Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> پروفیسر سعید بُھٹا >> کمال کہانی >> چودھری بہاب للیرا

چودھری بہاب للیرا

سعید بُھٹا
May 20th, 2008

    موہلا، قادر بخش دا بھٹی ہویا ہے کوٹ موہلے دے۔ راء موہلے ماملا دیونا ہا۔ زمانہ ایسا ہویا ہے بھُکھ دا، ماملا لبھے نہیں۔ سِکھ، سپاہی بھیجے۔ اوس زمانے جھنگ دا گورنر ہویا ہے مُولراج۔ ایہناں ٹھیکہ لیا ہویا رنجیت سنگھ توں بڑانے کولوں لگ کے بھکر، منکیرے تائیں، مُلتان وی وِچے۔ زمانہ رنجیت سنگھ دا ہا۔ سِکھ سپاہی بھیجن۔ ایہہ اوہناں نوں روپیہ دو دے کے ٹال مٹول۔ بد رُکی جیویں ایہہ گرداور ہوندِن، اوتھوں سِکھ بھیجیا بھئی موہلے توں ماملا لَے آ۔ سِکھ آ کے ڈیرے تے کھلا۔ ہزار ہزار گاہل کڈھے موہلے نوں۔ کِدے گیا موہلا؟ سوانی ہِک پانی بھرن لگھی ویندی ہائی۔ اوس آکھیا، ''سردار جی! ہک گل میری سُن۔ ایہہ موہلا مریلا سدِیندا ہئی۔ ہئی اوہ ایتھائیں تے اوہنوں مُونہہ تے گاہل نہ کڈھیں۔'' ایس آکھیا، ''میں اوہدے مونہہ تے کڈھاں گا۔'' اوس آکھیا، ''تُوں اوہدے مُونہہ تے گاہل چاں کڈھ۔ میں تیرے مونہہ اِچ کھنڈ گھتیساں۔'' اوہ گھڑی بھرن اگانہہ لگی گئی۔
راء موہلے نوں کسے دسیا بدرُکی سپاہی آیا کھلا ہئی ڈیرے تے۔ اوس گہنے تے بوٹے ماچھی نوں آکھیا، ''ایتھوں منجی وی کائی چایو تے گھڑی پانی دی وی تے اوتھائیں جا بہیے۔'' یاں راء موہلا ڈیرے نوں وڑیا ہے۔ سِکھ آکھیا ہے، ''موہلا ہیں تُوں؟'' اکھے، ''جی ہا۔'' اوس کاڑ گاہل کڈھی۔ ''ماملا توں نہیں دیندا۔'' موہلے ماچھیاں نوں آکھیا، ''کیوں کھلے ہو۔ مارو دِھی چود نوں۔'' تلواریں شپ شپ کرن لگ پئیاں۔ سِکھ اوہناں ڈھاہ لیا۔ سوانی پانی بھر کے آوندی پئی ہائی۔ اوس آکھیا، ''دایا! ہک واری سِر نہ وڈھیں۔'' اوہدے مونہہ اِچ اوس بُک مٹی دا وگایا ہے۔ موہلے آکھیا، ''ایہہ کیہ کیتا ہئی؟'' ''ایہدے نال میرا وعدہ ہا۔ میں آکھیا ہا موہلے نوں مونہہ تے گاہل نہ کڈھیں۔ جے کڈھیائی تاں تیرے مونہہ چ کھنڈ گھتساں۔ کھنڈ میرے کول کائی ناہی۔'' سِکھ مری گیا۔ سِکھ چڑھائی کرن لگ پئے۔ کوٹ موہلے دا خالی ہو گیا۔ موہلا وی نس گیا۔ دُوئی خلقت وی نس گئی۔ سِکھ آوِن، پھیرے مرین، شے لبھے کائی نہ۔

    مُولراج مجھیں دا بہُت شوقین ہا۔ جیہڑیاں مجھیں دا منگُو ہے نا سعی کے ہرلاں کول، ایہہ مُولراج دا ہے۔ اج وی اوہدے وچوں کٹّا نہیں دیندے۔ جیس ویلے مُولراج نوں انگریزاں قید کیتا ہے نا تاں منگُو اوہدا اِنج ٹُردا رہیا ہے۔ سعی کھلا ہا، بھرا نوں اوس آکھیا ہے، ''مجھیں ول۔'' اوس آکھیا، ''ایہہ مُولراج دیاں ہین۔ لہو دِیاں نھاتیاں ہوئیاں ہین۔'' اوس آکھیا، ''ستارھاں پیڑھیاں اساڈیاں اگے وی مجھیں دے مگر موئیاں ہین۔ دو اسیں مر گیا سے تاں حد ہو جاسی۔'' مگروں سائیں کوئی نہ بنیا۔ میراثیاں آکھیا ہویا ہے ایہہ عرشوں لتھیاںہانیں۔ عرشوں اِنجیں لتھیاں ہان جیویں میں عرض کیتا ہے۔

مُولراج مجھیں دا شوقین ہا۔ جتھے چنگی مجھ سُنی سُوں جیویں لینی پئی سُوں، لئی ہے۔ اوہنوں دس پئی چودھری بہاب للیرے کول مجھ ہے رتی کیل۔ چگھاراں آلی سدیندن۔ ایس حُلیے دی ہے۔ اِنج مجھ ہے۔ مجھ کھا گئی اوس نوں شکل سُن کے۔ اوہ بندے گھلن لگ پیا، ''مجھ دے چاں۔ گھوڑِیاں لئیں تاں دیناں ہاں۔ مجھیں لئیں تاں دیناں ہاں۔ بھوئیں لئیں تاں دیناں ہاں۔'' ایہہ ہور وٹاویاں مجھیں اوس شکل دیاں گھلے۔ اوہ واپس کر گھلے۔ ایہہ اوہ نہیں۔ حالاں کہ ڈِٹھی ہوئی کائی ناہس۔ نقش اوس اِنج پکائے ہوئے ہان۔ بہاب آکھیا، ''میں کوئی نہیں دیونی۔'' اوس جباب چاں دتا۔
ایہہ گل راء موہلے تے پہنچی۔ موہلے خیال کیتا بھئی پیو میرے دا بیلی ہا بہاب۔ جے ایہہ مجھ چاں دیوے شاید میں بچ جاواں۔ ماملا اگے دیونا ہاس۔ حکومت دا بندہ مارلیوس۔ نٹھا ہویا جوں ہا گھوڑی تے چڑھیا ہے۔ سوتے ٹِبّی للیریاں دی آیا ہے۔ پُچھیا: چودھری بہاب؟ اوہناں آکھیا، ''دوآہنے دے وچ مجھیں بہائی بیٹھا ہے۔ '' چن نوں چودھویں ہوئی ہے۔ راء موہلا اودائیں ٹُر پیا ہے۔ اولی من تے کھلو کے سد ماریس بھئی جے ہے تاں اگانہہ ٹھِل جاواں نہیں تاں ایویں پدّھ نہ کراں۔ ''چودھری بہاب ہیں؟'' پہلے سد تے چودھری بہاب آکھیا ہے، ''کیہ کڑمیا! اگانہہ نہ آویں۔'' موہلے دے ہتھوں پیروں چھُٹ گیا۔ آہدن: مصیبت دے ویلے سجن چھوڑ ویندِن ایہہ حق ناہس۔ اگانہہ نہ آویں۔ ایہہ گل سُن بیٹھا ہے میری جیہڑا اگانہہ آون نہیں پیا دیندا۔ میرا کم کیہا کرنا سوں۔ موہلا اوتھائیں سِیپ گیا تے کھلو رہیا۔ انجیں دل اِچ غم۔ تاں جوں پیلی منی توں دھرک ماریا بندے کِسے۔ موہلا کھلو رہیا بھئی کوئی اگانہہ دا آؤ ہے چڑھائی لے جاواں۔ گل بھوں کیتیاں توڑا طبیعت ول ہو جاسی۔ لحظہ ہک ہویا اوہ بندہ چڑھ آیا۔ ڈٹھا ہے تاں چودھری بہاب ہے۔ کوری دودھ دی سِر تے ہے، اُتے من رکھیا ہویا ہے۔ ''موہلا ایں؟'' اکھے، ''ہا۔'' اکھے، ''ایہلا کھا۔'' اوس آکھیا، ''کم میرے دا پتہ ہئی؟'' اکھے، ''نہیں۔'' ''تینوں کاہیں دسیا ہے میں کھادھی ہوئی نہیں۔'' اوس آکھیا، ''توں ہیں جم دا کڑماـ۔ توہیں کوئی پاڑن کیتا ہوونا ہے نہیں تاں ادھی راتیں مینوں بیلے چوں کیوں اُٹھاونا ہائیا تے میتھے ہان پراہنے۔ میں آکھیا سُن ون نہ ہووے۔ ایہہ کوئی گند کر کے آیا ہے۔ اودائیں ڈکاؤس۔ چھوہر میرے اگے روٹی رکھی ہے۔ میں خیال کیتا ہے بھئی جیہڑے مُصیبتاں اِچ بندے آوندن نا، ایہناں نوں روٹی کوئی نہیں کھویندا۔ کم آکھیا۔ اوہناں ولدا دے چھڈیا۔ اگانہہ ٹُردا رہیا۔'' راء موہلے آکھیا، ''کھادھی ہوئی وی کائی نہیں تے کھواہیں تاں کھاونی ہے۔'' اوس آکھیا، ''کیہ گل ہے؟'' موہلے دسیا: انج انج سِکھ آیا ہے۔ اوس گاہل کڈھی ہے۔ میں مرا گھتیا ہے۔ کوٹ موہلے دا خالی ہے۔ پیسے اگے دیونے ہان حکومت دے اُتوں بندہ مری گیا ہے۔ میں تیرا کم کیتا ہویا کوئی نہیں۔ پیو میرے دا بیلی ہاؤں۔ اوسے دی قبر چاں ویکھ۔ ایہہ مجھ مینوں دیویں تاں شاید میں بچ جاواں۔'' اوس آکھیا، ''موہلیا! پتہ ہئی اوس مینوں زمین آکھی ہے۔ مجھیں آکھیَن۔ گھوڑیاں، سونا، چاندی۔ میں دِتی ہے؟'' اکھے، ''نہیں۔ '' اکھے، ''مجھ مڈھوں ہُن قیمت تے آئی ہے بھئی ترکڑ دے اُتے ہک لاہمے موہلا، قادر بخش دا ہے۔ ہک لاہمے رتی کیل مجھ ہے۔ موہلیا! جے انکار کراں تاں تیرے پیو دی قبر نوں پاڑ دیونا ہویا۔ ایہہ تاں ہک مجھ ہوئی۔ مینوں پُتر وی تیرے اُتوں کو ہاونے پوِن نا تاں میں ایس توں یالا نہ کراں۔ ایہو کم۔'' اکھے، ''ہا۔'' اکھے ، '' ہُن اگانہہ ٹُر آ۔'' پار ٹپ گئے۔ گلاں باتاں ہوندیاں رہیاں جیس ایلے پچھلی رات ہوئی نا، مجھیں چھیڑن لگے تاں پُتراں نوں بہاب سد کے آکھیا ہے: رتی کیل مجھ ہے نا جیہڑی ایہہ بگھے اِچ ونگ کے لگے جویائے۔ ایہہ نہ نال لے جویائے۔ پچھلی راتیں اوہناں مجھیں چھیڑ لئیاں۔

فجر چودھری بہاب اُٹھیا ہے اوس مجھ نھوائی ہے۔ گانیاں پائیاں ہن۔ مکھن نال ماکھی ہے۔ مجھ تاں اگے بہوں سوہنی ہائی۔ تصویر چھپ گئی۔ مجھ بہاب چِک لئی ہے۔ راء موہلا گھوڑی تے چڑھ بیٹھا ہے۔ ککو دی ماں ہوئی ہے جھنگ، دریا دے لہندیوں، دریا دے کنارے دے اُتے۔ اِتنا پیار مجھیں دا ہویا ہے جوں کچہری اوتھے بنائی ہوئی ہاس جوں مجھیں میری نظر ہیٹھ رہن۔ اگانہہ آئے ہین تاں سینکڑے مجھیں کھلیاں ہین۔ کُنّو پٹھیاں دے لگن پئے۔ ایہناں آ کے مجھ چھڈ دتی۔ پُچھیا ہے، ''مُولراج؟'' اوہناں آکھیا، ''نھاون لگھ گیا ہے۔'' نھا کے ہٹنا مجھیں نوں ہتھ پھیر کے کچہری لاونی۔ بہاب آکھیا، ''راء موہلیا! مجھ ہے دِپ گئی۔ ہُن تینوں چھوڑے یاں نہ چھوڑے۔ ہُن مجھ سانوں کوئی نہیں دیندا۔ توں اوڈِھر ہو جا۔ جے گل جھل لئیوس تاں حاضر ہو جاویں۔ نہ جھلیوس تاں دھروڑ جاویں۔'' راء موہلا اوڈِھر ہو کے بہہ رہیا۔ مُولراج نکلیا ہے نھا کے۔ چیرا موڈھے تے ہے۔ گلوں ننگا ہے۔ وال چوندے آوندِن۔ جوں مجھیں دے وچ آیا ہے تاں تکیا ہیس تاں ''ہائیں! چودھری بہاب آلی مہیں کاہیں لیاندی ہے۔'' چودھری بہاب اُٹھیا ہے۔ اوس آکھیا، ''جی میں آندی ہے۔'' اوس آکھیا، ''چودھری بہاب ہیں؟'' اکھے ''جی ہاں۔'' اکھے، ''تینوں کوئی گَرجھ پئی ہوونی ہے۔'' ''نہیں جی۔'' اکھے،''گَرجھ توں سوا توں نہیں ڈِگدا۔ میں تینوں مہیں آکھیاں۔ زمین آکھی۔ ہور چیجاں تے توں نہیں سی دتی۔ جواب دے دتا۔ ہُن توڑ لے آیا ہیں۔ کم کراں گا توں گل کر۔'' اوس آکھیا، ''جی اوہ موہلا، قادربخش دا۔'' مُولراج آکھیا، ''آہا۔ پاپی موہلا۔ فسادی موہلا۔ بڑا بُرا آدمی ہے۔ ہر صُبح نوں اوہدے خلاف میرے کول تن چار پرچے آوندِن۔ نہ آپ وسدا ہے نہ چنھاں وسن دیندا ہے۔ اوس سِکھ ماریا ہے میرا۔'' اکھے، ''جی کوئی نیہسوں۔'' موُلراج آکھیا' ''نہیں' نہیں سِنگھنیاں سُونوں نہیں کھلو رہیاں۔ ہور جالین گیاں۔ اگر اوہ سنگھ نہ ماردا مہیں کاہیں دینی سی؟'' اِتن نوں موہلے آن کے سلام دتا۔ ''موہلا ہیں؟'' اکھے، ''جی آں۔'' مُولراج آکھیا، ''میں تیرے نال اوہ کراں ہا، دُنیا تکے ہا، پر ایس مہیں دا مینوں بڑا شوق سی۔ اگر توں سِکھ نہ ماردا مہیں کاہیں دیونی سی۔'' بولیا ہے موہلا۔ اوس آکھیا، ''تہانوں مجھیں دا بڑا شوق ہے۔'' مولراج آکھیا، ''مینوں کیہ شوق سی۔ شوق سی میری ماں بیچاری نوں۔ مر چلی ہے۔ جیس وقت مجھیں اساڈیاں چِھڑن ہا۔ اپنے بھوچھن نال چھنڈدی سی تے چھنڈدی چلی جاندی سی دریا دے کنارے تک۔ بہاب آکھیا، ''پیاریاں تاں اساڈِیاں نوں وی ہین، پر اِنج دریا آل بُوٹاک اچ نہیں نِکلدیاں۔ چھیڑو اِنجیں ہٹن ای نہیں دیندے۔''مولراج کُدیا۔ اوس آکھیا، ''گاہلاں کڈھن ڈیہا ہیں۔'' موہلے آکھیا ''نہیں جی اپنی غریبی پیا جنیندا ہے۔ چنگا سلام ہے۔'' جیس ویلے راہ دے وچ آئے موہلے آکھیا، ''چاچا ایہہ کیہ کیتوئی؟'' اوس آکھیا، ''اِنجیں مجھ لے جاوے ہا۔ ہاں دی پیڑ اساں وی کڈھ چھوڑی ہے۔''


Share |


 

Depacco.com


 

 

Visitors Comments

Name:Faisal Nalera
Date:4th March

Comment: Excellent work of Prof. Saeed Bhutta on our punjabi culture, history, civilization, bravery and truth of our grandfather and ancient village Tibbi Nalera.


Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels