Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> پروفیسر سعید بُھٹا >> کمال کہانی >> راجا کرنال

راجا کرنال

سعید بُھٹا
May 21st, 2008

راجا اشوک بنارس دا راجا ہویا ہے۔ ہر بادشاہ یاں راجے نُوں اعظم دا خطاب نہیں ملدا۔ اشوک اعظم سدایا ہے جیویں اکبر اعظم سدایا ہے یاں سکندر اعظم سدایا ہے۔ اعظم دا خطاب اوہناں بادشاہاں نُوں ملدا ہے، جیہناں دے ہیٹھ کئی راجے ٹکے تار رہے ہون۔ اشوک بنارس دے وِچ بہہ کے ٹیکسلا تائیں شاہی کیتی ہے۔ گویا کہ سارا ہندوستان اوس دا ہا۔ راجے اشوک تے پُتر کوئی نہ۔ باغ دی سیر کریندا آوندا ہے۔ مالی توں پُچھیا ہے کہ ایس بوٹے پھل کیوں نہیں لیا؟ اوس آکھیا، ''مہاراجیا! ایہہ قدرت ہے اوس ذات دی، جیویں تینوں اولاد نیہسوں دِتی۔ انجیں ہار ایس نُوں وی ہور کمی کائی نہیں۔ زمین وی اوہا ہے۔ پانی وی ہے۔ محنت وی ہے۔'' راجے دے دل تے ٹھوکر لگی ہے۔ ہر بندے دا کم نہیں ہوندا مثال دیونا۔ کئیں کئیں بندے مثال دیون تاں دوئے دا بیڑا بوڑ چھوڑیندن۔ راجے دے دل تے ٹھوکر لگی ہے بھئی سارے باگ وِچوں میں وی
دنیا تے انجیں آیا ہاں، جیویں ایہہ بُوٹا ہے۔

٭ راجا کُنال
راجا لگا آیا۔ اوس قوم اپنی اکٹھی کیتی۔ اوس آکھیا، ''ایہہ تخت، ایہہ تاج، اوہ خزانے تے ہر شے قابو کرو۔ اساڈا دُنیا اچ حصہ کوئی نہیں۔'' ہر بندہ مالی نُوں کجھ آکھن لگ پیا ہے۔ کیڈا بے وقوف نکلیا ہیں۔ کیڈی گندی مثال دِتیائی۔ اوس ویلے لوکاں آکھیا ہے: راجیا! ہر شے اُمید تے زندہ ہے۔ خدا دی رحمت توں بے اُمید نہیں ہوونا چاہیدا۔ اُمید ترُٹ جاوے تاں انسان دی زندگی ختم ہو جاندی ہے۔ ہر چیز دا علاج ہے۔ ہر کم دی کوشش ہے۔ توں انج کر، ہک سادھو فقیر ہے، جنگل دے وِچ واسا ہے اوس دا۔ دُنیا توں تارک ہے۔ گھاہ، پتا کھا کے اوہ رب دی عبادت وِچ رہندا ہے۔ اکھے، اوہدے کول لگے جاویے۔ اوہدے کولوں دُعا منگوایے۔ مت اللہ پاک تینوں سنبھالے چاں۔ راجے نُوں لے کے سادھو فقیر کول چلے گئے۔ چار کتاباں ہین ہندو مذہب دیاں، چار وید ہن۔ اوہ چونہہ دا حافظ ہویا ہے۔ اوہدے کول گئن۔ جا کے گریہ زاری کیتی نیں: اے فقیر اللہ دیا! دُعا کر راجے دے تخت دا کوئی والی بنے۔ ایہدی اولاد ہووے نرینہ۔ اوس آکھیا، ''خُدا بدھا ہویا اساں فقیراں دا وی نہیں ہوندا۔ آؤ سارے رل کے گریہ زاری کریے۔ مت کسے دی منظور چاں کرے۔'' فقیر ہتھ دُعا دے اُٹھائن۔ گڑگڑا کے دُعا منگی ہے بڑی عاجزی نال۔ رُنّے ہین دوئے لوک وی۔ کجھ دل نُوں تسکین آئی ہے راجے دے نُوں کہ انشاء اللہ فقیر دی دُعا مستجاب ہے۔ آ گئن گھر۔
دیہاڑیاں دے بعد اللہ پاک راجے نُوں پُتر دِتا ہے۔ اوس دا ناں راجا کرنال رکھیا ہے۔ ہندوواں دیاں مذہبی کتاباں دسیندیاں ہن کہ اوس لڑکے دی سوا انچ اکھ ہوئی ہے، آنہ۔ بے مثال آنہ ہویا ہے اوس دا۔ بڑا خوبصورت۔ جیس ویلے پنج سال دا بچہ ہویا ہے تے اوہنوں آن کے سادھو دے کول کھلاریا ہے بھئی ایہنوں علم پڑھا۔ اوس آکھیا: ''راجیا!
جنھاں آہلنے چھوڑ ہوا لِتی، وت اُنھاں نُوں اندریں واڑنا کیہ
جیہڑے دُنیا چھوڑ فقیر ہوئے، وت اُنھاں دا پڑتنا پاڑنا کیہ
میں آبادیاں چھوڑ کے جنگل مَلّیا ہے۔ میں آبادی تہاڈی دے وِچ آ نہیں سکدا۔ تینوں طاقت ہے ایتھائیں اپنے پُتر کان سامان مہیا چاں کر۔ نوکر نوکریں رکھ دے۔ میں پڑھیساں۔'' راجے انجیں کیتا ہے۔ پہلے دیہاڑے جیس ایلے بچہ آیا ہے پڑھن کان۔ اوس آکھیا، ''بچیا! علم ہین دوئیں۔ ہک روحانی ہے۔ ہک زبانی ہے۔ پہلی بات ایہہ ہئی کہ توں ایہہ نہ جان کہ میں راجا ہاں یاں راجے دا پُتر ہاں۔ انسان نُوں موت اگوں اُڈکیندی کھلی ہے۔ جیڈی وی ہستی دا ہووے، اوس مرنا ضرور ہے۔ ایس دُنیا دے مال مگر دُنیادار اپنا مال تباہ کر رہن۔ بچیا! ایہہ خیال کریں، ایس دُنیا دے مگر دین نہیں ونجانا چاہیدا تے پڑھ الف۔'' جیس ویلے بچہ سبق لین آوے۔ پہلے اوہنوں موت دے اُتے نظر دیوائے کہ توہیں مر جاونا ہے۔ توں راجا کوئی نُونہہ۔ مخلوق اللہ دی نال اچھا ورتیں۔
رب دو گلاں دے کان، ہے بندہ خلقیا
ہک حمد پڑھے سُبحان، صبح تے شام نُوں
نہ سورے کوئی غیران، خدا دے باجھ اوہ
نہ سمجھے غیب دان، بشر جن ملک نُوں
ہر نفع تے نقصان، خدا دی طرف تھیں
رب قادر ہے رحمان، ہر ہر چیز تے
دوآ-
ورتے وِچ جہان، تے نال انصاف دے
انسان دا کم کرے احسان، وِچ بِھیڑ دے
راہ خدا دے جان، بچاوے کسے دی
بھُکھیاں دیوے نان، تے آب پیاسیاں
جند، عزت، مال، امان، رہے وِچ فضل دے
ثابت نال ایمان، وِچ بہشت سِدھاوسیں
پڑھ کلمہ مسلمان، ایہہ ساتھی ہئی توڑ دا
لڑکا پڑھن لگ پیا ہے۔ تعلیماں اوس نُوں دو دیون لگ پیا ہے اُستاد زبانی علم وی، رُوحانی علم وی۔ اِکی سال دے وِچ اوس جا کے تحصیل علم دی طے کیتی ہے۔ اتنے تائیں جیہڑی اوس دے وِچ ہائی نا دُنیا داری، ایہہ فقیر کٹ کے سٹ گھتی ہائی۔ اوہ مجسم فقیر ہو چکا ہا۔ جیس ویلے ایہہ آیا ہے راجے بڑیاں خشیاں منائیاں ہین۔ کُل ہِند دے راجے نُوں دعوت دِتی ہے۔ اوہ آ گئے۔
ایس زمانے دے وِچ راجے اشوک شادی کیتی ہے۔ رانی شکُنتلا، اوس داناں ہویا ہے۔ شکُنتلا جیس ویلے ڈِٹھا ہے راجے کرنال نُوں، اوہ عاشق ہو گئی۔ اوہ حرکتاں کرن لگ پئی ہے۔ ایہہ مجسم فرشتہ ہا۔ ایہہ حیران ہووے بھئی ماں ہے میری۔ کیہ حرکتاں کریندی ہے میرے نال۔ اوس آکھیا، ''گل سُن۔ اول تاں گل ایہہ وے کہ میں ہر عورت نُوں دھی بھین جاندا ہاں۔ توں تاں ہوئیوں میری ماں۔ ایہہ حرکتاں کرنیاں چھڈدے۔'' اوہ مُڑ وی ڈڑھی رہی۔ راجے اشوک کرنال کان ساک چاں منگیا قلعے قنوج دے راٹھور راجپوتاں توں۔ ساک آدری گیا۔ گڈھیں پے گئیاں۔ خوشیاں مناون لگ پین۔ جیس ویلے جنج ایہدی چڑھن لگی ہے تاں رانی شکُنتلا ایس نُوں وکھریاں سدیا ہے۔ اوس آکھیا، ''گل سُن ایہناں اکھیں تیریاں میرا دھرم، شرم ہر شے کھس لئی ہے۔ میرا آکھیا من چاں۔ جے نہ منسیں تاں جیہناں اکھیں میرا دھرم کھسیا ہے، ایہہ اکھیں نہ کڈھائیں، تینوں پتہ ہے کہ راجے اشوک اُتے میرا بڑا قابو ہے۔'' اوہ ہس پیا۔ اوس آکھیا، ''رانیے! اِکی سال میں تعلیم لئی ہے اپنے سادھو اُستاد کولوں، جیہڑے پردے میرے دماغ دے ہان دُنیا داری دے، اوس کٹ کے پرانہہ سٹ گھتن۔ مینوں اوس پہلے دیہاڑے آکھیا ہا، ایہہ اکھیں ویکھ کے تیریاں آدم عاشق ہوویندا ہے۔ ایہہ اکھیں تیریاں نُونہہ رہنا۔ توہیں آپ وی نہیں رہنا۔
سِلحی خانے دَل بناونے
کوٹ قلعے محکم پاونے
سبھ موت سگھر بھنّ جاونے
باقی رب ستار ہے

کوٹ قلعے جند نُوں کر گئے
تدبیراں ڈھالاں دھر گئے
موت کے مارے مر گئے
باقی رب ستار ہے

اوہ ویکھ پئیاں آوندیاں کُڑیاں نی
ہتھ پکڑ ڈنگورے اُڑیاں نی
چر جُوہ سرہانیوں مُڑیاں نی
باقی رب ستار ہے
بھئی میری توں ماں ہیں۔ میں تیرا آکھیا نہیں من سکدا۔ توں اکھیں کڈھوا چھڈ۔''
جنج چڑھ گئی۔ ایہہ پرنی کے گھر آ گیا۔ رانی نُوں بار بار اوہ گل سٹ مارے کہ میں وعدہ کیتا ہویا ہے۔ جیس ایلے راجے دے کول شکایت کرن دی کوشش کرے۔ راجا آکھے، ''گل سُن ایس کرنال جیہا ساڈی جد اِچ کوئی نہیں ہویا نہ ہوونا ہے۔ ایڈا پاک بندہ ہے۔'' قابو اچ اوہ آوے ای نہیں۔ تاں جے ٹیکسلا دے وِچوں پیغام آ گیا۔ راجا! جیہڑا گورنر توں ٹیکسلا تے بہایا ہے اوہ باغی ہو گیا ہے۔ ساری سندھ اوس دے نال رل گئی ہے۔ سارا مُلک اوس بدراہ لیا ہے۔ راجا اشوک بُڈھا راجا ہے۔ تخت دے اُتے کھڑا ہو گیا ہے۔ اوس تقریر کیتی ہے۔ اے راجپوتو! کیہڑا راجپوت ہے، جیہڑا میتھوں انعام لے تے اوہدا سر کٹ کے پیش کرے۔ اجے راجپوت کوئی نہ بولیا رانی شکُنتلا اُٹھی ہے۔ اوس آکھیا، ''چودھویں مِدھیں ندھان ہے۔ سولھیں بندیں ثابت ہے۔ پُتر نُوں چاڑھ۔ شے تہاڈی ہے لڑیندا میلکھ نُوں ہیں۔'' راجا رو پیا ہے۔ اوس آکھیا، ''اجِن تائیں میں پُتر دے پورے لاگ ای نہیں دے چُکیا۔ کل ایہدی شادی پئی ہوندی ہے۔ چھیواں مہینہ ایہدی شادی نُوں ہے۔ توں ایہنوں مروانا چاہنی ہیں۔'' اوس آکھیا، ''معلوم ہوندا ہے تسیں نسل راجپوت نیہے۔'' راجا بولن لگا ہے تاں کرنال اُٹھی کھلوتا ہے۔ کرنال آکھیا، ''گل سُن راجیا! حُکم ہوندن دوئیں۔ یاں ماں دا یاں پیو دا۔ پیو میرے حُکم نہیں دِتا۔ ماں میری مینوں حُکم دِتا ہے جنگ دا۔ میں ایہہ داغ کیوں جھلاں۔ کیوں خاندان میرے دے اُتے لفظ آوے۔ میں تیار ہاں۔ توں مینوں اجازت دے۔'' راجے اشوک ہاں نال چاں لایا ہے۔ ''شاباش بچیا! حلالی دی ایہہ تعریف ہے۔ تینوں غیرت آئی ہے۔ سامان آلوں کمی نہ ہوسی۔
ہار جیت وس خدا دے، راٹھاں ایہو کجھ کرنا
اگانہہ ہُن بھاویں ہار آوی یاں جیت آ وی۔ ایہہ رب دے وس ہے۔''
ٹیکسلا دے گورنر دے نال اعلان جنگ ہو گیا ہے۔ تیاری ہو گئی۔ جیس ویلے ایہہ چڑھن لگا ہے تاں ایہہ پہلے آیا ہے ماں مترئی دے کول۔ ''گُستاخی کوئی ہوئی وی ہے ماف چاں کر۔ ماں بن کے اج ہتھ پھیر۔
بیگم کہندی ہے ماں نُوں، سُن ماں پیاری
پنجے دے چاں کپڑے، چھیویں پھُلکاری
ہاتھی دے چاں جُھولدا، کوئی سنے امباری
اج سیر کرن دے باغ دا، مائے جاندی واری
اساں مُڑ نہیں آونا پیکیاں، بہہ عمراں ساری
کیہ پتہ ہے میری موت ہووے۔'' اوس آکھیا، ''توں آیا ہیں میرا رگڑا کرن کان۔ میرے سر تے چُونڈا ہے۔ میں وی راجپوت دی لڑکی ہاں۔ میں تیری اکھیں نہ کڈھائیں تاں توں آکھیں۔ نہیں تاں اج وی آکھیا منیں چاں تاں میں راجے نُوں روک لیندی ہاں۔'' اوس آکھیا، ''تیرا ماریا ای میں وطن چھوڑو ہاں۔ نہ تیرے متھے لگساں۔ نہ گندیاں گلاں سُنساں۔'' اوتھوں چل کے اپنی ماں کول آیا ہے۔ ''اماں جی۔'' اکھے، ''جی۔'' ''میں جا رہیا ہاں۔ توں مینوں اجازت دے۔'' اوس آکھیا، ''بیٹا! تیری میں موت تے وی خوش ہاں، جیہڑا توہیں داغ نہیں جھلیا تے آپ تیار ہو گیا ہیں۔ نہیں تاں ایس سوکن میری مینوں ہمیشاں ایہہ طعنہ دیونا ہا۔'' اوس ویلے اپنی رانی راٹھور کول آیا ہے۔ راٹھور نُوں آکھیا ہیس ''لے۔
الف : اللہ آن ملایا تاں آن ملساں، اج قسمت چاں نِکھوڑیا ای
ساڈا دل ناہیا ایتھوں ٹُرنے تے، رب ڈاڈھے نے بنھ کے ٹوریا ای
تُسیں خوش وسو پیارے مُکھ والے، اساں دیس تُساڈڑا چھوڑیا ای
وقت سخت دوپہر دے جان محمدا، جاندیاں سجناں نُوں کہیں نہ موڑیا ای

میں جا رہیا ہاں۔ اللہ نُوں سونپی ہیں۔ جیندے ہویاسے تاں وت ملسائیں۔'' اوہ روون کڈھ ڈڑھی۔ اوس آکھیا، ''گل سُن۔ میں اوس قوم دی، اوس نسل دی عورت ہاں، جیہڑیاں خاوند دے مُردے تے مر ویندیَن۔ نال جل ویندیَن۔ ستی ہو جاندیَن۔ میں جیندا خاوند کیوں چھوڑاں۔
توں ٹر چلیاں ہیں، ہو کے راہ پدھانو
میں کجھ نہ کھٹیا، بن کے تُدھے دا جانو
اج کریہاں وانگ بھار چوائے نی، اساڈی ہک وی نہیں ساہنو
نشے وانگ شراب دے، رہیا ہیں من توں لاہنو
میں تیرے نال''۔ اوس آکھیا، ''بیڑا ٹِھل جاوی توں ستراں دی پلّی ہوئی شہزادی ہوئیوں۔ اگانہہ جنگ ہویا۔ جنگل دے سفر۔ دریا عبور کرنے۔ اگانہہ مُرداراں دیاں بوئیں۔ توں نہ آ۔'' اوس آکھیا، ''ہر گل منظور ہے تیری جُدائی نہیں۔ میں نال آونا ہے۔'' ''چلو۔'' اوس آکھیا۔
ایہہ جی چڑھ پئے ہین لشکر۔ اگانہہ تکیا ہے تاں فوجاں، مدان۔ اوہناں دا وی اکٹھ ہے۔ تمبو ایہناں دے وی لگ گئے۔ صبح دا وقت ہے کرنیل، جرنیل، فوجاں آن کے دروازے تے کھلو رہن، تمبو دے تے۔ ''راجیا! حُکم دے اسیں حملہ کریے۔'' راجا چُپ ہے۔ اوہ حیران ہے۔ مینوں پیر بچپن اِچ آکھیا ہا، بچیا! دُنیا دے مگر دین تباہ نہ کریں۔ ایتھے ندی لہو دی واہنا ہے انسان دی۔مگروں پیو دی آکھ ہے۔ اگوں ایہہ باغی ہویا کھلا ہے۔ میں کیہ کراں میریا اللہ۔ کوئی ایسی میرے دل اِچ گھت میں ایس گُناہ توں کیویں بچ جاواں۔ بار بار جرنیل پُچھدن: جی حُکم دئیو، ایہہ مراقبے بیٹھا ہے۔ اپنے رب نال گلاں پیا کریندا ہے۔ آخر کار ایہدے دل اِچ ہک گل آ گئی ہے۔ ایس آکھیا، ''ٹیکسلا دے گورنر نُوں آکھو رزم گاہ دے وِچ آ کے میری گل سُنے۔ ہتھیار نہ اوہ لائے نہ میں لائیں۔ ایتھے آ کے گل میری سُنے۔'' اوس آکھیا، ''نہیں، ہتھیار توں وی لا کے آ۔ میں وی لا کے آونا ہاں بھئی ہک دوئے توں خطرہ رہے۔ ہو سگدا ہے میں ہتھیار نہ لائیں تیرے کول خفیہ ہتھیار ہووے یاں میرے کول ہووے۔'' راجے کرنال آکھیا، ''ٹھیک ہے۔''
دوویں راجے ہتھیار لا کے آگئن، جیہڑا ساجھا میدان ہا۔ جتھے جنگ ہوونا ہا اوتھے۔ ''ہلا دس۔'' اوس آکھیا، ''خُدا نُوں مننا ہیں۔ ایس نُوں مننا ہیں قیامت آونا ہے تے خُدا سوال کرنِن اساڈے تے۔'' اوس آکھیا ''ہا۔'' ''جیہڑی ایہہ مخلوق آپس اِچ لڑن کان آئی بیٹھی ہے، ایہناں دا آپس اِچ کوئی جھگڑا ہے۔ اوہناں لڑنا ہے تیرے حُکم نال۔ ایہناں لڑنا ہے میرے حُکم نال۔ ایتھے ندی لہو انسان دے دی واہنا ہے۔ کئی بچے یتیم ہو جاسن۔ بہتر انجیں ہے کہ جھگڑا تیرا میرا ہے۔ ایہناں دا جھگڑا کوئی نہیں۔ توں مینوں لکھ دے۔ میں تینوں لکھ دیواں بھئی جے توں مینوں مار لئیں تاں ہر شے تیری۔ جے میں تینوں مار لئیں تاں ہر شے میری۔ جھگڑا مُک جا سی۔ یاں توں مری یاں میں مریناں۔ ایس مخلوق دا تاں قصور کوئی نہیں۔'' اوس آکھیا، ''مینوں تھوڑا جیہا وقفہ دے۔ میں صلاح کر لئیں۔'' اوہ واپس ہٹ گیا۔ جا کے اوس اپنے مددگاراں نُوں بُلایا ہے بھئی میں حیران ہو گیا ہاں۔ راجے اشوک دے اُتے اسانوں ہزار شکایت ہا۔ ایہہ کوئی ولی اللہ ہے۔ ایہدے نال لڑائی کُفر ہے بھئی اپنی موت چائی کھلا ہے مُلکھ دے بچاون کان۔ جے تُسیں آکھو تاں میں ہتھیار رکھ دینا ہاں۔'' اوہناں وی آکھیا، ''ٹھیک ہے۔'' گورنر ہتھیار اُتار کے آ گیا ہے۔ اوس آکھیا، ''راجا کرنال! پیو دے پیش کرنا ہئی زندے نُوں تاں قید کر لا۔ جے میرا سر پیش کرنا ہئی تاں سر کٹ لا۔ میں تیرے نال لڑدا ہی نہیں۔ تیرے نال لڑنا کُفر ہے۔'' کرنال اُٹھیندا لگا آیا ہے۔ اوس ہاں نال چاں لایا۔ اوس آکھیا، ''توں بھائی ہیں میرا۔ پچھلی شاہی اوس کرنی ہے، اشوک۔ ایہہ شاہی میں تینوں دینا ہاں۔ میں تاں شاہی کرنی کائی نہیں۔ میں تاں رب رب کرنی ہے۔ گل ایہہ کر۔ ٹکا دیونا منظور کر۔ اُنجیں ہار رعایا ہو کے بہو۔ میری بیوی تے مینوں ہک کُٹیا پاکے چاں دے۔ سادہ لباس تے سادہ روٹی۔ ایہہ اسانوں دوویں ٹائم مل جاوے۔ ایہہ شاہی توں کر۔ پچھلی اوہ کریسی۔'' بڑا خوش ہو گیا۔ رسائی ہو گئی۔ ایہہ ہُن اوتھے رہندا ہے۔ٹیکسلا دا گورنر اتنا عاشق ہا ایس دا کہ سوا ایس دے کول پنج منٹ بیٹھے دے، اوہ تخت نہ لیندا۔ ہر صبح نُوں ایہنوں وقت دیونا۔ ایہدیاں گلاں سننیاں۔ بنارس دے وِچ خبر آ گئی۔ رسائی ہو گئی ہے۔ ٹکا تارنا منظور کر لیا نیں۔ راجے بڑیاں خوشیاں منائیاں بھئی بغیر لڑائی دے میرے پُتر ٹیکسلا فتح کیتا ہے۔ گل پہنچی شکُنتلا تے۔ اوہنوں اگ لگ گئی بھئی گھلیا تاں ہا مری جا سی۔ ہُن رات دینہہ کُڑھدی رہے بھئی میں جوں اکھیں آکھیاں ہان، کڈھاونیاں ہین، اوہ گل پوری نہ ہوئی۔ ہر ویلے اوہ سوچیندی ہائی۔
اوس زمانے مُہر تے راجے وِسدے ناہن۔ راجا آیا ہے۔ رانی تاڑی رکھیا ہے۔ اوس مُہر اُتار کے قندیل دے وِچ رکھی ہے۔راجے کھانا کھادھا ہے۔ سیں پیا ہے۔ اوہ مُٹھیں شُٹھیں بھرن لگ پئی ہے۔ پیار کرن لگ پئی۔ جیس ویلے سمجھیا ہے راجا سمدا ویندا ہے۔ اوہ اُٹھی ہے مُہر چاون کان۔ قندیل کول اپڑی ہے تاں راجے ہائے ہائے کیتی ہے۔ ''کیہ ہئی راجیا؟'' اوس آکھیا، ''خواب بڑا بُرا آیا ہے۔ میں ویہناں ہک بدماش جیہی عورت ہے۔ میرے پُتر آل اُنگل دا اشارہ کیتا ہے۔ اوہ ڈھے گیا ہے۔'' اوہ ہسدی ہسدی ڈِھڈھ تے لیٹ گئی۔ اوس آکھیا، ''راجیا! ایڈا بہادر جوان ہے تے عورت دے اشارے نال ڈھے گیا ہے۔ ایہہ خواب خیال ہے۔'' تھبِک کے سنوایا ہے۔ رانی مُڑ اُٹھی ہے۔ قندیل کول پہنچی ہے تاں راجے ہائے ہائے کیتی ہے۔ ''کیہ ہئی راجیا!'' اکھے، ''میں ویہناں میرا پُتر ہے۔ ہک سیاہ رنگ دا انسان ہے۔ اوہ اوس دیاں دوویں اکھیں پیا کڈھدا ہے تے دُھوتن خون دے پئے وہندِن۔'' اوس آکھیا، ''راجیا! اج کیہ کھادھا ہئی؟ کھانا ہضم نہیں ہویا۔ جیہڑے بُخار ہین، ایہہ دماغ نُوں چڑھ رہن۔'' اوس آکھیا، ''شئیں تاں گِنیندیاں ای نہیں۔'' تھبِک کے وت سنوایا سوں۔ اتنے نُوں قندیل دے وِچوں مُہر کڈھ کے اوس ہک کاغذ اُتے مار لئی ہے۔ راجے حال حال چاں گھتی ہے۔ ''رانیے! پتہ نہیں اج دے خواب کیہ پئے کریندن۔ میں ویہناں نونہہ میری تے پُتر ایہہ نگریاں دا گدا کریندے آوندن۔'' اوس آکھیا، ''راجیا! مُڑ سچی دساں تاں توہیں کوّڑِی جاونا ہے۔ میں تیریاں پڑپوتریاں جیڈی ہاں۔ نہ دل رہیا۔ نہ دماغ رہیا۔ نہ گُردے رہے۔ نہ عمر رہی۔'' اوس آکھیا، ''ایہہ ٹھیک ہے۔ واقعی ایہہ گل سچی ہے۔ شاید ایہہ وجہ ہووے۔''
صبح رانی کاغذ دے اُتے لکھیا ہے۔ گورنر ٹیکسلا! ماملے اساڈے گھر دے ہین ایہہ خط پہنچے، کرنال دیاں دوویں اکھیں کڈھ لئیں۔ اگر توں ایسا نہ کریسیں، چالھی بندہ ہو تُسیں پرواردا، میں چالھی نُوں موت سزا کریساں۔ ایہہ راجے اشوک دے ناں تے اوس خط بھیج دِتا ہے۔ شُتراں تے ڈاکاں چلدیاں ہان۔ ڈاک چلدی چلدی ٹیکسلا دے گورنر تے پہنچ گئی۔ اوس خط پڑھیا۔ اوہ حیران ہو گیا۔ ایڈا نیک ہے تے پیو سکا پیا خط لکھدا ہے۔ اوس آونا چھڈ دِتا کرنال کول۔ اٹھویں دیہاڑے کرنال بندہ گھلیا۔ اوہ آیا۔ آن کے بہہ رہیا ہے۔ ''یار! اٹھ دیہاڑے تینوں گذر گئے ہین تے توں میرے کول نہیں آیا۔'' اوس انج تکیا ہے اکھیں آلوں تے ہنجوں شپ شپ کیتی ہے۔ ''کیہ ہئی؟'' اکھے، ''ایہہ کائی مرض ہے اٹھویں دیہاڑے دی جیس توں میں نہیں آ سگیا۔ میریاں اکھیں چوں پانی وہندا ہے۔'' کرنال ہس پیا۔ اوس آکھیا، ''جیہڑا سادھو فقیر میرا اُستاد ہا۔ اوس مینوں حکمت وی سکھائی۔ مریض بندہ اُتلی ہوا تے کھلار تے میں تینوں دسیساں، ایہنوں ایہہ مرض ہے۔ ایہہ کوئی دل دا درد ہے، جیہڑا ہنج لیا رہیا ہے۔ ایہہ پانی نہیں۔'' اوس ویلے اوس آکھیا، ''کھلوو نُونہہ۔ ایہہ خط تیرے ناں آیا پیا ہے اٹھویں دینہہ دا۔ چالھی بندہ کوہیساں میں، تے میں تیریاں اکھیں کیوں کڈھنیاں ہین۔ پیو تیرے ظلم کیتا ہے۔'' کرنال اوہ خط پکڑ کے پیو دا اکھیں تے لایا ہے۔ اوس آکھیا، ''اگانہہ بکواس مت کریں میرے پیو دے حق اِچ۔ ایہہ ہزار واری وی اکھ پیدا ہووے، پیو دے حکم تے کیوں نہ کڈھائیں۔ میں اکھیں دوویں کڈھینا ہاں۔''
اوس ویلے اوہ آیا ہے رانی کول۔ اوس آکھیا، ''رانیے! رانی شکُنتلا کسے ڈھنگ نال میرے پیو توں ایہہ خط لکھوایا ہے۔ حُکم میرے باپ دا ہے۔ جے میں اکھیں نہ کڈھائیں، ایہہ چالھی بندہ مری جاسی تاں میں ہک دیاں دو اکھیں گئیاں چنگیاں ہن۔ چالھی بندہ بچدا ہے نالے پیو دا حُکم منی جاسی۔ توں پیکیاں تے چلی جا۔ رانی شکُنتلا دا مطلب ایہہ ہے بھئی انھا راج تے نہیں بٹھایا جاندا۔ ایہہ قانون ہے ساڈا۔ اوہ اپنی اولاد کان رستہ صاف کر رہی ہے بھئی مینوں کوئی بھلکے ڈھہیوے تاں اوہ راجا بنے۔ توں وگ جا۔ جیس ویلے انھیاں ہو جاونا ہے، راج رہنا نہیں۔ میں گداگر ہو جاونا ہے۔'' رانی روون کڈھ ڈڑھی۔ اوس آکھیا، ''راجیا! تینوں میں اوس دیہاڑے دسیا ہا کہ میں اوس خاندان دی لڑکی ہاں، جیہڑیاں مُردے خاوند دے نال جل کے مردیاں ہین۔ ستی ہو جاندیَن تے میں جیندا خاوند چھوڑ جاواں۔ میں کون ہاں۔میں تینوں مت دینی ہاں پیو دا آکھیا من جوں لوگ جانن کہ پیو ظلم کرے، اولاد کتھوں تائیں سہہ سکدی ہے تے میں وی عورتاں نُوں مت دیواں کہ متھاج خاوند دی خدمت کیویں کریندی ہے۔ میں تیری انج خدمت کراں جیویں توں راج تے بیٹھا ہیں۔'' ''اچھا۔'' اوس آکھیا۔
اوس ٹیکسلا دے وِچ ہو کا دیوایا ہے کہ آؤ لوکو اج تہانوں تماشا وکھایئے بھئی پیو دے ایسے حکم دے اُتے اولاد عمل کیویں کریندی ہے۔ مخلوقاں اکٹھیاں ہو گئیاں۔ فقیری لباس بنا رکھے۔ آکھیا ہے بھئی جیہڑا میریاں اکھیں کڈھے، جیہڑا شاہی لباس میں پائی کھلا ہاں، ایہہ اوس دا۔ عورت آکھیا، ''جیہڑا زیور میرا ہے ایہہ وی اوس دا ہے۔ میرے خاوند دا آکھیا منو کیوں کہ چالھی بندہ تد بچدا ہے۔'' ساریاں جلاداں انکار کیتا ہے بھئی ساتھوں تاں ایہہ کم نہیں ہوندا۔ ہک جلاد وِچ کجھ ول ہا۔ اوس آکھیا، ''میں کڈھداں۔'' عورت اپنی نُوں کرنال آکھیا ہے، ''جیس ویلے آنہ میرا نکل رہے، ایہہ دوائی گھتیں۔ میرا درد تے خون کھلو رہسی۔'' جیویں ایس آنہ پٹ کے باہر کڈھیا ہے۔ مخلوق روون آلی ہے۔ عورت اُٹھی ہے۔ اوس دوائی وگائی ہے درد تے خون کھلو رہیا۔ اِنج (ہتھ دی تلی ول اشارہ) ہتھ دے وِچ آنہ پکڑ کے، ''آئے (اے) مخلوق اللہ دی جدوں تائیں ایہہ اکھ اپنی جگہ تے ہا، ساری دُنیا وی کوئی ایہدی قیمت آکھے تاں میں کائی ناہی دیونی۔ ہُن ایہہ آنہ نکل گیا ہے۔میں آکھاں ہک پیسے توں وی لے لوو تاں لیسو؟'' اکھے، ''اساں ایہدی جڑھ کڈھنی ہے۔'' اوس آکھیا، ''ایہا بات ہے۔ جیس دُنیا دے مال دے مگر اپنا ایمان ونجا رہے ہو۔ دینہہ قیامت دے ایس آنے دی قیمت دا وی ایہہ نہیں۔ ہاں بھئی دوئی کڈھ۔'' اوس دوئی کڈھی۔
آہدن: اوس زمانے ایس اپنے سادھو کولوں بین سکھیا ہا۔ بین پہلا ساز ہے ایس علاقے دا۔ایہہ سارے ساز سارنگیاں وغیرہ پچھے بنے ہین۔ ایہہ سارے ساز بین چوں بنائے گئے ہین۔ بین سادھو وگیندا ہا، جیہدے کولوں ایہہ سکھیا۔ بین ہتھ وِچ ہے۔مخلوق ہُٹ رہی ''رہو۔'' اوس آکھیا، ''نہیں ایس دیس تے میں نہیں رہن لگا۔'' عورت اپنی نُوں آکھیا، ''لے چل۔ موت دی انتظار ہے، پر نہ اَپنے پیکیاں تے جاونا ہئی نہ میریاں تے۔'' ایہہ اوتھوں ٹُر پئی۔
روندی تے ٹُر چلی تھلاں نُوں، ویکھن لوک تماشا
بین ایہدے کول ہے۔ جیس شہر وِچ آوندا ہے ایہہ بین وجیندا ہے۔ کوئی کپڑا دیندا ہے، کوئی آٹا، کوئی پیسہ۔ واہ انھیا کمال کیتا ہئی۔ رانی اوتھوں بنارس چاں تکیا ہے بھئی میں اپنے سوہرے توں پُچھاں۔ ایہدا قصور کیہ ہائی جیس توں ایہدیاں اکھیں نکلیاں ہین؟ ایہنوں کوئی علم نہیں کہ مینوں کِدے لے کے جا رہی ہے۔ کئیں جنگلاں دے وِچ راتاں آوندیَن۔ قدم قدم تے موت ہے۔
نازک پیر ملوک سسی دے، شودھی کیہ جانے پدھ کر کے
اگے سیجوں لہہ آب نہ پیتا، کدوں ٹُری پب دھر کے
تھل مارو دیاں تتیاں ریتوں، پنچھی چھوڑ گئے سبھ ڈر کے
آ سسیے کر ہوت نُوں گھولے، کیہ لینا ہئی تھل وڑ کے
آہدا ہے اکھے۔
عزرائیل تھلاں دے اندر، لین آیا سسی دی جان ہے
جان سسی دی لبھدی نیہسوں، ایس گل تے ملک حیران ہے
سسی آکھیا ''اوہ جان میری، اگے لے گیا ہئی کیچ دا خان ہے
مویاں نُوں مارن دا، نہیں رب دا کوئی فرمان ہے

مُنکر تے نکیر سسی توں، وِچ قبر دے پُچھن آئے
اوہ لین حساب کتاب قبر دا، سسی رو رو حال سُنائے
وے کون تُسیں کیہ نام تُساڈا، دسو کیچ ولوں کد آئے
واہ واہ صدق یقین سسی دا، جیس ہوت نہیں منوں لاہے
جنگلاں دے وِچ فاقیاں دیاں راتاں آوندیَن۔ مینہ برسدن تاں غاراں دے وِچ رہندن۔ قدم قدم تے موت ہے مگر سنگت خاوند دی نہیں چھوڑی۔ ترائے سال ایہناں نُوں ایس رستے دے وِچ لگے۔ ٹاکیاں نُوں پرٹاکیاں لگیاں ہوئیَن۔ تلیاں پیراں دیاں اُڈ گئیَن۔ رنگ اُڈ گئن۔
شام دا وقت ہے ایہہ بنارس نُوں آ وڑن۔ شہر دے وِچ پھرن لگ پئے اسانوں رات رہائیو۔ رات رہائے کوئی نہ۔ اودوں بارش لہہ پئی۔ اودوں سرد علاقہ ہے۔ سردی بے بہا ہے۔ جتھے راجے دیاں رتھاں کھلوندیاں ہان، اوس مکان دے وِچ آ وڑن۔ پالے دی ڈک کائی نہیں۔ مینہ دی ڈک ہے۔ہک سپاہی لگا آیا اوس ہُدھاں مار کے اُٹھایا ہے۔ اکھے، ''رات نہیں رہنی۔'' رانی روندی ہے بھئی سُبحان اللہ۔ واہ خدا دیاں حکمتاں۔
رانجھا جا لگھیا ہے گلی چوچک والی، سجی پیڑ کلیجیوں دھاوندی ہے
اوہو جھنگ تے جھنگ دیاں گلیاں نیں، ہکا ہیر نہ نظریں آوندی ہے
محل ویکھ کے تے اوہ بابل والے، کیوںجان نہ نکل اج جاوندی ہے
بَھیں بَھیں کے ویکھے چوغطیا اوئے، اورے نکراں توں ہیر بُجھاوندی ہے
اوہو شہر ہے جیہدے وِچ میری ڈولی لتھی ہائی۔ ایہا رعایا ہے جیہڑی سانوں سلام کریندی ہائی۔ اج اوہو شہر ہے سانوں رات رہن کوئی نہیں دیندا۔ کرنال اوس نُوں آکھدا ہے۔ ''رانیے! اج تاں ہر گئی ہیں۔ بیڑا ٹِھل جاوی خدا دی رحمت توں کدی وی بے اُمید نہیں ہوونا چاہیدا۔ خُدا کوئی سبب بناونا ہے ساڈا۔'' جیس ویلے ہُدھاں مار کے کڈھن لگ پیا تاں کرنال بولیا: کیوں بھائیا تیرا بال بچہ کوئی نہیں؟ اوس آکھیا، ''کیوں؟'' اوس آکھیا، ''دیگر دا وقت ہا جدوں اسیں ایس شہر اِچ آئے ہاں۔ٹُکر اساں منگیا کسے توں نہیں۔ سانوں سر لُکاون دی جگہ کسے نہیں دِتی۔ ایڈے ظالم لوگ ہین۔ سانوں توں کڈھسیں ایس سردی وِچ، اسیں مر جسائیں۔ ایہہ یقین کر ایس نگری نُوں اگ نہ لگے تاں انجیں جانیں فقیر کوڑ ماریا ہے۔'' اوس آکھیا، ''فقیر پلوتے نہ دے۔ اگانہہ ٹُر آ۔ میں تسانوں اچھی جگہ تے بہائیں۔ جتھے نہ مینہ ہو سی، نہ پالا ہو سی۔'' اوہ لگا آیا۔ جتھے جنگی سامان راجے دا پیا ہوندا ہا، اوس دروازہ چاں کھولیا۔ اوس آکھیا، ''ایس وِچ وڑ جاؤ تے کسے شے نُوں ہتھ نہ لیائے-''
کرنال لیٹیا ہے گودڑی وِچھا کے۔ آکھیوس: رانیے! ویکھ لا کہیں دے محل ہین۔ کروڑ ہا بھر کے اوہناں بنائن۔ اللہ پاک ساڈے اُتے کیڈی مہربانی پیا کریندا ہے۔ میں تینوں پہلے دیہاڑے آکھیا ہا توں ایہہ بھار نہ چا۔ تیتھوں نہیں چویندا۔ توں ہیں ہر گئی۔ کل دے آئے ہاں توں ہیں روون لگی۔ ہُن تائیں روندی پئی ہیں۔ میں جے راجے دا پُتر ہاں، دیو بھرے تیرے میرے پھُٹن دا وقت ہے۔ میں تینوں گھل چھڈنا ہے۔ توں مینوں تنگ کرینی ہیں۔ رانی پیراں تے ڈھے پئی۔ ''خدا دا ناں ہئی ایہہ قسم نہ چا۔ میں تینوں سچی گل دسینی ہاں، جیس توں میں رونی ہاں۔'' اکھے، ''دس۔'' اوس آکھیا، ''کل دا میرا دل ہا میں بین سُناں۔ میں کیہڑی ماں دی جمی ہوئی ہاں کرنال راجے تے حُکم کراں۔'' کرنال آکھیا، ''جا رانیے! مینوں توہیں بڑا درد دیوایا ہے بھئی میں چُٹکی آٹے دی دے مگر بالاں نُوں سُنیندا ودا ہوندا ہاں تے بھیڑیے توہیں میرے مگر پیکے وسار چھڈے۔ راج وسار چھڈیا۔ گداگر بنیوں۔ میں تینوں بین کیوں ناہی سُناونی۔ آ تینوں میں اوہ بین سُنائیں، جیہڑی اج تائیں میں تینوں سنائی ای کدی نہیں۔'' کرنال اُٹھی بیٹھا ہے۔ بین اوس مونہہ نال چاں لائی۔ اوہ النکھ جگاون لگ پیا ہے۔ رانی نُوں بھی درد آون لگ پیا ہے۔ ایہہ بین دا آواز روشنداناں دے وِچوں ٹپ کے شاہی محل دے وِچ پہنچ گیا۔
راجا سُتا ہویا ہے۔ اوہ جاگ گیا ایس بین دے آواز اُتے۔ اوس آکھیا، ''جاگو نا ساریاں کُل گولیاں، باندیاں، رانیاں، شکُنتلا۔'' اُٹھا بہایوس۔ ''ساریاں جاگو کوئی میرے پُتر آر بین وجا رہیا ہے یاں پُتر ہے میرا یاں اوس دا کوئی اُستاد بھائی ہے۔ سگویں اوسے آر وجا رہیا ہے۔'' ساریاں اُٹھ بیٹھیَن۔ راجا روون لگ پیا ہے۔ راجے آکھیا، ''اج ترائے سال گذر گئے میرے آل تاں بھیڑے خط ای نہ لکھیا۔'' شکُنتلا آکھیا، ''جنگل وِچ پلیا ہے۔ جنگل وِچ رہیا ہے۔ اوہنوں ساک سین دے نال کیہ؟'' اکھے، ''رانیے! ہمیشاں توں بُرا بولینی ہیں۔ دراصل اوہدا لگاؤ خدا نال ہے، جیہناں دا اودے لگاؤ ہو جاوے، اوہ دُنیا داراں نُوں ایڈا کوئی نہیں چنگیاں جاندے تے ایس جیہا تاں اساڈی پوری وِڑھی وِچ کوئی نہیں۔'' اتنے نُوں راجے بلایا ہے ''دربان کھلا ہیں؟'' اکھے، ''جی کھلا ہاں۔'' اکھے، ''جاویں نا ایس بین آلے نُوں ایتھے لے آ۔ ایہدی بین سُنیے۔'' اوہ گیا ہے۔ اوس آکھیا، ''او بین وجاون آلیا۔'' اوہ ڈر گئے ہین۔ اسانوں پالا ہے۔ ہُنے کڈھدا ہے۔ اکھے، ''جی۔'' اکھے، ''بھئی میرا مہاراجا تہانوں یاد فرما رہیا ہے۔ چلیں نا اوتھے چل کے بین سُنا۔''
کرنال اُٹھیا ہے تے ہسیا ہے۔ اوس آکھیا، ''ویکھ لے رانیے قدرت خدا تعالیٰ دی اسانوں بھگوان کائی شے لے دیواؤ ہے۔'' رانی بھی رُنی ہے بھئی سائل بن کے جا رہیا ہے پیو آل۔ میں تاں ایس نُوں دسیا ہویا کوئی نہیں۔ ایہہ آ گئے۔ تکیا ہے رانی راٹھور تاں پلنگ اُتے، سیج اُتے بیٹھی ہے شکُنتلا۔ کئیں نوکریں اُتے دھاوندیاں کھلیَن راجے دے اُتے کئیں۔ ایہہ جیس ویلے لگھ آیا ہے تاں شمع دان جاگ رہے ہان۔راجے آکھیا، ''او ہو نمانیا! توں تاں انّھا ہائیں۔'' اکھے، ''جی آ۔'' ''اچھا بھئی بین سُنا۔ میں تینوں انعام بڑے کریساں۔'' ایہہ دروازے اچ بہہ رہیا ہے جیویں منگت بہندن۔ دوویں پیر جوڑ کے ایس بین مونہہ نال لائی ہے۔ رانی راٹھور کُنڈا نپ کے کھلی ہے۔ اوتھے بھی اوہنوں درد ہے بھئی میرے نالوں تاں ایہہ گولیاں چنگیاں ہین، جیہڑیاں کُرسیاں تے بیٹھیاں ہین۔ ایس بین شروع کیتی۔ جیویں جیویں النکھ جگیندا ہے، راجا روندا ہے۔ راجا شکُنتلا آل مونہہ کر کے روندا ہے۔ ''تمام اوسے آر بند اُٹھا رہیا ہے۔ سُن لے۔'' راجے آکھیا، ''بھئی ہک واری بین بند کر۔ گلاں کریے۔ توہیں بہوں رووایا ہے۔'' اوس بین بند کیتی۔ اکھے، ''جوگی ہیں؟'' اکھے، ''جی نہیں۔'' ''سناسی ہیں؟'' اکھے، ''جی نہیں۔'' ''اُداسی ہیں؟'' ''نہیں۔'' ''بیراگی فقیر ہیں؟'' اوس آکھیا، ''سچ پُچھو تاں میں فقیر ہاں نہیں۔'' ''کون ہیں توں؟'' اوس آکھیا، ''میں وی ہک راجے دا پُتر ہاں۔'' ساریاں ہسن کڈھ ڈڑھیاں۔ اکھے، ''مونہہ وی راجیاں آر ہے۔'' راجا وی ہیسا۔ کرنال جوش اچ آ گیا۔ اوس آکھیا، ''راجیا! ہس پیا ہیں۔ میں آکھیا ہے راجے دا پُتر ہاں ایس واسطے۔ خدا دی قسم میں ایڈے راجے دا پُتر ہاں، توہیں جیہے اوہدے اگے ٹکا تاریندے ہوئے۔'' تاں راجا بہوں ہسیا۔ ''میں جیہے اوہدے اگے ٹکا تاریندن۔ کیہ ہے اوس راجے دا ناں؟'' اوس آکھیا، ''جی اوس نُوں دُنیا جاندی ہے۔ اوس نُوں اشوک اعظم سدیندن۔ بنارس دا والی ہے۔'' راجے آکھیا ''کیہ پیا آہنا ہیں۔ بیٹھا بنارس دے وِچ ہوئیوں۔ میں اشوک ہویوم۔'' اوس، ویلے رانی انج ٹُری ہے راجے آل۔ راٹھور رانی آکھیا:
مُکر جانے کا ظالم نے نرالا ڈھنگ نکالا ہے
ہمیشہ پوچھتے ہیں تجھ کو کس نے مار ڈالا ہے
او راجیا! میں نونہہ ہاں تیری راٹھور۔ ایہہ پُتر ہے تیرا کرنال۔ ایہہ خط ہے تیرا۔ ایہدے اُتے ایہدیاں اکھیں کڈھائیاں گئیاں ہین۔ مینوں ترائے سال ایس سفر اچ گزر گئے ہین۔ پِن پِن کے، گدا کر کے اسیں لگے آوندے ہاں تے ہُن توں پُچھنا ہیں کہ توں کون ہیں۔'' راجے انجیں سمجھیا ہے کہ میرے سر اِچ بمب پھٹ گیا ہے۔ راجا اَپنی مسہری توں چنویا ہے تے زمین تے آ لتھا ہے۔ راجے اشوک دی برک نکلی ہے۔ سارے محل وِچ کہرام مچ گیا ہے۔
راجے حکم دِتا ہے بگل بجائیو۔ ایسے وقت ہر کوئی آوے۔ دربار لگ گیا ہے۔ ایہناں دوہاں دی بانہہ نپ کے راجا آگیا دربار دے وِچ۔ اوس آکھیا، ''او وزیر، مصدی، ڈھیر سارے بیٹھے ہو۔ دسو ایہہ کون ہین؟'' اوہناں چوں کِنھاں آکھیا، ''پتہ نہیں جی کل پِندے ڈٹھے ہین۔ اسانوں تاں کوئی پتہ نہیں۔'' اوس آکھیا، ''ایہہ پُتر ہے میرا۔ ایہہ نونہہ ہے میری۔ ایہہ خط ہے میرا۔ ایہدیاں دوویں اکھیں کاہیں کڈھوائیاں ہین؟'' مخلوق روون کڈھ ڈڑھی ہے۔ اوہناں آکھیا، ''راجیا! اسانوں تاں کوئی علم نہیں۔'' اوس آکھیا، ''نہیں مینوں علم لگدا ہے۔ وزیر؟'' اکھے، ''جی۔'' ''اوہ ترائے خواب مینوں آئے ہان۔ یاد ہئی۔'' اکھے، ''جی آ۔'' ''میں آکھیا ہا بھئی ایہہ خواب نامے جاندا ہے۔ کرنال آل لکھو بھئی مینوں خواب انج آیا ہے۔ اگوں وزیرا توہیں مینوں ہوڑیا ہے۔خواب اوسے دے بارے ہین تے بھیڑے خواب ہین۔ اوس ویلے خواب نامے وِچ میں ایہہ درج کروائے ہین۔ تاریخ ویکھو۔ اوس دیہاڑے دے خواب دی گل تے ایس خط دی تاریخ رل جاوے تاں میری چور شکُنتلا ہے۔کیوں کہ میں جاگدا ہام، ایہہ قندیل کول کھلوتی ہوندی ہائی۔مُہر قندیل دے وِچ ہا۔'' ملائی تاں تاریخ مل گئی۔
اوس ویلے راجے حکم دِتا ہے شکُنتلا نُوں مُلزم بنا کے میرے پیش کرو۔ پھدھی آئی۔ راجے آکھیا، ''لے گل دس۔''اوس گل اول کولوں لے کے اخیر تائیں دسی۔ میں عاشق ہو گئیم۔ ایہہ غلطی میں کر بیٹھی ہاں۔ میں مافی منگنی ہاں۔ راجے آکھیا، ''میں تینوں اوہ سزا کریساں، جیہڑی دُنیا کن نپیسی۔ توہیں میری لُگ کر چھڈی ہے۔'' اوس ویلے کرنال اُٹھیا ہے۔ اوس آکھیا، ''حُکم ہوندا ہے ماں دا یاں پیو دا۔ ایہہ ماں ہے میری۔ میں اللہ واسطے ماف کرینا ہاں۔ چلو تیرے حُکم نال نہ کڈھائیاں ماں دے حُکم نال کڈھا چھڈیاں۔ہتھ نال توہیں وی نہیں کڈھیاں اوس وی نہیں کڈھیاں۔ حُکم گیا مینوں اوہ مننا پیا بھئی چالھی بندہ بچدا تاں ہے، جے میں اَپنیاں اکھیں کڈھائیں تاں۔چالھی بچا کے میں اَپنیاں اکھیں کڈھائیَن تے میں اللہ واسطے مافی منگنا ہاں بھئی تیرا حکم نہ سہی، میری ماں دا سہی۔ ہُن ایہہ فرق پیندا ہے۔میں مُڑ ماں تاں نہ سمجھی۔
جیہڑے ہوندی طاقت ٹلدے
نالے خیر فقیراں چلدے
اوہناں کارن باغ محل دے
باقی رب ستار ہے
راجیا! ماف کرن آلے نُوں رب بہوں چاہندا ہے-''
اوس ویلے شکُنتلا اُٹھی ہے۔ اوہ پیراں تے ڈھے پئی ہے۔ اوس آکھیا، ''توں کُتی اُتے رحم کر رہیا ہیں۔ ہک سُورنی اُتے رحم کر رہیا ہیں۔ خدا تیرا بھلا کرے۔'' راجے آکھیا، ''بھاویں قانون نہیں نا انّھے راجے نُوں تخت دیونا، توں تخت دا وارث بن۔'' اوس آکھیا، ''میں ہکو ساتھ کیتا ہے دُنیا دار نال۔ ایہہ حالت ہو گئی ہے۔ جے تہاڈے آل آیا ہاں تے ایس حالت نُوں پہنچ گیا ہاں۔'' دُعائیں دیندا اوہ چلا گیا۔ جیس ویلے اوتھے گیا ہے تاں رانی تے راجا دوویں گئے ہین بھئی اوتر پے ویندے ہاں۔ ساڈے حق اِچ دُعا کر۔ اوس ویلے دُعا واسطے ہتھ اُٹھائے ہین۔ میریا اللہ! جے کدی ایہہ عمل منظور ہے تاں میری ماں دی گود ہری کر دے۔ اوہنوں مُڑ پُتر ڈھیہا۔ ایہہ مُڑ ڈھیر تائیں بادشاہ لگے آئن۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels