Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> ڈاکٹرپرویز ہُود بھائی دی ہڈ بیتی،آپدی زبانی (پہلی لڑی)

ڈاکٹرپرویز ہُود بھائی دی ہڈ بیتی،آپدی زبانی (پہلی لڑی)

پرویز ہود بھائی، پنجابی روپ۔وچار
June 26th, 2017

میں اک اسماعیلی فیملی وچ پیدا ہویا۔ میرے نانا حیدر آباد(دکن) دے نیڑے اک تھاں توں تعلق رکھدے سن جس نوں اجکل ’’سلطانہ آباد‘‘ آکھیا جاندا ہے۔ پِنڈ وچ انہاں دے کول بہوں زیادہ زمین سی۔ انہاں نے اوہ ساری زمین ’’آغاخان‘‘ نوں دان (Donate)کردتی سی تے ایس طراں خود ’’وارث‘‘ بن گئے (غالباً ’’وارث‘‘ اسماعیلی برادری وچ کسی مذہبی عہدے دا ناں ہے)۔ میرے دادا وی بڑے مذہبی بندے سن۔ حقیقت ایہہ ہے کہ کراچی وچ اسماعیلیاں دا پہلا ’’جماعت خانہ‘‘ میرے دادے نے اپنی ذاتی رقم نال بنوایا سی، جس پاروں ’’سلطان محمد شاہ‘‘ (آغا خان سوئم)نے انہاں نوں ، ’’مُکھی‘‘ (سردار) دا لقب دتا۔ میرا ناں ’’ہُود بھائی‘‘(ہود دا بھرا) اک پیغمبر ’’ہُود (علیہ السلام)دے ناں تے ہے۔(حضرت) ہُود پیغمبر ہوراں دا شمار انہاں پیغمبراں وچ ہے جنہاں دا ناں قرآن شریف وچ ہے۔ میں ایسے خاندان وچ پیدا ہویا جس دی جڑاں ’’اسماعیلیت‘‘ وچ بہوں ڈونگیاں سن۔ البتہ میرے والد اوس(اسمائیلی دھرمی) ماحول توں مطمئن نہ سن۔ اوہ اسماعیلی نظام نوں استحصالی نظام سمجھدے سن۔ انہاں دی ایس باغیانہ طبیعت دے اثرات سارے بچیاں تے پئے تے ایہو وجہ ہے کہ اسی اپنے کزناں وانگ روایتی(اسمائیلی) ماحول وچ وڈے نہیں ہوئے۔ بارہ سال دی عمر وچ میں اپنے اندر بغاوت دا پہلا عنصر محسوس کیتا۔ میری وڈی بھین نماز ،رازے دی روایتاں توں بڑی تنگ سی۔ اوس دی ایہہ بے چینی میرے وچ منتقل ہوئی تے میں اسماعیلیت خلاف بغاوت کردتی۔ مینوں یاد ہے میں اپنے گھر وچ کھلم کھلا آکدا سی کہ ’’آغا خان فراڈ ہے‘‘۔ ایس گل توں میرے والدین غم تے غصے دا شکار ہوجاندے سن۔ اک دن جدوں میرے والدین گھر نہیں سن، میں آغا خان دی تصویراں اپنے سارے گھر چوں لائیاں تے انہاں نوں توڑ بھن دتا اتے خود اک دن لئی گھر توں دڑکی لادتی۔ بعد وچ انہاں نے مینوں معاف کردتا کیونجے اوہ میرے گھر توں چلے جان پاروں پریشان ہوگئے سن۔ ایس طراں میں اسماعیلیت توں ’’پراپراسلام‘‘ ول آیا تے میں مسجد وچ جانا شروع کردتا۔ 14 سال دی عمر تک میں اسلامی تعلیمات نال پورا جڑیارہیا۔پر ایسے عمرے، خش قسمتی یا بدقسمتی نال میں ’’برناڈ شا دے ڈرامے پڑھنے شروع کردتے تے فیر میں ’’برٹرینڈ رسل‘‘ پڑھنا شروع کیتا۔ ایس پڑھائی پاروں چانن ہوندا گیا تے میں’’ چِت‘‘ ہو گیا۔ ا پندرہ سال دی عمر تیک میں ساریاں’’ چنگیاں چیزاں‘‘ ہارچکیا ساں۔ میں ’’کراچی گرامر سکول‘‘ توں تعلیم حاصل کیتی ہے۔ ایہہ اک ایسا سکول سی جتھے کوئی وی معاشرے دے مسائل تے گل نہیں کردا سی۔ ایتھے سب بچے اشرافی( Elite)طبقے توں سن تے اوہ ہر ویلے ڈانس دی گلاں کریندے یا فیرFun Timeوچ رجھے رہندے۔ میں اوہناں دے نال کجھ عرصہ تے ایہو جہیا پارٹیاں وچ جاندا رہیا ، پر ایس لائف سٹائل توں وی میں کدی خوش نہیں سی۔ میرے والد زیادہ اَمیر نہیں سن تے اوہناں نے 1964 اک مالی گھاٹے دا سامنا وی کیتا سی، اوس ویلے میں چودہ سال دا سی ۔ اوہناں دناں وچ ،ہورے،اوہ مینوں سکول چوں کڈھ سکدے سن ا تے میں قدرے گھٹ مہنگے سکول وچ گھل دتا جاندا۔ پر کسی نہ کسی طراں میرے والد نے مینوں اُوسے سکول وچ ہی رکھیا کیونجے اوہناں دی(مالی) مدد میرے وڈے بھراء وی کررہے سن جیہڑے امریکہ رہندے سن اتے فیملی نوں رقماں گھلدے سن۔ خیر! میں اوسے سکول دی پیدوار ساں اتے اپنی سوسائٹی تے آل دوال دی دنیا بارے بے حس وی۔سچی تے حقی گل ایہہ ہے کہ ایہہ میرا امریکہ جانا تے ’’ایم آئی ٹی‘‘ (MIT) وچ داخلہ لینا ہی سی جیہنے مینوں اندروں باہروں بدل کے رکھ چھڈیا اتے مین پہلے دے مقابلے وچ بلکل وکھرا بندہ بن گیا۔(جاری جے)
پرویز ہود بھائی دا ایہہ آرٹیکل اک انٹرویو دی شکل وچ آیا تے فیر اک ویب سائٹ تے آرٹیکل وچ۔اخیری لڑی وچ اساں دوناں لنک دے دواں گے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels