Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> پروفیسر سعید بُھٹا >> دیس دیاں واراں >> نورے چدھرڑ دی وار2 دا متن

نورے چدھرڑ دی وار2 دا متن

سعید بُھٹا
July 23rd, 2008

متن


1
بیوی راستی ویاہی ہے چندلے، جیویں کابل چگتی
اوس پتر پھتوہل جائیا، اُمراواں دی بھتی
خان آپ وڑے آپ نکلے، اجل دھرتّی
بھئی نورا، صدر سلیم دا، دَل گھوڑا گھتی
مست ہاتھی بادشاہ دا، پلیندا وتی


2
کُوک کچہری نوریا، تیریاں لہور کہاں
نورے نوں ملدن بھومیے، ہتھ بدھی باہاں
کون رگھڑ، کون بھومیا، جیہدی کوک سباہاں
نورا، صدر سلیم دا، مالم بادشاہاں
3
بِھڑدے ماہنی جیت مال، سردول متاع
دوویں تختوں چودھری، دوویں دَل گاہ
سداد، پیرو دا چودھری، کڈھ لیندا کاہ
جیڈا جھامب، اروڑ دا، تیڈ نورے راہ


4
راہے نور نَوَل نوں، سچ کہاں نا چھوڑ
کِرت کرن سداد دی، میر لکھ کروڑ
ماہنی جیت مال دا، وج تخت لہور
لیا دست نَوَل خان، کستوری بوڑ


5
اوس ہتھ کستوری بوڑیا، نور گودھے مِہار
اُگو تے وِجھل، جھامب جیڈ، لکھوں مقدار
سنیا نور نَوَل دا، وج لنکوں پار
دادے وِیسے، جھامب دا، پر ہتھ چتار
جیس دن لیونیں پھتا، پھتوہل، کرملی تے تاج خان،
سلیمان دے محل، مونہہ تے گاہندے مار
6
پیا پھتوہل ماریا، ڈنگ سدوآنی
ایہہ ماہنی، بھرمی، کوڑھی، روج تریونہہ سیلانی
ڈھاہر، وِنجر، ماہنی، ہوٹھ جھورانے گھانی
میرک، مسن تے پہاڑ، ڈنڈ پتھیریانی
حرماں پئی ہرولی، ستی کھیویانی
سر کھلائے ہن بیبیاں، ترٹی اول سانی
بھنے چوہڑے کھومویں، دند کھنڈی کھانی
نیر سرمے تے گاڈرے، ہے وڑہیوں اُڈانی
اوہ پٹ پٹ کڈھن میڈھیاں، پھاٹن تگرانی
اوہ تروڑن دھڑیاں گُتیاں، ہے رنگ چوہانی
ہار، ہمیلاں، لمبڑاں، نتھوں گرہیانی
نتھوں تلیئر باہیاں، موتی کیہ شانی
سیجیں موتی کھلرے، کیہی نشانی
چھٹے جن جوار دے، چا دتے کرسانی
جیویں کپر پینگھن بیڑیاں، ٹھاٹھیں نشانی
میر میاں الحان چوں، آ واہن وانی
محلاں رنگڑی کُرلاون، جیوں کونجاں اسمانی



7
منصوبہ کیتا جپیاں، پیروج دا ویر چتاریا
خط لکھے بیوی بھؤ جوں، اوس گہنا خان ونگاریا
گھت جماونے جاگ جوں، دہی دا مٹ ابھاریا
نہ بہیں وے ہٹ مل کے، چڑھ آویں خان کراریا
لگھ آیا چندل بیٹ وی، اوس چودھری مِرجا ماریا


8
خط لکھے بیوی بھؤ جوں، ہتھ قاصد پھڑیا
اوہ پوہتا مرجے خان تے، مار تیگیں ڈلیا
سر وڈھیوس نوسلطان دا، نور اگے دھریا
چِکے شینہہ سردول وی، منگینی وڑیا
منگینی کوٹ قندھار جوں، آ نورے ولیا
نورے، صدر سلیم دے، شیر پنجرے کڑیا


9
پڑھ ڈھاڈھی اَٹ چتار، اگے داتیاں
اوہ کوٹاں دے سردار، چودھری جھامب کے
اوہ کیما مہر سکار، دھنی تیگ دا
باز پیا اُڈ اُڈار، پتر جمال دا
آیا دلیں ونگار، بکھو چودھری
اوہ پالے قول قرار، نکے دے پوترے
نورے دھروہ تلوار، چھنڈی زور نال
وت چھاتیوں لگھی پار، باہیں وڈھ کے
سداد، شبیگ، ستار، دَلاں دے چونویں
سر سداد دے بھار، وانگوں دھول جوں


10
ڈھاڈھی اَٹ چتاری، اگے داتیاں
خان گولے کی سرداری، آد قدیم دی
نورا سچی داڑھی، صدر سلیم دا
اوس کیتے مار ستھاری، ماہنی جیت مال
چھجا لئی کچہری، دتا چوھری
کیمے دی آمد بھاری، کسے نہ ڈکی آ
آیا ڈنڈ ابھاری، وانگن شیر جیوں
لئیوس مل سلاری، نور نَوَل توں
اگے ہاٹھ کراری، خان جمال کی
ویراں دی پنجالی، گل سداد دے
سداد وی تیگ سمھالی، گھڑی دوکان دی
بہہ اُستاد سنواری، چاڑھی مِشکلے
پھٹ نہ کیتے کاری، سُدّھا سار نہ
پتراں اُچی بالی، خان ادھم دیاں
سر چھتر نبی دی یاری، مدد مرتضٰے
آئے دھروہ تلواریں، ساہویں دلاں نوں
سداد توں منگدے واری، فتح خان دی
واہ توڑ نبھائی یاری، سمو خان کیاں
کر سودے گئن وپاری، ہتھو ہتھ جوں


11
پڑھ ڈھاڈھی اَٹ سنائی، اگے داتیاں
جو کجھ کرے الٰہی، سر پر ہوسیا
جپیاں کیتی دھائی، کر سموہ جوں
خیرے نوں دُہائی، لکھاں جوان جوں
چُنگ تیگ کیمے ہے چائی، ذمہ نور دا
آ خیرو بھاجی لاہی، خان پیروج دی
ٹوپے دی بھر لئی پائی، آکے جپیاں
بیوی بھؤ نوں وڈیائی، دئیو مبارکاں

12
دوہاں دلیں مقابلہ، نت وتے نور امالیا
سمو کیاں تے خان برہان، رل ویر بھراواں گھالیا
اوہناں ویر لیا فتح خان دا، چھ لاہ کے بارھاں چاڑھیا
پڑھ تداں مبارکاں گہنے تے جانی بیگ نوں، چِک دھوکھِر نُورا واڑیا


13
جکے فت پھتوہلوں، سچ ناں گنایوس
ملک علی، شہمیر دا، سر بھار اُٹھائیوس
تمک سدووال دا، دے گھائیاں وایوس
ڈُھڈھی خان شہمیر وانگ، گھت بیٹھا ہایوس
کلتر سمائل خان دا، بھرپور لگھایوس


14
ہکیہی دھکے ملک علی، شہمیر دی، پگ بدھی جکّے
جکے توں کمبے ملتان، لہور تھڑکّے
پوترے وِیسے، جھامب دی، بھاہ وانگ بھڑکّے
پھتاں ساہن سریک دے، پیٹ دھروہ رڑکّے
بھچھ محبت ڈھویوس، آوے وحی تکّے
محبت توں جھگڑ پِتریے ساہمنا، ٹھاہ کار کڑکّے
خان محبت جھگڑ کے، وریام پلکّے
رعیت تیری تے توں خصم، کون تینوں ڈکّے
پگ تمھارے باپ دی، ملوم خلقّے
خان محبت جھگڑکے، دربار نہ جھکّے
پکڑ کہایوس جکھتیار خان، اکھ پھور پلکّے
گجے محبت ماہنیاں، وانگ لودی ککّے
ہایے سارا کھتروس، وریام پلکے
صفت کرن خان دی، وچ حاجی مکے
کھیوے وانگ محبتوں، پنجند دھڑکّے
چھوٹا ہویا خان وی، کوہ چاچے سکّے


15
نُورا نرور بادشاہ، وڈ یارُو ڈھول
تیرے گل وڑین گجنیں، نورا بہلول
میں ویر چتاراں باپ دا، ویکھ ہاٹھیں کول
میں دھرتی تے اسمان چوں، لیساؤں گول
نہ او لوہڑیا ! ڈر وڈے رب تھیں، الا نہ بول

16
نہ او ماما ! لوہڑے سوئی آکھیِن، جیہڑے دودھ پیون جھگا
ملک علی، شہمیر دی، سر میرے پگا
بُک اُٹھیواں جھل چوں، شینہہ کیہربگا
میں سگند خدا دی، سن مام ابھگا
میرے نت گُھرن دربار تے، سر ماہنے دھرگا
کھوج پھتوہل باپ دے، آساؤں لگا


17
آ او محبت بھنیا! جیس دیہاڑے متھے آوسیں، تیرا آدرلیساں
چنن چوگ ارگ دے، چاں کُنگو چھڑکیساں
دھرو میانوں سار دی، مزمانی دیساں
خضر، دولت، لکھمیر، عبدلوں، ٹھٹی جا ولیساں
وِگھ گرجاکھ آیا، کیوں مونہہ موڑیساں
جیہی دتی ہام تیرے باپ نوں، ساہ پنوں دیساں


18
ماما مرن قبول ہے، میں جے تینوں ماراں
سانگیں، تیگیں، برچھیں، چھویاں، لجھ گھت کٹاراں
ستی، کھیوا، مہنگرا، داد، سدو تاراں
گلاں جو میں تے تیریاں، ہوسن درباراں
ایسی مار مراہیں جولے، اک تیہی واراں


19
میں نورا صاحب نبی دا، انصاری جابر
چڑھ ندھے آ کے، شاہ مرد اکابر
جیویں دلی کیتا ہا نال چگتیاں، لہور مقابل
میں توہیں جِدّے ہوونا، آرام نہ آبر
محبتا بھنی
أ ! تینوں تس دن جھلسی، یار بیگ اکابر


20
آ او ماما یار بیگ اکابر، اشراف ہے گھر جاون تیرے
میں وی جانناں چدھرڑاں دی ذات چوں، ہک ہتھ اُتیرے
میں وی پھرناں رات دینہہ، بیگ ہندی ہیرے
میں لیساں پھتوہل، بیگ نوں، داء آوی میرے


21
نہ او بھنیئا ! آئی باجھ نہ مرسیا، یار بیگ نہنگ
یارو سوجا سلطان، لکھیا اورنگ
وڑتل خضر خان دی، شہزادہ بنگ
عبدالغنی لطیف کے، کوٹ کھلن نپنگ
مجلس گہنے تے جانی بیگ دی، مت گھتیں جنگ
محبتا بھنیا ! بیلی نند آوسنی، خیر سر اچ منگ


22
توں صاحب نبی دا، راجے جیس بدھّی
ٹھِل جہاج سمندروں، آ لائیم کدّھی
آہیں سارا کھتروس، وریام پندِّھی
میں توہیں جدے ہوونا، پگ ہیموں بدھی


23
سور خداوند بادشاہ، وڑ چھل گواہاں
ویکھ جانی گہنیا، سر پٹ اُتاہاں
باپ اساڈے نوں مار کے، لٹ لیا اساہاں
اساں من پوجے اپنے، ہور کہیں اکھاہاں
جیت نَوَل وساہیے، سو لنگ گھتاہاں
جے گڑ دتیاں ماریے، کیوں ویوہ دیواہاں
مامے نور نَوَل نال، کر ساک بھڑاہاں


24
ساجے ساک نَوَل نال، جانی پردھان
نُورے مَیل نہ ہاں تے، خاص مسلمان
نوریا گلاں کُجھ اہولیاں، اگے فرقان
آؤ بیٹا فتح خان دا، سرخرو میدان
اوہ گلاں کرے بھلیریاں، جھنگ سنیا خان


25
سنیا جھنگ جہان خان، آ ڈُھکیا اُپرت
ہکو پنڈا ساس ماس، خون ہکا رت
گھلیا لکھیا جہان خان، پروانہ ہتھ
چاچے جوں لکھیا ڈٹھا، نندل میں مت
چودھری پیر رکیبے دیونا، ویکھ دیویں خط

26
ڈٹھے گھت نَوَل خان، کیوں گھتے موآ
کیس پوجا جھنگ دا، پہن چنن چوآ
چڑھدے خلق نَوَل نوں، آ دتونیں ڈھوآ
نورے ونڈیا خلق نال، کہ احسان اڑوا


27
بیگ اُسارے ہویا، مجلس پچندا
نورے دے گھر یار بیگ، جیویں رام، جسرت ہَندا
بیگ اساں البت اوتھے ہوونا، جتھے خان ہَوَندا
کھیوے دے دربار تے، نت راہ رکھندا
تیرے ہتھوں ماہنیاں، نت سجرا بندہ
چودھری کیہ مسلت نال اُلاگھنا، نت گھر خیریں سندا


28
چاول کسے نہ ، جھب لئین گچاگ
سنو پَرجا کن دے، مٹ ہوون اکاب

29
چدھرڑیں صدر سلیم کے، مگلیں ممرالے
بیٹے نور نَوَل دے، آدی ٹنگسالے
خضر، جسرت، لکھمیر، عبدلوں، وریام ہٹھالے
دینہہ دینہہ نورا، بیگ نوں، اسمان اُلارے
یارو ہویا چودھری، متھے بھگالے
باپ سدھور چڑھایا، چونترے مگلالے
وداع کریندا چلیا، بیگ بانہہ اُلارے
چڑھ لت رکیب دے، سور لنگ چھترالے
جتھے بی بی سردول، لاہ ڈِکے پالے
ملے نَوَل جہان خان، جھنگ سیالاں آلے
میں سنیا گھر بیٹھیاں، آتیہی ڈھالے
چاچا تیتھے دشمناں، گھتے کُرالے
خان محبت تے یار بیگ، بھنویے تے سالے


30
منگن ہارے بیگ نوں، گاون پربھات
نورے دے گھر یار بیگ، ہے ساری کرمات
بیگ تیتھے ست کھنے چودھرائی دے، رب ہندی دات
کوٹیں آون فوجدار، ودھیں گجرات
جتھے چین سانور تے کنچل مروڑ، فیل وڈی ذات
اوہ بہن دلچیں اُمرے، کر بہن جمات
جتھے مہر مُگل تے کارکن، بھر جٹن واٹ
پیل چلائن داعیاں، سبھ منن طاعت
لشکر یارو بیگ دے، کل بھرن صفات
اُمرے پرچن بیگ توں، ہک تیہی بات
یارو کے چودھریاں چوں، یار بیگ الائے گھات


31
گھات الائے یار بیگ، چنگا ہوسیئی
اُگو تے وِجھل، جھامب چوں، نورا تریوہیئی
اوہناں دو دو تریونہہ نَوَل تے، مڑ دھروہ کیوئی
واگھا ایڈی وڑتری، چیر لگھ گیوئی
آہدے: اسیں لئیے ہکس بھرا نال، یار بیگ وڈیوئی


32
یارو جیڈا چودھری، ہور نہیں کوئی
جھنگ مجلس خان دی، نورے سنیوئی
کہ ڈپھر کے یار بیگ، مسلت ہتھ ہوئی
33
سن اُسارا بیگ دا، جھنگ نورے باوے
نورے مجلس خان دی، آرام نہ آوے
مینوں رخصت دے جہان خان، جے اللہ بھاوے
متاں ماہنی تے وِسے یار بیگ، لے بازی جاوے


34
نہ او چاچا ! بازی بیگ نہ دیسیا، مسئلہ ہتھ پورا
مینوں خطرہ نشاء جوان تے، سن چاچا نورا
توں پیو تے داد سلیم خان، جھامب سگھر چورا
چاچا ! یارو مونہہ آیا سار دا، چُور کرے تاں نورا


35
توڑے بیگ تاں نوریا، کول ہوندیوس بھائی
صدر، سمو تے شیر خان، ور جاگا چائی
کلو، دولت تے پیر خان، سردول ہوائی
جنھاں گلیں میں بیگ نال، مجلس پکائی
جہان خانا گزرے ہوئے کم دا، پھیر ہتھ نہ آئی
36
پتھیریانے سردول، وڑیے ست جنجیں
توں کیہ دینایے ویریا، چڑھیا مشکنجیں
اساں شیرو آوندیاں، پی کر ہوئی ہے تھنجیں
چاچا ! جیس دینہہ پچادھی آیا، توں گھر ونجیں


37
پتھیریانے سردول، وڑیے ست جچی
دینہہ دینہہ کوڑ کریندیاں، آ ہوئی ہے سچی
ماہنی تے جیت مال دی، کل سجی نچی
محمد کلیں کدایے، مسلت ہتھ گھٹی
فصل چکاون چڑھیا، لہوریں نٹی
پہلوں لائیوس کلری، من تیہی چٹی
خضر چڑھیا کچھیوں، ارزانی گھٹی
چڑھیا رات گزار کے، راء حسن بھٹی
لئیے ہکس بھرا نال، یار بیگ انٹی


38
سور خداوند بادشاہ، سچ پڑھاں وچار
مگل ابھردیوں تے دھمیوں، ہویا اسوار
شہنائیاں تے مرلیاں، دھونسیں دھسکار
نجے، جھنڈے، بانسر، چھین گنار
چڑھیا نور ترک نال، ہو جھجھوں جھار
یارو چدھرڑ کھلی بندیں آیا، باگ ماہنے ہار


39
بھڑدے ماہنی جیت مال، کل نچی گنگوں
بولے بول نَوَل نوں، کر خیز تُرنگوں
نورے گھٹ نہ ساگھرو، سیال بہائی ہے کنگوں
سرے کسائے سردول، پی پھُل نپنگوں
بیٹے نور نَوَل دے، کیوں گُھسن ڈھنگوں
حسن
ؓ سگھرا امام، ویکھ بہشتوں منگوں


40
لنگ پیونیں موت دا، کچ واچیں کتھا
جھنگوں چڑھیا نور خان، تولے ابھرتھا
بیٹے ملے نَوَل نوں، لا پیریں ہتھا
پوہتا نیہوں کلری، بادشاہی جٹا
محمد شاہ کے کھوٹے وساہ تے، چودھری نو تھینہہ لتھا


41
لتھا نور وساہ تے، جن مکے حاجی
مسلمان نبی دا، خاص پاک نمازی
مییے دے الاء تے، میں ہوواں راضی
میاں تُرت نَوَل نوں، ٹھوہ روٹی سازی
لکھے لکھ تمجس ، دوڑ ایس پازی
خبر محبت خان، پہچایوس تازی
ویلا آ محبتا، لے ساروں بھاجی
میں چا قرآن وساہیا، نور وِیسا غازی


42
وسیا نور قرار تے، بادشاہی ریتا
دوآ محمد شاہ وگایا، ماہنو سکریتا
اوس ہتھ محبت خان دے، کھڑیا لکھیا دتا
لکھیا خان پڑھایا، درمیان مسیتا
اوس نفر سدائے چونویں، یار بیلی نیتا
اوہ نھاتا گھڑی ولٹ کر، کڈھ میل پلیتا
اوس کپڑ پہنا من بھاوندا، پٹ سدھے سیتا
پکڑ سواری سرے دی، سو لاہو پتیا
خان محبت چڑھن نوں، ٹھوہ آہر کیتا


43
بھینا چڑھیا محبت دھرو تے، مسلت ہتھ پورا
آدی لتھے چودھری، البت ضرورا
خان محبت بھوچریں، نوتھینہہ ہے نورا


44
بھڑدے ماہنی جیت مال، وریام پکیٹ
وگدا آیا بھوچریں، لگھ چندل بیٹ
رات گزاری شوق نال، آسائش لیٹ
سون نہ دیوے خان نوں، دُوت لگی تریٹ
زور محبت مرن نوں، آ دتی پسلیٹ

45
سور خداوند بادشاہ، سچ جانی گائے
جتھے آل رسول
ؐ دی، اوتھے وی جائے
اگے خان محبت دھروہ دے، شطرنج وچھائے
ماہنی آپ نہ ہوسنی، باجھوں ازمائے
مرد ہویائے یار بیگ، اج سیال سمبن آئے


46
بھڑدے ماہنی جیت مال، کل تتھے ڈُھکی
رت پیون، ماس کھاون نوں، نیڑے لکُی
جکھ کنگل بیتال بھوت، لے نارد حُقی
سرھیوں سایہ ونکیا، رت پوریاں سُکی
ویری ڈٹھے ویریاں، مسلت چُکی


47
مسلت چکی تے مونہہ ملے، کون ملیاں چھڈے
زور محبت آیا، وانگ دھرانو تڈے
اگے گجب نَول سلیمے، آن چیرسیا چڈے
نہ کر دھروہ محبتا، مت آوی ہڈے
خضر، یار بیگ نال، شاہ شیخن دے تڈے


48
بھینا ! چڑھیا محبت دھروہ تے، کاہیں واک رہائی ہے
پہلوں ماداں ورجیا، وت پھتاں مائی ہے
پھتاں آکھے خان نوں، بچہ وت ایڈا چاہیے
ست کھنے چودھرائی دے، سر نال ہڈھایے
تتسا کیوں گلاچیے، تھوریڑا ای کھایے
چدھرڑ ہے شینہہ دا شکار، مت بہتا ویایے


49
سور خداوند بادشاہ، رب کردا آپ کماں نوں
محبت ویر چتارے باپ دا، بہہ کردا یاد موئیاں نوں
نت کھلا اُڈیکے نور نوں، جیویں ویکھے لوک چناں نوں
چڑھ آئن صدر سلیم کے، آ چڑھیائے چن رمضانوں
اوہ ملسن سجن سجناں، جیویں سکے ویکھ سکیاں نوں
اوہ ملسن ملویر، پھوپھیر، جیویں پروانے ویکھ شمع نوں
مرد ہویا ہے یار بیگ، اج مشکل ہویا ہے تسانوں
50
کمریاں اگے چھاترٹ، جن شینہاں واگُ
آکھے نور، سلیم دا، سن بیگ ابھاگُ
ویکھ کنھاں دے سراں تے، آ بولی ہے دھراگُ
ہوون رل کے کاہلے، لہوری ٹھگُ
جنھاں ظاہر ہتھیں تسبیاں، گل گجھے ترگُ
نیہوں رہندا ہوڑیاں، نہ ناناکی رگُ
لئی لوڑینایں یاربیگ، کھیویانی پگُ


51
نہ او باوا ! پگ مبارک اپنی، درگاہوں آئی
حکم خدا رسول دے، توہیں آپ بنھائی
اساں جُڑ چلایے مار کے، موڈھے ڈڈھیائی
اساں حرف کراہیں روبرو، مستی مردیائی
چونترے سمبے آیا، نور خان جن متھا لائی
نوکر چاڑھن سورمے، سردول ہوائی
اوہندی صورت تے پوشاک دا، کجھ کہیا نہ جائی
جامے، نیمے، چولنے، پٹ سُدھے دھائی
کسب دوپٹا ململاں، شالاں دریائی
ڈھالاں جمدر کاتیاں، رومال وڈیائی
دھنواں ترگش، سِپرا، سان تیگاں لائی
سنجیں، پنجیں، پچریں، سو لاہو آئی
بیٹھے ہوون کاہلے، مجلس بنائی
نانے، مامے تے بھانجے، ویر ماسٹر ہائی
ماسٹر، پھپھڑ، ماولے، سوہرے جوائی
متھے ترڈھی تے پیٹ دھروہ، واتوں مٹھّیائی
بیٹھے نور نَوَل نوں، دلاور میر وگائی


52
بھڑدے ماہنی جیت مال، سیال بہائی ہے سیئا
نورے دے گھر یار بیگ، جیویں چنن ملدئیا
ہتھوں یارو بیگ دیؤں، راٹھاں ہو جیئا
یارو لکھمن دیوتا، ہَنوَنت بلیئا
مار دوگھٹ جو جھاڑیوس، دہسر لیئا
وِجھ ونی دا بادشاہ، مستان ہتھیئا
پرنس جے نورے باپ دے، بگ گج اُٹھیئا
اگے بیگ اُتاولا، ہور تھاؤں پیئا



53
تیگاں بیگ وگائیاں، سچ آئیاں کار
اُبھردیوں تے لہندیوں، سنیا سنسار
نور، محبت ٹکرے، شیخن وچکار
ڈھاڈھ بلن کرمانیاں، کتنی مدار
لئی کریمے مشری، وڑ ماہنے ہار
یارو دے تن چھنڈیوس، رن دست اُبھار
کیہی نشانی گھاہ دی، واچیں وچار
جن رنجانا امب دا، ٹاہل اوس دا کار


54
بِھڑدے ماہنی جیت مال، گڑھ شیخن شاہ
ڈھاڈھ بلن کرمانیاں، کیہی سُناہ
لئی سجے ہتھ یارو مِشری، سر آوی بھاہ
جسڑ دے تن چھنڈیوس، سمب شیر سنباہ
وینی، پنجا، بیرکھیت، نشانی کاہ
جن راہک ترینگل سٹیا، کھلواڑا گاہ



55
سمبے بیگ اُٹھی
أا، لے پیو دا ظن
نورے دے گھر یار بیگ، جیویں راؤ دے کرن
یارو دھروہی مِشری، دھون اوندا گن
جف تنھاں تیگ نال، بُھلا گردن
بھلا خضر بیگ نمردا، پے جاندا بن
تیگیں وڈھیا آرییے، ہوئی دو کھن
اوس دھری محبت خان نوں، چھوہ لتھی کن
جن کُلنگ تریکیا، ادھ وچوں چن


56
پیو پرنایا کامریاں، سمبے اُٹھے
جھل جھلاون سردول، کیوں مڑن اپٹھے
پُھپھے آئے ویرتے، تلواریں جُٹے
انج بِھڑے چگتے قزلباش، خرسانوں گُٹھے
سر دھڑ باہیں گنلے، دے ویریں کُٹھے
جن جہاج فرنگیاں، دے بازی مُٹھے
تیگاں بیگ وگائیاں، دوویں تیگاں رُٹھے
پہلی ہڑبے آہری، تیگ دوئی سو پُٹھے

57
چدھرڑیں صدر سلیم کے، مُگلیں ممرالے
بیٹے نور نَوَل دے، آدی ٹنگسالے
خضر بھچھ بھڑایا، یار بیگ چھترالے
چھبی تیگاں چھنڈیاں، خضر دھڑیالے
ست محبت خان نوں، اٹھیں کلواڑے
ویکھاں حرف قرآن دے، چھ بارھاں ڈھالے


58
تپک محمد بیگ دی، کسے رنگ وچیئی
سکہ کپر گھتیوس، دے دارو بھبکیئی
کُوہی میر شکار دی، اُڈ چڑھی اُتیہی
نارد کُوت چھڑکیا، روندی ڈسکیئی
پھیر بھتار نہ چاڑھی آ، روندی اُٹھیہی


59
نور، محبت ماریا، گھت کیہی اڑی
اوتھے یار بیگ وانگ، ہور کیہڑا لڑی
خضر کھیڑی خان دی، گردانوں گھڑی
جن وِجھ منارا توڑیا، ویراں دی جھڑی


60
جھڑی وسیئی اُٹھیئا، ہاتھی مستان
ختم محبت ماہنیاں، علموں فرقان
کرکے دھروہ نَوَل، لدھس میجان
تیگیں بدھا کامریاں، ہویا حیران


61
خان لگی حیرانگی، ہویا مشتاق
بھڑے ماہنی جیت مال، کر کھوٹے ساک
نت نَوَل نہ ماریے، بھنیوے واک
اج ہوندے کول نَوَل دے، جیت مال کجاک
جسٹر، کاویں تے کلواڑ، آدی زور ناک
اج گئے محبت نوں چھوڑ کے، ماہنی لٹاک
چودھری دلاں دا سرخرو، دولت اُشناک
دولت نواب نوں چھنڈی آ، کنڈ دوئی پُٹھاک
بھبھر وڈھن مشریاں، وڈھ کرن جھراک
جوگی بھگوے کپڑیں، ستے نندراک
جواناں دی رت پھٹوں اُچھلی، کیہی ڈماک
چندل نور، سلیم دا، جیویں شالم ٹاک
بِھڑے چدھرڑ تے ماہنی، جیویں نیانی ہے ٹھاک


62
سور خداوند بادشاہ، رب کم کریندا ہر دے
پیدے کیتوس پنج تن، جیہڑے ساقی حوض کوثر دے
سید آل رسول دی، اچے شان اماماں دے بردے
پیڑ تازی آندن نفراں، پیر دے رکیبن دھردے
اوہناں نوں لاج ہے حضرت شاہ دی، گڈھیں گھت سیدہن لڑدے
اوہ وانگ محمد حنفیے، تیگاں دھروہ دَلاں نوں وڑدے
اوہ بیٹے شاہ سلطان دے، نیت آئن حرف شکر دے
اوہناں لک ولائیاں مِشریاں، گھڑیاں دوکان منچر دے
اوہناں دھروہ میانوں کڈھیاں، جیویں شب رات مساہرے بلدے
اوہناں ستر ماہنی ماریا، پچھ لیکھے جا دفتر دے
کلو، دولت تے پیر خان، ہان غلام امر دے
وطن اوہناں دا ڈھاک، مسافر پنچھی سر دے
بیٹے نور نول دے، چُک لاہنے بیٹھے گھر دے
رہیا دل ارمان جوں، ناہن زور بھراویں پھردے
اوہ پئے ملوکاں ہاڑ وچ، پیالے پی صبر دے
لوتھاں تڑپھن رت وچ، جیویں مچھ پانی وچ تردے
پھدھ سیداں پربت گیڑیا، توڑ خبراں کوٹ نرور دے
اوہناں گھتی دُھم کہاجوں، بھنے شیشے عطر گر دے
کنتھ اُڈیکن رانیاں، کرلاون کھڑیاں در تے
ہک گوڑھے رنگ سہاگنیں، بت روضے سنگ مرور دے
گل لٹکن زلفاں کالیاں، جیویں کنڈل ناگ بشیئر دے
وین کریندیاں بیبیاں، سہاگ ترٹیانیں ور دے
فتح کھاتو سوڑاں ڈِٹھیاں، نہ ایڈے تاء قبر دے
اوہندا پِھپھر سانگاں سلھیا، کون سیوس پھٹ جگر دے
واہ ملیوس لیکھ نصیب جوں، لکھے ہوئے نیں کم پرور دے
اوہ کونجاںوچ ہوا دے، کرلاون وین قہر دے
ٹرے صراف جہان توں، کون پیسی مُل گوہر دے
کر وداع ٹریا کاہن جوں، سنج کوچے پئے متھر دے
اوہ کوئل ہوئیاں گوپیاں، بُھنے کباب اندر دے
کر سودے لین وپاریاں، پے خالی بھار شتر دے
جیویں سوداگر کیچ دے، ویچ ٹرن بھار عطر دے
مچھ تڑپھن وِن پانیاں، جیوں سُکے نین ترور دے
اوہ لبن پِون سہاگنیں، جیویں پون خیال ابر دے
گزری رُت بہار دی، لگھ گئے نیں دن چیتر دے
پیا وچھوڑا سجناں، میل ہوسن روز حشر دے
63
تھوڑے ویکھ سلیم کے، کیوں پیؤں محبت توں بھُل
توں انج ہے محبت ماہنیاں، جیویں باگیں کیچکدا پُھل
توں تارا ترٹایے امبروں، آ پیایے دھرتی تے رُل
اگے چدھرڑ ہین صدر سلیم کے، تیری کیتی دا پایا نیں مُل
یارو بیٹا نور نَوَل دا، اوہ کنڈے لتھا تُل
مارے نور، محبت خان کی، آپئی چنھاویں ہُل
تُسیں پِٹو ون چدھرڑیں، مہریٹیاں او،
جیہا پِٹنا کھیوے تے جیہا کُل

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels