Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> ڈاکٹرپرویز ہُود بھائی دی ہڈ بیتی،آپدی زبانی (چھویں اتے اخیری لڑی)

ڈاکٹرپرویز ہُود بھائی دی ہڈ بیتی،آپدی زبانی (چھویں اتے اخیری لڑی)

پرویز ہود بھائی، پنجابی روپ۔وچار
September 3rd, 2017

جتھے تک ڈاکٹر عبدالسلام دا ذکر ہے، ہاں! میں انہاں نوں فقط ملیاہی نہیں سگوں میں انہاں نوں چنگی طراں نال جاندا وی ساں۔ ایہہ گل بالکل درست ہے کہ انہاں دی کہانی المناک ہے۔ فزکس دے علاوہ انہاں دی پہلی وفاداری ’’تحریک احمدیہ‘‘ دے نال سی تے انہاں دی ثانوی وفاداری پاکستان دے نال سی۔ ایہہ تِنوں وفاداریاں بہر حال چنگیاں نہیں رہیاں۔ ایہہ گل پہلے دن توں صاف سی کہ اوہ نہایت منفرد صلاحیتاں دے مالک انسان سن۔ شروع شروع وچ اوہ بالکل لبرل بندے سن۔ مینوں دسیا گیا ہے کہ اوہ شراب وی پِیندے سن تے خوبصورت عورتاں دے شیدائی وی سن۔ فیر جدوں انہاں نوں اک خاص سطح دا مقام مل گیا تے مغرب وچ انہاں دی عزت بہت زیادہ ودھ گئی۔ ایتھوں تک کہ ہلے انہاں نوں 1974 تک تے نوبل پرائز وی نہیں ملیا سی تے عالم ایہہ سی کہ کئی ملکاں دے وزرائے اعظم انہاں نال ملن دی آرزو رکھدے سن۔ ایہہ 1974 دی گل ہے جدوں اوہ اچانک اک ایہو جہے شخص توں جو کہ مذہبی مزاج نہیں رکھدا سی، اک ایہو جہے شخص وچ تبدیل ہوئے جو تیز رفتاری دے نال مذہب وچ پھسدا جارہیا سی، تے اینج بالاخروہ ’’تحریک احمدیہ‘‘ دے اک انتہائی دقیا نوسی قسم دے سپاہی بن کے رہ گئے۔ چیتے رہے پئی اوہ سال وی تے 1974 ہی ہے جدوں بھٹو نے احمدیاں نوں غیر مسلم قرار دے دتا سی۔ میری ملاقات انہاں نال دس سال بعد ہوئی تے ایہہ ملاقات فزکس دی وجہ توں نہیں ہوئی ۔اک وار جدوں میں اٹلی سیر دے لئی گیا تے انہاں نے میرے نال ملن دی خواہش ظاہر کیتی۔ دراصل انہاں نے میرا آرٹیکل پڑ لتا سی، جس دا عنوان سی ’’سائنس اینڈ اسلام‘‘۔ ایس دے بعد ساڈے چنگے تعلقات بن گئے جو دس سال تک قائم رہے۔ ایتھوں تک کہ اک آرٹیکل اساں رل کے وی لکھیا جو بعد وچ اک کتاب دا دیباچہ بنادتا گیا۔ اوہ اک المناک بندے ایس لئی وی سن کہ اوہ پاکستان دے نال بہت زیادہ دلچسپی رکھدے سن۔ انہاں نوں پاکستان نال بے پناہ محبت سی پر پاکستان نے انہاں نوں مسترد کردتا کیونکہ اوہ احمدی سن۔ میں تے ایہہ آکھاں گا کہ اوہ زیادہ پیچیدہ انسان سن۔ میں ایہہ وی تہانوں دسنا چاہواں گا کہ ایہہ پیچیدگی ایس وجہ توں وی انہاں وچ آوڑی سی کہ اوہ ایٹم بم بنان والے لوکاں وچ بنیادی حیثیت رکھدے سن۔ 1972 وچ جدوں بھٹو نے سارے سائنسداناں نوں ملتان بلایا تے اوہ ایس میٹنگ دے رُوحِ رواں سن۔ انہاں سائنسداناں نوں آکھیا گیا کہ اوہ نیوکلئیر دھماکے دے معاملے دی باریکیاں تے غور کرن۔ پر 1974 وچ یعنی دوسال بعد انہاں نوں ایس پورے پراجیکٹ توں یکدم وکھرا کردتا گیا سی۔ پراجیکٹ بہت اگے تک نہ جاسکیا پر بہر حال اوہ یٹم بم بنان دے تصور دے حمایتی سن۔ دیانتدارانہ رائے دا اظہار کراں تے ڈاکٹر عبدالسلام غیر جانبدار نسان نہیں سن۔ اوہ احمدیاں دی حمایت کردے سن۔ اوہ چاہندے سن کہ احمدی طاقت وچ آجان۔ انہاں نے ایہہ وی محسوس کرلتا سی کہ پاکستان نوں بھارت دے مقابلے وچ کھڑا ہونا پئے گا۔ ہندواں توں انہاں نوں خاصا تعصب سی۔ پر اک ہور معنی وچ اوہ کھلے ذہن دے وی سن۔ انہاں نے کئی وار ہندوستان دا سفر کیتا تے بعد وچ تے خیر جدوں اوہ اپنے آپ نوں پاکستان ولوں دھتکاریا ہویا محسوس کردے سن تے انڈیا دے بارے وچ انہاں دے خیالات بدل وی گئے سن۔ آخری مرتبہ جدوں میں انہاں نوں ویکھیا تے اوہ بے حد ناخوش سن تے رورہے سن۔ اک مرتبہ کسی تقریب وچ اک طالب علم انہاں دے کول آیا تے انہاں نوں دسن لگا کہ اوہ انہاں تے کینا زیادہ فخر کردا ہے۔ اوہ وہیل چیئرتے سن۔ اوہ بُری طراں بے قابو ہوکے رون لگا۔ انہاں نوں ایس حال وچ ویکھنا خاصا افسوسناک سی۔ جدوں اوہ فوت ہوئے تے کوئی اک پاکستانی افسر وی انہاں دی اخیری رسوماں وچ رلتی نہ ہویا۔ اخبار وچ وی اک وار چھوٹا جیہا نوٹ شائع ہویا سی، بس۔
ایہہ سب کجھ انہاں دے نال ہویا حلانکہ ایس وچ کوئی شک نہیں کہ اوہ پاکستان دے نال جذباتی طور نال جڑے سن تے انہاں نے ’’ایٹامک انرجی کمشن آف پاکستان‘‘ دی نیہہ رکھی سی۔ میں تہانوں عبدالسلام دی کہانی سناندا ہاں، جیہڑی ایہہ وکھاندی ہے کہ عبدالسلام دے نال پاکستان وچ کیہ سلوک کیتا جاندا رہیا۔ جدوں اوہ فوت ہوئے تے میں پاکستان ٹیلی ویژن دی اک ڈائریکٹر ’’رعنا شیخ‘‘ نال ملیا تے میں انہاں نوں آکھیا کہ میں عبدالسلام تے اک ڈاکومینٹری بنانا چاہندا ہاں۔ اوہ متفق ہوگئیاں۔ اوہ اک لبرل زنانی سی۔ اسی اک ٹیم بنائی تے جھنگ لئی روانہ ہوگئے، جتھے سَلام پیدا ہوئے سن۔ اسی اوتھوں کافی معلومات اکٹھی کیتیاں۔ واپس آکے اسی انہاں دے بی بی سی ٹی وی دے انٹرویوز وی جمع کیتے۔ انہاں وچ اک اوہ وی سی جیہڑا میں 1988 وچ کیتا سی۔ خیر! جدوں اسی سب کجھ جمع کرلیا تے مینوں اک ہفتے لئی اسلام آباد توں کتھے باہر جانا پیا۔ میں اوہ سارا مواد اک پرڈیوسر نوں دتا، جیہڑا پی ٹی وی میرے نال مقرر کر رکھیا سی تے میں ایس نوں آکھیا کہ میرے آن تک انتظار کرن۔ میں محسوس کرچکیا سی کہ اوہ پرڈیوسر ایس کم توں خوش نہیں سی۔ ایس لئی میں خاص طور تے ایس نوں ہدایت کیتی کہ میرے آن تک مواد دے نال کوئی چھیڑ خانی نہ کرے۔ جدوں میں واپس آیا تے ایہہ جان کے مینوں حیرت ہوئی کہ اوس نے ڈاکو منٹری مکمل وی کرلئی سی تے جو کجھ بنایا سی اوہ ساڈے پلان توں ہٹ کے سی۔ میں رعنا شیخ نوں شکایت کیتی تے تے انہاں نے آکھیا کہ ایس نے تے ہن سارا مواد ضائع کردتا ہے۔
میں جاندا ہاں کہ اوس پرڈیوسر نے اوہ سارا مواد جان بجھ کے ضائع کیتا سی۔ تعصب دا ایہہ مقام ہے جیہڑا سانوں اپنے ملک وچ سہنا پیندا ہے۔
میں اپنے بڑے نامکمل خواباں ول ویکھدا ہاں تے مایوسی ہون لگدی ہے۔ ہن جو میں کرنا چاہندا ہاں اوہ فزکس دے اک بالکل الگ شعبہ جس نوں ’’سُپر سڑنگ تھیوری‘‘ کہندے نیں نوں سمجھن دی کوشش ہے۔
جتھوں تک میری زندگی دے دوجے معاملیاں دا تعلق ہے، میں نہیں سمجھدا کہ میں کجھ خاص کم کیتا ہے، بس ایہو نِکی موٹی چیزاں ہی نیں، ایدھر اودھر دیاں۔ ہا ں جے مینوں کسی کم تے فخر ہے کہ میں کیتا ہے تے اوہ قائداعظم یونیورسٹی دی زمین لئی لڑائی ہے۔ جو ایہہ لوک، یونیورسٹی دے پروفیسراں تے ایم ین ایز وچ ونڈ رہے سن۔ میں ایہہ جنگ دوسال لڑی تے تے آخر وچ میں بالکل تھک گیا۔ اک وقت ایسا آیا جدوں لوک میرے تے غصہ سن ، پتھر سٹدے، کھڑکیاں توڑدے اتے دھمکیاں دیندے سن۔ آخر کار اک وڈی ہڑتال ہوئی تے یونیورسٹی نوں اک پورے سمسٹر لئی بند کردتا گیا۔ سانوں عدالت وچ جانا پیا تے اوتھے اسی کیس جِیت لیا تے یونیورسٹی دی زمین بچا لئی۔ ایہہ واحد کامیابی ہے جس تے مینوں فخر ہے۔
نوٹ: پرویز ہود بھائی دا ایہہ ہڈ بیتی انگریزی وچ سوال تے جواب تے مشتمل اک انٹرویو ہے جس نوں آردو وچ آرٹکل بنا کے چھاپے چاڑیا گیا سی تے انگریزی نوں ویکھدے ہوئے ایس نوں وچار لئی پنجابی روپ دتا گیا۔سند لئی اصل انگریزی والی لکھت ہی سامنے رہے گی۔
 Limk of Part 5
http://www.wichaar.com/news/281/ARTICLE/33360/2017-08-01.html
Link of Part 4
http://www.wichaar.com/news/281/ARTICLE/33322/2017-07-18.html
Link of part 3
http://www.wichaar.com/news/281/ARTICLE/33246/2017-07-01.html
Link of part 2
http://www.wichaar.com/news/281/ARTICLE/33236/2017-06-29.html
Link of First Part
http://www.wichaar.com/news/281/ARTICLE/33227/2017-06-26.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels