Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> جیون کتھا >> جیون کتھا: جنگل وچ منگل

جیون کتھا: جنگل وچ منگل

July 25th, 2009

سب نویں آؤن والیاں نوں امریکہ آکے کشٹ کٹنا پیندا سی سو سانوں وی کٹنا پیا۔امریکہ وچ زندگی بڑی اوکھی سی، روز دے چار پنج گھنٹیاں دے بساں ٹریناں دے دھکے، پڑھائی دا پہاڑ اُتوں پاکستان توں آؤن توں پہلاں مینوں آنڈا وی ابالنا نہیں سی آؤندا۔ خیر میں زندگی دی کسے سٹیج تے گھابرنا نہیں سی سکھیا تے جو ساہمنے آوے اوہنوں بھگتن توں ڈر کے کتھے جانا سی۔ کھانا پکاؤنا تے میں ایہو جیہا سکھیا جو اخیر میں زردے پلا، پاوے نہاری سب کجھ پکانا سکھ لیا سی۔ انج وی پیسے اینے گھٹ ہوندے سن جو فوڈ سٹور توں کنڈم کیتیاں سستیاں شیواں خرید کے پکا کے ہی کھا سکدے ساں۔ پندرہ دناں مگروں جدوں یونیورسٹی توں تنخواہ ملدی تے یونیورسٹی دے گوانڈھ چرچز فرائیڈ چکن (ایہہ چین وی مک چکی ہے) توں اک ڈالر تے سینتی سینٹ دے دو پیس چکن تے فرنچ فرائز لے کے کھانا ساڈی عیش دا دن ہوندا سی۔ پر ایس ساری زندگی دا وی اپنا نشہ تے سواد سی۔

روز بروز دیاں اوکھتاں دے نال نال اودریواں (اداسی) وی سی۔ پہلے چھ مہینے ہر آؤن والا بڑے اودریویں وچ کٹدا ہے فیر ہولی ہولی راسے پے جاندا ہے۔ میں بڑی محفلی زندگی چھڈ کے آیا ساں اوس دی تھوڑ وی چھبدی سی۔ پر ایہہ مسئلہ چھیتی حل ہو گیا۔ سیون کارنر دے علاقے وچ پاکستان توں نویں نویں آئے پاکستانی چوکھے سن۔ اوہناں وچ نکیاں نوکریاں والے پاکستان تے ہندوستان ایمبیسی دے ملازم وی سن۔ اوہناں دناں وچ وٹرنری ڈاکٹر بڑے آؤندے سن، اوہناں نوں پاکستان وچ امریکی کونسلیٹ وچ ہی گرین کارڈ مل جاندا سی کیوں جو امریکہ وچ وٹرنری ڈاکٹراں دی بہت تھوڑ سی۔ پر امریکہ آکے اوہناں نوں چنگی نوکری نہیں سی ملدی، اوہ پنج سال امریکی شہریت ملن تیکر لیبارٹریاں وچ نکیاں موٹیاں نوکریاں کردے سن تے فیر اوہناں نوں نوکری ملدی سی۔ ایتھے ہی پیپلز پارٹی واشنگٹن دے اجوکے صدر جاوید منظور تے اوسدے بھرا پرویز منظور نال ملاقات ہوئی سی۔ اوہناں نال اجے تیکر دوستی چل رہی ہے۔

کجھ چر مگروں نور نغمی دی وجہ توں فاروق احمد تے جاوید اقبال (ہن اوہ اپنا ناں جاوید بوٹا لکھدے ہین) آگئے۔ فاروق دے پیو دا لنڈے وچ کاروبار سی تے فاروق پیو دے مال تے پاکستان فلم انڈسٹری دی منڈلی وچ عیش کردا ہوندا سی۔ اوس کئی فلماں وچ رول وی کیتے۔ جاوید پاکستان دے سب توں وڈے فلم پروڈیوسر تے ڈائریکٹر شباب کیرانوی دا اسسٹنٹ ڈائریکٹر سی۔ دوہیں اپنی قسمت بناؤن امریکہ آئے سن۔ اوس زمانے وچ شعیب، فاروق، جاوید تے میرے کول گرین کارڈ وغیرہ نہیں سی۔ پر اوہناں دناں وچ نوکریاں تے یونیورسٹیاں وچ ایس دی پن چھان نہیں سی ہوندی۔ بہتے امریکی جان دے وی نہیں سن جو گرین کارڈ یا لیگل الیگل کیہ ہوندا ہے۔ پاسپورٹ وکھا کے سب کاغذ پتر بن جاندے سن۔ ہن تے گرین کارڈ والیاں نوں وی بعضے ویلے وخت پے جاندا ہے۔ سو ساڈی ساریاں دی روزی دے نال نال ایہہ کوشش وی سی جو سانوں گرین کارڈ مل جاوے۔ کیوں جے ایس دے بنا اسیں امریکہ توں باہر نہیں ساں جا سکدے۔

فاروق تے جاوید دے آون نال ساڈی جٹ بندی ہو گئی تے روز محفل لگن لگ پئی۔ میں تے شعیب اک دو کمریاں دے اپارٹمنٹ وچ رہندے ساں، اسیں اک کمرہ کرائے تے دے دتا تاں جو خرچہ بچایا جا سکے۔ سو میں تے شعیب کئی سال اک ہی کمرے وچ رہندے تے سوندے ساں۔ ساڈا اک کرایہ دار راجو بڑا مزے دا بندہ سی۔ جین مذہب دا منن والا سی تے گوشت تے اک پاسے سبزیاں وی ساریاں نہیں سی کھاندا۔ اوہ سویرے سویرے اٹھ کے روز فلم شعلے دے امجد خان دے ڈائیلاگ ضرور بولدا سی، خاص طور تے "سانبھا وہ دو تھے یا تین" والے۔ مینوں سدا شہنشاہ کہہ کے بلاؤندا سی۔ ہن اوہ نیویارک دے علاقے وچ کمپیوٹر دے کاروبار وچ کروڑ پتی ہو چکیا ہے۔ کدی کدی کال کرکے پچھ لیندا "شہنشاہ اعظم آپ کی حکومت کیسے چل رہی ہے" فیر اک کانت بھائی بڑا مزیدار کردار سی۔ اینا ڈھلا سی جو دس گز دا پینڈا پندراں منٹاں وچ کردا سی۔ اوس نوں کجھ پکاونا نہیں سی آؤندا، میں یونیورسٹی توں نکل کے اوس نوں لسن گنڈھے تیار کرن دا حکم دینا، گھر آکے کھانا پکاونا تے اوس نوں کھوالنا۔
اوہناں ہی دناں وچ عارف وقار وی وائس آف امریکہ وچ براڈکاسٹ دی نوکری تے آگئے۔ اوہناں دا لکھیا تے ڈائریکٹ کیتا ٹی وی ڈرامہ "دوبئی چلو" بڑا مشہور ہویا سی۔ ایہناں ساریاں دے آؤن نال ساڈے اپارٹمنٹ وچ ہر شام محفلاں لگن لگ پیا۔ پر ساڈے وچوں سوائے نور دے کسے کول کار نہیں سی، ایس لئی سب دی ڈھوائی دا کم اوس نوں ہی کرنا پیندا سی۔ سارے کم توں آکے اپنے اپنے سپروائزراں تے کم دیاں مزیدار کہانیاں سناوندے۔ فاروق دا سپر وائزر سیالکوٹ دا رہن والا چاچا منیر سی۔ ہر نویں آؤن والے نوں اوہو نوکری دیندا سی۔چاچا منیر اوہناں گھٹ لوکاں وچوں سن جنہاں کول وی سی آر سی، اوہناں دناں وچ امریکہ وچ وی سی آر عام نہیں سن ہوندے، امریکی گھراں وچ وی ایس ناں دی کوئی شی نہیں سی۔ میں پہلی واری چاچے منیر دے گھر جاکے وی سی آر تے ہندوستانی فلم "موسم" ویکھی سی۔ پاکستان وچ تے ساڈی ہوش وچ ہندوستانی فلماں لگنیاں بند ہو چکیاں سن ایس لئی چاچے منیر دے وی سی آر تے ہندوستانی فلم ویکھ کے بڑی خوشی ہوئی۔

چاچے منیر دے کئی چکر سن، اوہ گرین کارڈ دین دوان دے چکراں وچ کجھ پٹھے سدھے منصوبے بناؤندا رہندا سی۔ اوہدیاں ساریاں مزے مزے دیاں گلاں فاروق سانوں آکے سناؤندا رہندا سی۔ فاروق اوس نوں انج ڈرامہ بنا کے سناؤندا جو ہولی ہولی اسیں سوچیا ایس تے ڈرمہ لکھ کے سٹیج کیتا جاوے۔ایس لئی اک ڈرامہ گروپ انڈو پاک آرٹ سرکل بنایا گیا جیہڑا واشنگٹن ایریا وچ پہلا سٹیج گروپ سی۔ مگروں ہندوستانی امریکیاں نے ناٹیا بھارتی تے پرواسی کلا منچ ورگے گروپ بنا کے سٹیج ڈرامیاں دا کم جاری رکھیا۔ پر ایس دی نینہ ساڈے گروپ نے رکھی سی۔

ساڈا پہلا ڈرامہ "گرین کارڈ" ہی سی جیہڑا بہتا شعیب تے کجھ عارف وقار نے لکھیا ایہہ وکھری گل ہے جو پیش کاری ویلے عارف وقار نے ڈرامے دی لکھت اپنے ناں لا لئی۔ جاوید نقلاں تے جگتاں بڑی ایکٹنگ نال کردا سی ۔ میں کہیا چاچے منیر دا کردار جاوید بڑا سوہنا کرے گا حالاں اوس پہلاں کدی ایکٹنگ نہیں سی کیتی۔ نور تے شعیب نکیاں ہوندیاں توں ڈرامے کردے آئے سن، سگوں پی ٹی وی تے بچیاں دے پہلے ڈرامے وچ نور تے شعیب نے ایکٹنگ کیتی سی۔ فاروق وی ایکٹنگ جاندا سی۔ عارف وقار منیا ہویا ڈائیریکڑ سی۔ مینوں تنظیمی کم آؤندا سی کیوں جو این ایس او تے ہور کئی تنظیماں بنا چکیا ساں۔ میں ڈرامے دا پروڈیوسر بن گیا تے میرا کم ٹیم نوں جوڑنا، ریہرسلاں کرواناں تے ہور لوڑاں پوراں کرن توں وکھ ٹکٹاں ویچن وی سی۔ سو ساڈی بندیاں دی ٹیم پوری سی پر ڈرامے وچ دو عورتاں دے کردار وی سن اوہ کتھوں لبھن؟ ایہہ وڈا پواڑا سی۔اک کڑی دا کردار تے عارف وقار دی بیوی فرحت کرن لئی تیار ہو گئی پر مسئلہ اک آنٹی دا سی!

اک دن نور بڑے جوش نال بھریا آیا تے کہن لگا "آنٹی لبھ گئی" ایہہ آنٹی پشپا اگنی ہوتری سی جیہناں دے گھر والے اومیش اگنی ہوتری وائس آف امریکہ دی ہندی سروس وچ براڈ کاسٹنگ دی نوکری کرن آئے سن۔ پشپا جی آپ وی آل انڈیا ریڈیو دی بڑی اچ پدھری براڈ کاسٹر سن۔ اوہناں دیاں دو نکیاں دھیاں وڈی شمالیہ (عرف گنوں) تے نکی نیہا سن۔ اگے چل کے اومیش جی آپ ایس علاقے دے سب توں چنگے سٹیج ڈائیریکڑ بن گئے تے ہن اک ہوون والے ڈرامے "اوہ جمیا ہی نہیں جنہیں لاہور نہیں ویکھیا" وچ اومیش دی ڈائیرکٹری وچ پشپا جی، گنوں تے نیہا سب ایکٹنگ کر رہے نیں ۔ہن دوہیں کڑیاں دو دو بچیاں دا ماواں ہین۔

خیر گرین کارڈ ڈرامہ تیار ہو گیا، اک سکول دا ہال کرائے تے لیا گیا، اوہناں دناں وچ امریکی سکول ہال بڑی سوکھ نال دے دیندے سن جیہڑا مگروں بدل گیا۔ فاروق تے جاوید نے سٹیج تے بڑا پروفیشنل سیٹ لایا تے جد ویکھن والے ہال وچ آئے تے اوہ دنگ رہ گئے، اوہناں دا خیال سی جو ایہہ ٹٹیا بھجیا پاکستان دا سکولی ڈرامہ ہووے گا۔ پر اسیں بڑا پروفیشنل ڈرامہ کیتا۔ ڈرامے دا ٹکٹ تن ڈالر رکھیا گیا تے کوئی ساڈھے تن سو لوک ویکھن آئے جیہڑے اوس ویلے دے حساب وچ چوکھے سن کیوں جو اوس ویلے ہندوستانی پاکستانی کمیونٹی اج توں دس گنا گھٹ سی۔ عجیب گل ہے ہن وی اینے اک لوک ہی ڈرامہ ویکھن آؤندے ہین۔

گرین کارڈ توں مگروں عارف وقار نے افضل رحمان دے پاکستان وچ کھیڈے گئے ڈرامے "ٹچ می ناٹ" وچ بدلیاں کر کے "امریکہ چلو" بنایا۔ ایس وچ ٹیم بڑی لمی چوڑی سی، ایس لئی سانوں کجھ ہور منڈے تے کڑیاں لبھنیاں پیاں۔میری بیوی عطیہ کوکب نے ایس ڈرامے توں اپنی ایکٹنگ شروع کیتی تے فیر بہت سارے ڈرامیاں وچ حصہ لیندیاں رہیاں ہین۔ کلونت کور ناں دی اک ہور کڑی وی ٹیم وچ آگئی جیہڑی ساری عمر کینیا وچ رہی سی تے تے اپنے بندے نیک سنگھ نال رہ رہی سی، نیک وی کینیا وچ ہی پلیا سی تے اوس نے کدی ہندوستان نہیں ویکھیا سی۔ پر دوہیں میاں بیوی پنجابیاں نالوں ودھ خالص پنجابی بولدے سن۔ ایس توں وکھ صفدر، زیبر تے نعمان نے وی ایس ڈرامے وچ حصہ لیا۔ ایہناں وچوں بہت سارے لوک گواچ گئے تے فیر کدی نہیں ملے۔ جیون ملن وچھڑن دا ہی ناں ہے!

"امریکہ چلو" ساڈا سب توں مشہورر ڈرامہ سی۔ ایس نوں کوئی اٹھ سو توں ودھ لوک ویکھن آئے۔ فیر اجے تیکر کسے ڈرامے نوں اینے لوک ویکھن نہیں آئے۔ ایہہ اکلا ڈرامہ سی جیس وچ ساڈے پیسے پورے ہوئے نہیں تے میں ، فاروق، جاوید، شعیب تے نور ہی آپو وچ پیسے پاکے ڈرامہ کردے سن۔ ایہہ اپنے آپ نوں پنجتن دا گروپ کہندے سن۔ ایس توں مگروں ٹاؤن ہاؤس، پاگل خانہ ورگے ڈرامے وی ایس گروپ نے کیتے۔ فیر عارف وقار چلا گیا تے کم ٹھنڈا پے گیا۔ مگروں جد اومیش اگنی ہوتری ہوراں ڈائریکٹری شروع کردتی تے اوہناں دی ہدایتاں ہیٹھ بلونت گارگی دا مشہور ڈرامہ "لوہا کٹ" کیتا گیا۔

پر لوہا کٹ توں پہلاں انڈو پاک آرٹ سرکل دی سب توں وڈی پیش کاری نجم حسین سید ہوراں دا ڈرامہ "تخت لہور" سی۔ ایہہ بڑا لما تے اوکھا ڈرامہ سی، ایس لئی بہت سارے ایکٹراں دی وی لوڑ سی۔ دو بڑے سچجے سکھ نوجوان گورشرن سنگھ تے راج ورک تے اک گڑھیا ہویا ایکٹر انیل گھلاٹی تے بھوپندر سہگل تے اوس دا سجن گولڈی وی رلتی ہو گئے۔ ایس ڈرامے وچ شاہ حسین دے استاد سعداللہ دا کردار میں کیتا۔ ایس توں وکھ ڈائیریکٹر نے ڈرامے وچ رس رکھن لئی اک دلے بھٹی دا گیت ورتیا جیس لئی میرے پتر وارث حسین عرف دھیدو تے بھتیجے نوید حسن نے رول کیتے۔ ایہناں وچوں کئی ایکٹر سن جیہناں نوں صرف گورمکھی پڑھن وچ سوکھ سی تے کجھ اجیہے جیہڑے صرف ہندی یا دیو ناگری سکرپٹ ہی پڑھ سکدے سن۔ ایس لئی ڈرامے نوں گرمکھی لپی وچ گورشن دے پتا سردار گوربخش سنگھ نے کجھ ہی دناں وچ کردتا، ہندی سکرپٹ پشپا جی نے کیتا۔ ایس ڈرامے نوں بناون لئی بہت ریہرسلاں تے نک سک دی لوڑ پئی۔

ایہہ ڈرامہ بڑا وڈا سی تے ایس دے خرچے دا گویڑ وی چوکھا سی۔ پر میں ایہو جیہے کماں نوں پیسے دی وجہ توں کدی پچھے نہیں پائیا کیوں جو میرا یقین ہے جو پیسے کتوں نہ کتوں آ ہی جاندے نیں۔ ہویا وی ایہو۔ اک دن واشنگٹن دے ہوٹل مشہور واٹر گیٹ توں اک پرانے سجن عزت مجید دا فون آیا کہ مینوں مل جا۔ عزت مجید ساڈے نال پڑھاؤندا وی سی، وائی پی ایف گروپ وچ وی شامل سی تے جد اسیں نجم حسین سید نال سنگت شروع کیتی تے میرے نال طبلہ وجاؤندا ہوندا سی۔ مگروں اوہ سعودی عرب چلا گیا تے فیر لندن تے اک دن پتہ لگا اوہ کروڑ پتی ہو گیا ہے۔ اوس ملنی توں مگروں پچھیا کسے شے دی لوڑ تے نہیں تے میں کہیا ڈرامہ کرن لئی پیسے چاہیدے نیں۔ اوس نے ہوٹل دے پیڈ تے اک چٹ دے دتی جو فلانے بینک وچوں جاکے پنج ہزار ڈالر لے لواں۔ میں ایس نوں مذاق ہی سمجھیا کیوں جو ہوٹل دیاں چٹاں تے کیہڑا بینک پیسے دیندا ہے۔ خیر میں اوس بینک گیا تے اک ہندوستانی مینیجر نوں چٹ دتی۔ اوہ کہن لگا اوہ چٹ دے کے فون وی کردے ہوندے نیں تے ایہہ اوہناں کیتا نہیں۔ میں کہیا ٹھیک ہے، دل وچ سوچیا عزت اکواری فیر چکر دے گیا۔ فیر اوہ مینیجر آکھن لگا پر اسیں ایہہ چٹ موڑ وی نہیں سکدے تے اوس پنج ہزار میرے ہتھ پھڑائے ۔ مینوں بہت سارے سنگیاں وانگ عزت مجید نال کوئی ساڑا نہیں سگوں ایہہ ہے جو ساڈی سنگت وچوں وی کوئی دین دی پوزیشن وچ تے آیا۔

میری لینڈ دے اک پروفیشنل ہال وچ ڈرامہ ہویا تے بہت ہی سوہنا بنیا۔ ویکھن والیاں وچوں کجھ نے ایہہ ڈرامہ پاکستان وچ وی ویکھیا سی اوہناں وی کہیا جو ایس پدھر دا ڈرامہ پاکستان وچ نہیں ہویا۔ بس ایس دی گھاٹ ایہہ رہی جو ویکھن والے اونے نہیں آئے۔ بس اک طرحاں اسیں جنگل وچ مور نچوا کے اپنا سواد لیا تے بھرواں لیا۔ایکٹر ڈائریکٹر تے جیس نے وی ایہہ ڈرامہ ویکھیا سی اوہ منندے ہین جو ایس علاقے وچ ہوون والے ڈرامیاں وچوں ایس دی ٹکر دا کوئی ڈرامہ نہیں ہویا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels