Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> پروفیسر سعید بُھٹا >> کمال کہانی >> نارنگ ساہی

نارنگ ساہی

سعید بُھٹا
May 20th, 2008
1 / 5 (1 Votes)

    دانا باد دے کھرل ساہی سدیندِن۔ مرزا وی ساہی کھرل ہویا ہے۔ اڑل ہے ایہہ۔ مرزا مر گیا ہویا ہا۔ ماہنی ایہناں دے دُشمن ہان۔ سِرجاناں دا کھرل ہویا ہے، ایہہ مرزے دے بھرا توں پچھے ہویا ہے۔ پہلی شادی اوس کیتی کھرلاں آل۔ اوس دے وچوں پُتر ڈِھیہا۔ اوہدا ناں نارنگ ہویا ہے۔ نارنگ دی ماں مر گئی۔ دُوئی شادی اوس کیتی رجوکیاں آل۔ رجوکی دے وچوں دو پُتر ہوئن۔ یار بیگ تے عزت بیگ۔ دیہاڑے ہوئے تاں اوہناں دا پیو مر گیا۔ رجوکی خیال کیتا ایتھے چوگُوٹ اساڈا دُشمنا ہے۔ ایہہ پُتر میرے مرِی جاسن۔ ہووے نہیں تاں ایہہ دیہاڑے میں کسے سجن دے بُوہے تے گھتاں۔ ترائے سوار لے کے ٹُر پئی۔اوتھوں ایہہ بھوڑانی بھٹیاں دی وِچ آ گئی۔ راء خضر ، علی خاں دا بھٹی ہا، اوس پُچھیا، ''کون ہے بھائی؟''اوس آکھیا، ''جی،میں رجوکی ہاں کھرلاں دے گھروں تے تُسیں اساڈے لگدے بندے او۔ چند مُصیبت دے دیہاڑے ہن، اوہ میں تاں کٹن آئی ہاں۔'' اوس آکھیا، ''ٹھیک ہے بھین ہوئیوں، جی آئی ۔ بہو۔'' ترائے سوانیاں ہوئیَن راء خضر دے گھر۔ دو بھٹیٹیاں تے ہِک بھرِت۔ جیس حویلی وچ اوس رہائی ہے نا اوس حویلی وچ سال بھر خِضر نہیں آ وڑیا۔

    ساون دی رُت ہے۔ خضر، علی خاں دے بھٹی کول پرھیں لگی ہوئی ہے۔ ڈیرے تے بیٹھِن۔ کھرل چھوہر ترائے تے بھوڑانی دے چھوہر کھیڈدے ودن۔ جیہڑی آوی کھلی ہے بھوڑانی دے اُبھردے، ایس دے اُتے۔ اچانک بدل چڑھیا ہے۔ اُبھر دیوں، بدل گھنگھور گھتی آوندا ہے جیویں بدلاں دی طرز ہے۔ ساون دی رُت وچ ایہہ وسدن۔ ہوا پُرے دی چھُٹی کھلی ہے۔ بدل بولیندِن پئے۔ ہِکے واری راء خضر ہائے ہائے کیتی ہے۔ ''کیہ راء خضر؟'' اکھے، ''ایہہ ترائے کھرل چھوہَر مری گئن۔ دُوئے چھوہَر کھیڈدے کھلِن۔ راوی آل گھڑ بدھی کھلا ہے بدل۔ اوہناں تریئیں دے مُونہہ اودائیں ہو گئن تے تمب ہو کے کھلِن۔ ایہناں وطن تے جاونا ہے بندے ایہناں دے دُشمن ہین، ایہناں مرِی جاونا ہے۔'' اوہا گل بنی اوہ ہٹ کے لگے آئے۔اکھے، ''اماں۔'' اکھے، ''جی۔'' اکھے، ''راوی وس پئی ہے۔ راوی آل بگلے اُڈدے نظر آئن۔'' بگلا اودوں اودائیں اُڈدا ہے جِدے بارش ہووے، پانی تھوڑے ہوندے ہان۔ چھوہراں دی ماں آکھیا، ''راء خضر! اسانوں رُخصت کر۔''ـ خضر آکھیا، ''جتنے تائیں ایہہ تراہے چھوہَر گبھرو نہ ہو رہے میں تہانوں کوئی نہیں جاون دیونا۔'' چُپ کر گئی۔ راء خضر کماں آلا بندہ ہا، نکلیا اوہنوں دیہاڑے پونے ہان۔ رجوکی تراہے چھوہَر لیندی تے نس گئی۔

ٹاہلی منگینی آلا پتن پار ٹپی ہے تے اگوںمنگینی دیاں کدھاں تے ماڑیاں تکیاں ہن۔ پُچھیا ہے ''کیہڑا تھینہہ ہے؟'' اکھے، ''منگینی ہے چدھرڑاں دی۔'' رجوکی ڈری ہے بھئی صاحباں منگ طاہر خان چدھرڑ دی ہائی تے متاں اوس وجہ توں کوئی مینوں ہتھ چاں لائے۔ اسیں اج ہر توں کمزورہاں۔ اوس منگینی راہ پاہ چھڈ دِتا تے لمیوں چاں ولایا ہے۔ اگوں پے بار نوںگئی ہے۔ آہدِن: اوس ویلے ساندڑ بار اِنج ہوئی ہے بھئی بندہ بندے دا پگڑا لاہ کے ہک جھاڑ ولائے ہا نا چاں مُڑ لبھدانہ۔ انج گھاٹی بار ہوئی ہے۔ اوہ بار نوں وڑی راہ دِسے کوئی نہ۔ بندہ ملے کوئی نہ۔ اودوں ترئیاں چھوہراں نوں تسا لگا ہویا ۔ اوہ نمانی بھجن لگ پئی ہے۔ چھوہَر پانی پانی کرین۔ اوہ بھج کے ہک ون تے چڑھی ہے بھئی کائی وسوں ولایت دِسے۔ تکیوس تاں اگوں پرا کیتی آوندِن شکاری۔ باز تے بندوقاں تے تیر تے پیادے لگے آوندِن۔ او س شُکر کیتا۔ اودائیں ٹُر پئی۔

شکار چڑھیا آوندا ہا صاحب خان ماہنی کھیوے دا سردار۔ ایس نمانی نوں کیہ پتہ ہے بھئی میں بلا تے پئی پوندی ہاں۔ ایس آکھیا، ''بھائی پانی۔'' اوہناں آکھیا، ''پانی ہے۔'' اوس ویلے مشکیزے لے کے ٹُردے ہان۔ پانی پیوایا ہے۔ ایس آکھیا، ''دانا باد جاوناہے اسانوں راہ دسو۔'' دانا باد دا اج وی کھیوے ناں چاں لیوے اوہناں بندیاں نوں سر تائیں کاوِڑ چڑھ جاندی ہے۔ صاحب خان آکھیا، ''کون ہیں توں؟'' ''رجوکی ہاں۔'' ''اودے کیہ کرنا ہے؟'' اکھے ، ''اساڈا گھر ہے تے فلانے کھرل دے گھروں ہاں۔'' ''ایہہ ترائے چھوہر؟'' اکھے، ''اوسے دے ہن۔ ایہہ وڈا متریا ہے تے دو نکڑے میرے ہن۔'' اوس آکھیا، ''تراہے چھوہَر نپ لیؤ تے ایس سوانی نوں راہ وکھایو۔'' اوس آکھیا، ''چھوہَر کیوں نپ لین؟'' اکھے، ''توں مینوں جاندی نیہوں تے میں صاحب خان ماہنی ہاں، کھیوے دا سردار۔'' اوس ویلے ایہہ نواب ہوئن ۔ ماں ترائے کھسا کے کِدے جاوے ہا؟ اوہ مگر مگر واسطے گھتی آوے۔ بال نپ کے پچھانہہ ٹُر پئے۔ خانُو آنے شہر چوں آ لگھیا ہے۔ خانُوآنیاں تے کھرلاں دی برادری، تے کجھ علیک سلیک ہا۔ خانُو آنیاں قرآن مجید میلا کیتا ہے۔ بال چھڈ دے۔ اوس آکھیا، ''میلا میں من لیا ہے۔ ڈیرے اپنے تے جا چھوڑیساں۔ ایتھے میں چھڈاں تاں میرے مگر گل لگدی ہے بھئی خانوآنیاں چھوہَر کھس لین۔'' اوہناں آکھیا رجوکی نوں، ''لے جا ہُن چھڈ دیسی۔''

جیس ویلے ڈیرے تے جا لتھا ہے اوس آکھیا ہے، ''رنّے! میں چھوڑنے ہوندے تاں میں نپنے کیوں ہان۔ توں اپنی دانَت نہ لہا۔ توں جا۔'' رجوکی بھج کے ماہنیاں دی حویلی نوں جا وڑی ہے۔ سوانیاں دے پیر نپن لگ پئی ہے مہریٹیاں دے۔ مینوں پُتر چھڈوا دیوو۔ چھُری دا پتہ اوسے نوں ہوندا جِدے چھُری دا مُونہہ ہووے۔ جِدوں کنڈ ہووے اوہنوں کیہ پتہ۔ اوہ ہس پوِن مرداں دی گل ہے اسانوں کیہ پتہ۔ باہروں بھج کے ہک سوانی وڑ پئی ہے۔ اوس آکھیا، ''اوہناں تریئیں دی ماں ہیں توں؟'' اکھے، ''جی آ۔'' اکھے، ''تراہے کُسدے پئے نی۔ مونہہ ویکھنے نی تاں ہُن ویکھ لا۔'' اوہ بھج وگی۔ بھج کے جیس ویلے دروازے وچ آئی ہے تاں نواب صاحب خان ماہنی پیا آہدا ہے نوکر نوں: ''اندروں تلوار لے آ تریئیاں دے سِر وڈھ۔'' تلوار لے کے اندروں نِکلیا ہے۔ سوانی آ کے پیراں تے ڈھے پئی ہے۔ 'ـ'صاحب خان! تراہے نہ کوہ۔ مینوں ہِک اللہ واسطے دے چاں۔ اِنجیں جانی وڈھ چُنیا ہیس تے تریئیا حِصہ وڈھ چُنن آلی دا ہوندا ہے۔ ہک کانہہ مینوں دے چاں۔'' جیس توں اج تائیں سوانیاں آہدیَن میتھے تاں اِتنے کانہہ ہین۔ ایہہ کانہہ دا لفظ رجوکی آکھیا ہویا ہے۔ صاحب خان آکھیا، ''ہِک اُٹھا لَے۔'' دوہاں سکیاں ماں دے مُونہہ آلوں تکیا ہے۔ نارنگ دی مترئی ہائی۔ نارنگ جھولی اِچ چاں مونہہ گھتیا ہے۔ سانوں کاہیں اُٹھاوناہے۔ یار بیگ بولیا ہے اکھے، ''عزت بیگ بھیڑیا! راٹھ دا پُتر ہیں۔ موت آ کے رہنا ہے:

صفتاں تیریاں مالکا اسانوں وی آسرے تیرے
راٹھ اوتھے ٹھلدِن جِتھے کپر کڑکن پوِن سار بہیڑے
راٹھاں باجھ نہیں وگدیاں تیغاں،
پر سخیاں باجھ نہیں پکدے ڈیرے

جیہڑے ویلے اماں نوں حُکم ہویا ہے ہک اُٹھا لا۔ توہیں وی تکیا ہے۔ میں وی ڈِٹھا ہے۔ نارنگ دا جھولی آل مُونہہ کرنا میرا کلیئا پاڑ کے سٹ گھتیا ہے مر جاونا سیں، اماں نوں توں وی آکھ تے میں وی، نارنگ نوں اُٹھائے۔'' دوہاں بھراواں آکھیا ہے، ''اماں! مر اساں مُڑ وی جاونا ہئی تے اج خُدا توں عِزت لَے تے مترئیا اُٹھا تے اسانوں کُسن دے۔'' بھراواں نوں آسان ہے گل کرن۔ مترئی نوں مترئیا پُتر اُٹھاونا تے سکے کوہاو نے بہُت مُشکل ہن۔ ایڈے راٹھ دی بچی ہوئی ہے۔ اُٹھی تے اوس نارنگ دی بانہہ نپ لئی ہے۔ ''اُتانہہ اُٹھی۔'' نارنگ اُٹھیا ہے تے دوہاں چھوہراں تے تلوار وُٹھی ہے۔ ہیٹھ تلوار دے اوہناں دیاں بکاٹیاں نکلیاں ہن۔ سِر ڈُک کے دور جاپین۔

بھنے ہن ساہی کھرل، بھج کے وڑے کھیوے
اگے صاحب خان ماہنی ہے، بھر ُتنگ شراب دی پیوے
اوس وڈھ اُڈائن راوی دے ڈِیوے
لکھ لعنت ہے ماہنیاں، جاں تائیں جِیوے

لاشاں تڑپن لگ پئیَن۔ نارنگ دی ڈھاہ نکلی ہے۔ ماں رکھ کے اَلُتھا مُونہہ تے ماریا ہے۔ ''میں تینوں رواون کان اُٹھایا ہے۔ بچیا! رویندا اوتھے ہے جِتھے کائی حد کھلی ہووے۔ جیس ویلے ظلم دی حد ترُٹ جاوے اوتھے روون حق کوئی نہیں۔ پَھرپویں تاں بھلکے وَیر چاں لئیں۔ اُتانہہ اُٹھی، ٹُر۔'' اوس آکھیا ''اماں! ایہہ اوہ بھرا ہین جیہناں میری موت لئی۔ میں دوہاں دیاں لاشاں راوی لے جاونیاں ہن۔میں کُتیاں کاواں اگے کیوں سٹ جاواں؟'' اوس آکھیا، ''سٹھ کوہ داناباد ہے۔ جنگل دا سفر ہے۔ دو میت لے کے ٹُرنن۔ میں عورت تے توں بال۔'' اوس چادر تاں کھلاری۔ ہِک پاسے ہک لاش چاں بدھی تے دوئے پاسے دُوئی۔ موڈھا دے کے اُٹھیا ہے۔ پہلے قدم تے تھڑبکیا ہے۔ تک سٹھ کوہ تے۔ دو لاشاں ہین۔ آپ وی ایڈا گبھرو کوئی نہیں۔۔ ماچھیاں دا گھر باہر وار ہویا ہے کھیوے توں۔ اوتھے آ کے ساہ کڈھیا ہیس۔ مچھانی بڑی رُنی ہے۔ پانی پیوایا ہیس۔ ست پُتر مچھانی دے ہوئن۔ اوس آکھیا، ''بتری دھاراں تد بخشیساں ایہہ لاشاں اپڑایو۔ ایس غریب توں چیندیاں ہن، جیہدے دو کُس گئن۔ ایس توں لاشاں دانا باد نہیں جاندیاں۔'' ماچھی ٹُر پین۔ لاشاں چا لئیاں ہن۔ راہ دے وچ جیویں جیویں خلقت سُندی گئی ہے بھئی رجادے کے کھرل ہین۔ ایہہ ایہہ کار ایہناں نال ہوئی ہے۔ آدم آپے اللہ واسطے نال رلن لگ پیا ہے۔ دانا باد جا لاشاں دفن کیتیاں نیں۔

نارنگ ہوریں صاحب جائیداد ہوئن۔ پگڑی ایہناں دی ہائی۔ اوہ شریکاں لَے لئی۔ کنھاں نارنگ نوں آکھیا، ''توں دعویٰ کر، اسیں گواہیاں دیندے ہاں۔ اسیں تیری مدد کریندے ہاں۔ ''او بھیڑیاں او۔'' اوس آکھیا:

باگ لوینی آں وِچ لوینی آں دھائیں
کھِڑیائے چنبا پھُل چُنین آرائیں
پھُل اوہ پیندیاں ہن جنھاں دے وِیر ایتھائیں
ساڈے وِیر پردیسی ہن، بھاہ پھُلاں نوں لائیں

''میں جڑھ کڈھنی ہے پگڑیاں دی۔ میں کوئی پگڑیاں جوگا رہیا ہویا ہاں۔''

نارنگ ہک وچھیرا نسلی ویکھ کے رکھیا ہویا ہا۔ صبح شام اوہدی حفاظت۔ اوہ مگر ٹُردا ہا لیلیاں وانگوں۔ بندیاں نارنگ دا ناں واہیات رکھیا ہویا ہا۔ نہ رعیت دا پُچھے نہ برادری دا۔ دیہاڑے لگھدے رہے، جیہڑے ویلے اوہ چڑھن دا ہو گیا، نماز ویلے اوس تے کاٹھی گھتے، دوئیں پہر ڈیگ راوی دی من اُتے اوس توں دو کم لَے۔ ہک دوڑ دا، ہک جھال ٹپاون دا، ترٹ دا کم۔ گھر آوے تاں ماں مونہہ کجی بیٹھی ہووے۔ بھراواں نوں تاں سمھالیا وی کدی نیہسوں وَیر تاں نہیں لے سکدا۔ دیہاڑے گُزردے جاون۔ جیس دیہاڑے نارنگ سمجھیاہے نا اج میرا گھوڑا ہِک پہر وِچ سٹھ کوہ کریندا ہے۔ آیا ہے نماز ویلے کاٹھی گھتی ہیس۔ ماں سمجھیا ہے اگے آر ویندا ہے پیا۔ توبرا ہنّے دے وچ سٹیا ہیس۔ میرا ہتھ پے جاوے تاں ماں نوں نواب صاحب خان دا سِر وکھائیں تاں اوہ دیہاڑا لاہندا ہے۔

دانا باد چوں نکلیا ہے۔ نِکل کے مُڑ مونہہ پھیریا ہیس گھوڑے دا تھینہہ نوں۔ کیہ پتہ میں مُڑ ہٹ کے آونا ہے یاں نہیں۔ آخری دِن ہے۔ ہِک واری دیس اُتے نظر تاں مار لئیں۔ نظر ماری ہیس تاں ہنجوں ویہہ آئیاں ہیس۔ ''میرے اللہ! میری حیاتی تاں مُڑ تیرے وس ہوئی۔ اوس بُڈھڑی دا پچھے کوئی نہیں جے میں مری جاواں۔'' گھوڑا سٹیا ہیس۔ پہر دینہہ دا آیا کھلا ہے اگوں ماڑی کھیوے دی نظر آئی ہیس۔ گھوڑے نوں تھپکی ماری ہیس، شاوا۔ پُچھیا ہیس کسے بندے توں نواب صاحب خان ایس ویلے کتھے لبھسی؟ اوس دینہہ آلوں ویکھیا ہے۔ اِنج لہندیوں ولائی آ۔ لہندے آلی چُنڈ اُتے کُھوہ ہئی۔ اوتھے ایسے ویلے نھاوندا ہے۔ اوس آکھیا، ''خُدایا! اِنج باہر کڈھ کے دیویں تاں۔'' اگانہہ آیا ہے تاں اولو دے چوگِردے کدّھ اُسری ہوئی ہے۔ نِسار اُچی ہے۔ گدھیال حُقا بھکھا کے اِنج گادھی آل ٹُریا ہے۔ ایس سلام دتا ہے۔ ''حُقا ہئی؟'' اکھے، ''ہا۔ '' ''ہلا اوہراں کر۔'' شکل چنگی، لباس چنگا، ہتھیار چنگا، گھوڑا چنگا۔ ایہہ شئیں رل جاون تاں ان جانُو وی سلام جھلیندا ہے۔ اوہ حُقا نپ کے آ کے کھلو رہیا ہے۔ حُقا چھِکن لگ پیا ہے۔ ایس پُچھیا ہے، ''نواب صاحب خان سُنیا ہا ایتھے۔'' اکھے، ''نوکر نکلے آوندِن تے اوہ وی مگروں گِڑدا آوندا ہوسی۔'' لحظے دے بعد جوں بھائیں کے تکیا تاں صاحب خان اودوں نِکلیا ہے۔ صاحب خان نوں ایس ڈِٹھا ہے۔

ویری ڈِٹھے ویریاں، مُونہہ کوڑھے اکھیں گہریاں

ایس سٹ ماری ہے ہویزے وچ اگ بلی ہے۔ اکھے، ''لے جا۔'' گدھیال آکھیا، ''وچ سُور چھڈیا ہئی۔'' اوہ تُھدھدا گادھی تے جا بیٹھا۔ صاحب خان نوں ویکھ کے جیہڑیاں سوانیاں وچ اولو دے ہان، اوہ نِکل آئیاں۔ صاحب خان ونج مجھلا بدھا ہے۔ اولو وِچ وڑ آیا ہے۔ اوس ویلے ایس گھوڑے دا تنگ گوڈا چِھکنا شروع کر دتاہے۔ چِھک کے دھرّک مار کے لتھا ہے۔ ایس آکھیا، ''نواب صاحب خان! میں اوہ نارنگ ساہی ہاں، جیہدے دو بھرا کُٹھے ہوئے نی۔ اج دے کے جا ۔'' ایس ماری ہے چُنگ کدھ تے آ بیٹھا ہے۔ یقین ہاس گھوڑا چھڈ کے نہیں ویندا۔ ایس تلوار ماری ہے نِسار اُچی ہائی نواب صاحب خان ہیٹھ ہو گیا۔ کُوکاں وگ گئیاں۔ حال حال پے گئی۔ تھینہہ دا مُڈھ ہا۔ آدم نِکلن لگ پیا ہے۔ ویکھن ایدوں آدوں لگ پیا ہے۔ ست تلواریں ایس ماریاں ہین ستے نِسار تے لگیاں ہین۔ ایہہ پیاجاندا ہے اوہنوں پئیاں لگدیاں ہن۔ اِتنے تائیں آدم نیڑے آ گیا ہے۔ ایس چُنگ چائی ہے تے گھوڑے تے بہہ رہیا ہے۔ ارمان اگے نالوں ودھ گیا تے دھروڑ گیا۔ جتھوں تائیں سانگے ہان نواب صاحب خان دے پرچاونی کان آئے۔ اوہناں صلاح دِتی اِنج ویسرا ہو کے ہُن نہ نِکلیں ایس بندے تیتھے مُڑ آونا ہئی۔ اوہ باہر نِکلے تاں فوج نال ہووے۔ ڈیرے دے وچوں دو کدھی گلی چھِکوائی ہیس۔ صاحباں آلی مسیت نوں آئی تے اوتھے حوض ٹُوٹیاں لوائیاں تے باہر نِکلنا چھڈ دتا۔

چنھاویں ایس گل دی کُٹ پے گئی ہائی تے راوی تے پتہ کسے نوں نہ۔ ایہہ پیا رہے۔ ماں پُچھوس: پُترا! گھوڑا کدی نیہوں ٹوریا؟ اکھے، ''اگلے دیہاڑے ڈھاہیا ہیس۔ ہاں چ پیڑ ہے۔'' اوہ نِمانی کاڑھے ماڑھے بنوا کے لَے آوے۔ ایہہ نظر بچا کے وِیٹ چھڈے۔ ماں پُچھوس تاں آکھے کسر ہے۔ ڈھیر دیہاڑے جال گیا بھئی گل کجھ وِسر لے۔ ڈھیرناں دیہاڑیاں دے بعد چڑھیا ہے۔ اوہو توبرا کول ہیس۔ کھیوے آیا ہے۔ پُچھیا ہیس، ''نواب صاحب خان؟'' اوہناں آکھیا، ''ایس ویلے ڈیرے تے بیٹھا ہے۔'' کچہریاں سدِیندیاں ہان اوہناں دیاں۔ ''کچہری لائی بیٹھا ہے۔'' دروازے نو ہوئن کھیوے دے۔ دروازیوں وڑ پیا ہے۔ جیس ویلے اگانہہ آیا ہے تاں پُچھیا ہیس، ''نواب صاحب خان؟'' اکھے، ''نھاون گیا ہے۔'' ''کِدے؟'' اکھے، ''ایس دو کدھی گلی وِچ۔'' اودائیں ٹُر پیا ہے۔ بندیاں پچھے آکھیا ہے۔ ''دینہہ دِیریں ایس موہل کیوں ماری ہوئی ہے؟'' کِنھاں آکھیا، ''بھین دے بھراؤ! ایہہ گھوڑا تاں اوہو نہیں جیہڑا اوس دیہاڑے نارنگ ساہی دے ہیٹھ ہا۔'' بندے اُٹھی کھلوتے۔ اُتنے تائیں ایہہ پُہنچ گیا ہے۔ نواب صاحب خان دہی سِر تے وگا کے ٹُوٹی کھولیندا پیا ہے کہ بُوہویوں ایہہ وڑ پیا ہے۔ ایس گھوڑے توں دھرک چاں ماریا۔ ''صاحب خان جیویں ہوونا ہئی ہو لامیں آ گیاں۔''

لکھی بھٹی تکیا ہے شہادت لک نوں، چشمیں دِید رلا کے
لکھی آہدا ہے: شہادت میں دیواں نِت نِت پاسنے، ہک تیری چاہ تے
لک دی سار دی کوٹھی ہے، نیہسوں رکھیا قدم بھنوا کے
لکھی عنایت دے دی سانگ ہے کائی،آندی اُستاد بنا کے
اوہدا چھڑ تاں بانس بریلی ہے، پھُمن لٹکے چڑھ ہوا تے
اوس ماری ہے شہادت لک نوں، اوہ لگھی ہے پنجر کھا کے
جیویں گنگا نھاتی ہے باہمنی، رام جپدی ہے نھا کے
یاں بیگم نِکلی ہے شیش محل چوں، سجّا سِیس گُندا کے
اوہ ٹاہ ٹاہ کر کے ہسی ہے، جد لیا ہیس کونت مرا کے
اوس دیہاڑے لکھی، عنایت دے بھرا وٹیا ہے،
پر تول کنڈے دے بھاء تے

والاں چوں نپ کے ایس تلوار چِھکی، سِر وڈھ لیا ہیس۔ سِر وڈھ کے گھوڑے تے چڑھ گیا ہے۔ اگوں پچھوں آدم۔ گھوڑا نچن لگ پیاہے، اِتنا موقعیا نہیں کہ توبرے چ سِر سٹ لوے۔ ہِک ہتھ چ سِر ہے ہک ہتھ چ تلوار ہے۔ گھوڑا پٹاں چ ہے۔ دروازے آلوں کدھ اُسر گئی ہے تلوار دی تے مگروں وی۔ گھوڑا نچن لگ پیا۔ ایہو کجھ آکھے، ''بچو حوصلہ۔'' جیس ویلے دروازے دے کول آیا ہے تاں اگوں ڈانگاں اُلریاں ہن۔ گھوڑے نوں ایس لت ماری ہے۔ ''کیہ سُورا تینوں اج دے دیہاڑے کان سانبھیاہا۔ '' گھوڑے ہاٹھ دے وچوں چُنگ چائی ہے تے دروازیوں باہر جا لتھا ہے۔

جِتنے تائیں چنھاں دی حد رہی ہے، سِر کھرل دے ہتھ چ رہیا ہے۔ اج ہر کوئی ویکھ لَے۔ جیس ویلے راوی دا لڑ چڑھیا ہے تاں سِر توبرے چ سٹ لیا ہے۔ دِ ل ٹھڈھا ہے۔ خوش ہے۔ پہلا کُھوہ دانا باد دا آیا ہے اوتھے لتھا ہے، پہلے خون دے دھبے دھوتِن۔ پٹ، پٹھے گھوڑے دے مَلّے ہن۔ مُونہہ چ پانی جھگایا ہے۔ اپنے اُتے جیہڑے دھبے خون دے ہان اوہ دھوتِن۔ تنگ ڈِھلڑا کیتا ہے۔ ساہ کڈھیا ہے۔ اگے دوپہریں گھر جا وڑدا ہا۔ دینہہ اوس دیہاڑے ڈھل گیاہے۔ دُور توں تکیا ہیس تاں ماں چُبارے تے کھلی ہیس۔ جِدے پُتر نوں نِکلدا ڈِٹھا ہاس اودائیں مُونہہ ہیس۔ ''میرے اللہ! امان میری تیرے حوالے، اگے دی مُٹھی ہوئی ہاں خیر کریں۔'' نارنگ اودوں تکیا ہے ماں آلوں تاںہنجوں ویہہ آئیاں ہیس۔ نارنگ ہور تاں تیری خبر لین آلا ہے کوئی نہ اوہ تاں نِمانی کھلی ہے۔ جیہڑا کجھ ہوندا ہیس۔ خیال آیا ہیس اچانک ماں نوں دساں تاں متاں اوہدا ہارٹ فیل ہو جائے۔ بُڈھی عورت ہے دُکھاں دی ماری ہوئی ہے۔ دِل اپنے نوں ترکڑیاں کریندا گھوڑے توں لتھا ہے۔ اوہ وی لہہ آئی ہے۔ گھوڑے نوں کائی شے گھتی ہے۔ کاٹھی لاہی ہے۔ توبرا ٹنگیا ہے۔ اگاڑیاں پچھاڑیاں لا کے ہتھ مُونہہ دھوتا ہیس۔ آن بیٹھا ہے۔ ماں آکھیا ہیس، ''روٹی لے آواں؟'' اکھے، ''جی۔'' اکھے، ''نارنگ۔'' ''جی۔'' ''اج توں مینوں بہوں پیارا پیا لگنائیں۔ کیہ وجہ ہے؟'' اکھے، ''پُتر جوں ہویوم تیرا۔'' ''پُتر تاں اگے وی ہائیں؟'' اکھے، ''آکھیں تاں میں تینوں حُقا بھکھا دیواں؟'' اکھے، ''اماں میں اگے کدی تیتھوں بھکھوایا ہے؟'' اکھے، ''میرا جوں دِل ہے۔'' نارنگ نوں گوت آوندا ہے بھئی ایس غریب دیاں آندراں ٹھر گئیاں ہن۔ چلو اوس آکھیا، ''بھکھا۔'' اگ چاں بالی ہے۔ اکھے، ''تماکُو لَے آ۔'' اوس آکھیا، ''ایس توبرے دے وچ میں تماکُو چنگا آندا ہے ایس چوں گھت۔'' جوں اوس ہتھ ماریا ہے تاں سِر بندے دا۔ اوس آکھیا، ''ہائے ہائے نارنگ! ایہہ تاں سِر ہے بندے دا۔'' اوس آکھیا، ''اماں! سیہان متاں صاحب خان ماہنی دا نہ ہووے۔'' اوس آکھیا، ''بچڑا ! میں تاں ایڈی کرماں آلی ہاں ای نہیں بھئی صاحب خان ماہنی دا سِر ایتھے ویکھاں۔ '' اوس آکھیا، ''حرام دا میں وی نہیں، توہیں میرے مگر دو کوہائے ہوئے ہین۔ پَکَا تے ویکھ۔'' جوں اوس والاں چوں نپ کے سِر چایا ہے:

صُورت ڈھول دی سانوں کدی نہ بھُلسی
ساڈا رُوح سیلانی ہے بُت گلیاں وچ رُلسی
سانوں پتہ نہ غیب دا ہے، بھلکے واء کیہڑی گُھلسی

سِر پھدھ کے ماریا ہے تے کدھ تے جا لگا ہے تے سوانی حال حال چاں گھتی ہے، ''اماں ایہہ کیہ بیڑا چاں بوڑیاہئی؟'' اوس آکھیا، ''چُپ کر میرے گل ڈھول کوئی نہیں۔ ایڈی خوشی میں پچا سگنی آں۔'' آدم اکٹھا ہو گیا۔ ''بھیڑیا! کیوں ماریا ہئی ماں نوں؟'' اوس آکھیا، ''میرا خانہ کعبہ ہویا۔ اِنجیں منڈی کھلی ہے حال حال۔۔میرا دماغ خراب ہے۔ میں تاں کُجھ نہیں آکھیا۔'' ''بُڈھڑیے کیہ ہئی؟'' اوس آکھیا، ''اج میرا دیہاڑا لاہ چھڈیا ہیس تے ایہہ صاحب دا سِر ہے۔'' ڈھول چاں اوہناں مارے۔ جیہناں پگ لئی ہوئی ہائی اوہناں اپنے ہتھیں دے چھڈی۔ ''نارنگ! آپت اِچ تلوار نہ گھتیے۔ اگے جوں تُسیں سردار ہائے۔ ایہہ پگ۔''

ہُن ہر شے ایہدے مگر ہووے۔ نارنگ چڑھے، کوئی بندہ جھل جاوس کھیوے دا۔ ''کتِھے ہئی گھر؟'' ''کھیوے۔'' ''ہُن ہُن آ بیٹھے او؟'' ''نہیں جدّی ہاں۔'' مارے تلوار ، سِر وڈھیندا تے نِکل جاوے۔ مینوں ہک کھیوے دے بندے دسیا ہا: کھیوے دے اُبھردے آلے کھوہ ڈلاں ہو گئے ہان۔ کوئی پراہنا آونے ہاں تاں آکھدے ہان، ایدے نہ نکلیں اوہدا ویلا کویلا کوئی نیہوں۔ ہوّا بن گیا۔ بندے مارن لگ پیا۔ ماں میلا چاں کیتا ہیس بس کر۔ ''توں جوں مری جاسیں، میں کِدے جاساں؟'' خلقت آئی بیٹھی ہے۔ ''میلا آئے بیٹھے ہاں۔ ایہہ بھیناں تے ایہہ پھُپھیاں۔ '' نارنگ آکھیا، ''کھرلاں او! تُسیں آہدے او اوہناں تیرے دو کُٹھے ہوئن تے توہیں اِتنے مارے ہین۔ میرے اوہناں کُٹھے ہوئے ہین بچے ، مسافر، ماں میری پیراں تے ڈھاہندی ہائی تے اوہ پیر چھنڈیندا ہا۔ بھری کچہری وچوں کسے نہ آکھیا، ظلم نہ کر۔ میرے ہین ایہہ سارے قاتل۔ ماں نوں میں آکھیا ہویا ہے شادی میںنہیں کرنی۔ میں مرنا ہے کھیوے دے راہ تے ـ۔ میرا ارمان لگا نیں تاں مینوں دھاڑ چاں دیو گل مُک جاسی۔ نہیں تاں میں اوس دیہاڑے کھلوونا ہے، جیس دیہاڑے ماہنی دی قوم کھیوے وچ نہیں لبھنا۔ ہک بندہ ہاں میتھوں ایہو کجھ ہوندا ہے۔'' آہدِن: ماواں پُتراں نوں آکھیا ہے بتری دھاراں تد ماف کرنیاں ہن جے نارنگ دی دھڑ کرو۔ نارنگ نوں کھرلاں آکھیا ہے: نارنگ! آئے تاں ہاسے تینوں کھلارن، پر ایہہ بلا ہُن ساڈے گل پے گئی ہے۔ اُٹھیؤ دھاڑدیو۔ کھرل دھا گئے۔ کھیوے دس پے گئی۔ اگے تاں آوندا ہا، ہکارا چوری۔ ماہنی وی نِکل آئے۔ لڑائی پے گئی۔ کھرل چل پئے۔ نارنگ وی دھروڑ گیا۔

نارنگ جا کے اکٹھ کیتا ہے دانا باد وِچ۔ ''پگڑی میری وی سٹ آئے ہو تے اپنیاں وی۔ کیتی کرتیائی میری وی تباہ ہو گئی۔ دھاڑ دیؤ جیویں میں آکھاں۔'' اکھے، ''کیویں؟'' اکھے، ''ایہہ گھوڑے ہوون تاں اسانوں گھر لَے آوندِن۔ سڈّھیاں تے چڑھ کے جاویے۔ یقین ہو سی اسانوں گھر تاں نہیں اپڑیندے۔ اسیں وی بندیاں وانگوں لڑسائیں کیوںجوں سڈّھے وی چار تلواریں جھل کے ہک قدم پٹنا ہے۔ '' آہدِن: نارنگ راوی دی ڈیگ دی من اُتے بھج پیا ہے۔ جتنی راوی ہے کاٹھیے، ڈب ، سنپال، ویہنی وال، وٹو، وسیر، بگھیلے، پیرو کے، چرہیڑے، کُل کھرل قوم دھڑ چاں کیتی ہے نیں دی۔ کٹک چاڑھے سُوں پر بڑے۔ آ کے لڑن لگ پین۔ اوس دیہاڑے نو دروازے ہان کھیوے دے۔ نواں نوں پھُوک کے اگ چاں لائی ہیس۔ مسیت سڑی ہوئی میں وی ڈِٹھی ہے۔ ایہہ مُڑ آ کے مہاجراں چھتّی ہے۔ اج تائیں ماہنی دی قوم کھِیوے چ کائی نہیں۔ نارنگ آکھیا، ''جیہڑا ماچھیاں دے گھر وڑ جاوے مت جھاتی گھتو بھاویں ماہنی ای کیوں نہ ہووے۔ اوہ مچھانی مینوں ماں توں گھٹ کائی نہیں۔''


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels