Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> ڈاکٹرپرویز ہُود بھائی دی ہڈ بیتی،آپدی زبانی (چوتھی لڑی)

ڈاکٹرپرویز ہُود بھائی دی ہڈ بیتی،آپدی زبانی (چوتھی لڑی)

وچار ڈیسک
July 18th, 2017

میری جیب وچ کُل اک سو پنجھاں روپے سن میں نہیں جاندا سی کہ ہن اگے کیہ کرنا ہے۔ جدوں انتظار کرہیا سی تے اک شخص میرے کول آیا تے مینوں آکھیا ،تُسی دلچسپ بندے لگدے ہو۔جداں میں اپنا مسئلہ دسیا تے اوس نے آکھیا کہ میں وی خود اک لیفٹسٹ ہاں۔ اوس نے مینوں اپنے لیفٹسٹ دوستاں نال ملوایا تے اوہناں نے میری مدد کرن دی کوشش کیتی۔ میں وائس چانسلر تے چیئرمین دے درمیان پھس کے رہ گیا سی۔ بعد وچ مینوں پتہ چلیا کہ چیئرمین قنونی طور تے ٹھیک آکھ رہے سی۔ اسسٹنٹ پروفیسر لئی میری تعلیم گھٹ سی ۔میرے کول پی ایچ ڈی دی ڈگری وی نہیں سی۔ آخرکار چیئرمین نے آکھیا کہ اوہ مینوں بطور لیکچرر بھرتی کرسکدا ہے۔ میں من گیا کیونجے میں ایس کنفیوژن نوں ختم کرنا چاہندا سی ۔ اوس وقت مینوں اسسٹنٹ پروفیسر تے لیکچرر دے درمیان فرق تک دا پتہ نہیں سی۔ مینوں اک کمیٹی دے سامنے پیش کیتا گیا ہے۔ انہاں نے میرے کولوں کجھ ٹیکنکل سوالات پُچھے تے لیکچرر دی حیثیت نال میری تقرری کردتی۔ کمیٹی نے وائس چانسلر نوں اک لیٹر گھلیا جس وچ میری حیثیت لیکچرر دی لکھی ہوئی سی تے تنخواہ اٹھ سو روپے ماہانہ لکھی سی۔ وائس چانسلر نے لیٹر واپس گھلیا تے ایس وچ لکھیا، اسسٹنٹ پروفیسر تے تنخواہ ست سو۔
ایس ساری کنفیوژن دے دوران وائس چانسلر (کنیز یوسف) دا ذہن وی میرے بارے وچ بدل گیا کہ میں کوئی پر اسرار شخص ہاں۔ انہاں نے یونیورسٹی دے خزانچی نوں اک خفیہ خط لکھیا، جس وچ لکھیا کہ ھُود بھائی کھبے بازو دا ہے تے امریکی ایجنسی سی آئی اے دی تنخواہ تے ہے۔ ایہہ خطرناک بندہ ہے۔ ایس نوں کسی قسم دا ہاؤس الاوئنس نہ دتا جائے تانجے ایہہ چھڈ جان تے مجبور ہوجان۔
خیر! انہاں ساریاں ابتدائی مشکلات دے بعد بالاخر میں لیکچرر بن گیا تے ایہہ میرے یونیورسٹی وچ 27 سالہ دور دا شروع سی۔ ہاں ہن میں پروفیسر ہاں تے ایس نظام وچ ہر شخص وقت دے نال نال اپنے مقام تے پہنچدا ہے۔ تقرری دے بعد اگلے دو سالاں وچ ٹریڈ یونین دے نال شامل ہوگیا تے اسی پِنڈ پِنڈ جاکے چیئرمین ماؤزے تنگ دا پیغام دین لگے۔ اوہ دو سال میری زندگی دے مشکل سال نیں پر میرا خیال ہے کہ میں انہاں سالاں وچ بہت کجھ سکھیا ہے۔(لکھاری کھبے تے کس گروپ نال کم کردا سی اوس بارے کوئی گل نہ کیتی۔) جتھے تک میری شادی تے گھر دی گل ہے تے ساڈی یعنی میری تے میری بیوی دا میل جول اک سفر دے دوران شروع ہوئی۔ واقعہ اینج ہے کہ ساڈی ٹیم دور دراز دے اک پِنڈ وچ جایا کردی سی۔ سانوں چھ میل پیدل چلنا ہوندا سی تے رستہ سارا پہاڑی سی۔ اُتے تھلے کوئی سڑک نہیں سی۔ ہور تے ہور اک صحت مند شخص لئی وی اوہ سفر خاصا مشکل سی۔ اوہناں دناں وچ اک وبا پھیل گئی۔ ساڈی ٹیم وچ اک ڈاکٹر سی جس نے تجویز دتی کہ پِنڈ والیاں نوں حفاظتی ٹیکے لائے جان نہیں تے ایہہ لوک وبا توں بچ جان گے۔ اسی مرداں نوں ٹیکے لاسکدے سی پر عورتاں نوں ٹیکے لان لئی سانوں اک عورت دی لوڑ سی۔ اسی جڈیاں زنانیاں نوں جاندے سی اسی انہاں سب دا ذکر کیتا تے آخر وچ میں اپنے دوست دی بہن دا ناں تجویز کیتا۔ جدوں اوس نال گل کیتی تے اوہ راضی ہوگیا۔ اینج اسی بہت سارے سفر اکٹھے ہی کیتے تے آخر وچ ساڈی شادی ہوگئی۔
اوہ دوسال خاصے مشکل سن۔ میں اک پِنڈ دے سکول وچ وقتی طور تے پڑھایا تے مینوں پتہ لگا کہ پِنڈ دے سکولاں وچ ٹیچر کینے ظالم ہوندے نیں۔ اوہ طلبا نال جنسی زیادتیاں کردے سن۔ اسی دوران مینوں ایہہ پتہ چلیا کہ لوکاں دی سوچاں بدلن وچ مدد دینا کس قدر اوکھاکم ہے۔ انہاں دوسالاں وچ میں اکڈیمک حوالیاں نال اپنے آپ نوں نامکمل جیہا محسوس کرن لگا۔ مینوں احساس ہویا کہ مینوں پی ایچ ڈی دی ڈگری لینا پوے گی۔ میں دوبارہ ایم آئی ٹی دے گریجویٹ سکول وچ اپلائی کیتا تے فیر میں مڑ امریکہ چلاگیا تے ایس وار پی ایچ ڈی کرکے واپس آیا۔ ایہناں تِن سالاں وچ جدوں میں آیا تے پاکستان دے سیاسی حالات بدل چکے سن۔ میری واپسی دے چند مہینیاں بعد ہی بھٹو نوں پھانسی تے لٹکا دتا گیا تے ضیاالحق دی حکومت دا دور شروع ہوگیا۔ ایہہ ساڈی تریخ دا سب توں درد ناک دور ہے۔ بہت لوکاں نے مشکلاں دا سامنا کیتا۔ خاص طور تے اوہ لوک جیہڑے ضیا حکومت دے مخالف سن۔ ایہناں دناں وچ اسی اک میگزین شروع کیتا جس دا ناں سی ’’امور پاکستان‘‘ تے ایس دے ذریعے اسی مارشلا دے خلاف جنگ کیتی۔ اسی دیواراں تے نعرے لکھنے شروع کیتے۔ میں اک ایسی ڈیوائس ایجاد کیتی جو دیوار تے کوئی وی نعرہ دومنٹ وچ لکھ دیندی سی جد کہ باقی لوک پندرہ منٹ وچ لکھدے سن۔ اسی شیمپو دی اک خالی بوتل وچ موبل آئل تے کالا رنگ بھر لیندے سی تے بوتل دے منہ تے شیونگ برش لا دیندے سی۔ ایس بوتل نے بڑے کمال وکھائے۔ اک دن جدوں امریکن سیکرٹری آف سٹیٹ نے پاکستان دا درہ کرنا سی تے اسی دیواراں نوں ضیاالحق تے امریکہ دے خلاف نعریاں نال بھر دتا۔ آرمی پلس تے سکیورٹی فورسز سب دیوراں تے نعرے ویکھ حیراں رہ گئے۔ اسی ایہہ کم بار بار کیتا ایتھوں تک کہ اوہناں نے پِنڈی تے اسلام آباد وچ رات دی گشت لادتی۔ اسی دوران میں واشگٹن وچ اپنے پوسٹ ڈاکٹریٹ لئی اپلائی کیتا تے میں اپنے دوستاں دی گرفتاریاں توں اک مہینے پہلے نِکل گیا سی۔ میرے دوستاں چوں اک کسی دکان وچ میگزین رکھ رہیا سی جدوں اک سیکورٹی آفیسر نے ایس نوں ویکھ لیا تے گرفتار کرکے پلس سٹیشن لے گئے۔جدوں ضیا الحق نوں پتہ چلا تے ایس نے اک وڈا کریک اَپ کرن دا حکم دتا۔ تے اوس نے آکھیا،سانوں قائد یونیورسٹی توں سیاست دے ایس کینسر دا خاتمہ کرنا ہوئے گا
میرے دوستاں نوں جیل وچ گھل دتا گیا تے اوہناں تے ظالمانہ تشدد کیتا گیا۔ اوہناں چوں اک نوں پھُٹا لٹکا کے ماریا گیا تے اوس دے جنسی اعضا نوں ساڑیا گیا۔ اوس نوں ذہنی تے جسمانی ہر طراں نال تشدد دا نشانہ بنایا گیا۔ اوہ اج وی اک ٹُٹا ہویا شخص ہے حلانکہ اینے زیادہ سال بیت گئے نیں۔ اوہناں چوں اک نے میرا ناں پلس دے سامنے ظاہر کردتا تے پلس میرے گھر دی تلاشی لین لئی آگئی۔ پر خوش قسمتی نال میرے سالے یعنی بیوی دے بھراء نے پلس دے اپڑن توں پہلے ہی ایہو جیہا سارا مواد گھر توں ہٹا دتا جس دی انہاں نوں تلاش ہوسکدی سی۔اینج پلس نوں کجھ نہ ملیا۔ پلس وچ ہلے تک میرے خلاف اک کیس درج ہے کسی جگہ۔ خیر! اک سال امریکہ وچ رہن تے اپنا پوسٹ ڈاکٹریٹ ڈپلومہ مکمل کرن دے بعد میں 1983 وچ پاکستان واپس آگیا تے ایہہ ویکھ کہ میں ششدر رہ گیا کہ پاکستان وچ علوم نوں وی اسلامائز کیتا جارہیا سی۔
Link of Part 3
http://www.wichaar.com/news/281/ARTICLE/33246/2017-07-01.html


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels