Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> جیون کتھا: عشق لہر توں ہردم کتدا رہو

جیون کتھا: عشق لہر توں ہردم کتدا رہو

November 1st, 2008
یونیورسٹی دے اندر تنظیم بناون دی گل بات ساری پروفیسر عزیز الدین ہوراں نال ہی ہوندی جنہاں بارے میں دسیا ہے کہ اوہ بی اے آنرز دیاں کلاساں نوں روز پڑھاون آوندے تے پھیر میرے کمرے دا چکر لاوندے۔ پر اوہناں نال عزیزالحق ہوراں وانگ کوئی ذاتی گل نہیں سی ہوندی۔ اوہ اپنے یا اپنے گھر بارے کدے کوئی گل نہیں سی کردے۔ اوہناں اپنے گھر، دفتر تے سیاست نوں بڑیاں پکیاں کندھاں نال وکھ وکھ رکھیا ہویا سی۔ سنی دا سی جو اوہناں دا ویاہ ہویا ہویا ہے تے اوہناں دی گھر والی اک سدھارن عورت ہے جیہڑی پردہ کردی ہے۔ اسیں کئی سال ملدے رہے پر سانوں کدی اوہناں دی ذات یا ذاتی زندگی بارے پتہ نہیں لگا۔ ایہہ عزیز الحق ہوراں دے بالکل اُلٹ ماڈل سی۔ ایہہ گل بحث جوگ ہے جو اہناں وچوں کیہڑا ماڈل بہتر تے ہنڈن سار سی۔

عزیز الدین ہوراں دا پچھوکڑ وی وکھ سی۔ اوہ اسلامی جمعیت طلباء وچ رہے سن تے شاید لاہور ڈویژن دے جمیعت ولوں کوئی عہدیدار وی رہے سن۔ اوہناں دے بہت سارے سجن اوہناں تے ٹوک وی ماردے سن تے ماردے ہین جو اوہ اسلامی جمیعت طلباء وچ وی مذہبی سن تے سوشلسٹ ہو کے اک ہور طرحاں دے مذہبی ہو گئے پر اوہ سن مذہبی ڈھنگ دے ہی۔ ایہہ گل چنگی سی یاں بھیڑی ایہہ فیصلہ کرنا اوکھا ہے پر ایہہ مینوں یاد ہے جو اوہ اپنی جیکٹ دی جیب وچ ماؤزے تُنگ دی نکی کتاب رکھدے سن تے جے کوئی ساتھی غلطی کردا سی تے اوس نکی لال کتاب وچوں لوڑیدا حصہ پڑھ کے سنا دیندے سن۔ ( ایہہ نکی لال کتاب میں تریہہ چالیاں سالاں بعد چین وچ شنگھائی توں سو میل دور واٹر سٹی دے کباڑیاں کول ویکھی جیہڑے باہر آون والیاں نوں ایہہ سودا ویچدے ہین۔ چینی ماوزے تنگ نوں پیغمبری دا درجہ دیندے ہین پر اوہناں دیاں گلاں نوں گذرے ویلیاں دے قصے من کے گولدے نہیں ہین۔)

عزیز الدین ہوریں کجھ وی اپنی سرڑ دے پکے سن تے میرے نال روز تنظیم دے ودھا بارے گل کردے سن۔ یونیورسٹی وچ کھبی پڑھیار تنظیم بناونا سوکھا کم نہیں سی۔ پہلاں تے خیال سی جو نئے لوگ دے ترقی پسند دوست ہی تنظیم بناون وچ اگے اگے ہوون گے پر کجھ دناں بعد ایہہ گل صاف ہوگئی جو اوہ اینے جوگے نہیں سن۔ اوہناں دا جو رول لکھن پڑھن دا سی اوہ نباہ چکے سن تے اوسے پینترے تے چل رہے سن تے تنظیم دے ڈھانچے وچ ڈھلنا نہیں سن چاہندے۔ ایس لئی فیصلہ ایہو کیتا گیا جو نویں بندے لبھے جاون۔

جنہاں سجناں بعد وچ پڑھیار تنظیم نیشلسٹ سٹوڈنٹس آرگنائزیشن (این ایس او) اوہناں وچوں کئیاں دی کہانی بڑی دلچسپ ہے۔ اہناں سجناں وچ سب توں مڈھلے لوک شجاع الحق، فیاض باقر، عارف راجہ، چوہدری نذیر، امتیاز عالم، خالد محمود تے زمان خان سن۔ ہور وی اِکا دُکا ناں ہوون گے پر مڈھ اہناں لوکاں توں ہی بنیا۔

امتیاز عالم تے خالد محمود تے میرے ہوسٹل وچ رہندے سن، امتیاز عالم جرنلزم وچ سی تے خالد محمود پولیٹیکل سائنس وچ۔ دوہیں بہاول نگر توں آئے سن تے خوش باش بندے سن۔ مینوں یاد ہے تحریک وچ آون توں پہلاں امتیاز عالم روز نکر پاکے ہاکی کھیڈن جاندا ہوندا سی۔ خالد محمود وی شوقین بندہ سی، تحصیلدار دا پُتر سی تے ساڈے ساریاں وچوں اکلا سی جیس کول سکوٹر ہوندا سی۔ اہناں نال کیویں سنگت بنی تے ودھی کوئی بہتا یاد نہیں کیوں جو اسیں روز ہی ملدے تے اکٹھے ہوندے ساں۔

شجاع الحق، فیاض باقر تے عارف راجہ نوں لبھن دا عمل کافی خفیہ ایجنسیاں دی کاروائی وانگ سی۔ کسے نے مینوں دسیا جو ہوسٹل نمبر اک وچ بی اے آنرز دے دو منڈے اک مذہبی کتاب بارے بحث رہے سن۔ اک دا خیال سی ایس نوں پاڑ کے سُٹ دینا چاہیدا ہے تے دوجا کہندا سی ایس دی کیہ لوڑ ہے، کتاب ہے اسیں نہیں مندے ، رہوے یا نہ رہوے سانوں کیہ فرق پیندا ہے۔ میں اوہناں نوجواناں دے کمرے لبھ کے اوہناں نوں ملیا، اوہناں وچوں اک شجاع الحق سی تے دوجا فیاض باقر۔ میں دوہاں نوں کئیاں مِلنیاں وچ ایس گل تے لیاؤن دی کوشش کیتی جو ساڈا مسئلہ مذہبی نہیں یا مذہب نوں مکاونا نہیں ، ساڈا مسئلہ ظلم تے نا انصافی نوں دور کرنا ہے۔ خیر کجھ دناں وچ ایہہ سجن ساڈے پینترے تے آگئے۔

پھیر اک سجن دسیا جو پولیٹیکل سائنس دے بی اے آنرز پروگرام وچ اک منڈا آیا ہے جیہڑا کچھ وچ مارکس دی داس کیپیٹال لے کے پھردا ہے۔ میں اوس دا کمرہ نمبر پتہ کروایا تے اوس نوں ملن جا پجیا۔ ایہہ عارف راجہ سی۔ گل بات ہوئی، پتہ لگا راجہ صاحب داس کیپیٹال ہی کچھ وچ نہیں رکھدے ہر ویلے اسلحہ وی لے کے چلدے ہین تاں جو کسے ویلے وی مسلح انقلاب شروع کیتا جا سکے۔ اوہناں نال بڑیاں بحثاں توں بعد اسلحہ تھلے رکھوایا جو اجے ایس دی کوئی لوڑ نہیں۔ پر راجہ صاحب دا جدوں وی دا لگا اوہ اسلحے ول پرتدے ضرور سن۔

راجے ہوریں فوجی ٹبر وچوں سن تے پٹارو سندھ دے فوجی سکول وچ پڑھے ہوئے سن جتھے آصف علی زرداری وی پڑھیا ہے۔ راجے ہوریں سن 65 دی جنگ وچ وی کجھ کر چکے سن۔ اوہناں دے چاچے یا ماسڑ کوئٹہ وچ کرنیل سن تے اسیں اکواری چھٹیاں وچ اوہناں کول جا کے رہے وی ساں۔ کوئٹہ توں پنجاہ اک میل دور خانوزئی وچ اوہناں دے بھرا (ریاض ناں سی شاید) ڈنگراں دے ڈاکٹر سن، اسیں دوہیں اوہناں کول وی جا کے رہے تے اوتھے اک پختون ویاہ وچ وی گئے۔ ویاہ وچ باقی تے سب ٹھیک سی پر جدوں اوہناں لوٹیاں وچ پین دا پانی دتا میری بس ہوگئی۔ ساڈے ذہن وچ لوٹا وٹوانی لئی ہی ورتیا جا سکدا سی ، پر اوتھے ایہہ پانی داجگ سی۔۔۔

اہناں کہانیاں دا مطلب گذریاں ویلیاں نوں یاد کرنا وی ہے پر وڈا مقصد ایہہ دسنا ہے جو جدوں کسے تحریک لئی کوئی جتھہ یا کوئی ستھ بن دی ہے تے اوس وچ آٹو میٹک خبراں پڑھ کے لوک نہیں آجاندے۔ اک اک بندہ جوڑنا پیندا ہے تے اک اک بندے نوں تیار کرن لئی اوویں ہی جتن کرنے پیندے ہین جیویں نیانا پالنا۔ ساڈے تے وی ساڈے اگلیاں انج ہی لما چر لایا تے سانوں وی ایہہ لما چر لاؤنا پیا۔ پر کوئی وی جتھہ یا ستھ ہور کسے طرحاں نہیں بن دی۔ تسیں ویکھو جماعت اسلامی والے نکیاں جماعتاں وچوں منڈیاں کڑیاں نوں بھرتی کردے ہین تے اوہناں نوں کئیاں منزلاں توں گذار کے ممبر شپ دی آدر دیندے ہین۔ جماعت کیہ فوج توں ڈاکوواں تک نوں جتھے بندے لئی سارے وخت کرنے پیندے ہین۔

ایسے لئی سیاسی تحریک لئی جتھے بندی دے موڈھیاں وچ جدوں تیکر ایہو جیہے بندے نہ ہوون جیہڑے دن رات اک ہی خیال تے سدھر نال جاگدے سوندے ہوون، اوناں چر جتھے بندی نہیں ہوندی۔ ایہہ گل تے خیر ہر سیاسی جتھے بندی بارے صحیح ہے پر ترقی پسند کماں لئی تے ہور وی سرڑ دی لوڑ پیندی ہے کیوں جو اک تے بندے نوں پرانی ریت وچوں کڈھ کے بالکل نویں راہ تے لاونا ہوندا اے تے دوجا پاکستان ورگیاں ملکاں وچ ترقی پسندی دا کم ایس لئی وی اوکھا ہوندا ہے جو ریاست اوہناں نوں نہیں بخشدی۔ ایس لئی ویکھو یحییٰ خان دے مارشل لاء وچ صرف اسیں لوک جیل گئے تے فوجی ٹربیونلاں دے سامنے پیش ہوئے، جماعتیاں نوں کسے نے کجھ نہیں کہیا۔

خیر ساڈے نال جیہڑے سجن آ کے رلے اوہ پڑھائی وچ ہوشیار وی سن تے دلیر وی سن۔ اگونہے منڈیاں دا ایہہ پُور پڑھائی وچ کافی طاق سی، مثلاً عارف راجہ ایف ایس سی وچوں پورے بورڈ وچوں دوجے تیجے نمبر تے آیا سی۔ پر جیویں جیویں ویلا لنگھیا، تحریک دا سبھا بدلیا تے اخیر تحریک مکن دے کول آئی تے پھیر جیہڑے منڈے ساڈی کھبی پکھ نال جڑدے سن اوہ پڑھائی لکھائی وچ ماٹھے سن۔ کدی کدی ایہہ وی لگدا سی جو اوہ ساڈے نال صرف ڈنگ ٹپاؤن لئی آ رلے ہین ۔ پر پہلا پور بالکل وکھ سی۔

اگونہے پڑھیاراں دا ایہہ گروپ آپو وچ جڑ رہیا سی۔ اک دن عزیز الدین سرسری جیہی گل کیتی جو اک لاء کالج دا منڈا زمان خان وی ہے اوس نوں وی مل کے ویکھ لوو۔ میں اوہناں نوں ملیا، اوہناں نال باقیاں طرحاں نیڑتا تے نہ ہوئی پر اوہ وی این ایس او دے موڈھیاں وچ شامل سن۔ اصل وچ اوہ اولڈ کیمپس پڑھدے سن تے اوتھے ہی ہوسٹل وچ رہندے سن ، ایس لئی ساڈی ملنی بہتی نہیں سی ہوندی۔ پھیر اوہ اوتھے عزیز الدین ہوراں نوں بہتا ملدے سن کیوں جو عزیز الدین ہوریں پروفیسر تے انگریزی شعبے دے سن جیہڑا اوس ویلے اولڈ کیمپس وچ ہوندا سی۔

این ایس او بنن توں بعد وی عزیز الدین ہوراں دا اک گروپ اولڈ کیمپس وچ ہوندا سی جیس وچ طارق لطیف، طارق مسعود تے پروفیسر متیں ورگے بندے شامل سن۔ ایہہ وی تنظیم دا حصہ ہی سن پر ایس وچ پتہ نہیں کیہ حکمت سی جو عزیز الدین ہوراں کدی ایہہ کوشش نہیں کیتی سی جو طارق لطیف والا گروپ باقی دے این ایس او دے کور گروپ نال مل بیٹھے۔ طارق لطیف تے طارق مسعود ہوراں نال میری چنگی طرحاں ملاقات بہت بعد وچ ہوئی جدوں اوہ لاہور دی مزدور تحریک دے وڈے آگو بن چکے سن۔

اوسے ویلے لاہور وچ کوئی ہور چج دی پڑھیار تنظیم نہیں سی۔ این ایس ایف دے کجھ لوک سن پر اوہناں اک جتھے دے طور وجود دسدا نہیں سی۔روس نال جڑے گروپ (سی آر اسلم۔ عابد منٹو تے شمیم اشرف، پروفیسر امین مغل وغیرہ) دا وی گروپ سی جیس دا بعد وچ ناں پنجاب سٹوڈنٹس یونین (پنجسو) سی وی پڑھیار سیاست وچ کوئی رول نہیں کردا۔ پر اجے تیکر حیران ہونا جو عزیزین نے سانوں این ایس ایف بناون دا کیوں نہ کہیا کیوں جو اوس ویلے سندھ تے کراچی وچ این ایس ایف وڈھی پڑھیار ستھ سی تے اوہدی دھمک سنندی سی۔ روس نال جڑے گروپ نال تے چلو مڈھلا پاڑ سی جو عزیزین اوہناں نوں ترمیم پسند کہندے سن ، پر کراچی والا گرپ تے چین پرست ہی سی تے اوہناں نال کوئی مڈھلا اختلاف وی نہیں سی۔

پر اوس ویلے ساڈے گروپ وچ ہوا ایہو جیہی سی جو ساڈے توں پہلے والے ترقی پسنداں گھٹا چھانن توں وکھ کجھ نہیں کیتا۔ سگوں ایہہ کہیا جاندا سی جو اہناں قوم نال غداری کیتی ہے۔ ایس لئی سب کجھ نویں سرے توں کرنا ضروری ہے، نواں مڈھ بناونا ضروری ہے۔ نویں لوکاں نال گل کر کے پتہ لگدا ہے جو اوہ ریت جاری ہے۔ ہن والے نویں لوک ساڈی نسل تے اوہو اعتراض کردے ہین جیہڑے اسیں اپنے توں پہلیاں تے کردے ساں۔ ایس لئی ہر نویں تحریک دا پہلی نال کوئی خاص سانگا نہیں ہوندا۔

بہرحال جدوں تنظیم بناون دا فیصلہ ہو گیا تے پھیر پہلا اکٹھ لارنس گارڈن وچ کیتا گیا جس وچ ساڈے توں وکھ ہور گروپاں دیاں لوکاں نوں وی سدیا گیا۔ ایس وچ اقبال بالی وی شامل سن۔ کافی بحث ہوئی پر کوئی فیصلہ نہ ہو سکیا کیوں جو ایس وچ رنگا رنگ قسم دیاں صلاحواں آیاں۔ایس توں بعد ایہہ فیصلہ کیتا گیا جو اسیں اپنے کور گروپ نال ہی نویں تنظیم بناواں گے۔ اوس لئی اولڈ کیمپس وچ فائن آرٹس ڈیپارٹمنٹ دے سامنے مال روڈ دی کندھ دے دوجے پاسے اکٹھ کیتا گیا ۔ اوس وچ تنظیم دا فیصلہ کیتا گیا۔ اوس دا ناں نیشنلسٹ سٹوڈنٹس آرگنائزیشن رکھیا گیا۔ چھ ست نکاتی نکتیاں دا مینی فسٹو وی بنایا گیا۔ امتیاز عالم نوں چیف آرگنائزر بنایا گیا تے مینوں نیوکمپس دا آرگنائزر۔ بناون والے لوکاں وچ بہتے نیو کیپمس دے ہی سن تے اگلے کجھ سال بہتی کاروائی نیوکیمپس این ایس او دے وچاراں مطابق ہوندا رہیا۔

نیشنلسٹ سٹوڈنٹس آرگنائزیشن دے وچ نیشنلسٹ دا لفظ ایس لئی رکھیا گیا جو ساڈا وچار سی جو ساڈا مڈھلا کردار سامراج دی روک کرنا ہے کیوں جو ہر برائی دی جڑھ سامراج ہے تے ایس نوں ملک وچوں کڈھ دتا جاوے تے پاکستانی سماج وچ آپے انصاف تے سکھ چین آجاوے گا۔ اوہناں دناں وچ ویتنام تے ہور تھاں تے سامراج دے خلاف جنگ لڑی جا رہی سی تے ایس نوں سامنے رکھ کے ہی ایہہ ناں رکھیا گیا سی۔

اوہناں ہی دناں وچ نیوکیمپس دے سٹوڈنٹس ٹیچرز سنٹر وچ امریکی پڑھیاراں دے اک وفد دی آدر بھاء لئی اکٹھ ہویا۔ شاہد محمود ندیم اوس اکٹھ دی پردھانگی کر رہے سن۔ جد کاروائی شروع ہوئی تے میں تے زمان خان نے اٹھ کے سامراج دے خلاف نعرے مارنے شروع کردتے۔ ایہہ نیو کیمپس وچ امریکہ دے خلاف پہلے واری نعرے وجے سن۔ جماعت اسلامی دے ڈشکرے اٹھے سانوں تونی چاڑھن لئی کیوں جو اوہناں دناں وچ اوہ امریکہ دے لاڈلے سن تے امریکہ اوہناں دا۔ پر اوتھے کجھ فلسطینی پڑھیار وی سن۔ او ہ ساڈے پکھ وچ آگئے۔ اوہ گنتی وچ وی کافی سن تے انج وی بڑے ڈشکرے جسماں دے سن۔ظاہر گل ہے اسیں جماعتیاں دی پھینٹی کولوں بچ گئے۔شاہد ندیم نے پربندھک ہوون دے ناطے جماعتیاں دا ہی ساتھ دتا جیس لئی اسیں اوہدے بارے کافی شک شبے وچ پے گئے ساں۔بعد وچ اک واری جد شاہد ندیم نوں اک پڑھیار وفد دا آگو بنا کے مشرقی پاکستان بھیجیا جا رہیا سی اسیں وائس چانسلر علامہ علاؤالدین صدیقی نال احتجاج کیتا تے تڑی وی لادتی جو جے ایہہ وفد گیا تے نتیجے بھیڑے ہوون گے۔ میرا خیال ہے وفد روک لیا گیا سی !

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels