Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> جیون کتھا: یہی ہمارا جیونا ۔۔۔

جیون کتھا: یہی ہمارا جیونا ۔۔۔

October 12th, 2008

یونیورسٹی نالوں بہتا ویلا باہر عزیز الحق ہواراں نال گذرن لگ پیا سی۔ اوہ ایس سی کالج دے پچھے فیروز پور روڈ تے نہر دے پل دے نال پی سی ایس آئی آر لیبارٹریز وچ سرامک دے انجینئر سن۔ دفتر دا کم تے پتہ نہیں کنا اک کردے سن کیوں جو اوہناں کول سارا دن ساڈے ورگے لوک بیٹھے رہندے سن۔ اوہناں دے سائنسدان پیٹی بھرا وی اوہناں نال آکے نظریاتی بحثاں کردے رہندے سن۔

مینوں یاد ہے اک واری روزیاں دیاں دناں وچ میرے ساہمنے اوہناں دا اک افسر تے پیٹی بھرا اوہناں دے کمرے وچ آیا تے پچھن لگا عزیز روزہ رکھیا ای ظاہر گل ہے چاء دے برتن میز تے سن تے اوسنوں پتہ سی اسیں روزہ نہیں رکھیا ہویا۔ پھیر اوہ روزے دے وادھے دسن لگ پیا۔ عزیز دی عادت سی جو اوہ دوجے دی گل سنندے رہندے تے پھیر اک دم شیر وانگوں پبھ مار کے دلیل نوں پرتا دیندے۔ سو جد اوہ افسر گل مکا بیٹھا تے عزیز نے پچھیا روزہ ہے کیہہ؟

روزہ دن ویلے نہ کھان پین دا ناں ہے؟ روزہ تے میں وی رکھیا ہویا ہے پر عمر بھر دا۔ میں بازار جانا دل کردا بیوی لئی سونا کپڑے لواں، فرج لواں ہر شے لواں، پر میں روزہ رکھیا ہویا ہے اہناں شیواں نال تعلق نہ جوڑن دا۔

عزیز الحق ہوریں تصوف دے انقلاب دے، سچی تے بندیائی دی زندگی گذارن دے۔ میں اپنی زندگی وچ بہت گھٹ شاید دو بندے ہی ویکھے ہین جیہڑے جو کہندے سن اوہ سن وی اوہو کجھ۔ اوہ اپنے بیوی بچیاں ، بھیناں بھراواں، ماں پیو تے یاراں سجناں نال اک ہی سن۔ ایہہ میں ایس لئی جانناں کہ میں اوہناں دے نال بڑا چر لنگھایا تے اوہناں دے سارے ٹبر نوں اوہناں نال ملدا رہیاں۔

جنہاں دناں وچ میں اوہناں نوں ملیاں اوہ سمن آباد وچ اک کوٹھی دے اُپرلے حصے وچ کرائے تے رہندے سن۔ مکان دے مالک حبیب صاحب اوہناں دے یار سجن ہی سن۔ ڈاکٹر عزیزالحق دی گھر والی جمیلہ بہت سوہنی شکل دی زنانی سی تے پچھوں کھاندے پیندے گھر توں سی۔ جمیلہ ہوراں دے ماپے بہاولپور روڈ دی اک بہت ہی وڈھی کوٹھی وچ رہندے سن۔ عزیز ہوراں دے تن نیانے سن وڈھے دو منڈے شاہد تے.عاصم تے نکی کڑی عظمٰی سی۔کجھ سال پہلاں عمراں بعد جمیلہ ہوراں نال گل ہوئی تے پتہ لگا سی جو عاصم تے عظمٰی ٹورانٹو کینیڈا وچ ہین تے شاہد کتے خلیجی ریاست وچ۔

میں عزیز ہوراں دے سمن آباد والے گھر وچ بڑا ویلا لنگھایا۔ کئی واری رات دیر ہو جانی تے اوہناں کہنا ایتھے ہی سوں جا۔ سویرے ناشتے تے عزیز ہوریں بڑے رومانٹک موڈ وچ ہوندے۔ مینوں کہنا یار غالب دی فلانی غزل ذرا گا کے سنا۔ اوہناں نوں پتہ سی جو مینوں گاون دا شوق ہے۔ جد میں غالب گاوناں تے اوہناں اتے عاشقی موڈ سوار رہنا۔ اودوں کیہ اوہ اک عاشق سن، جہان دے، لوکاں دے ، اپنی بیوی دے عاشق۔۔۔ اوہناں دی سارا جیون ڈھنگ عاشق والا سی جیس فدا ہو جانا ہوندا ہے حیاتی دے مڈھلے سچ تے جو وی اوس نوں چمبڑ جاوے۔

کجھ ایہو جیہے جذبے اوہ منیر نیازی وچ وی ویکھدے سن تے اوہناں نال بڑی یاری نبھاوندے سن۔ اوہ عام طور تے شاعراں ول بہتا دھیان نہیں سن دیندے پر غالب دے بڑے عاشق سن تے منیر نیازی دی بڑی آدر کردے سن۔ اک واری منیر نیازی دی گھر والی بیمار ہوکے ہسپتال داخل سی۔ عزیز الحق ہوریں منیر ہوراں ول گئے تے اوہناں نوں لے کے ہسپتال گئے۔ منیر ہوراں آکھیا یار عزیز توں آگیا ہیں ہن میرا حوصلہ بن گیا ہے ہسپتال جاکے بیوی نوں ویکھن دا۔ پھیر عزیز ہوراں پھل فروٹ خریدیا تے لے کے ہسپتال گئے۔ منیر نیازی دی شاعری تے بہتی گل تے کدی نہیں ہوئی پر عزیز ہوریں کہندے سن جو منیر نیازی دی شاعری وچ جاگیرداری سماج دا خوف جن ڈیناں بن کے سامنے آوندا ہے۔

میں عزیز ہوراں نال اوہناں دے ماپیاں گھر وی جاندا رہندا ساں۔ اوہناں دے والد عبدالحق سی ناں شاید اوہناں دا بڑے ساؤ مٹھے تے درویش صفت بندے سن۔ اوہناں دی ماں دا تے مکھ ہی صاف شفاف نتریا ہویا تے روشن سی۔ اوہناں دی دکھ ہی انج دی سی جو اوہناں دے اندر ڈوہنگھ تے درویشی سی۔ عزیز ہوراں ایہہ صفتاں شاید کسے حد تائیں اپنے ماپیاں کولوں ہی لیاں سن۔ اوہ اوہناں نال وی انقلابی وچار دھارا دیاں گلاں انج ہی کردے سن جیویں باقی ساریاں نال۔ اوہناں دے ماں پیو وی اوہناں دی مانتا کردے سن۔ عزیز ہوراں دا اک بھرا اکرام الحق تے اوہناں دناں وچ جرمنی سی پر نکا بھرا بادشاہ (اصلی ناں انوارالحق سی ، مینوں یاد نہیں) ساڈے نال شامل سی تے شامل رہیا۔ اوہ سچی مچی بادشاہ طبعیت دا بندہ سی۔

عزیز ہوراں دے ماپے اک نکے سرمایہ دار سعید صاحب دی کوٹھی دے نال اک مکاں وچ رہندے سن۔ میرے خیال وچ اوہ مکان سعید صاحب نے ہی کرائے تے دتا ہویا سی۔ رابعہ سنبل اوہناں نال ویاہی ہوئی سی تے عزیز ہوراں دی وچار دھارا دے اثر وچ سی۔ عزیز ہوراں دی سعید صاحب نال وی دوستی سی پر اوہ رابعہ سنبل دے نویں وچار دھارا وچ رلتی ہون توں خوش نہیں سن۔اوس دا مینوں بڑا دکھانت والا ذاتی تجربہ وی ہویا۔
ہویا ایہہ جو میں اک ساتھن نیّر عباسی نوں اک دن سخر دوپہرے رکشے تے بٹھا کے رابعہ سنبل نال ملاون لئی لے کے گیا تاں جو اوہ اوہناں نال مل کے عورتاں وچ کم ودھا سکن۔نیّر عباسی ساڈے سیشن وچ ہی سی تے جرنلزم دی پڑھیار سی۔اسیں جدوں نیشلسٹ سٹوڈنٹس آرگنائزیشن اسار رہے ساں تے نیّر عباسی وی ساڈے نال شامل سی۔ نیّر عباسی اجکل ریڈیو پاکستان دی ڈپٹی ڈائیریکٹر ہے تے اوہناں دا گھر والا انور محمود انفارمیشن سیکرٹری تے جنرل مشرف دے نیڑے دے بندیاں وچوں ہے۔

خیر کجھ گھنٹیاں توں بعد رابعہ سنبل دے خاوند سعید صاحب باہر نکلے تے میری گل سندیاں ہی گل پے گئے۔ اوہناں سانوں سخر دوپہرے آون تے اوہناں نوں جگاون تے بڑا مندا بولیا۔ بڑی نموشی ہوئی، تے اسیں اوتھوں بڑے نراش ہو کے نیّر دے گھر دھرم پورے چلے گئے ۔ نیر دی ماں نے بڑا چنگا کھانا پکا کے کھوایا۔ نیر دی ماں دا کھانا کھان تے پھیر وی میں کئی واری گیا پر پھیر میں نیر نوں کسے نوں ملاون نہ لے جا سکیا۔ ہاں ایہہ سنیا جو رابعہ سنبل نوں جدوں پتہ لگا تے اوس سعید ہوراں نال پھڈا کیتا۔ پر ایہہ گل پکی سی جو دوہاں میاں بیوی دا عزیز الحق تے اوس دی وچاردھارا تے بڑا نکھیڑ سی۔جدوں ینگ پیپلز فرنٹ بنیا تے رابعہ سنبل اوس وچ شامل سی، سگوں اوس دے لیڈراں وچ منی جاندی سی۔

عزیز ہوریں باغبانپورے دے علاقے وچ اک سٹدی سرکل وچ چلاوندے سن جیس وچ اوس علاقے دے کجھ نوجوان سن جنہاں وچ خالد محمود لڈو وی سی۔ جدوں ینگ پیپلز فرنٹ بنیا تے اوس وچ سب توں وڈا گروپ اہناں نوجواناں دا سی۔ پر عجیب گل ہے جو عزیز الحق ہوراں دے مرن توں بعد میں خالد محمود لڈو توں بناں اوہناں جیاں وچوں کدی کسے نوں نہیں ویکھیا۔انج ہے جیویں اوہ اجیہے پھل سن جیہڑے عزیز دی چھاں وچ ہی کھڑے تے اوہناں دے مرن مگروں غائب ہو گئے۔

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels