Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> جیون کتھا: جالو جالو آگن جالو

جیون کتھا: جالو جالو آگن جالو

September 21st, 2008
5 / 5 (1 Votes)
اُنی سو اکہتر بڑا اوکھا ورھا سی۔ پاکستان دیاں فوجاں نے اپنے بنگالی بھرواں تے چڑھائی کیتی ہوئی سی، اوہناں دا گھان بچہ کوہلو کیتا جا رہیا سی، سوجھواناں سنے لکھاں بندے مار دتے گئے سن، زنانیاں نال جبر زنا کتیاں دی ہیڑھ وانگ کیتا جا رہیا سی تے بنگالی نسل بدلی دے جتن دیاں بڑھکاں ماریاں جا رہیاں سن۔

اُنی سو اکہتر دا ورھا بڑا نحس تے نکڑما سی جو نہ صرف بنگالیاں دا قتلام ہویا، ملک ٹٹا پر ایہہ وی ہویا دو پاکستان جمہوری طاقتاں توں وانجھیا گیا، جاگیرداری دیاں ویری، جاگیرداری توں آزاد بنگالی جمہوری طاقتاں جنہاں دی جدوجہد نال پاکستان بنیا سی تے پاکستان دے اندر انصاف تے برابری دی لہر مردی نہیں سی، وکھ ہو گئیاں۔ پاکستان اہناں طاقتاں دا ساتھ گوا بیٹھا تے اج تیک جمہوریت تے انصاف لئی ہتھ پیر مار رہیا ہے پر گل نہیں بن رہی۔ بنگالیاں دی جدوجہد نال ایوب خان تے یحییٰ خان گئے سن تے اوہناں دے صدقے ای بھٹو تخت تے بیٹھا سی۔

ایس بھیڑے ورھے وچ جنگ ملک ای نہیں ترقی پسند جتھیاں نوں وی ٹوٹے ٹوٹے کر گئی۔ فوجی کاروائی دا ساتھ دیون تے مخالفت کرن والیاں وچ جیہڑا پاڑ پے گیا اوہ فیر نہ پُوریا گیا۔ پنجاب دی پڑھیار لہر ایسی ٹٹی جو فیر نہ جُڑی۔

ایہہ ورھا ساڈے ورگے بنگالیاں دے حامی گھٹ گنتی دیاں لوکاں لئی اوکھا سی کیوں جو پنجاب وچ جھوٹھے دیس پیار دی لال ہنیری جھلی ہوئی سی، ہر پاسیوں آوازاں آ رہیاں سن ''سانوں بنگالی نہیں بنگال چاہیدا ہے۔'' تے ٹکا خان ایہہ نعرہ مار کے ڈھاکے میدان وچ لتھا ہویا سی۔ ایہہ انج دا ہی سماں سی جیویں امریکہ وچ عراق دی جنگ دے شروع وچ سی، جدوں امریکی عراقیاں نوں فتح کرن دے نشے وچ دُھت سن، کسے نوں نہ سچ دسدا سی تے نہ سُندا سی۔ ہر تھاں ہر ویلے دیس پیار دی جھوٹھی ہنیری لوکاں نوں انھیاں بولیاں کر دیندی ہے۔ پنجابی تے اردو والے ایس ہنیری نال ڈور بھورے ہو گئے ہوئے سن اوس ویلے۔

پنجاب وچ ینگ پیپلز فرنٹ، روس دے حامی کجھ گروپ تے مزدور کسان پارٹی دے کجھ حصے فوج دی مخالفت تے بنگالیاں دی آزادی دی جدوجہد دے حامی سن۔ پیپلز پارٹی تے چین نواز بوہتے گروپ فوجی کاروائی دے حامی سن۔ میں تے راجہ انور تے کجھ ہور سجن یونیورسٹی نیو کیمپس دے کیفے ٹیریا وچ بیٹھے اپنے آپ وچ سڑدے، کھجھدے رہندے ساں، کر کجھ نہیں ساں سکدے! ساڈی میز تے ساڈا مجلسیا عمر جنگ دا نقشہ لے کے بیٹھا دس رہیا ہوندا سی اج کیہڑا کیہڑا شہر فتح ہو گیا۔ جیس دن پاکستانی فوج دے غازی نیازی نے ہتھیار سُٹے اوس دن عمر دے نقشے تے ساڈیاں فوجاں کلکتہ دلی دے نیڑے تیڑے سن۔ ایہہ سی 1971 دی کالی رات!

سانوں سمجھ نہیں سی آؤندی اسیں دنیا نوں کیہ منہ وکھایئے۔ پنجاب یونیورسٹی وچ اپنے پڑھیار بنگالی سجناں نوں کیہ کہیئے جیہڑے اوکھے سوکھے ویلے ساڈی ترقی پسند پڑھیار ستھ دا اسلامی جمعیت طلبہ دے خلاف سدا ساتھ دیندے سن۔ اوہ کوئی سٹھ ستر بنگالی پڑھیار ایکسچینج پروگرام وچ پنجاب یونیورسٹی وچ پڑھدے سن، جد یونیورسٹی الیکشن آؤندا تے اوہ ترقی پسند پینل دے حق وچ جلوس کڈھدے تے نعرے ماردے ''جالو جالو آگن جالو''۔ ایس لڑائی وچ فلسطینی پڑھیار وی ساڈے موڈھے نال موڈھا جوڑ کھلوندے۔

اوہناں دناں وچ جماعت اسلامی تے اسلامی جمعیت طلبہ امریکہ نال پیار کردیاں سن تے پاکستان نوں سوشلسٹاں دا انڈونیشیا بناون دیاں دھمکیاں دیندیاں سن۔ رب جاندا ہے اوہناں نوں پتہ ہووے گا جو سی آئی اے پاکستان وچ انڈونیشیا طرحاں کم کر رہی سی یاں نہیں۔ پر ایہہ پکی گل ہے جو جماعتیئے بنگالیاں یاں فلسطینیاں نوں بوہتا پسند نہیں سن کردے تے ایسے لئی فلسطینی وی ساڈا ہی ساتھ دیندے۔

پنجاب وچ پڑھیار تحریک ڈاکٹر عزیز الحق تے پروفیسر عزیز الدین دے جتناں نال اوہناں دے آلے دوالے نِسری سی۔ ایس مقصد لئی نیشنلسٹ سٹوڈنٹس آرگنائزیشن (این ایس او) ناں دی ستھ 1968 وچ بننی شروع ہوئی سی تے چھیتی ای پنجاب یونیورسٹی تے لہور دے دوجے سِکھیا اداریاں وچ اگوائی کرن لگ پئی سی۔ اوہناں دناں وچ سندھ تے کراچی وچ نیشنل سٹوڈنٹس فیڈریشن (این ایس ایف) دا زور سی پر اوہدا لہور یاں پنجاب وچ بوہتا اثر نہیں سی۔ لہور تے پنجاب وچ این ایس او بڑی چھیتی زور پھڑ گئی سی تے اسلامی جمعیت طلبہ دا ڈٹ کے مقابلہ کرن لگ پئی سی۔

پر ایہہ ساری جُڑت چڑھدے بنگال وچ فوجی کاروائی تے وکھیویں دے پاروں ٹٹ بھج گئی۔ ڈاکٹر عزیز الحق تے پروفیسر عزیز الدین دے وچکار اخیری مناظرہ پروفیسر اعجازالحسن دے گھر ہویا جیہڑے مشہور آرٹسٹ نیں تے ڈیلی ٹائمز وچ کالم وی لکھدے نیں۔ ایہہ مناظرہ بڑا ڈرامہ سی۔ دوہیں پاسے مناظرے والے مولویاں طرحاں کتاباں لے کے آئے سن تے دوہاں دے نائب ورقے کھول کھول پھڑا رہے سن۔ مناظرے وچوں کیہ نکلنا سی؟ این ایس او ٹٹ گئی تے اوس دے بوہتے موڈھی چھڈ کے ینگ پیپلز فرنٹ ہیٹھ کم کرن لگ پئے جیہدے اگوائی ڈاکٹر عزیز الحق کردے سن۔

ایہہ مان ڈاکٹر عزیزالحق دا ہی ہے جو اوہ پہلے پنجابی سوجھوان سن جنہاں اپنے نامور پمفلٹ ''قومیتوں کا مسئلہ'' وچ مظلوم قومیتاں دا نظریہ پیش کیتا سی۔ ایس نویں راہ کھولن والے نظریئے وچ اوہناں کہیا سی جو غالب قومیت (پنجاب کراچی) دے لوک جناں چر مظلوم قومیتاں (سندھ، بلوچستان، سرحد) دی اگوائی من کے اوہناں دے نال کھڑے نہیں ہوون گے، ظلم تے جبر توں اوہناں دی وی جان نہیں چھٹ سکدی۔

ڈاکٹر عزیزالحق دی دلیل سی جو اوس ویلے تیکر پاکستان دے ڈھانچے دے اندر جو کجھ نکیاں موٹیاں چنگیاں بدلیاں آئیاں ہین اوہ مسلمان بنگالیاں دی جدوجہد نال آئیاں ہین۔ اوہناں دا کہنا سی جو ایوب خان لہندے پاکستان دی پتلی جہی پڑھیار لہر نال نہیں سی گیا، اوہ مسلمان بنگالیاں دے دباء نال نسن تے مجبور ہویا سی۔

ڈاکٹر عزیزالحق دا نظریہ سی جو مسلمان بنگالیاں ہندو جاگیردار توں جان چھڈان لئی پاکستان بنایا سی تے پاکستان وچ وی جمہوریت دے اوہو ای پکے سچے راکھے ہین۔ مسلمان بنگالیاں دا ساتھ گوا کے لہندے پنجاب دے لوک جمہوریت دی جنگ وچ اکلے ہو گئے ہین۔ اوہ اجے وی جمہوریت سانبھن جوگے نہیں۔ جیہڑا پاڑ مسلمان بنگالیاں چھڈیا سی اوہ چھتیاں ورھیاں وچ بھریا نہیں گیا۔

پر ایس گل دا اودوں پتہ لگا جدوں بوہت کویل ہو گئی سی۔ بنگلہ دیش بنن توں مگروں فوجی کاروائی دی حمایت کرن والے بوہت سارے سوجھوان بوہت پچھتائے تے اپنی سیدھ وی ٹھیک کر لئی پر جد چڑیاں چُگ گئیاں کھیت تے فیر کیہ ہونا اے؟ پاکستان وی ٹٹ چکیا سی تے ترقی پسند ستھاں وی کھلر پُلر گئیاں سن۔ بنگالی پڑھیار واپس بنگلہ دیش پرت گئے تے مگروں فلسطینی پڑھیار وی ضیاء الحق دی مہربانی نال چلے گئے۔ پنجاب یونیورسٹی جماعت اسلامی تے جمعیت دی جاگیر بن گئی۔

پنجاب تے کراچی دے ترقی پسند لوکاں نوں مت اوس ویلے آئی جدوں اوس دا فائدہ کوئی نہیں سی۔ بنگلہ دیش دا بننا مسلمان بنگالیاں لئی تے خورے چنگا ای سی پر مسلمان بنگالی جیہڑا خلا چھڈ گئے اوہنوں ہور کوئی پُور نہیں سکدا۔ سندھی تے بلوچی قوم پرست ایس پاڑ نوں پُورن دے جتناں وچ ہین پر اوہ بوہت نکے تے گھٹ زورے ہین۔

پاکستان دے لوکاں نے تے چڑھدے پاکستان دے وکھ ہوون توں کوئی سبق لیا ہووے پر پاکستانی ریاست نے نہیں۔ اوہ اجے وی بلوچستان تے سندھ دا فوجی حل کڈھ رہے ہین۔ اوہناں دا خیال ہے کہ پاکستان دے اجوکے جغرافیے وچ بلوچ تے سندھی اپنا مقصد حل نہیں کر سکدے۔ اوہ اجے وی بھلیکھیاں وچ جیوندے نیں۔

پنجاب تے دوجیاں غالب قومیتاں دے لوک جابر نظام کولوں سیاسی، سماجی تے معاشی آزادی حاصل نہیں کر سکدے جد تیکر اوہ بلوچستان تے سندھ دیاں مظلوم قومیتاں دی اگوائی من کے اوہناں دے حق وچ آواز نہیں لاؤندے۔ ڈاکٹر عزیز الحق دا ایہہ قوم پتھر تے لیک ہے۔

میں اک واری اک ریٹائرڈ سینیٹر نوں پچھیا جو سینٹ وچ کیہڑے لوک سبھ توں ودھ عام لوکاں دی گل کردے سن۔ اوس آکھیا صرف بلوچی سینیٹر عام لوکاں دے مسئلیاں تے چانن پاؤندے سن۔ مینوں وی کوئی حیرانی نہیں ہوئی تے کسے ہور نوں وی نہیں ہونی چاہیدی۔۔۔

میریاں کناں وچ اج وی بنگالی پڑھیاراں دے ''جالو جالو آگن جالو دے نعرے گونج رہے ہین۔''

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels