Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> ماں بولی۔ اک ڈاکٹری نظریئے توں >> ماں بولی۔ اک ڈاکٹری نظریئے توں

ماں بولی۔ اک ڈاکٹری نظریئے توں

ڈاکٹر ہرشندر کور
June 19th, 2008
4.5 / 5 (4 Votes)
میرے ولوں :

مینوں بچپن و چ میرے بھاپا جی، پروفیسر پریتم سنگھ جی اک دنت کتھا (دیومالائی کہانی) سنایا کردے سن، جو اوہناں نوں میرے دادا جی نے سنائی سی تے اوہناں نوں میرے پڑدادا جی نے۔ ہویا انج کہ اکبر بادشاہ ویلے دربار و چ رب دی بولی نوں لے کے جھگڑا شروع ہو گیا۔ ملانے کہن کہ رب دی بولی عربی ہے تے پنڈت کہن کہ سنسکرت ہے۔ اس گل دا فیصلہ کرن لئی کجھ گُونگے تے بولے بندے لبھے گئے تے اوہناں نوں اک قلعے اندر بند کر دتا گیا۔ پندراں سالاں بعد اوہناں دے بچے باہر کڈھے گئے تاں جو اوہناں دی بولی توں ایہہ پتہ لگ سکے کہ رب دی بولی کیہ ہے؛ جدوں اوہناں نوں بولن لئی کہیا گیا تاں اوہ سارے اوں، آں، کر کے ہی چپ ہو گئے۔ اس توں ایہہ تاں ثابت ہو ہی گیا کہ رب دی آپنی کوئی بولی نہیں۔

بچے اوہی بولدے ہن جو اوہ سُندے ہن۔ جدوں گونگے بولے بندیاں دے بچیاں نے کسے نوں بولدے سنیاں ہی نہیں سی تاں اوہ وی اوہی آوازاں کڈھ سکدے سن، جہڑیاں اوہناں دے ماپے کڈھ رہے سن۔ نتیجے وجہوں سُن بول سکن دے قابل ہُندے ہوئے وی بچے گونگے بن کے رہ گئے سن۔ اس دا مطلب صاف ہے کہ بچے لئی اوسدی ماں ہی رب دا رُوپ ہے تے جیہڑی زبان ماں بول رہی ہووے، اوہی بچے لئی رب دی بولی بن گئی۔

ہالے تک بولی دے ماہراں تے دھنی وگیانیاں نے بولی بارے بوہتی کھوج کیتی ہے تے کھوج پتر لکھے ہن۔ جے غور نال ویکھیئے تاں بولن لئی جیہڑے جنتراں دی لوڑ ہندی ہے، اوہ ہن: کن، اکھ، سنگھ، تالُو، اُپرلے دنداں دا اندرلا حصہ، بُلھ تے جیبھ ایہہ سارے انگاں دا بریکی نال معائنہ کرنا ڈاکٹری پڑھائی دا اہم حصہ ہے۔

جے ایہہ سبھ ٹھیک ہے تاں کسے ڈاکٹر ولوں بولی اُتے لکھنا تے اوسدا بچے اُتے پَیندے انسانی اثر نوں گھوکھنا جائز ہے۔

اسے لئی میں بچیاں دی ڈاکٹر ہُندے ہوئے ایہہ موضوع چُنیا ہے، کیونکہ بچے دے شخصیت اُبھارن و چ ماں بولی ایہہ اہم رول ادا کردی ہے آپنی ماں بولی نوں نیواں سمجھن والے آپنے آپ نوں وی ہین سمجھن لگ پیندے ہن تے آپنے سبھیاچار تے پچھوکڑ نوں وی۔

مینوں آپنی ماں بولی تے فخر ہے تے میں اسنوں دنیاں دے ہر کونے تک پھیلدی تے چھلانگاں ماردی اُتانہہ چڑھدی ویکھنا چاہندی ہاں۔ اسے لئی ماں بولی دے ہر پہلو نوں گھوکھ کے میں ہر اوس پنجابی دے ضمیر نوں ہلُون دینا چاہندی ہاں، جس دے دل وچ پنجاب ، پنجابی تے پنجابیت بارے رتا وی پیڑ ہے۔

مینوں مان ہے کہ میں اوس پیو دی دھی ہاں، جس نے زندگی بھر پنجابی بولی دے حق وچ ہک تان کے ہر مصیبت جھلی ہے تے آپنی کمان نہیں چھڈی میں اوسے جھنڈابردار دا پرچھاواں ہاں تے اوہی جھنڈا لہراؤن دی میں وی قسم کھاہدی ہے۔

میں شکرگزار ہاں سردار گرندر سنگھ ڈھٹ جی دی، جنہاں نے نیوزی لینڈ و چ بیٹھ کے وی مینوں ہلاشیری دتی رکھی تاں جو میں آپنے مشن وچ کامیاب ہو سکاں ہور وی کئی این. آر. آئی. ویر بھین جہڑے ویلے کویلے میری ہمت ودھاؤندے رہندے ہن، دا وی شکریہ کیتے بغیر میں نہیں رہ سکدی۔

میں شکرگزار ہاں اوہناں پنجابیاں دی وی جنہاں نے آپنی مٹھی ماں بولی نوں ایوں وگاہ سٹیا ہے، جویں اکھاں وچوں ہنجھو، کیونکہ اوہناں نوں جگاؤن صدقہ ہی ایہہ کتاب ہوند وچ آئی ہے۔

پنجاب دے چوٹی دے بولی ماہر ڈاکٹر ٹی. آر. شرما جی نے میری کتاب نوں لوکائی ساہمنے لیاؤن دی کھیچل کر کے اس کتاب نوں بھاگ لا دتے ہن۔

میں کیویں بھل سکدی ہاں آپنے بھاپا جی دی لگاتار ملدی ہلاشیری، جس توں بناں میرا لکھاری والا وجود ہی ادُھورا سی۔ میرے پتی ڈاکٹر گور پال سنگھ تے بچے سکھمنی تے نانک جوت دے پیار دلار صدقہ مینوں آپنے رجھیویاں بھرے وقت وچ تھکیواں محسوس ہی نہیں ہویا تے اس کتاب دا کم بناں رُکے پورا ہو گیا۔

انت وچ میں اس موقعے دا فائدہ چُکدیاں آپنی سورگواسی ماں دا وی شکریہ کردی ہاں، جس نے مینوں اینی پیاری تے اینی مٹھی زبان نال دھنی کر دتا ہے۔

میں ایتھے جالندھر توں نکلدے روزانہ اجیت دے مکھ سمپادک (چیف ایڈیٹر) سردار برجندر سنگھ ہمدرد جی دا وی شکریہ کرنا نہیں بھل سکدی، کیونکہ اوہناں نے میرے لیکھاں نوں آپنے اخبار وچ تھاں دے کے ساری دنیاں وچ پہنچایا۔ پنجابی وچ چھپدا اوہناں دا اخبار پردیس وچ بیٹھے آپنے بھین بھراواں نال سانجھ بناؤن دا وسیلہ بن چکا ہے۔

جس ذاتی دھیان نال سردار گرساگر سنگھ جی نے اس کتاب دی دَکھ اُگھاڑی ہے، اس لئی میں اوہناں دا وی دھنواد کردی ہاں۔

ڈاکٹر ہرشندر کور
ایم. ڈی.
(بالاں دی ماہر)

Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels