Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> ڈاکٹرپرویز ہُود بھائی دی ہڈ بیتی،آپدی زبانی (پنجویں لڑی)

ڈاکٹرپرویز ہُود بھائی دی ہڈ بیتی،آپدی زبانی (پنجویں لڑی)

وچار ڈیسک
August 1st, 2017

میں فیصلہ کیتا کہ ہن مینوں پِنڈ پِنڈ جان دی بجائے اپنا کم ’’بول‘‘ تے لِکھ کے کرنا ہوئے گا۔ تہانوں یاد ہوئے گا میں اقبال احمد دا ذکر کیتا سی میری(پہلی) بیوی اقبال احمد دی بھتیجی سی۔(اجکل ہود بھائی ہوراں اپنی دوجی بیوی نال رہندے نیں تے ہاجرہ بی بی وکھری رہندی ہے) جدوں اقبال احمد فوت ہوئے تے اسی دونوں بُہت بری طراں صدمے دا شکار ہوگئے ساں۔ اسی دوناں یعنی میرے تے میری بیوی دے اک ورگے سیاسی نظریات سن۔ میں سمجھدا ساں کہ بچیاں دی پرورش دے معاملے وچ وی ساڈے دوناں دے خیالات اک ورگے نیں اسی انہاں نوں سوچن والا انسان بنانا چاہندے ہاں۔ میں اپنے بچیاں دے وطیریاں توں خوش ہاں تے پُر امید ہاں کہا وہ زندگی وچ اپنے لئی درست جگہ لبھن وچ کامیاب ہوجان گے۔ میرا وڈا بچہ 20 سال تے چھوٹا 15 سال دا ہے (ایس توں جاپدا ہے پئی ایہہ مضمون 1990دے دہاکے وچ کھیا گیا ہو سی)تے مزے دی گل ایہہ ہے کہ اک ہی تریخ نوں پیدا ہوئے۔ ہاں! میرے بچے تے فیملی میرے ماملیاں دی وجہ توں خوفزدہ تے پریشان رہندے نیں۔ اوہ ایس نوں یعنی میرے مِشن نوں خطرناک سمجھدے نیں پر زندگی وچ کجھ پاون لئی رِسک تے لینا پیندا ہے۔ حالات نے مینوں تبدیل کردتا ہے۔ میرا خیال ہے کہ اک مشکل بندہ ہاں۔ میری (پہلی)بیوی ایس گل دی تصدیق کرے گی۔ اصل وچ اوہ کہے گی ’’ایہہ صرف مشکل نہیں، امپاسبل بندہ ہے۔‘‘ تجربہ دسدا ہے کہ تُسی غصے وچ ہوسکدے ہو پر بہتر ہے کہ تُسی ایس دا اظہار نہ کرو۔ تُسی بے صبرے ہوسکدے ہو پر تہانوں صبر کرنا چاہیدا ہے۔ کدی کدی میں بہت مایوسی دا شکار ہوجاندا ہاں کہ اسی کجھ خاص نہیں کیتا۔ جے تُسی ویکھو کہ پاکستان دے نال پچھلے تیہہ سالاں وچ کیہ کجھ ہوگیا تے تُسی کہو گے ’’ایس ملک تے زوال آگیا تے ایہہ ڈِھیہہ گیا، تے تھلے ہور تھلے۔‘‘ کجھ لوک ہسدے نیں تے کہندے نیں، ’’جی ہاں! پاکستان، ایس توں مختلف ہوسکدا سی‘‘۔ پر کدی مینوں ایس دا یقین آندا ہے تے کدی نہیں آندا۔ فیر سوچدا ہاں آخر ایس صورتحال دا متبادل کیہ ہوسکدا ہے؟ تہانوں کوشش ترک نہیں کرنی چاہیدی۔ تُسی ایہہ نہیں کہہ سکدے کہ چیزاں اینی بُری حالت دا شکار ہوچکیا نیں کہ ہن انہاں نوں ٹھیک کرن دی کوئی امید نہیں رہی۔ سچ تے ایہہ ہے کہ ذاتی حد تک میں وی ٹھیک ٹھاک ہا ں تے کجھ ہور لوگ وی ٹھیک ٹھاک نیں۔ جے اسی مجموعی طور تے اج ملک نوں ویکھیے تے پہلے توں زیادہ گڈیاں نیں ،پہلے توں زیادہ ٹی وی نیں، پہلے توں زیادہ خوراک ہے، پہلے توں زیادہ دوایاں نیں ا تے لوک پہلے توں زیادہ لمیری عمراں پاندے نیں۔ بے شک ایہہ چیزاں اہم نیں پر فی زمانہ پاکستان وچ پہلے توں بہوں زیادہ گروہ بندیاں تے دشمنیاں نیں۔ جے اسی اک بیلنس شِیٹ بنائیے تے زیادہ تر لوک ایہو آکھن گے کہ اسی ڈاؤن جارہے ہاں۔ ممکن ہے ایہہ گل درست ہوئے پر کیہ اسی کوشش ترک کردئیے؟ جے تُسی کجھ کر نہیں سکدے تے گھٹ و گھٹ پُر امید تے رہنا چاہیدا ہے۔
جتھے تک ایس سوال دا تعلق ہے کہ میں مسلمان ہاں یا نہیں؟تے میں سمجھدا ہا کہ جیہناں لوکاں دی تقدیر تُسی بدلنا چاہندے ہوتاں انہاں وچ تہاڈی کجھ ساکھ ہونا ضروری ہے تے تہانوں ایہہ نہیں کہنہ چاہیدا کہ ’’میں انہاں چوں نہیں‘‘
سچائی ایہہ ہے کہ میں پیدائشی طور تے اک مسلمان سی۔ (ہُود بھائی پیدائشی طور تے اسماعیلی برادری توں نیں جیہڑا مسلماناں دا اک فرقہ ہے) کجھ عرصہ میں بہت عبادت گذار مسلمان وی رہیا۔ (ایہہ عرصہ چودہ سال دی عمر تک رہیا) ساڈے چوں ہر کوئی مسلم روایتاں پاروں پرورش پاندا ہے۔ اسی اپنے آپ نوں اپنی جڑاں توں کٹ نہیں سکدے۔ میں تہانوں اقبال احمد دی کہانی سُناندا ہاں۔
جدوں(اقبال احمد) وفات پان لگے تے  رضا کاضم دی بیوی جیہڑی انہاں نال بہت پیار کردی سی، کمرے دے باہر کھڑی ہوکے گھنٹوں قرآن دی تلاوت کردی رہندی سی۔ جدوں میں اقبال احمد نوں ایس بارے دسیا تے انہاں نے اوس نوں اندر بلایا تے بیٹھن نوں آکھیا۔ اوہ اوس وقت وی قرآن پڑھ سی۔ آخر اک مقام آیا کہ میں تنگ ہوکے اک چھوٹا جیہا نوٹ لکھ کے اقبال احمد نوں پُچھیا کہ جے اوہ اجازت دین تے خاتون نوں تلاوت توں منع کردیوے؟ انہاں نے انگلی دے اشارے نال مینوں منع کیتا۔ بعد چوں جدوں اوہ چلی گئی تے میں اقبال احمد نوں پُچھیا ’تُسی اینی دیر ایس خاتون نوں برداشت کیتا؟ تُسی تے مسلمان نہیں ہو?۔‘‘
انہاں نے آکھیا، ’’کیوں نہیں ! میں مسلمان ہی ہاں۔‘‘ میں اصرار کیتا، ’’نہیں تُسی نہیں ہو?۔ تُسی اللہ دے ہون دا یقین نہیں رکھدے ہو،؟قرآن تے آخرت دے دن تے وی تُسی یقین نہیں رکھدے؟‘‘
نہیں میں مسلمان ہاں، انہاں نے فیر اظہار کیتاا تے نال ہی آکھیا میں مسلمان پیدا ہویا تے ہمیش مسلمان رہاں گا۔
حالانکہ انہاں نے کدی خدانے خدا توں کوئی دعا وی نہیں منگی سی۔ کدی بخشش طلب نہ کیتی سی۔ فیر وی آخر تک اوہ ایہہ محسوس کردے سن کہ انہاں دی جڑاں اُسی تہذیب وچ نیں جس وچ انہاں نے عمر گذاری۔ میرے خیال وچ ایہہ ساڈے ساریاں دا مسئلہ ہے۔ جے ایہہ ہوسکدا ہے کہ مذہب نوں نہ من دے ہوےئے فیر وی اسی ایس وچ پیدا ہوئے تے ایہہ پیدا ہونا ہی ساڈے تے ہمیش لئی مُہر لادیندا ہے کہ اسی مسلمان ہاں۔ ہاں! اسی ایہہ کہہ سکدے ہا کہ اسی ’’سیکولر مسلمان‘‘ ہاں۔
میرا خیال ہے کہ حالات تہانوں بہت کجھ سکھاندے نیں۔ جے تُسی اک یونیورسٹی وچ پڑھاندے ہو تے تہاڈا واسطہ ایہو جہے طالب علماں نال پیندا رہنداہے جیہڑے نچلی تعلیمی پدر توں اُتے آندے نیں تے تُسی ویکھدے ہو کہ انہاں دی سوچاں کینی بُری طراں لِپٹی ہوئی یعنی محدود تے تنگ ہو ندیاں نیں۔ فیر تہانوں احساس ہوندا ہے کہ تہاڈی ذمہ واری دراصل ایہہ ہے کہ طلبہ اپنے لئی تعلیمی زندگی وچ درست طرزِ عمل اختیارکرسکن۔ جے میں کسی پِنڈ وچ ہوندا تے ایس یونیورسٹی وچ نہ ہوندا تے شاید میں عبدالستار ایدھی نوں جوائن کرلیندا تے سماجی کماں وچ لگ جاندا۔ پر ہن میرے تے ایہہ گل کُھل گئی ہے کہ مینوں لازمی طور تے لوکاں نوں تعلیم دے ذریعے تبدیل کرن دی کوشش کرنا ہوئے گی۔ تے ایہہ کم ہر پدرتے ہونا چاہیدا ہے۔ میری ورگی تعلیم تے بیک گراؤنڈ دے نال تے شاید کسی یونیورسٹی وچ کم کرکے ہی زیادہ بامعنی طور تے اپنا حصہ پایا جاسکدا ہے ناکہ کسی پرائمری سکول وچ۔ پر تہانوں پرائمری سکولاں وچ وی ایہو جہے لوک چاہیدے نیں۔ ہر طراں دیاں چیزاں ہر کتھے ہونا ضروری ہے۔ میں سمجھدا ہاں کہ اعلی تعلیم ایس لئی زیادہ اہمیت دی حامل ہے کہ ایتھے قوم لئی لیڈ نکلدے نیں۔ جے اسی انہاں تے اثر پاسکدے ہاں تے فیر ایس دا مطلب ہے کہ تُسی دوجے بہت زیادہ لوکاں تے اثر انداز ہوسکدے ہو۔ ایہو وجہ ہے کہ میں سمجھدا ہاں کہ ایہہ سب انہاں دی رہنمائی نال ممکن ہویا۔ اقبال احمد حیران کن انسان سن۔ میں اینا دُکھی نہیں ہویا جینا انہاں دی موت تے ہویا۔ انہاں نے میری بانہواں وچ جان دتی۔ میرے کول پہلے امریکہ وچ رہن دی چوائس سی پر ہن نہیں ہے تے میں رہ وی نہیں سکدا۔ میں جے امریکہ وچ رہیا تے اوتھے فزکس مینوں مکمل طور تے اپنے قبضے وچ لے لوے گی۔ فزکس ایہو جہی چیز نہیں ہے جو اک زندگی وچ کیتی جاسکے۔ فزکس لئی کئی زندگیاں درکار نیں۔ تُسی 25 سال دے ہو تے تُسی خوش نصیب ہو کیونکہ تہاڈے کول جدید فزکس نوں سمجھن دا بہت وقت ہوئے گا۔ جدید فزکس نوں سمجھن لئی فزکس وچ ہروقت تجسس پیدا کرن والے کم ہورہے نیں۔ میں تے مشکل نال ایس فزکس دی اوپر والی پدر نوں ی کھرچیا ہے۔ میرے اندر فزکس لئی بہوں بھُک ہے پر میں ہن بُڈھا ہوچکیا ہاں۔
link of Part 4
http://www.wichaar.com/news/281/ARTICLE/33322/2017-07-18.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels