکھیا ہی نہ گیا تے عزیز الحق ہوریں بڑے ناراض ہوئے ایس گل تے۔ ایس تے غصہ کر کے اوہناں ایہہ وی کہیا جو لگدا کُجھ سنگیاں دے دماغ وچ کوئی عورت پھسی ہوئی اے، اوہ اوس توں نکل ہی نہیں سکے۔ اوہناں دی گل کنی سچ سی ایس بارے تے بوہتا کجھ نہیں کہیا جا سکدا پر ایہہ گل سچ ہے جو کجھ چر لئی لکھن وچ بڑا جھاکا لگدا سی۔

عزیز الحق دی عورت والی گل توں ہی یاد آیا جو میں جد ایم اے کر کے ویہلا پھر رہیا ساں، نوکری وی نہیں سی تے کھان پین نوں وی کجھ نہیں سی ہوندا۔ پنڈ وچ وی حال بھیڑے ہو رہے سن۔ساری زمین سیم ہوونا شروع ہو گئی سی تے آمدن بڑی گھٹ گئی سی سو مینوں گھروں کجھ نہیں سی ملدا۔ تے میں اک دن ڈاکٹر عزیز الحق دے پی سی ایس آر والے دفتر وچ گیا تے اوہناں دی کسے گل تے میں اوہناں تے چڑھ گیا۔ ''بھائی تیرے کول نوکری ہے، تنخواہ ملدی ہے، کار ہے تے اک بہت سوہنی بیوی ہے، تسیں انقلاب کر سکدے ہو، اسیں بھکھے کیہ کرئیے'' ۔

عزیز ہوریں بڑی تسلی نال سن دے رہے تے پھیر کہن لگے ''ہاں تہاڈی ایہہ گل تے ٹھیک ہے، ایہہ سب کجھ میرے کول ہے، تے تہاڈے کول وی آ سکدا ہے'' اوس توں بعد اوہناں سوکھ دی زندگی تے سماج نوں بدلن دی راہ پھڑن وچکار جو فرق دسیا، اوہ مینوں شرمندہ کرن لئی کافی سی۔ جیویں پہلے کِتے میں کہیا ہے جو ڈاکٹر عزیز الحق دی کاریگری سی جو تسیں کوئی گل کرو ، تسیں ایہہ کہیا جو میں درزی کولوں کپڑے سوان گیا ساں تے اوہ اوس نوں پھڑ کے گل مارکسی تے وجودیت دے چوکھٹے وچ رکھ دیندے سن۔ روز بروز دیاں عام واپریاں نوں نظریاتی چوکھٹے وچ رکھنا کوئی سوکھا کم نہیں ہوندا۔ پھیر خاص طور تے اوہناں لوکاں لئی جیہڑے آپ وی تھوڑے بوہتے جانو ہون۔

عزیز الحق نال اپنے ایس ڈائیلاگ توں اک ہور گل وی چیتے آگئی۔ یاد نہیں ٨٦ سی یا ٩٦، طارق علی خان لندن توں آئے تے اوہناں پنجاب یونیورسٹی وچ تقریر کیتی۔ اوہ اوس ویلے یورپ دے پڑھیار لیڈراں وچوں بڑے مشہور سن۔ جد اوہناں ساڈے نیو کیمپس دے مجمعے وچ تقریر مکائی تے ساڈے اک سنگی اعجاز نقوی سوال کرن لئی کھڑے ہو گئے۔ نقوی ہوریں ملتان دے سن تے ساڈے توں اک سال اگے سیاسیات دے پڑھیار سن ۔ اوہناں طارق علی خان نوں کہیا جو جناب تہاڈے تے ساڈے انقلاب وچ مُڈھلا فرق ہے، اسیں بھکھ مردے انقلابی بنے ہاں تے تہانوں انقلابی بناون لئی تہاڈے ماں پیو نے لکھاں پاؤنڈ خرچ کیتے ہین۔ (طارق علی خان، نواز مظہر علی خان، ویو پوائنٹ والے، تے طاہرہ مظہر علی دے پتر تے وڈے جاگیردار شوکت حیات دے بھانجے ہین، مطلب جاگیرداری ٹبر توں ہین)۔

سیمینار وچ عزیز الحق ہوراں آپ تے صرف اک یا دو مضمون پڑھے سن پر ہر مضمون وچ اوہناں دے وچاراں دا ہی پرچھاواں سی۔ اوہناں آپ جیہڑا سب توں وڈا مضمون پڑھیا سی اوہ ''پاکستان میں مظلوم قومیتوں کے بارے میں ہمارا موقف'' سی۔ ایہہ گل اوس ویلے تیکر پنجاب وچ کوئی نہیں سی کردا۔ پچھونہے وچاراں والے تے اک پاسے کھبے تے اگونہے وچاراں والے وی ایس نوں کفر سمجھدے سن۔ ایہہ گل میں پہلے دس ہٹیاں جو کیویں ایس مسئلے تے این ایس او وچ پاڑ پیا سی تے دو عزیزاں وچ وکھیواں ہویا سی۔

عزیز الحق دا نظریہ سی جو جد تیکر ظالم قومیت دے مزدور تے اگونہے لوک مظلوم قومیتاں دے پاکستان دی ریاست وچوں وکھ ہون دے حق نوں نہیں من دے تے مظلوم قومیتاں نوں رہبری نہیں دیندے اوناں چر ظالم قومیت دے لوکاں نوں وی ظالم نظام کولوں نجات نہیں مل سکدی۔ اوہ مارکس دا حوالہ وی دیندے سن جنہاں کہیا سی جو جد تیکر برطانیہ دا مزدور طبقہ آئرلینڈ دے لوکاں دے حق خو اختیاری نوں نہیں من دا اوس دی اپنی نجات وی نہیں ہونی۔

عزیز الحق دا ایہہ نظریہ پنجاب وچ اوہناں دی دین سی جیس نوں بعد وچ دوجیاں وی من لیا۔ ایس مسئلے تے عزیز الحق ہوریں عام چین پرستاں نالوں وی وکھ سن کیوں جے چین پاکستانی فوج دے مشرقی پاکستان وچ فوجی کاروائی تے چُپ سی تے کہیا جاندا سی جو اوہ ایس مسئلے تے پاکستان دی حمایت کر رہیا ہے۔ ایس لئی سارے چینیاں نوں رہبر منن والے گروپ وی چپ چپیتے سن تے اوس نوں فوج دی حمایت ہی سمجھیا جانا چاہیدا ہے۔ جے کوئی ظلم تے بولے وی نہ تے اوہ ظلم دا چُپیتا سانجھی ہی ہوندا ہے۔

عزیز الحق ہوراں دے قومیتاں دے مسئلے تے دعوے دے پچھے اوہناں دی ہردیال بینس نال سانجھی سوچ وی سی جنہاں نال اوہناں کینیڈا وچ کم کرنا شروع کیتا سی۔مرحوم ہردیال بینس وی قومیتاں دے مسئلے تے بڑا چانن رکھدے سن۔ اوہ کینیڈا دی کمیونسٹ پارٹی دے جنرل سیکرٹری ہوندیاں کینیڈا دیاں قومیتاں دے حق دا پرچار کردے سن تے اپنے دیس ہندوستان وچ وی دلی حکومت نوں حق مارو کہندے سن۔ اوہناں دا نظریہ سی جو ہندوستان کئیاں قوماں دا مُلک ہے تے اوس اندر وسدی ہر قوم نوں وکھرے ہوون دا حق ہے۔ عزیز الحق تے ہردیال ہوراں دے وچاراں دا چوکھا اثر سی تے اوہناں دی ہر روز گل کردے سن۔

ایس سیمینار دی واہوا دُھم پئی تے ینگ پیپلز فرنٹ دی جان پچھان ودھن لگ پئی سی۔ میں ساہیوال وچ این ایس ایف دے حبیب اللہ شاکر نال مل کے اک سٹڈی سرکل شروع کردتا سی۔ میں ہر ہفتے چھُٹی والے دن بس تے بہہ کے ساہیوال جاندا ساں تے اوتھے مُنڈیاں دے سٹڈی سرکل وچ اوہناں نوں مُڈھلی تعلیم دیون دی کوشش کردا ساں۔

پاکستان دیاں فوجاں دے آگو لفٹیننٹ جنرل عبداللہ خان نیازی نے مشرقی پاکستان وچ ہتھیار سٹ دتے تے ذوالفقار علی بھٹو پہلاں باقی بچے مُلک دے مارشل لاء ایڈمنسٹریٹر بنے، پھیر صدر تے اخیر وچ وزیر اعظم بن گئے۔ اوہناں دے حکومت وچ آون مگروں عزیز الحق ہوراں دی اگوائی وچ وائی پی ایف نے پیپلز پارٹی حکومت دی کُھل کے مخالفت شروع کردتی حالاں وائی پی ایف دے بوہتیاں لوکاں الیکشناں وچ پیپلز پارٹی نال رلتی کیتی سی۔ اوہناں ہی دناں وچ بھٹو صاحب نے فیصل آباد (جیہڑا اودوں لائل پور ہوندا سی) دے نڈر تے ان جھک لیڈر مختار رانا نوں جیل سٹوا دتا تے اوہناں دی قومی اسمبلی دی سیٹ وی مکا دتی۔ اوس سیٹ دے ضمنی الیکشناں وچ لوکاں اوہناں دی بھین زرینہ رانا نوں کھڑا کیتا۔

وائی پی ایف نے فیصلہ کیتا جو اوہ زرینہ رانا دی حمایت کرے گی تے لائل پور جا کے اوہناں دی چون مہم وچ حصہ پواوے گی۔ اخیر ہفتہ چھٹی تے میں تے ساہیوال سٹڈی سرکل لین چلا گیا پر جد میں مُڑیا تے شجاع الحق نے مینوں سویرے سویرے دسیا جو عزیز الحق ہوراں نوں رابعہ سُنبل دے خاوند سعید نے گولی مار دتی، اپنے آپ نوں گولی مار کے مار لیا تے رابعہ سُنبل چوکھی پھٹر ہو گیاں۔ پتہ لگا عزیز الحق ہوریں رابعہ سنبل تے کُجھ ہور سجن زرینہ رانا دے الیکشن لئی لائل پور گئے سن تے رات دیر نال پرتے۔ رابعہ سنبل شاید بوہتی دیر نال گھر نہیں سی جانا چاہندیاں تے عزیز الحق تے اوہ کار وچ ہی سوں گئے۔ جد گولی وجی تے عزیز الحق ہوریںڈرائیونگ سیٹ تے سن تے رابعہ سُنبل پچھلی سیٹ تے سن تے شاید ایس لئی بچ وی گیاں۔

ایہہ ہونی ورت گئی، تے وائی پی ایف نوں نال ہی مُکا گئی۔ مینوں کافی یقین ہے جو عزیز ہوراں دا رابعہ سنبل دے نال کوئی گجھا رشتہ نہیں سی۔ سگوں جدوں عزیز الحق ہوراں دی بیوی جمیلہ رابعہ سُنبل دی وجہ توں وٹردی سی تے اک واری عزیز الحق ہوراں کہیا سی ''ایس نوں میں کیویں سمجھاواں جو ایس دے مڑھکے نوں سنگھیاں بناں مینوں نیند وی نہیں آؤندی'' ظاہر گل ہے اوہناں دا مطلب سی جو اوہ جمیلہ توں وکھ ہور کسے عورت نال جنسی تعلق دا سوچ وی نہیں سکدے۔

عزیزالحق ہوریں رابعہ سنبل دے اُپرلے طبقے تے اوس دیاں خواباں بارے کافی جان دے سن۔ اک واری رابعہ سنبل تے گل ہو رہی سی تے پتہ نہیں کیہڑی گل تے عزیز الحق ہوراں کہیا جو رابعہ سنبل ایس طرحاں دی ہین جو اوہناں نوں شاہد محمود ندیم ورگا نوجوان پسند آ سکدا ہے۔ میرا نہیں خیال اودوں رابعہ سنبل دا شاہد محمود ندیم نال کوئی تعلق سی، یا سی تے عزیز نوں پتہ ہووے گا سانوں پتہ نہیں سی۔ پر جے واقعی اوس ویلے اہناں دا کوئی تعلق نہیں سی تے مننا پوے گا جو عزیز الحق دے اندر دور تائیں ویکھن دی بڑی طاقت سی۔اوہناں دی ایہہ طاقت اسیں روز ویکھدے ساں کیوں جو سیاست وچ ہوون والیاں واپریاں نوں پہلے ہی دس دیندے سن۔ سانوں ایہہ وی کہہ دیندے سن تہانوں فلانے دن یونیورسٹی ولوں چھٹی ہونی اے حالاں اجے ایہو جیہا کُجھ ہویا وی نہیں سی ہوندا جو اسیں یونیورسٹی دے بند ہوون دا سوچئیے۔

میرے خیال وچ عزیزالحق ہوراں دا رابعہ سنبل نال اک سیاسی ساک سی جیہڑا کہ اوہناں دے خاوند نوں ہضم نہیں سی ہوندا ۔ میں پہلے وی دسیا اوہناں (سعید، رابعہ سنبل دے خاوند) ایس واقعے توں بہت ہی پہلاں جدوں اجے وائی پی ایف بنیا وی نہیں سی مینوں تے نیر عباسی نوں دوپہرے غلط ویلے تے بوہا کھڑکاون تے بڑیاں گالھاں کڈھیاں سن۔ ایس پچھوکڑ وچ رابعہ سنبل نوں وائی پی ایف وچ کنا وڑنا یا نہیں وڑنا چاہیدا تے عزیز الحق ہوراں نوں اوہناں نوں اک وتھ تے رکھنا چاہیدا سی ایس بارے ہُن کیہ کہیا جاوے۔ پر عزیز الحق ہوراں دا ایہہ سٹائل نہیں سی، اوہ دنیاداری دے جھگڑے وچ نہ پین دی وجہ توں دنیا داری دے اہناں نکیاں نکیاں احتیاطاں دا وی نہیں سی سوچدے۔ اوہناں دا رنگ ایہہ سی، ''راہ جاندیاں جیہدی بانہہ پھڑ لئیے تے جن آکھ نہ سکئیے نہ'' تے پھیر اپنے خطرے لئی پچھاں نہیں ہٹیا جا سکدا۔

عزیز الحق ہوراں نوں کیہ قصور دیئے میں آپ وی ایس بارے وچ کدی حد نہیں کھچ سکیا۔ ایس لئی ساتھی زنانیاں نال میل جول تے اوہناں نال واہ ورتن کھلا ڈھلا رہیا۔ میرا یونیورسٹی وچ کسے کُڑی نال کدی کوئی جنسی تعلق نہیں رہیا تے پھیر وی میری شہرت خراب سی جو جیویں میں ہر دن گرل فرینڈ بدلنا ہاں۔ میرے ایسے ورتارے پاروں مینوں بہت ساریاں اوکھتاں جھلنیاں پیاں تے اخیر یونیورسٹی چھڈنی پئی۔ سب نوں ایہہ پتہ سی جو میرا اوس کڑی نال کوئی دور دا وی تعلق نہیں سی جیس دا دوش مینوں دتا گیا سی، پر اوہ تے سیاسی دشمناں دا کم ہوندا جو اپنے وردھی دے کچاں تے حملہ کرے۔ ایس لئی میں جاننا ہاں جو عزیز الحق وی وچارے سارے معاملے وچ نردوش سن، بس اوہ رابعہ سنبل دی وائی پی ایف وچ تھاں متھن وچ بھلیکھا کھا گئے۔

جد عزیز الحق ہوریں مار دتے گئے تے رابعہ سنبل نوں ہسپتال لے جایا گیا۔ وائی پی ایف دے کسے بندے نے اوہناں دی ہسپتال وچ پیروی نہیں کیتی۔ اوس دی اک وجہ تے ایہہ سی جو سارے عزیز الحق دی موت دا دوش رابعہ سنبل نوں دیندے سن، جو ایہہ سب پواڑا اوس دا پایا ہویا ہے۔ دوجے سارے آپ ہی ڈٹھے ہوئے سن تے تیجے جیویں میں پچھلی قسط وچ کہیا سی بوہتے بندیاں دا رشتہ صرف عزیز الحق نال سی، اوہناں دا آپو وچ کوئی ساک نہیں سی۔

خیر شاہد محمود ندیم نے رابعہ سنبل دی سنبھال کیتی تے بعد وچ اوہناں دا ویاہ ہو گیا۔ عزیز الحق دی کہی گل پوری ہو گئی۔ ویسے میرے خیال وچ شاہد محمود ندیم کدی ٹھکویں طور تے وائی پی ایف دی تنظیم وچ نہیں سن، کدی کدی آؤندے سن۔ خالد محبوب لڈو ہوریں کہندے ہن جو وائی پی ایف اک سٹدی سرکل سی تے اوس وچ آؤنا جانا کوئی پابندی نہیں سی۔ ایہہ اوہ کیوں کہندے ہین، مینوں پتہ نہیں پر گل انج نہیں سی جیویں اوہناں دے اپنے بعد دے ورتارے توں پتہ لگیا۔

جد عزیز الحق ہوریں نہ رہے تے اوہناں دے قائم کیتے خلیفے افتخار جالب وی غائب ہو گئے۔ اوس توں تھلے رابعہ سُنبل سن اوہ وی گئیاں تے لیڈر ہوگئے خالد محبوب لڈو ہوریں۔ اوہناں دی اگوائی بڑی سخت تے ڈکٹیٹراں والی سی۔ اوہناں ہولی ہولی بندے وائی پی ایف توں کڈھنے شروع کر دتے۔ ہمراز احسن دا کہنا ہے جو اوہناں نوں وی لڈو ہوراں کڈھیا سی۔اسیں چوکھا چر رہے تے اوہناں نال چلن دا جتن کردے رہے۔

اوہناں دی حکمی طبیعت تے اپنے تھاں تے سی۔ اوہناں دے وچار دی پدھر وی پیتلی سی تے عزیز الحق ورگے فلسفی توں بعد اوہناں دا منیا جانا انہونی گل سی۔ اوہ زاہد چوہدری کولوں صلاح لے کے آؤندے سن تے اوس نوں منواندے سن۔ مینوں اج تائیں سمجھ نہیں آئی جو اوہناں یک دم ہندوستان دے خلاف جھنڈا کیوں چُک لیا سی۔ سانوں حکم دتا گیا جو اسیں دھوتے ہتھ وچ پھڑ کے بازاراں وچ جا کے مجمع لائیے تے اوس وچ لوکاں نوں ہندوستان دے خلاف تیار کرئیے تے ہندوستان دے خلاف پمفلٹ ویچئیے۔

میری تے شجاع الحق دی ڈیوٹی لنڈا بازار وچ لگی۔ اسیں نیوکیمپس توں بساں بدلدے تے لنڈے بازار دے چوک وچ کھلو کے بالکل معجون ویچن والیاں وانگوں مجمع اکٹھاکردے، اوہناں دے سامنے ہندوستان دے خطرے انج دسدے جیویں کہ کل حملہ ہوون والا ہے۔ اوس توں بعد بساں وچ قصے ویچن والیاں وانگ پمفلٹ ویچدے تے کمائی لیا کے لڈو دے سامنے رکھ دیندے۔ ساڈے ساریاں وچوں شجاع الحق بوہتا کامیاب سی، اوس دی آواز لاؤڈ سپیکر وانگ سی تے اوہ جھکدا وی گھٹ سی۔ ایس لئی سب توں بوہتی کمائی اوہو کرکے لیاؤندا۔

کُجھ دیر تائیں تے ایہہ ہوندا رہیا پھیر میں بغاوت دا جھنڈہ چُک دتا۔ لڈو نے میرے اُتے چارج شیٹ لا کے مینوں کڈھن دا پربندھ کیتا۔ مظہر ترمذی وی آئی پی ایف دا ممبر سی، اوسنوں وی خاص طور تے چیچہ وطنی توں سدیا گیا تے رات اوسنوں لولو پوپو کر کے میرے خلاف تیار کیتا گیا۔ مینوں نہیں یاد ووٹنگ کیہ ہوئی سی پر میرے خلاف بوہتے ووٹ بھگتے تے میں وائی پی ایف توں باہر ہو گیا۔ واپسی تے مینوں عزت مجید نے یونیورسٹی چھڈیا کیوں جو اوہ وی اوہناں زمانیاں وچ وائی پی ایف دا ممبر سی۔ اوہ جد برطانیہ پڑھدا سی تے تدوں توں عزیز الحق دا منن والا سی۔ اوس وی ساڈے نال کافی کھجل خواری کیتی ہے۔

مُکدی گل ایہہ بئی میں باہر نکل گیا۔ وائی پی ایف وی کُجھ دناں وچ کِھلر پُلر گئی۔ وائی پی ایف دا یونیورسٹی والا گروپ وی میرے مگروں کجھ چر لڈو دی لیڈری وچ کم کردا رہیا پھیر اوہ وی تھک ہار کے بہہ گئے تے اک بالکل ہی وکھرا وارا شروع ہویا۔ اسیں مِل کے سنگت بنائی، نجم حسین سید ہوراں نوں یونیورسٹی سدیا۔ نجم ہوراں دے گھر کئیاں سالاں توں چلن والی سنگت دی نیہہ اسیں یونورسٹی وچ ہی رکھی سی۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels